Showing posts with label Zomi Version. Show all posts
Showing posts with label Zomi Version. Show all posts

BSM- IN REV. DR. KAM KHAW THANG PAHTAWINA PIA:

Zomi (Tedim kampau) te' ading Laisiang Tho Mikang lai (English) pan Zolai /Zokam tawh hong teisak /bawlsak masapen Rev. Dr. Kam Khaw Thang (Tedim Bible Translator) pen Kawlgambup Lai Siangtho Khen Kipawlna (Bible Society of Myanmar-BSM) in December 16,2016 ni-in " Tedim Lai Siangtho bawlkhia Pahtawina " piakhia uh cih kiza hi.
Rev. Dr. Kam Khaw Thang in a beisa 1982 kumin Mikang lai (English) pan Tedim pau /kam tawh amasapen hong bawlsak hi. Tu hun LST version tuamtuam a kibawl ngeingai hangin, tuni dong mah mipite' deih pen Lai Siangtho suak hi. Rev. Thang (Translator) pu zong Pasian mahin khansauna thupha hong piak sak lai ta hen.
Tua banah Pahtawi huaite pahtawina dingin a vaihawmpi pen khat ahi Rev. Khoi Lam Thang (General Secretary of BSM) zong hih mun pan zahtakna leh pahtaakna i piak kawm in, i biak Pasian in hong thupha thuap hong piaksak in, hong zatsak semsem tahen cih ih thu-ngetna ahi hi.



Khamtung Zogam ah American Adventist missionary a hi Pi Lois Anderson

Khamtung Zogam ah American Adventist missionary a hi Pi Lois Anderson in December 19, 2016 zingsang nai 5 in a om na CA pan hong nusia ta hi. A pasal in nungkum in hong nusia hi.

(First American Adventist Missionary Lois Anderson passed away this morning. Pr Anderson passed away last year).

KALAYMYO KHUAPI TANGTHU TOMNO:

A. Kalaymyo Khua kilam zia:
Kalaymyo min masa pen " Karlaymyo" khuaveng, khuali in umcih( Kar) cih pan kipan ahi hi. Kalaymyo pen Sagaing huam sunga om khuapi lian khat hi a, Gamgi khua lian Tamu tawh tai 103 bek ki gamla in, Tedim khuapi tawh tai 43 bek ki gamla hi. Kalay khazai( district) khuapi pen Kalaymyo mah hipah hi.India leh Myanmar ading gamgi khuapi poimawh mah mah khat ahih ban ah Kawlgam sunga a khangto pen khuapite lak ah khat ahi hi. Kalaymyo a om masa leh aluah masa pen Shante kici hi.
B. Kalaymyo Khua hun:
Kalaymyo pen a lumpen hun March pan May kikal pen 100-112'F( 38-44'C) in ki ciamteh a, a votpen hun December-February 50-70'F( 12-21'C) in kiciam teh hi. Kum khat sung atangpi khuahun a ki-et ciangin 79'F(26'C) dan in kituat hi. Kum khat guah zukna atangpi in a ki-et kik ciangin 66.77 inchs( 172.1 cm) in ki ciamteh hi.

C. Milip omzah:
Kalaymyo pen milip tein li ( 400000) val pha a, Zomi/Chin- 55% , Bamar -35 leh adang 10% in ki ciamteh hi.
D. Nek leh Taak zonzia:
A diakin a khuapi kivaakna pen zanglo khawh hipha deuh a, setmuhzung (Kalay Industrial Estate) zong a kithei mah mah khat hi-in, Jeep, Tungbing (three wheeled motorcycles), a kipan atuam tuam bawl khia uh hi. Nisim/nitha nasep tawh a kivak zong a tam mah mah hi. Myanmar khuapi dangte mah bang kizopna mobile, internet a kipan a tuam tuamte noptak in kingah hi.
E. Ngeina leh Biakna:
Biakna din mun a ki-et ciang in, Buddhist- 50%, Christian-45% leh adang 5% in ki ciamteh a, Buddhist biakna inn(monasteries) 116, Christian biakinn(church) 508, Hindu temple -2, Muslim mosque -1 leh Sen(Chinese) ngeina biakna inn - 1 cih bang in om hi.
F. Lampi (kizop/kikawmna):
# Kalay-Tamu lampi pen Indiate makaih Border Road Organization in 1997 kumin bawl kipan a, 2001 kumin India Foreign Minister pa-in honna nei hi.
# Mandalay, Yangon tawh kizopna lampi nih om a, tuuk hun in Kalay- Gangaw-Monywa-Mandalay, khaal hunin Kalay-Myoma-Yarje-Monywa-Madalay lampite kitawn phadeuh hi
# Meileng( rail) station zong om a, Kalay- Gangaw pan in Myanmar khuapi tuam2 kizom in tung hi.
# Tuilam kikawmna (Inland water tranport) zong om a, Kalaymyo pan tai 15 bek gamlatna Kalaywa pan Myanmar khuapi tuam tuam kikawm thei hi.
# Vanlam kikawmna( air port) zong khua laizang ah om a, galpi nih- World War-II-1945 lai a Mikang kumpi in Vanleng bawh pak.nadinga a bawl a kizuun tosuak ahi hi. Vanlengtual pen pi (499 Ft) san na-ah omin, pi (295ft) zai-in leh pi (5502ft) sau hi.
Hoihna leh siatna a hon hon , a tat khopna khuapi zong ahi hi.(beh lap).
Ref: November Da Zos Hero, Wikepedia, 2014 census leh adang" via tongsan

Zomi Students' Federation (ZSF) In Chin State Chief Minister Kimuhpih

Imphal - November 22
Zomi Students' Federation (ZSF) General Head Quarter in tuni zingsang nai 9:00 in Classic Grande, Imphal Khuapi ah Chin State Chief Minister Salai Lian Luai leh a Minister 3 te kimupihna nei uh hi, cih thu kiza hi.
ZSF GHQ President K. Vanlallian Vaiphei in Zomi puan silhsak in, mailam ah unau kikal kilainatna, itnate akhan semsem nading thu gen hi. Chin state CM in zong Zosuan unaute mailamah lung kihualin mapan khawm zel ding cih alungulhna gen khia hi.
Chin state CM leh a Minister 3 banah Chief Secy, PSO leh Cameraman khat cihte Sangai Festival zang dingin November 20, 2016 ni Manipur State, Imphal khuapi ah a zin uh hi a, zingciang in Myanmar lam zuan kik ding uh hi.



A (2) Veina Zomi Numei Seminar

A (2) Veina Zomi Numei Seminar Yangon lawhcing.
Yagon- November 5 ni bup sung Tedim Baptist Church - Yangon, Social Hall ah thupi tak in kibawl thei hi.
Seminar tawh kisai in, "A (2) veina Zomi Numei seminar ah vai thupi tampi nusia in, sih le nat te nopna cih te paulap khat zong a nei vet lo numei vive 120 in pawllutna form la in at ngiat2 uh a, sun thaphai pikpek thu ngai in hall ( Social hall, TBC-Y) ah hong tut sitset uh ka muhtak ciangin Zomi Numei'te mailam pen sun nitaang hong bang ta ding hi cih khamuan ngeungau na khat ka nei hi!" ci in Sm Zen Dot Mang, Director, Zomi Numei ki pawlna Yangon in gen hi.
Seminar ah GZA Makaipi Rev. Dr. S. Pau Khan En, Zomi Numei MP, Pi Cing Ngaih Mang, ZCD, Zomi numei Sittni le Politician Pi Kan Kham Dim te kipan Zomi numei khangthak te in thugenna nei thei uh hi.
Abeisa kum in kibawl A (1) Veina Seminar ah thukigen te kaikhopna Laibu zong tuni mah in kihawm khia thei pah hi.
Ref and Photos Judih Niang, Zen Zen via Zingsol





Rev. Dr. Pu Kam Khaw Thang' Kammalte

Rev. Dr. Kam Khaw Thang' Kammalte:
• I mawhnate im lo ding, mi tawh thu i neih leh maizum seelna peuhin pang tentan loin thumbawl zaw ding, i mawhnate im loin pulak zaw ding.
• I zawh ngap lohte langbawl se loin om hithiat ding.
• Sum leh paai, annek tuidawnte ah thang gamtat lo ding.
• Kineih khem se lo ding, a zawng i hih leh i zawn'na im lo ding, a hai i hih leh i haina im lo ding, a zawngpi kihausak, a haipi kipilsak, cih bangte hoih lo hi.
• Mi gensia se lo ding, midang khat peuh thu i gen leh zong tua i gente pen i gen mite' zakin i gen ngam dingte bek gen ding.
• I siamlohnate ah a siam kineih selo ding.
• Kamciamna khat peuh i neih leh tangtungsak ding, i tangtungsak zawh loh dingte kamciamna nei vet lo ding.

• Mi simmawhbawl in neu ngaihsut selo ding, tuhun a, a neute nidang ciang a lian suak thei a, tuhun a, a liante nidang teh a neu suak thei zel hi. I simmawhbawlte i mai-et hun hong tun ciangin zumhuai mahmah hi.
• Innkuan sum zeekna ah ngeina kip nei ding, sumpi, sumkhol, zattawm ding a nam tuamtuam ciatin sehkhenin a ma sansanah a val in zatloh ding.
• Leiba nei dingin sum zang lo ding, i ngahna tawh kituakin zang bek ding.
• I tungsiahte langpanhuai lo hi. I paunak ah ''Lamsak leh pute kizo ngeilo'' na ci hi. I tungsiahte langpan lehang eima gimna hi lel hi.
• Zuau gen se lo ding, ahi bangbangin gen den ding, mi khat kiangah thu khat gen, a dang khat kiangah a tuampi khat in gen zel cihte pawl hoih lo hi. Lungsim nam nih nei selo ding cihna hi.
• Hun-awng omsak loin manlah den ding, na tampi septheih ding hanciam ding, a awng khong luate siatna tawh kizom thei hi.
• I hat laitak, i liat laitak, vang i neih laitakin midangte' na sak dingin gamta in na sem lo ding, a thuakte in a khantawnin mangngilh lo hi.
• Thulian khensat ding a om leh khensat pah loin hong kikum phot nung, ci-in a hun sotin limtakin ngaihsun ding.
• Midangte ngaihsutna zui-in na semin gamta lo ding, ei mahmah in man i sak bang bekin na sem ding, midangte' ngaihsutna zui-in i gamtat ciangin thu haksa khat hong om leh e'n siansak nading siamna nei lo i hih manin zumhuai hi.
• Ei leh ei kiphattawm selo ding, midangte phat dingin i om leh lungdamhuai hi. Ei leh ei kiphatna pen zumhuai mahmah hi.
• Khangno lai a siamna leh theihnate kip ahih manin khangno lai-in pilna leh siamna tampi i sin ding kisam hi. Khangham khit a sinte kimangngilh kik pahpah hi. Hih pen khangnote in a hun lai in a phawk ding thupi hi.
REV. DR. KAM KHAW THANG' TANGTHU TOM
• October 17, 1927 Tuithang ah suak (Pu Sim Tung Nung + Pi Ciin Za Dim)
• October 18, 1936
Apa in Khristian suahpih.
• May 18, 1972
Apa'n sihsan (kumkhat phakma a Nu si)
• June 1937 - March 1941
Tonzang ah Zolai tan 4 dong kah
• September 11, 1938
Rev. Vial Nang in tuiphum
• June 1941 - March 1942
Tedim Manglai sangah Tan 4 dong kah
• June 1945 - March 1947
Tedim Manglai sangah Tan 6 dong kah
• June 1947 - December 1950
Nelson Lai Siangtho sangah kah
• June 1952 - March 1956
Insein Lai Siangtho sangah kah
• June 1956 -December 1956
Hakha Lai Siangtho sangah sem
• May 4, 1957
Sister Niang' Khan Ciin tawh kiteeng.
• February 1957 - February 1960
TBA Secretary sem.
• 1960 - 1982
Tedim Lai Siangtho tei
• April 1984 - 2006
ZCLS laitei.
Theih ding: Hih a tunga Sia Thang' kammalte leh a tangthu tomno pen Rev. Job Thawngno gelh, ''Tedim Lai Siangtho hong bawlsak Rev. Dr. Kam Khaw Thang' Pianzia leh Sepzia'' cih laibu pan ahi hi. Adang tampitak om.
Sia Thang'zat kammal Jesu hilo Jesuh, Khris hilo Khrih, Khasiangtho hilo, Kha Siangtho, Laisiangtho hilo, Lai Siangtho, le hilo leh, Kam Khua Thang hilo, Kam Khaw Thang... cihte ama' zat ahihi.
by. Job Thawngno

A 10 veina Zomi Siamsin Kipawlna Seminar

The 10th Siamsin Seminar
Laitui village,Tedim Township,Chin State,Myanmar
Zomi Siamsin Kipawlna-Universities Myanmar in kum Khat sung a naseppi a aneihte ahi…Siamsin Medical Trip,Siamsin Seminar leh Siamsin Summit..etc. te lakah a Guk(6) veina Siamsin Medical Trip leh a Sagih(7) veina Siamsin Summit April khasung in kibawl khina,a Sawm(10) veina Siamsin Seminar pen hongtungding 15-21,November,2016 ni sung teng in “Learn more,Lead more,Teach more”cih thulupi tawh Laitui khuaah kibawl ding hi.
Zomi Siamsin Kipawlna-Universities Myanmar in sang khakhun sung ahi November khasung tain Tedim(2006), Kalay(2008), Tedim(2009),Tongzang(2010),Pyidawtha(2011),Tuithang(2012),Kalay(2013),Hakha(2014),Heilei(2015) khuate ah Seminar kibawl khin a,tua Laitui(2016) Seminar bawlzawh a Sawm(10) veina ahihi.
Siamsin Medical Trip pen Zato tawh kigamlatna,Lampi hamsatna cihte ah April kha sungta in kibawla Buanli(2011), Suanghoih(2012), Salzang(2013), Pimpih(2014), Langzang(2015) leh Guasing(2016) khuate ah kibawlkhin hi.
Siamsin Summit bawlna te Mandalay(2010),Yangon(2011),Kalay(2012),Hakha(2013),Pimpih(2014),Langzang(2015),Guasing(2016) khuate ah kibawl theihi.

Malaysia ah Zomi leh Chin UNHCR vai

Laigelh: Khen Za Muan Thang,Denmark
2001-2003 sung thupiang theih khakteng hipha-deuh.
(Late: 81.10..... Isaiah: 61.9)
Thupatna:
Ih Biak Pasian in 2001 kum a kipan, Zogam leh Kawlgam sang' nuntak khuasak na a nuamzawkna gam a hi, gam ( 3 ) na gam ih cihcih gamte ahhi. Norway. Canada. Denmark. New Zealand. USA. Australia. Sweden. Czech Republic leh Netherland ( Holland ) gamte a zuanding in, Kuala Lumpur-United Nations High Commissioner For Refugees ( UNHCR ) Malaysia pan in, Zomi te a honhon in gamthum na gam zuandingin hong ki pansak in, hongkuankhia sak hi. ( Tu'hun pen, Zomi pawlkhat te a ding in, kuan khiat hun maw, Antawk hun, cihkhat tawh hong kibang thei khading hi. )
Canaan gam a kialtung nate hang in, Jakob ta mi 10 te, Egypt gam a' antaw dingin ah vapaisuk uhteh, Egypt gampan Jakob Ta mi 10 te ahna dawntuah dingin, Pasian in Jakob tate sung a khat a hi, Josef pen, Egypt gam aa, ah nama tung kholsaktawh kibang kasahi. Pian: 45.5,b. Hih hun laitawh a kibang pianmah in, Zomi te zong' gam ( 3 ) na gamte a lomlom aa ihtun'theih na dingin, Kuala Lumpur-UNHCR phualpi pan, Zomi te hong na dawntuah dingin, ih Sanggam Laimi te Pasian in KL-UNHCR phualpi aa, ahna tungkhol saktawh hong kibang kik hi.
2001 kumma laipek a kipan' Sanggam Hakha lamte in, Luala Lumpur-UNHCR phualpi na luah khinta uhhi. Tua hunlai in, CNF makai khat a hi, Dr. Sui Kha in KL-UNHCR pua lampan, gambel ngennuam a om’ ah Mite lamlak in, UNHCR Office sung a, kamphen dingte a kipan, thu leh late donpih vanpih in lamlak pupi khat in na pang hi.
A sanggam te ahna dawntuah ding in, Egytp gam a Pasian in Josef ahna tunkholh masak bangmah in, ih Sanggam Laimi te in, KL-UNHCR phualpi sung a Zomi te ihlut theih na dingin, hong na dawntuah in hong na muak uh hi. Zomi te sung a Kuala Lumpur-UNHCR pualpi a nazuan masa, Sia Khuppi, Tamu Khua mi leh keimah Khen Muan, Tungzang Khua mite, hong na dawntuah uhhi. Gamthum na gamte tung in, Gambel/peemta suahthei na ding lamhong hialh in ( Case ) bawldan ding ahthu ahla cihte a kipan’honghialh in hong makaih uh hi. Phulun phul na ding leikha in a napetlet masak mah bangin, ei Zomi te'n KL-UNHCR Liaison Office sung ihlut theih na ding in, ih sanggam Chin or Laimi te pen, ih leikha zong kici theiding hi. Tua a hih man in, KL-UNHCR phualpi pansan aa, Zomi gamthum na gamzuan khempeuh te a dingin, CRC leh Sanggam Laimi tepen, eite mai a ahsia ahpha te aa, ah na kikham masate a hihna ihtelkhial lo ding thupi kasa hi.
( Ciimnuai a Sa kibak Geeltui a kithuk cih phawk ding hoih hi. )
KL-UNHCR Office sung aa kamphen ( Interpreter ) sem masa te:
2002 kum malamsiah KL-UNHCR phualpi sung a, kamphen in, Mi 2 bek kizang hi. Hakha pau leh Kawlpau tawh, Khen San in kamphen semhi. Zopau leh Kawlpau mah tawh Sia Khuppi-in kamphen hi. KL-UNHCR phualpi sung a, Kawlgam pan a pai, Rohingya a kici te lobuang kamphen ( Interpreter ) na’sep a sem masa pen tegel zong a hih pah hi.
Zopau tawh kamphen ( Interpreter ) sem masa te:
Sia Khuppi, Tamu Khua mi-in, 2001-2002 sungteng sem hi. 2003 kumbul lamciangh Sia Khuppi in Norway gam hong lensan khitteh, Pa Hang Za Pome, ( Pa Pome, Australia ) Khuasak Khua mi-in kamphen hongsem zom to hi. Tua zom in, kei gam thum na ka lenzawh teh, Pa, Pau Khek ( USA ) in kamphen hongsem to kik leuleu cih Denmark ka tun zawh teh ka za hi. ( hih hun lai in, Kawlgam mi te sung a kipawl na, organisation cihte limlim khat zong om nai lo hi )
CRC hong pian khiat na:
2002 kum sung in, ko UNHCR pan gam 3 na zuattheih na ding. ( register ) a bawlsa Kawlten "Chin" hongcihte sung aa, Mi mal 50 kim khawngbek ka ompan uh hi. ( Zomi sung a keibek ) ka hi aa, UNHCR vaitawh kisai thu leh la khatpeuh a om ciangin, khat leh khat kizop na, kithu zakna ( Communication ) a nuamding deihna bulpi leh a om nuam peuhpeuh om theih na ding cih deihnapi tawh, Innkhan khat sapni cih, kamphen sempa a hi, Khen San in, hong vaihawm in, Mi khatteh sum RM, 50,00 ta ka kidong uh hi. Ka Inn sap na minding un, Chin Refugees Center (CRC ) cih ka min vawh uh aa, KL Khuasung a, Apartment, Inn khankhat kasap uhhi.
Hih hunlai ciangciang KL-UNHCR phualpi pan’ gam 3 na gamzuan in, Khawl ten "Chin" ahhong cihte sung aa kua mah kipai khia nai lo hi. Hun hongpai toto in ko'gam 3 na ka paizawh uhciangh CRC bangpen kipawl na ( organisation ) lianpi khat na suak to hi. Ko' om lai-in, CRC pen kipawlna (organisation ) min cihbangzong hihnai lo in, ka Innsap na min bek uh a hihi.
Zopau tawh kamphen ( Interpreter ) kisam:
2001-2002 sungteng UNHCR phualpi sung a, Zopau tawh kamphen ding, Sia Khuppi a om teisam hang, Pasian na septawh thuahkhawm a hih man in, kamphen hongsep dinghun, ahhun hong tampiak zolo in, ah mahpen kamphen in zong’ ki tamzat theilo pah hi. Kei leh Zomi a om sunsun a tamzawte in, Hakha lamte kamphen a hi, Khen San mah kamphen in ka na tam zatzaw uhhi. Hun masa lai-in Zomi te kamphen in, sanggam Hakha lamte mah kitam zatzaw hi. Zomi te kamphen masa pen a hi, Sia Khuppi-in Pasian na septawh thuahkhawm ahhih man in, UNHCR phualpi sung aa, kamphen hunding, ahhun hong tampiak zawhloh teh, Zomi te kamphen ding in, kamphen siamkhat ka zongthuah hi. A hang in, Zomi te kamphen ding, Sia Khuppi a hih hangh, Sia Khuppi pen kitam zatlo a hih man in, kamphen dangkhat a kisamthuah ka hi uh hi.
Tuabang tengtawh hun hongpai toto in, kamphen ding ka zonzon sung in, KL-UNHCR a gambel ngending’Yangon pan aa hongpai, eimi te Philippines pan’ LST sang man khinsa khat, gambel ngetding dan'dongnuam kawm in, Sia Khuppi kiang a zintung suakpah cih kazak ciangh, Sia Khuppi Pasian nasep na lah a hi, omna zong a hipah. Revival Mission Centre. Kuala Lumpur, West Malaysia, "Sen" ( Chines ) te Biak Inn khat a, Malaysia Centre For Burmese Mission a Pastor ahsep na mun ka vapai aa, Yangon pan a hongpai eimi kaki muhpih nop patawh ka va kimu thei hi.
Tua mun a ka va kimu a, kamphen hong sepding ka lunggualh na tengzong ka genpih thei hi. A man zong' kamphen in nong zatnop nak uh leh ka utmah hi hong ci hi. A hihhangh tua ka ki muhzawh a sawtlo khatteh, kamphen ding aa kazawt pa, Malaysia Police ten' na man citciat in "Thung" ( Jail ) na kia hi. Tua ni mah in, ZRA sung a galkap Bu a semngei khat zong’ tua ka kimuhpih noppa te tawh a kibang in, gambel ngennuam aa, Sia Khuppi kiang ah na belh lam, Nipi kal 2 khitkhawng teh kanung zakkik hi. Kazakphet in, tua ZRA bu pa tawh kimu nuam in, ka kankik pah leh ZRA bu Pa zong’ police te matna sung a na kihel kha in, ” Thung ” ( Jail ) sung mah na tung khin in ka kimu man kei hi. Tua ZRA sung aa bu semngei a cihpa pen ka nungtheih teh, Zo Khai ( Australia ) na hih tuak hi. A mau thung sungpan hong suahtak ma in, kei gam 3 na ka na lengkhin hi.
Tuahun lai-in, kei leh Sia Khuppi tawh hong kizom khempeuh CRC or Hakha lamte makai na vive mah a hihi. Zomi ko tawh hong ki zomlo khat leh nih kan omtuan lo ding aa, tua hong kizom lo sunsun te zong, ” C ” lamte mah ii makaih na tungtawn vive mah na hih veve hi.
Tua hi-in, hun sawtsim laipek a kipan, Online tungkhawng a ihsim khaktheih zelzel a hi, Luala Lumpur-UNHCR tungtawn a hongpiang, Zomi leh Chin kikal, kimuh khialna, kilang pan kha nate, eilam pan ihtelsiam theihding thupawlkhat hih kong lai atna tungtawn in, etkaak aa ihtelsiam theihding thu pawlkhat om dingin ka lam en hi. Kuala Lumpur-UNHCR phualpi tawh a kizom kha, Zomi khempeuh pen, CRC te lam sialsa tungtawn a ki zom toto ihhihlam hongphawksak nuamzong ka hihi. CRC te lamsial sa tungtawn aa ei Zomi te'n ahzui ihhih man in, a maupen ihlangte hi lo in, ihpawlte a hihi. A hi zong in, CRC te thuneih na nuai a om tawntung lo in, ei leh ei a hi, ZAM leh Zomi te kipawl na tuamtuam te in, Mipi a ding nahoih nalian tampi ihsep zawhpen thupi leh lungdamhuai hi. CRC or " C " tepen galte khatbang a ihmuhkhial loh ding hoih hi. Paunak: 14.23
Zomi Movement a hih leh ei om natek pan’ khauh pai to tektek ding a hihi.
2001-2016 Zomi pawlkhat te kuan khiat dan " KL-UNHCR. Chin. CRC. Zomi pawlkhat te. ZAM leh Zomi kipawl na tuamtuam. ACR " te, cihbang in, gam thum na gam ahkizom toto cihbang ih hihi.
Kuala Lumpur-United Nations High Commissioner For Refugees ( KL-UNHCR ) phualpi pan, Zomi gam 3 na gam zuan masak te:
( 1 ) Norway gam aa. January. 2003.
* Sia Khuppi leh kei Khen Muan tawh. Nu Mang te nupaa ( Nu Mang lawmpa sanggam Mindat lamte ) tawh ka hi uh hi. Kuala Lumpur-UNHCR Office pan, gam 3 na gam ahsam masa pen gam, Norway gam te zong a hihpah hi. Kei pen Norway gam painuam nailo ka hih man in, Norway gam paiding ka cancel phot hi. Sia Khuppi leh Nu Mang te nupaa vapai uh hi. Kuala Lumpur-UNHCR Phualpi pan, gam 3 na ahki paisak masa pente zong a hihpah hi.
( 2 ) New Zealand gam aa. July. 2003.
* Tg. Khup Khan Suan, New Zealand gam vapai thei hi.
( 3 ) Denmark gam aa. September. 2003.
* Tg. Khen Za Muan Thang leh Nu Luan Suan Cing & Pa Bawilian te nupaa,
tawh, Denmark gam ka pai thei uh hi.
2003 kum a kipan' KL-UNHCR phualpi pan' tawmtawm in gam ( 3 ) nagam kipaisak toto hi. Tua kum sung in, Canada gam in zong mitawm khat samin ei mite a kihel omlo hi. 2003 kum bei ciangciang, USA. Australia. Sweden. Czech Republic. Romania leh Netherland ( Holland ) gamte in, KL-UNHCR pualpi pan in, Gambel/ Peemta dingin, kua mah sapnei nai lo uh hi.
Tu' in ka theihkhial kei leh. Norway. Canada. Denmark. New Zealand. USA. Australia. Sweden. Czech Republic. Romania leh Netherland ( Holland ) hih Gam ( 10 ) te in, KL-UNHCR Office Malaysia pan in, Refugees te sam uh hi. Hih gam ( 10 ) te sung pan’ Romania gam sim loh a, Zomi te kitung kim hi. ( ke'n Zomi te cih kong zatciangh, kamphen kullo leh ngeina kibang tengbek, Zomi te ci a hongzang ka hihi )
2001-2016 kum 15 sung in, " KL-UNHCR " phualpi Malaysia pan, Zomi te mimal 7.000 ( Tul sagih ) kimding in, gam 9 sung a ih ki thehthang khin ta hi.
Phawk gige ding ka lunggualh thu:
Canaan gam a kialtun nate hang in, nuntak khuasak na'ahnuamzaw ding lunggualh na tawh, Israel leh Innkuan pihte mi 70 Egypt ah gambel in na paisuk uh hi. Pian: 46.27. Egypt a tunzawh kum 430 lianteh numei naupang kisimlo Pasal tingteng mi 600.000.00 ( tulza guk val ) Egypt gam pan, Canaan gam zuanding un na pai khiat pih in, tuapen "PAI KHIAT NA" ki ci pan a hih man in, ( Zomi te zong' tu'hun a Gambel/ Peemta ih va'suahna paikhiatna hih nai lo ding in, Zomi pawlkhat te kuankhiathun hih pan lo dia ka cihi. )
Israel te, Canaan gampan’ kuankhia in, Canaan gam mah zuandingin, " PAI KHIA " kik uhhi.
Egypt gampan' Israel te Canaan gam zuanin, Pasian in a paikhiatpih teh mawk paikhiatpih lo in, Israel te a makaih ding' Pasian in Moses na zang hi. Makai mah na zanghi. Tu'hun in zong' Zomi te gamthum na gam kuankhia in, a lomlom a ihtun theih na dingin zong' ( A diakdiak in ) Zomi te tamtun na pen a hi, USA gam a gambel, peemta ih va hihtheih na dingin, a mapangpen leh Moses bang a a kizang, a Mi mal in hong kitel sak hih leh, Dr. Zo Tung Mung mah Pasian in hong zang hih leh kilawm ka sa pen hi. ( Makai tuamtuam bel tam peuh mah in cin, tu'ih kuankhiat hun a, Moses bang khatdan a Pasian in hongzat pen a cinuam ka hihi. )
Israel leh Innkuan pihte, Egypt aa antaw a ahpan lai un, Canaan gamsangh nuntak khuasak na nuamzaw ding cih lunggualh na tawh, Egypt gambel in hong omsuak uhhi. Jakob leh Innkuan pih mi 70 te, Egypt gambel peemta dingin ahva tuncial hun lai un, Egypt mite a ding in, Israel leh Innkuan pihte a tualniam mahmah minam te na hihi.
Pian: 43. 32 ... Pian: 46. 34.
( Ei Zomi te zong’ tu laitak gambel, Peemta, a ih tuntun na, hih a tung a ihgen gam 9 gamte sung a,ah tualniam pente mah ihhih laitak mah a hihi )
Hun hongpai toto in, Israel te Egypt gam a tu'n zawh, a kum 400 val in hongsawt takteh, ahbelh gam Mite a ding in, Israel Mite thahat lua tamlua ta uh ahhih man in hong kitak uhteh' bawl siatna, Salsuah na ciangdong hong tungmawk uhhi. Cihnop na ah, Josef lobuang, Israel leh Innkuan pihte pen Canaan gampan "Sal" dingin ki man aa, Egypt gam ki paipih hi lo hi. Gialkial dangtak na tehang in, ah gambelh na Egypt gam aa, ah tualtang mahmah ah Innteek mahmah khitzawh nung aa, Sal hongsuak pha phing uh a hihi.
Pai: 1.1-22
Israel leh Innkuan pihte bangmah in,Tu'hun pen Zomi pawlkhat te a dingin, Zogam leh Kawlgam sang' nuntak khuasak na ahnuam zawding lunggualh na mah tawh, a kuankhia ih hi aa, "kuankhiathun, ahhih ke'h, Antaw hun" zong ki ci thei veve ding hi. ( Mipawl khatte in, tu'n hun pen, Zomi te paikhiat hun a ci ki om hi ) kenbel Paikhiathun hih nai lo hi ka ci nuam hi. Zomi Mi mal 7.00.00 ( Tul sagih ) sang' a tawmzaw lo kikuan khia khinta a hihman in, Tu'n hun a, ahkuan khia Zomi 7.000.00 valte suan leh khakte in, ihkuan khiatna te a hi, hih gampi 9 te sungpan, tu'zawh kumbang zah? hiam khatteh Zogam zuankik in "PAI KHIAT HUN" hongtung kik kha thei ding aa, tuahun ciangh' mimal bangzah hiam khat in, Pasian hongpiak Pupa luahsa Zogam Leitang tung aa ihciah kik hun dingzong' ih Biak Pasian in geelna neiding hicih ka um hi.
Israel te Egypt a peemta va hi-in, peemta a hih na pan' hong kuankhiat na "Canaan gam" a paikhiatpih a nungta Pasian hi cih um kahih man in, tu'hun a Zogam pan' Zomi te hong kuankhiatpih zong' ih biak Pasian mah hicih ka um aa, hunkhat teh Zogam mah zuankikding in zong' hong " PAI KHIAT PIH "kik theikhading hi cihpen ka umhi. Tu'hun a Zomi gambel, peemta, teng khempeuh zong’ Ih Pu Abraham, Isaac leh Jacob te Pasian, ih biak Pasian geelna mah hihding hi cih ka um hi. LST OT sungteng ih etciang in, Israel te tung a, Pasian in, note Pasian ka hihi cih' tamveipi na gen ciatciat hi. ( A Pasian uh a mangngialh loh na ding uh, a na hopih ciatciat a hihi.) Hih kammal pen, adiak in, tu'hun a Zomi gam ( 3 ) na gamte hong tunpih, ih Biak Pasian in, ei Zomi te zong hong hopih ciatciat na zong' a hih pah a hihi. Tua a hih man in ihtu ihta te ahkhang ahkhang in ih Biak Pasian ihtheihsak aa, ih kihelh sawnsawn dingzong Pasian deih na a hihi.
Thukhup na:
Kuala Lumpur-UNHCR leh Zomi te tawh kisai in, tu'lai pau leh " C " te pen Josef din mun a Pasian in ahna koih hih leh kilawm ka sa aa, " Z " te ihhih leh Judah suante dinmun a, Pasian in a hong koihkhawng ih hih kha tam maw.. Pian: 49. 8-13 "C" leh "Z" te Pasian in hongkoih na ih dinmun tuak hoih mahmah hi. Z ii huamteng ih-hizong in, C te huamteng a hizong in, Topa hoih na in hong ompih tawntung ta hen.

Pu Tual Cin Pau, Myanmar constitutional Tribunal panmun pen a hemnuam om

October 19/2016
Myanmar gam,Thukhunpi vai tawh kisai,thunei leh thuvaihawmpawl Constitutional Tribunal of Myanmar ah,Zomi khat a kihel sun, pu Tual Cin Pau pen USDP leh Jakhai Party te'n a panmun letna pan na hemkhia nuam mahmah uhhi.
Constitutional Tribunal ah mihing 9 kikoih a, Tual Cin Pau pen NLD kumpi te'n March 24 in ana teeluh ahi hi.

2008 Constitution danah a hihleh Constitutional Tribunal panmun lending pen upadi thukhun zumpi-ah atawmpen kum 20 beek nasem khinsa hiding cih thu omkhinsa hi'n, Pu Tual Cin Pau pen upadi zumah kum 20 panmun lenngeikhin hiam cih kitheicianlo hihtuak hi.
Upadi zumah kum 20 sung, nasep neikhin ahih leh hihloh kician takin theihsakna omlopi'n Constitutional Tribunal ah nasep a guatziau uhpen 2008 Constitution tawh kilehbulh hi ci'n USDP leh ANP(Jakhai) MP te'n na pulakkhia uhhi.
NLD te'n Pu Tual Cin Pau nasep apiaklai un Hlutdaw a galkap te'n nanial uh himah taleh NLD te'n na guang teitei uhhi.
BBC

UNA in party 3 sangbeh

Zomi party ahi ZCD kihelna Mualmi party Kipawlna United Nationalies Alliance(UNA) te ki muhkhopna ah pawlthak sanna nei.
____________________________________________
16.10.2016.ni-in Zangkong Khuapi Panda Hotel ah akibawl UNA -SUBMIT ah kipawlna thukimna tawh anuai-a party thumte UNA pawlmi(member) dingin sanna ki nei hi.tua pawlte in ah
1. Chin Langue For Democracy(Pu Ngai Sak-Matupi, makaihna)
2. Chin Progressive Party(Pu No Than Kap-Falam , Makaihna)
3. Shan-ni & Northern Shan ehnic solidarity National Party
te pawlmi sanna kinei thei hi.
Tulai gamvai apha-mawh diak|Ki lemna daihna vai| 21st Panglong vai|Innpi(lawtdaw) sung Innpi(Lawtdaw) pua pan vaite| UNA in koici danin kalsuan in nasem ding cihte kikup khopna nei hi.


_________________________
UNA Pawlmite in
___________________________
(၁) ရွမ္းတိုင္းရင္းသားမ်ား ဒီမိုကေရစီ အဖဲြ႕ခ်ဳပ္(SNLD)
Shan Nationalities League for Democracy
(၂) ရခိုင္ အမ်ိဳးသားပါတီ (ANP)
Arakan National Party
(၃) မြန္ အမ်ိဳးသားပါတီ (MNP)
Mon National Party
(၄) ဇိုမီး ဒီမိုကေရစီ အဖဲြ႕ခ်ဳပ္ (ZCD)
Zomi Congress for Democrary
(၅) ကခ်င္ျပည္နယ္အမ်ိဳးသားဒီမုိကေရစီကြန္ဂရက္(KNCD)
Kachin National Congress for Democracy
(၆) ကယန္းအမ်ိဳးသား ပါတီ (KNP)
Kayan National Party
(၇) ရွမ္းျပည္ ကိုးကန္႔ ဒီမုိကရက္တစ္ပါတီ (SSKDP)
Shan State Ko Kant Democratic Party
(၈) ကရင္ အမ်ိဳးသားပါတီ (KNP)
Karen National Party
(၉) ရခိုင္မ်ိဳးခ်စ္ပါတီ (APP)
Arakan Patriot Party
(၁၀) ၿမိဳအမ်ိဳးသား ဒီမိုကေရစီပါတီ (MNDP)
Mro National Democracy Party
(၁၁) ဓႏုတိုင္းရင္းသားလူမ်ိဳးမ်ားဒီမိုကေရစီပါတီ(DNDP)
Danu National Democracy Party
(၁၂) ခူမီး(ခမီး)အမ်ိဳးသားပါတီ (KNP)
Khumi(Khami) National Party
(၁၃) ခ်င္းဒီမိုကေရစီ အဖြဲ႕ခ်ဳပ္ (CLD)
Chin League for Democracy
(၁၄) ခ်င္းတိုးတက္ေရးပါတီ (CPP)
Chin Progressive Party
(၁၅) ရွမ္းနီ(တိုင္းလိုင္)ႏွင္႔ေျမာက္ပိုင္းရွမ္းမ်ိဳးႏြယ္စုမ်ား
ေသြးစည္းညီညြတ္ေရးပါတီ (SNSP)
Shan-ni & Northern Shan ethnics solidarity party
Ref. Saikyawnyunt

Thangmual dung gamsingte kepcing ding thusunna

THANGMUAL DUNG PEN NATURAL HERITAGE LE BIODIVERSITY KEPCINGNA DINGIN GEELNANEI


Sep 19, 2016
Tedim gamkhen sungom Thangmual kici (Kanedy mountain) kawlten Litataung hongcihsak, pen limtakkivelcian in Pianngeimunkepna (Natural heritage) bawlding hoihmaw hoihlo cihte ento in kepcinghuaimunte hoihtakkepcingtheihnading lampi zongtotoding cih Myanmar Natural Resource and Environment Ministry ah tanupi ahi Union Minister U Onh Win in gen hi.

Sep 19 ni a, Amyota Hluttaw anihveina thukikupna ah, Chin State, Mee luina mun (6)na pan tangmi ahi U Cin Khan Pau in “Chin State, Tedim gam Thangmualdung kepcingding geelna ommaw omlo cih adotnapan, tuadan in akidawngkik ahihi.

Tuaban ah Union Minister pa in, Tedim gamkhensung om Kanedy Mualkici, Litataung ( ThangMual) dungkim pen kepcingna leh Ganhingnamtuamtuam tepianna phualpi ahihzawhnadingin Gamsa, Ganhing le Singkunglopa tawhkisai kimlepan kepcingna thukhuntawhkituak in panlaktheihnading in, akimnai a om khuanu khuapa te ngaihsutna te gawmkhawmin thukhunle sepdantetawh kituak in vaihawmtohtohding in genbehna nei hi.

Dr. Pu Kam Khaw Thang ii thugen tomno


Dr. Kham Khaw Thang in a thuahkhak thute sungpan in zuih dingin hoih asak thu (18) te hong gelh suk ing.

(1) I mawhna te imcip lo ding. Mi tawh thu i neih leh maizum selna peuh in pang tentan loin thum bawl zaw ding. I mawhna te im loin pulak zaw ding.

(2) I zawh ngaploh dingte langbawl se loin om hihiat ding.

(3) Sum leh paai, annek tuidawnte-ah thang gamtat lo ding.

(4) Kineih khem se lo ding. A zawng i hih leh i zawn’ na imlo ding, ahai i hih leh i haina imlo ding. A zawngpi kihausak, a haipi kipilsak, cih bangte hoih lo hi.

(5) Mi gensia se lo ding. Midang khat thu i gen leh zong tua i gente pen i gen mite zak-in i gen ngam dingte bek gen ding.

(6) I siamlohnate-ah a siam kineih se lo ding.

(7) Kamciamna khat peuh i neih leh tangtung sak ding. I tangtun’sak zawh loh dingte kamciamna nei vet lo ding.

(8) Mi simmawh bawl in neu ngaihsut se lo ding. Tu hun-a a neute nidang ciang alian suak thei-a, tu hun-a a liante nidang teh a neu suak thei zel hi. I simmawh bawlte i mai-et hun hong tun’ ciangin zumhuai mahmah hi.

(9) Innkuan sumzeekna-ah ngeina kip nei ding. Sumpi, sumkhol, zattawm ding anam tuam ciat in ama sansan ah aval-in zat loh ding.

(10) Leiba nei dingin sum zang lo ding. I ngahna tawh kizui-in zang bek ding.

(11) Midangte’ ngaihsutna zui-in na simin gamta lo ding. Eimah mah in man isak bang bekin na sem ding. Midangte’ ngaihsutna zui-in i gamtat ciangin thu haksa khat hong om leh e’n sian’sakna ding siamna neilo ihih manin zumhuai hi.

(12) I tungsiahte langpan’ huai lo hi. I paunak-ah,“Lam sak leh pute kizo ngeilo,” na ci hi. I tungsiahte langpan’ lehang eima gimna hi lel hi.

(13) Zuau gen se lo ding. Ahi bangbang in gen den ding. Mi khat kiangah thu khat gen, adang khat kiangah a tuampi khat-in gen zel cihte pawl hoih lo hi. Lungsim nam nih nei se lo ding cihna hi.

(14) Ei leh ei kiphattawm se lo ding. Midangte’ phat dingin i om leh lungdamhuai hi. Ei leh ei kiphatna pen zum huai mahmah hi.

(15) Thulian khensat ding aom leh khensat pah loin, hong kikum phot nung, ci-in a hun sotin limtak in ngaihsun ding.

(16) Hun awng omsak loin manlah den ding. Na nam tampi sep theih ding hanciam ding. A awngkhong luate siatna tawh kizom thei hi.

(17) Khangno lai-a siamna leh theihnate kip ahih manin khangno lai-in pilna leh siamna tampi i sin ding kisam hi. Khangham khit-a sinte kimangngilh pahpah hi. Hih pen khangnote in a hun lai-in a phawk ding thupi hi.

(18) I hat laitak, i liat laitak, vang i neih laitak in midangte’ na sak dingin gamta-in na sem lo ding. A thuakte in a khan’tawn in mangngilh lo hi.

‘Kineihkhem se lo ding. A zawng ihih leh i zawn’na imlo ding, a hai ihih leh i haina imlo ding. A zawngpi kihau sak, a haipi kipilsak’, acih mah tamvei sim pen in ki-um ing. Nang zong na simgaih khit ciangin dikna sak penpen khat hong genkik ve leh, Tawng, na pa’n zong hong gen kaih teh!

21st panglong khawmpi a masa, ni 2 ni ah Pu Chin Sian Thang ii thugenna


1st September 2016, NayPyiTaw ah Zomi Congress for Democracy -ZCD chairman, Pu Chin Sian Thang in hungeelna no.6 na ah minutes 10 sung thugenna nei thei hi. (Makaipi te mi khatciang minutes 10 ta thugen hun kipia ahihi.)

Hi bang aa ih kimuhkhopna pen nong huhna uh ahihman in kei aituam a ngaihsun in nakpitak lungdamna hongko masa ing... Ka lungdamna lianpi penpen in bang hiam? cihleh hilai aa omteng khempeuh tawh kibangin kawlgambup thu dotpi Daw Aung San Suu Kyi tungah lungdam ko masa ing ..
Panglong sachuk ih cihcih pen kum sawtpi sung kiselcip hongmang kawmkal ah Kawlgam sungah nisim in kikapna thauging te a kuamah khempeuh leh ko ZCD te'n zong za hi ungh! Hih bang thute hangin Ko ZCD lampan lungsim hong nasak mahmah aa , lungsim hong lawngkha mahmah in , ihmutnuam in zong ihmu thei ngeikei ungh ! Cileng khial hethet loding hi ungh..

Banghang, hi bangin kikapna omthei mawk hiam ? Gam khat leh gamkhat kikap lah hilo,Hih thau gingging te koipan hiam? gamdang pan hongpai lah hilo , ei leh ei lawmta khat mah kikap tanghtangh ih hihi.Hi bang thauging ,kikapna a omloh nadingin Panglong sachuk om khinsa leh kibawl khinsa ahih lam ka ngaih sunsun aa , hi bang tawh piang nawnloding hi cih ka ngaihsun hi.

Panglong samkik ding ci'n 2010 kum October 24 ni-in Kalaymyo ah kihokhawm na bawlin, tangko khiatna kanei uhhi.. Hih tangko khiat nading ah hong thukimpih aa letmatthuh dingin hong kihelthei a zahtaak huai NLD U Tin Oo , hong nusia khin U Win Tin , Nyai Ngwe Thein tu laitak Khawmpi ah hong pailo hi . Nyai Tun Thein omnawnlo hong nusia khinta hi.Mi akim in tun hih Khawmpi ah hong kiheltheih kimloh hangin amau tungah lungdam ko hihang. Tun hih Khawmpi pen 2nd Panglong a kicih loh hangin 21st Century Panglong Khawmpi ci'n hong kizangkhia ahihi.. 2nd Panglong cilo aa banghangin 21st Century Panglong hong kici hiam ? Nang ap pen hilo hiam? ci'n hih vaipen mitampi in hong dongdong ahihman hong genkhia ka hihi.

Takhen U Thein Phye suakni (birthday) ni'n Daw Aung San Suu Kyi zong hong kihel aa, 2nd Panglong vai ka genpih hi .. 2nd Panglong kei letna sungpan Daw Suh tungah ap dingin kagen aa, tua ahih mawk leh 2nd Panglong ci kei zawni , banghang hiam cihleh panglong vaipen sawtlua mahmah tahi..21 st Century Panglong ci-ni hong ci hi .. Tua pen nang khutsung hongtung khitteh nang deih bang aa nong hih ding hi... Hi pen hitheilo cihbang omlo hi kana ci hi..Hih 2nd Panglong Ka ap nipen 2010 November 14 ni Lian ahihi..Ka ap zawhpen kum 6 sungbang lutta hi.

Tua hun laitak in Daw Suh pen inn sungah ki khumcip in thongkia in aom laitak ahihi..Hih bangin Foreign minister suakding leh Kawl gambup thudotpi suak dingin zong ka lam-en hetkei hi . Kam phat natawh Takhe U Thein Phye suahni birthday ni-in hong paithei zenzen aa, ka ki ap theipah uhhi..Hih Panglong vaipen a pianglo dingin Bogkoye Aung San kithat lum ahi hi..Bogyoke Aung San nungzui ding , a khekhap sulzuih kikdingin tu hun-ah kuamah omnawnlo phialta ahihi.Ko ZCD lampan ka ngaihsutna vuah., Daw Aung San Suu Kyi omlai hi,a mahmah in hong zomzo pen ding leh hong hanciam zopen ding hi., cih natawh naki ap kahi uhhi.Bogyoke Aung San tawh ana sikhawm te hangin tu ni in Panglong Khawmpi bawl kik thei ih hihlam phawk kik huai mahmah hi.

Tu-ni tuhun in i bawl 21st Century Panglong Khawmpi hongpiang khia taktak ta hongsuak hi . Mailam aa dingin bangteng ngaihsun ding ih hiam? Hih Khawmpi kibawl taktak in gualzawhna omtak pi'ding hiam? cih pen khen2/Namnih bek om hi.. Hih bang aa 21 st Century Panglong khawmpi hong piang khiat takpi pen ko ZCD te bek lungdam lo, Kawlgam sung aa om minam a kuamah khempeuh kilungdam mahmah hi. 2015 election November khasung in Kawlgam pen Daw Aung San Suu Kyi khutsung ah hong ki ap ciang in minam tuamtuam khempeuh nakpi takin kilungdam in tua ding hi ci'n nak lungdam mahmah hihang! Hih vaitawh kisai in keibek hilo, aki nusia theilo , a kimangngilh theiloding, panglong vaipen akua mapeuh in ih vaipuak lianpen ahihi.

Tun ih sepding in bang hiam ? Cih leh suahtaakna ih lak hunlai in 1947 Panglong agreement hoihtak in na kibawlkhin aa , Hih Panglong thukimna sungah bangteng kihel hiam ? Federal vai cihte akim in omkhin sitset sa ahihi. Panglong agreement sungah Federal kihel maw? Kihello cihte kician takin Shan state panglong khuapi ah kibawl hi. Tua hunlai in Shan state"Federal state" kici pen Shante bek nahi uhhi. Shan state sungah Maymyo na omhi . Tun bel Shan state sungah om nawnlo in Madalay div. sungah tungta / kikoih hi . Hi tepen Shan state sung aa omding ahihi.

Hih Panglong vai lungsim tawng ah om takpi aa semnuam taktak ih hih aa, 21st Century Panglong Khawmpi sem taktak ding a kipan ih hih taktak leh thukhun upadi constitution te ngaihsun naikei phot un! Upadi khekding? khek loding?? cih thupi masa lo in, Na lungsim takpi tawh hih Panglong agreement banglian in semnuam takpi maw? takpi lo? cih thupi masa penpen bek hi. Lunglut taktak nahih vualeh tu laitak in NCA ah letmatthuh Khin leh thuh nailo cih khawng kisapna om kilkel masalo hi . Panglong vai siangta, manta hang ei , ih cih khitteh nathu kim uhhiam ? ci'n kidong ding aa tuakhiteh thukim leh letmat kithuh hi pan hi.. NCA letmatthuhna neilo aa hih Khawmpi ah hongpai theilote zong hongpai theihtheih nadingin sapding hilel ahihi..Panglong agreement vaite asiang khitteh letmatthuh nading hipan aa , zong kikhial loding hi . Hih Panglong pen lungsim taktak tawh ih bawlding athupi penpen hihi...,cih tawh thu Khupna nei hi. Translated by~ Zomi Indigenous And Politics

Manipur ah Zogam salpha 9 te kum 1 cin phawkna kibawl

India gam a Manipur Government in abeisa August 31,2015 ni a,Anti-Tribal Bill 3 a pass na hang a nuntakna apiakhia Zomi hangsan Salpha 9 te' luanghawm tuni dong kivui/phum nailo in kumkhat cing ding hita hi. Hih Salpha mi 9 te kum khat cin phawkna pen August 26,2016 ni-in JCA makaihna tawh All Churachandpur District Diesel Auto Owners Association (ACCDDAOA) khempeuh in Lungphona (Peace Rally) thupitak nei uh hi. Lungphona i deihna le ngimna bulpi ahih le Singtang mite' kipumkhatna (Tribal Unity) thahat semsemna ding cih thu Pu Mang Cin Khup (Covenor of JCA)in pulakkhia hi.
Zomi Salpha 9- te Luanghawm vuiloh zawh kum khat cing ding hi mah le Manipur Government in Singtangmite' deih ngetnate awlmawh loin, piakhia nai tuanlo uh hi. A hi zongin JCA makaihna tawh Singtang mite in Kipumkhatna (Traibal Unity) khahsuah loin, mainawt suaksuak lai ding cih kiza hi. Hih Lungphona (rally) pen Lamka khuapi sung Tedim road tawn in Sielmat lei kiangah lutto uh a, Hiangtam Lamka ah suakkhia in, Salphate luanghawm koihna Pumbuk ah salphate zahtakna leh paak piakna program kinei-in, lungphona (rally) lawhcing takin kizothei cih kiza hi.



Source: Zogam.com via Tongsan

Belpawl Gam a honkhia Zomi galkapte leh Karen gal, tualgal

1945, 2nd September in galpi nihna abei khit deuh, 7th September in Mangkang kumpi te leh Kawlte makai General Aung San in galkap tawh kisai thukimna lianpi khat nei thei uh a, tua pen Kandy Agreement ci-in kiciamteh hi. Kandy khua pen, Mangkangte ukna nuai aa om Sri Linka gam sunga khua khat hi in, galpi nihna hun in gal belpawl (Alliance Forces) te’ South East Asia Command a dingin aphualpi ahi hi. Mangkangte lampan in Commander Admiral Lord Louis Mountbatten leh Kawlte lampan in PBF (Patriotic Burmese Forces) makai General Aung San in thukimna suaikai thei uh hi. Hih thukimna tungtawn in galkap kilamzia a thak neih ding ahi hi.
PBF ong piankhaitna thu atom in en pak ni. General Aung San leh alawm (30 Comrades) te in 1941 kum 26th December in Thai gam, Bangkok khuapi pan aphuatkhiat uh Burma Independence Army (BIA), tua pan in Mangkangte a zawh khit ciangin BIA te pen kep hak leh phengtat uh ahih manin Japante mah in 1942 kum 27th July in Burma Defence Army (BDA) ci in amin laih in paizia zong laih hi. Japante in Kawlgam suahtakna (a min bek) a piak ni 1943, 1st August ni in BDA pan in Burma National Army (BNA) in kilaih a, a tawpna ah Japan te lehdo kik ding akipat ciangin BNA pan in Patriotic Burmese Forces (PBF) ci-in laih hi.
Kandy Thumkimna
Kandy Thukimna pan in General Aung San makaih PBF, Mangkang kumpi te pattah Mualtung mite leh Gurkha galkap te kigawm sak in Burma Army phuan uh hi. Hih Burma Army sungah thunei makai ding mimal 200 leh nautang mimal 5200, akigawm mimal 5400 tawh kipan hi. Hih Burma Army bup pen Mangkang kumpi te’ ukna nuai ah koih uh a, a siam akician galkap hoih ahih nangin zong pattah ding, cih thukimna ahi hi. Battalion 15 in khen a,
(1)Burma Rifles mintawh Battalion 6, (2)Karen Rifles min tawh Battalion 3, (3) Kachin Rifles min tawh Battalion 2, 4) Chin Rifles min tawh Battalion 2, (5) No.4 Burma Regiment cih min tawh Gurkha te Battalion 1 leh (6) Chin Hill Battalion cih min tawh Battalion khat hi in, a kigawm Battalion 15 ahi hi.
No. 2 Burma Rifles sungah Karen Company 2, Chin Company 1, Kachin Company 1 hi in, Battallion khat ah Company 4 aom ahi hi. Hih Kandy Thukimna hangin Kawlmi PBF galkapte honkhat Burma Army ah kihel khalo ahih manin, General Aung San in amau teng khawm in People’s Volunteer Organization (PVO) ci in phuan hi. Hih PVO te pen suaktakna ngahkhit teh Belpawl Kumpi a nawngkaisak thautawi te hizaw pian hi. (Kipawlna minte hoihtak na ciapteh sak in, khat vei khitteh atom ciaptehna bektawh ki at hi)
Belpawl Gam phuhkhit gamsung a buaisak singnuai mi kipawlnate
1948, 4th January ni in Belpawl Gam in suahtakna la a, tua khit asawt hetlo in gam sung buaina tualgal lianpi kipan pah hi. Suahtakna ngah mapek pan kipan in, gam makaite kikal kilem lohna, ngaihsut kibatlohna tuamtuam om in abuai mahmah khin ahi hi. Tua hang mahin zong amakaipi General Aung San leh alawmte aki suam lum ahi hi. Amasa pen in;
(1)Suahtakna ngahma 1946, 13th July pekpan in Takhin Soe makaih (CPB –Red Flag) te in thautawi kipan khinta uh hi. (2) 1948, 28th March in Takhin Than Tun’ makaih Communist Party of Burma (CPB – White Flag) te in kumpi lehdo kipan hi. (3)1948, 29th July in PVO te in kumpi lehdo kipan hi. (4) 1948, 18th August in Belpawl kumpi galkap ahi No.1 Burma Rifles Battallion leh No.3 Burma Rifles pan in pawlkhat in kumpi lehdo kipan hi. (5) 1948kum beikuan lam teh Karente so litlit ta uh aa, 1949kum January 20 pawl panin Karen Nation Union (KNU)/ Karen National Defence Organization (KNDO) zong kipan in kumpi nasem Karen mi UMP (Union Military Police) te, Belpawl kumpi galkap No. (1&2&3) Karen Rifles Battalion te zong damdam in KNU/KNDO tawh kipawl in kumpi lehdo ta uh hi. (6) No.1 Kachin Rifles pan in pawlkhat in zong kumpi lehdo lai uh hi. (7) Mon minamte in zong Mon National Defence Organization (MNDO) ci in thautawi kipan uh a,
(8) Rakhine gam ah Mujahids (Muslimte) te in zong amau suahtakna, a tuam in thuneihna deihna tawh thautawi kipan in kumpi lehdo uh hi.
Tua ahih manin CPB, PVO (White band), KNU/KNDO/Karen Rifles, MNDO, Mujahids leh No (1&3) Burma Rifles, No.1 Kachin Rifles, hih teng hangin suahtakna angah cil Belpawl Gam ( Union of Burma ) pen buaicih takin buai in mei-am bang hileh a san velval laitak ahi hi.
Suahtakna ngahkhit, gamsung buaina tualgal sungah Belpawl kumpi galkap ahi Zomite tawh aki talsik kha pen ahi Karen mite, a kipawlna leh gamvai ah adeihnate uh anuai ah kikum suk dih ni.
Karen Minam I cih te
Karen minamte pen Kawlzang kuam sungah a lut masa minam pawlin kiciam teh hi. Kawlgam leitaw lam ahi Taninthari Region, Irrawady delta, Yangon Region, Pegu, Taunggu, Phapon, Thahtone cih tengah teng uh hi. Kawlmite, Monte tawh teng khawm uh a Kawlkumpi’ ukna nuai ah aom laitak, Mangkangte in Kawl kumpi gam thum vei va sim (1824, 1852, 1885kum) in amasa leh anihna a sim khitteh tu aa Karente’ ten na gam khempeuh lakhin zo uh hi. Tua hun panin Mangkangte’ ukna nuai ah a om uh hi a, Kawlkumpi gam alak khitteh Kawlmite tawh aki bangin ukna khat nuai ah uk khawm hi.
A thuman, acihtak minamte ahih manin Mangkang kumpi in kumpi nasem ding, galkap ding, police dingin zanguh ahih manin a thutheihna, apilna zong manlang takin khangto hi. Tua hunin Sangmang Judson leh sangmang tuamtuamte hangin zong a pilna a thumuhna tampi khang hi dingin kiciam teh hi. Belpawl gam sunga teng minam khempeuh lak panin apil asiam masate na hi uh a, suahtakna ngah khit teh kumpi galkap zalian khempeuh zong Karen mite ahi hi. Belpawl Gam I Commander in Chief masa pen Smith Dun, Chief of Army Staff masa pen Saw Kyar Doe, Chief of Air Staff masapen Saw Shi Sho hi in, Chief of Navy bel Kawlmite Khin Maung Bo hi in, hih mun sangpen 4 lakah 3 pen Karen te hi mawk hi. Hih panmun te en leng, tua hunin Karente bangzah in pil leh thahat ding cih kimu thei hi.
Karen mite’ gam leh minam vai aki patna
1881kum in Karen National Association (KNA – Dawkalu) cih khat, a mipil masa te in na phuan uh a, minam leh mipihte’ biakna vai leh pilna lam khantohna ding cihte a van ding ngimna hipi pen hi. Damdam in hun pai toto a, minam vai gamvaite zong akisam bangin sep kipan toto uh hi. 1928kum in amakai Dr. San C Po in “Burma and The Karens” cih laibu khat at in, tua sungah Karente in gam leh mun atuam in neih ding, minam vai ah khawnlawh ding cih tawsawn na hi in, Karen minam sungah khanlawhna piangsak in Karente tawh kisai thu a laibu in Manglai tawh aki at masa zong ahih manin minam dangte in zong hih laibu lim sim mahmah uh hi.
1930kum khit lam ciangin Minam lianpi khat ahih hangin gam leh leitang kician anei nailo ahihna phawk thak uh in, tua hun laitak in zong pilna siamna nei khangthak minam it tampi na om ta hi. Japan gal abeikhit 1945kum teh Mangkangte in Kawlgam alakkik hun ciangin minam vai veina nasia mahmah ahih manin kipawlna tuamtuam kiphuan thak in gam leh minam vai vive angimna bulpi pen ahi hi. Kipawlna minthang te in, Karen Central Organization (KCO), Karen Youth Organization (KYO), leh 1881kum a kiphuan KNA pen Buddhist Karen National Association (BKNA) ci in, Christian Karen te in amin luimah lensuak in KNA ci bangin minam it kipawlna tuamtuam na kipan hi.
Kawlmite leh Karen mite kikal buaina, tualthahna
General Aung San leh alawmte (Thirty Comrades) leh Japan galkapte in Mangkangte’ ukna nuai aa om ahi Kawlgam la dingin kipan uh a, 1941 26th December in Burma Independence Army (BIA) phuan in Kawlgam sung lut uh hi. 1942kum kipat lam teh damdam in Kawlgam sungah lut uh hi. Mangkangte’ khutnuai ah citak takin na a sem ahi British te’ galkap Karen minam te tawh kikap in ki talsik uh hi. Japante leh Britishte’ kido na pen Kawl mite leh Karen mite’ kido na suak hiau hi. Japante’ thahat laitak ahih manin British te India lam ah galtai uh hi (Zomi tampi tak zong British galkap ahihna tawh hih kikapna ah kihel uh hi). British galkap asem Karenmi tampi mah India lamah galtai in, kician takin a nungkin theih uh hangin, India lamah a zuilo Karen galkap tampi takte in makai neilo, palang in aneih uh athau leh galvan tetawh amau tawh akinai penna Karen khua, amipih te kiangah bel uh hi.
BIA te zong hoihtak ki makaihna omlo ahih mainin a ut bang tekin om leh gamta uh hi. BIA te, Karen mite khuasung alut ciangin Karen mi thautawi te tawh kikap pah hi. Bangmah theilo Karen mi numei naupang tampi tak zong, hih British galkap Karen mite paulap in bawlsia, a khua bupbup in haltum sak uh in tatsia mahmah uh hi. Kawlgam a lutna lampi dung pen Karente’ tamna khuate na hi kha ahih manin Karen mite tawh abuai hi in, Zomite or Kachin mite omna khuate nawkkha hi zenzen leh zong tua bangmah hikha thei ding hi. BIA te in Karen galkap khempeuh tungah athau te a apkik na dingin anget uh hangin Karen galkapte in pialo uh hi. BIA te in Karen te leh Japan galkapte zong sutuah lai uh hi. Gal hun ma in Mangkang kumpi’ ukna ah panmun zalianpi anei ahi Saw Peter te innkuan zong BIA te in cikzethuai takin that uh hi. BIA te mah bangin Karen mi thautawi te in zong amau thahatna ah Kawlmi te bawlsia in minam nih kikal ah tual thahna kipan ta hi. Hih minam nih tegel bangzah takin kimuhdah hiam cih leh “Kawlmite tawh vantung gam ah om khop sangin Hell gam ka ut zaw hi” cih dongin Karen mite in gen uh hi.
Hih vai ah kua man kua khial cih pen agen hak thu himah ta leh, suahtakna ngahkhit in Belpawl gam I Prime Minister masapen U Nu genna tungtawn in tampi ngaihsut ding om kha ding hi. Ama genna ah “Karen mite tawh ka neulai panin ka khangkhia khawm a, amau’ dan a mau’ zia katel mahmah hi. Ka lawm-it teng zong Karente vive mah hi in, minam khat leh khat kikal buaina ki muhdahna a om lam ka thei ngeikei hi. Karen mite’ pianzia limlim pen, alungduai a migi leh anun nem mite hi in, a cihtak a muanhuai te ahi hi. Kawlmite (U Nu zong Kawlmi) ahih leh, a pianzia limlim ah a phenphi, a genhak leh lungism kikhel ziauziau minam ahi hi” ci in aki lamdanna siangtakin ama muhna na gen hi. Tua bek hi lo in “Mangkangte in Kawlte a uk sungin, akiciamteh ahi guktatna, mithahna leh phengtatna te en leng, Karen mite om khollo in, Kawlmite vive ahihna zong kimu thei hi” ci in ama laibu at Saturday’s Son sungah gelh hi. Mangkang kumpi in a galkap dingin Kawlmite a zat vetlohna zong Kawlmite’ pianzia tellua uh ahi hang hikha ding hi. Kua zaw a val hi ding hiam cih laisim mimal i khensat dingin koih ni.
Karen National Union (KNU)
1920 khit lam teh Karen mite sungah gam vai khanlawhna lianpi na om in khangthakte in damdam in gamtuam ki ukna tuam neih dingin na hanciam uh hi. 1942kum Japante alut khit zawhin Kawlmite tawh ki ukna khat nuaiah om ding, Kawlte’ ukna nuai ah om ding cihte pen ahi thei nawn vetlo suak hi. Galpi nihna khitteh General Aung San makai a, 1947kum in Aung San-Atlee Thukimna suaikai uh a, Kawlzang gam leh Mualtung gamte (Shan, Kachin, Zomi) in Mangkangte’ tungpan in suahtakna lakkhop dingin vaihawm uh hi. Aung San-Atlee Thukimna a bawl lai un Karen makaite tawh bangmah thu kikumlo, London ah thukimna abawl in zong Karente tangmi dingin kuamah samlo bekthamlo in hih athukimna sungah Karen minamte’ deihna leh a nget tawntung ahi Karen gam atuam in neih ding leh Karen minam vai genna kikupna nei vetlo hi (Rakhine leh Monte vai zong kikum lo, Mualtung mite tawh zong ki kumlo le thukimna kician om lian nailo pi in suaktakna lakhawm nung ci-in General Aung San in ama thu in Mangkangte tung gen).
Hih teng hangin 1947 kum February 5-7 sungin Karen Central Organization (KCO), Karen Natioanl Association (Buddish leh Christian–Dawkalu), Karen Youth Organization (KYO) tengin khawmpi khat nei thei uh a, tua pan in Karen Nation Union (KNU) na phuan khia uh a, Karen mite’ vai (Karen’s Interest) khempeuh a vaihawm dingin vaipuak kipia pah hi. Aung San-Atlee Thukimna a deihlohna, Mualtung mite mah bangin Karen mite in zong thuneihna leh gam thak a ngahna dingin ngen uh hi. Tua hun laitak (1947kum) in gam uk kumpi sungah Tanupi (Minister) panmun nih lenkha uh a, tua panmun panin zong KNU’ thukhensatna tawh Tanupi pan a khawlna dingin thu pia uh hi.
Karen mite’ Kumpi lehdo kipatna
1947kum dong, Mangkangte uk sungin Karente in amau deihna ngahzo lo uh hi. Karen makaite leh Kawlmi makaite in a deihna uh kikum in ki thukimna ngahzolo uh hi. A diakin Karente’ deih ahi Karen gam I a huamna (a zaina) pen Kawl makaite in sang zolo uh hi. A ngetna gam pen lianlua mahmah a, tulaitak a Tanintharyi Region, Mon leh Karen State, Irrawaday Delta, Pegu , Taunggo leh Insein cihdan in mun leh gamte ngen uh a, tua munteng pen Belpawl gam I seh 3 suah seh 1 bang lian hi. Karente’ ngetna gam khempeuh piak ding pen Kawlmi makaite in sang zolo uh hi. Tua kawmkal ah KYO makaite leh KNU makaite in Aung San-Atlee thukimna tungtawn a aki bawl ahi Thukhun Bawl ding Tangmi (Constituent Assembly) ah kihel/lo ding vaitawh ngaihsutna kituak lo hi. KYO in kihel ding, suahtakna ngahkhit kumpi zalian lam ah zong lut ding, tua panmunte bulphuh in a deihna uh la ding cih amau deihna hi.
Kawlmi makaite leh KNU te in kiho ki thukimna ngah zolo in buaina khauhpai semsem hi. 1947, 16th April in KNU makaihna tawh Karen National Defence Organization (KNDO) cih thautawi kipawlna pi khat kipan khia uh hi. Hih KNDO sungah British galkap lui Karente tampi kihel ahih manin gal zong siam thei mahmah uh hi. Hih hun pan kipan in KNU leh KYO zong a tuamtuak in akikhen hita hi.
Insein Galmai kipatna
1948kum sung tengin adang thautawi (Communist, PVO, MNDO) tuamtuam in kumpi lehdo kipan in gam sung a buai mahmah laitak in Karen makaite leh Belpawl Gam makaite in Karente’ vai kikum in thukimna aneih zawh nangin nakpi takin hanciam uh hi. Sabuai tungah thukikupna tawh thukimna ngah zo mahmah lo ahih man leh, adiakin KNU makaite in zong a thautawi KNDO te thuzawh nawnlo mawk ahih manin 1949kum, January in buaina pen dalzawh ding hinawnlo in kipan ziahziah ta hi. 1949 25th January teh Irrawady Region lam adiak in Bassein leh Myaugmya ah kipan in KNDO, Union Military Police (UMP) a sem Karen mite leh Belpawl kumpi galkap ahi Karen Rifles Battalion (1&2&3) te kigawm in Belpawl Kumpi tutna sut dingin kipan ta uh hi.
1949, 31st January ni in KNDO te in Yangon khuapi gei kumpi innpan 15-20 miles khawngbek agamlatna Insein leh akim aa khua teng la uh a, Belpawl Kumpi’ dinmun pen a sawt lo in KNDO te khutsung atung thei ding dinmun ahi hi. Tua hun pan kipan in Kawlgam mun tuamtuam, atam zaw pen singnuai mite’ khutsung ah om hi. Belpawl gam I khuapi te a hi Mandalay leh Shante khuapi Tawnggyi bang zong singnuai mite khutsung tung ahih manin bangzah in tualgal nasia leh singnuai mite thahat cih pen kimu thei hi. Gam tuamtuam thu ki zakna media te bangin Belpawl Kumpi pen Yangon kumpi cita uh hi, Yangon bek ah ukna nei hi aci nuam ahi hi. Tua nangawn a khua khung pan KNDO in a la dingin kipanpan ta uh ahih manin Belpawl Gam a dingin anak lauhuai mahmah dinmun ahi hi.
Insein ah KNDO te a nawk pipen Zomi galkapte’ apiankhiatna
Hih Insein galmai ah amapang, tangthu ah aki mangngilh ngeilo ding Zomi galkapte’ apian khiatna thu anuai aa bangin atom in ki muthei hi.
Zomite in 1917 kum in Piantit ah Labour Corp dingin pai a, tua panin galkap lam ah na lim lut mahmah hi.1921kum in Mangkang kumpi in No.4 Chin Riffles Batalltion na phuan in Zogam sunga om minam leh pau tuamtuam teng kigawm khawm hi. 1923 kum ciangin No.4 Chin Rifles phiat in Tedim uk sung leh Zogam leitaw lam gampan aa teng gawm in No.1 Burma Rifles, Hakha uk sung pan aa teng No.2 Burma Rifles leh Falam uk sung pan aa teng No.3 Burma Rifles ci in na kilam thak hi. Galpi nihna abei ciangin 1945kum Kandy Thukimna tungtawn in khatvei galkap paizia puahpha leuleu-a Hakha, Falam leh Zogam leitaw lampan aa teng No.1 Chin Rifles Batallion, Tedim uk sung aa teng No.2 Chin Rifles Batallion leh Zogam aom khempeuh kigawm leh Gurkha te tampi mah aki hel Chin Hill Batallion ci in (1949kum teh No. 3 Chin Rifles in amin laih) in battalion pi thum in kikhen hi. No.2 Burma Rifles Batallion ah zong Company khatpen Zomite mah hi in, koi lampan ate hiam cih ciaptehna kician om lianlo hi. Tualgual a khauhpai sungmah in Belpawl kumpi galkap Battlion behlap uh a, No.4 Chin Rifles ci in Tedim lampan aa te atamzaw kihel in, minam tuamtuam kigawm ngeingai hi. (Hih No.4 Chin Rifles te’ thu ciaptehna kician tam om hetlo ahih manin nakpi takin kanhuai kik mahmah hi.)
Insein galmai kikapna leh Zomi galkapte mapan na
Amasa lam a gensa mah bangin Zomi galkap pen No.1 Chin Rifles Battalion- Commander Lt.Col Hrang Thio, No.2 Chin Rifles Battalion-Commander Lt.Col Son Kho Pau, Chin Hill Battalion-Commander Lt.Col Lian Chin Zam, leh No.2 Burma Rifles ah Zomi galkapte Company khat hi in, akigawm Battalion 3 leh Company 1 ahi hi. 1949kum 31st January, KNDO in Insein khua alak ciangin Yangon khua gei mah ahi Mingalardon ah a om No.1 Chin Rifles in Insein galmai na do masa hi. No.2 Burma Rifles te’ Commander pa pen galsung ah asih ciangin amite palang mangin Zomite Company ahih leh No.1 Chin Rifles tetawh kigawm in Insein gal do uh hi. Insein galmai akipat cil in No.2 Kachin Rifles te in No.1 Chin Rifles tawh pangkhawm uh hi. 1949kum March kha kipat lam, Insein galmai a nasiat semsem ciangin Mon gam lam ah vaipuak anei No.2 Chin Rifles Battalion zong Insein galmai ah kipuak in No.2 Kachin Rifles te Mon gam lam ah kipuak kik-a a panmun kikhek uh hi. Hangsan mahmah leh galsiam bek thamlo in muanhuai mahmah uh ahih manin athupipen galmai leh a lauhuai pen galmai ah Zomi galkap te in mapangpi dingin vaipuak kipia hi. No 1&2 Chin Rifles Battalion tetawh, No.2 Burma Rifles pan Company khat (Zomite mah), No.3 Burma Riffles pan Company khat, No.5 Burma Rifles pan Company khat , leh Union Military Police (UMP) pawlkhat tawh amauteng in KNDO te na do uh hi. Chin Rifles Battalion pen a bulpi pen hi in, a dang tengin in zong KNDO te amunmun panin bawhhuan ngeingai uh hi.
Insein pen KNU leh KNDO te in phualpi dingin nei ahih manin thahat mahmah leh lungtang phatakin panmun nala uh hi. Hih kido na sungah U-Set-Kain-Kyaung, Saw-bua-gyi-Gone, Point 112, Min-da-ma-Gone cih galmaite pen lauhuai leh nasia mahmah hi. A langnih in galkap tampi si in liam uh hi. A tawpna ah KNDO in gallel in 1949, 22nd May in Insein panin nungkik ta uh a, Insein galmai pen kha 3 leh ni 22 sawt hi. Hih Insein gal sungin Zomite a si leh aliam 300 val bangin kiciamteh ahih manin Batalion khat dektak bang himawk hi (Kandy thukimna ah galkap 5400, Battalion 15 = Battalion khat ah 350-400 kim). A nuntakna apia lakah amin thang penpen in No.1 Chin Rifles te Commander Lt.Col Hrang Thio hi in hih galsung pan angah liamna mah tawh anuntakna beilawh hi.
Zomite’ cihtakna leh galhang na
1949 kum in gal le sa akhauh paina ahi Yangon kim ah Brigader ahi Col. Kyaw Zaw in “Hih Insein gal pen mundang galmai tetawh kibang hetlo hi. A hang thu 3 om hi. (1) Hoih takin gal pandan (Defence) asiam galte tawh kido na ah Belpawl kumpi galkapte in tuahna tawh theihna (Experience) kinei lo hi. (2) KNDO te pen British kumpi galkap sungpan a khangkhia vive ahih man in galsiam thei mahmah uh hi. (3) Minam itna a khauhpai mahmah laitak ahih manin lungtang pha thei mahmah uh hi” ci in ama tangthu sungah ciamteh hi. Hih zah a akhauhpai galte a zawhna a genna ah “Zomite hangsandan pen alamdang mahmah hi, galsiam in citak thei mahmah uh hi” ci in ciamteh hi. Bo Taik Chon (Aung San Thuriya) in zong “Burma Rifles te KNDO tawh akikap ciangin galte en neukha hiding hiam a va lutgawp uh leh, KNDO te in na kap huan ahih manin khatvei bang No.5 Burma Rifles Company khat bup phial a si leh aliam in bei mang hi” ci in Kawlmite galsiam lohna na gen hi. Amah mah in “Kei leh ka lawmte 5 in, galte lam ah damdam in kakikhin uh a, amau’ kigin loh laitak takin galte’ phual kalut sim thei uh hi. Tua mun aa om galteng khempeuh phial kakap lum zo uh hi“ ci in ama tangthu sungah gen hi. Zomi galkapte’ hangsan leh galsiam ahih manin Insein khuapan in KNDO te nawtkhia in Belpawl kumpi ahonkhia zo ahihna kimu thei hi.
Hih Insein gal sungin No.1 Chin Riffles pan in Lieutenant Taik Chon (Matupi lamte) leh No.5 Burma Riffles panin Major Hla Thawng (Kawlmi) in galhang pahtawina ah asang pen Aung San Thuriya Cross ngah hi( Tuni ciang dong mi 6 in ngah pan). Bek thamlo in Zomi sungpan in, Belpawl gam galhang pahtawina a sangpen nihna Thiha Thura Cross zong No.1 Chin Rifles panin Second Leiutenant Ca Thuan (Falam te) khat in ngah a, a sangpen thumna Thura Cross pen mimal 16 bangin ngah ahih manin, hih Insein gal bang zahtakin nasia leh Zomi galkapte in bangzah takin mapang uh hiam cih pen hih pahtawinate hangin kimu thei hi.
Galmai dangah mapang Chin Hill Battalion – Anti Tank Regiment
Mangkangte in Zogam alak cil in Gurkha leh Vaite, Burma Military Police dingin zang uh a, Zomite amuanhuaina amuh ciangin Zogam sungah daihna bitna aom na dingin Zomite zong damdam in amau nasem dingin la in Vaite leh Gurkhate tawh damdam in laih hi. Galpi nihna sungin Burma Frontier Force ci-in amin laih hi. Galpi nihna sungin Bristishtehoihtakin panpih uh a, galpi nihna khit ciangin thaupi galvan lianpi te alen Battalion (Anti Tank Regiment) in kikoih ahih mani Chin Hill Battalion-Anti Tank Regiment suak hi. Galkap teng khempeuh lak ah amau Battalion bekin hih bang thau lianpi nei uh in, Mangkangte aciah khitteh aneih uh thaupi tengpen hih Batllion tungah ap ahih manin a vaipuak leh a panmun uh pen thupi mahmah hi. Commander pen Lt.Col Lian Chin Zam hi in, Kawlgam laizang Myeithtilar khua phualpi in nei hi.
Kawlgam a laizang lamah Karente leh Communist te tawh kinawk ki do uh hi. Amin thang diak ah, KNDO te, Communist te leh No.1 Kachin Rifles pan pawlkhat kigawm in 1949 April kha sungin Yangon la dingin Kawlgam laizang lampan in a kuansuk uh a, “1949 kum 1st May in Yangon kala ding uh hi” ci in tangko uh hi. Yangon pan 50-60miles khawngbek a gamlatna Pegu leh Daik-U kikal ah nakpi takin kikap uh hi. Hih munah Chin Hill Battalion, No.6 Burma Rifles pan Company nih leh Gurkha galkapte (No.4 Burma Regiment)in pang huan uh a, kikapna nasia lua ahih manin a si aliam tam mahmah hi. Singnuai mite’ ngimna tangtun zolo in guallel uh a Taunggo khua ah nungkik kik uh hi. Belpawl Kumpi galkap (Chin Hill Battallion leh Burma Rifles) pan in asi aliam mimal 225 bang hi dingin kiciam teh hi.
Gen kizom in hih mun ah Chin Hill Battalion te bangzahin Belpawl gam aa dingin thupi cih akilatna khat sutsuk pak ni. Zomite leh Kawlmite in galte ado khawm laitakin galkap nautangte kitot kiselna nei kha hih tuak hi. Kawlmi galkap pa in “hih Karen te kazawh khitteh no Zomite kong kap ding uh hi” ci kha dan hi. Tua thu Commander Lt.Col. Lian Chin Zam in a zak ciangin hehlua in a aneih thaupi tengtawh Yangon lam kap dingin amite kiging sak hi, ci-in a ciamteh om in, U Nu (Prime Minister) pa’ ciamtehna ah bel, a Battalion bupin Zogam lam ciah dingin vaihawm hi ci in ciamteh hi. Hih thu U Nu in azak ciangin a sun a zan cilo-in Lt.Col Lian Chin Zam akho dingin Zogam Paliamentry Secretary Pu Capt. Mang Tung Nung tawh va delh uh hi.
Galmai ah vanleng tual omlo ahih manin Mangkangte’ hun lai aa a zat vanleng tual alui akipuah nawnlo khat ah lauhuai mah taleh tuak suk veve uh hi. Tua mun ah Lt.Col Lian Chin Zam tawh va kimu in va kho thei hi. Lt.Col Lian Chin Zam zong Prime Minister pa’ deihna bangin alungsim khiamkik in galte dosuak dingin alungsim khel ahih manin Prime Minister pa nuamlua ahih manin Chin Hill Battalion te sum 5000 letsong pia hi. U Nu in tua bangin Zomite atuamin letsong apiakpen khial kisa mahmah hi. Bang hanghiam cih leh Burma Rifles (Kawlmi) te leh Gurkha galkapte , gal ado veve Zomite in letsong ngah in amau ngahloh ahih manin Prime Minister pa tungah heh uh hi. U Nu aa dingin niangtui a piak uh teh, Hai (niangtui hai) a hekpi tawh pia uh hi, ci in U Nu in ama tangthu bu a atna ah genkik hi. Gal hunsungin Zomi galkapte mapanna in Belpawl gam aa dingin bangzah in thupi cih kilang sak mahmah hi.
Galmai adangte leh Belpawl kumpi galkap Battalion a dangte
No. 1 Burma Rifles te in 1948kum July, August kha pawlin amau phualsatna Tayet khuapan in Yangon la dingin, kumpi tutna suan ding, amau kumpi a sem dingin kipan uh hi. Lampi pan in No.4 Burma Rifles tetawh kikap in a ngimna ahi Yangon la zolo uh hi.
No. 2 Burma Rifles te (Karen Company 2, Chin Company 1 leh Kachin Company 1) ahih leh Kawlgam alaizang lamah panmun la uh hi. Communist tawh kido uh in, a Commander pa kikapna ah si ahih manin kikhen thang mang uh a, tua sungpan Chin Company in Insein galmai ah No.1 Chin Rifles Battalion tekiang na tung hi.
No. 3 Burma Rifles te ahih leh 1948kum July kha pawlin khen nih suakin a Commander pa makai in kumpi lehdo uh a, a Second in Commander pa makaih galkapte ahih leh kumpi tungah citak takin galte do uh hi. Pyay khuapi alak khitteh Yangon la dingin akuansuk No.2 Karen Rifles Battalion te Wetkaw Bridge acihna pan na nawtkik zo uh hi. No.3 Burma Rifles te nasepna pen minthang mahmah hi. Company 2 khawng bektawh Karen Battalion khat bang na zo mawk uh hi. Hih Karen te bang Insein aa KNDO tawh kigawm kha zenzen leh tangthu zong aki lumlet zo thei ding dinmun ahi hi.Hih No.3 Burma Rifles pan Company khat mahin Insein galmai ah Zomi galkapte tawh ma pang uh hi.
No. 4 Burma Rifles pen tangthu ah ki tam zak kha pen hi. Thu dang hang hilo in Kandy Thukimna pan aki lamthak Burma Army ah Lt.Col Ne Win (General Ne Win) in Commander asepna Battalion ahih man hi. Hih No.4 Burma Rifles te in Irrawady Delta sungteng ah KNDO te tawh kinawt uh hi.
No.5 Burma Rifles te in Rakhine gam ah thautawi Mujahids te do uh hi. A Company khat in Insein ah Chin Rifles tawh mapang khawm uh hi. Galhang thei mahmah uh a, a makai Major Hla Thawng in sihlawh in, a Company bup phial asi aliam tawh beimang uh hi.
No. 6 Burma Rifles te in Kawlgam a laizang lamteng vaipuak la uh hi. A tunga ih cihsa mah bangin Chin Hill Battalion tawh mapang khawm uh hi. Kawlgam alaizang pen Communist te leh PVO te thahat mahmah na mun hi in, mimal thatang in galte tamzaw leh hatzaw tham uh hi. A hih hangin hih Communist te leh PVO singnuai mite ki makaih zia, Kumpi galkap zahin kician lo ahih manin a guallel uh hi a, Kumpi galkapte in hoihtak ki uk in mapang ahih manin a gualzo suak zaw hi.
No.4 Burma Regiment te pen Gurkha mite vive hi in, gal hang thei mahmah uh hi. Amau pen akisap na munmun ah kipuak kawikawi hi. Tua bek hi lo in, akisam bangin khua leh mun thupite hungin cihtak takin amau panmun ciatah luangkham in mapang uh hi.
No. (1&2&3) Karen Rifles Battalion khempeuh in kumpi lehdo in KNDO tetawh kipawl uh hi. Hih Karen singnuai mi khempeuh in amau Karen mite tenna khempeuh laksawm uh hi. Hih bangin Karen minam khempeuh in kumpi a lehdo ciangin tua laitak kumpi galkap ah a zalian pen Commander in Chief ahi Karen minam General Smith Dun leh a dangteng khempeuh zong ki muangzo nawnlo ahih manin ki khawlsak mang hi.
No.1 Kachin Rifles Battalion pan in amakai khat ahi Bo Naw Seng makai in kumpi lehdo uh a, a dangteng in kumpi panpih in Kawlgam a laizang lamteng ah panmun la uh hi. Hih Bo Naw Seng’ makaih Kachin galkapte in KNDO tawh kipawl in Maymyo khua leh Shan gam ah khua thupi honkhat la uh hi. Tua bek thamlo in KNDO tawh pangkhawm in 1st May, 1949 in Yangon alaksawm te ahi hi.
No.2 Kachin Rifles Battalion te in KNDO te thahatna Mawlmein leh Thahton sungteng ah vaipuak la in, KNDO tawh kinawk uh hi. Tua kuamteng ah KNDO leh MNDO te zong thakhauh mahmah veve ahih manin a lauhuai galmai te mah in kiciam teh hi.
Tua bangin Belpawl Gam bup phial (Zogam leh Kachin simloh) pen a diak in Communist, PVO leh KNDO, hih teng kizel in mun khempeuh phial pen 1948-1949kum sung, amau khutsung ah om hi. 1949kum beikuan lam ciangin damdam in singnuai mite thanem semsem ta uh hi. Ki thutuak leh kician takin kipawl khawmin kumpi lehdo khawmlo ahih manin a ngimna uh a tangtung lo zong ahi hi. Tua hun mah in Belpawl Kumpi galkapte zong damdam in thahat semsem in, hoihtakin aki makaih bek thamlo in, Mualmite, Gurkhate leh a om sunsun Kawlmite hangsan takin a mapanna hangin Kumpi galkap in a gualzo ahi hi.
Belpawl Gam tungah a citak Mualtung mite
Suahtakna ngahkhit, tualgal a nasiat mahmah laitak in Panlong Thukimna tungtawn in Belpawl Gam a phutkhia ahi Mualtung mite in, a phuh uh Belpawl Gam tungah citak takin na cing na kem uh hi. Galpi nihna khit Kandy Thukimna pan a kipan thak Burma Rifles (Kawlmite) te nangawn in kumpi alehdo uh hi. Suahtakna ngahna ding a vaihawmpi leh na lianpi a sem khatmah ahi Communist te, General Aung San te tawh khut kilen in gam a dingin na a semkhawm hi napi in, suahtakna ngahkhit the Belpawl Kumpite na lehdo veve hi. Kandy Thukimna hangin BNA pan-a galkapte, akiphuan thak Burma Army sungah alut khalo teng, General Aung San in kaikhawm in a makaih PVO nangawn in kumpi lehdo veve uh hi. Karente in kumpi a lehdo bel ahi dingmah hi cih ding ahi hi.
Hih bangin a Kawlmite mahin kumpi lehdo in a so ngeingai laitak in Mualtung mite in citak takin aluangkham in Belpawl Gam na hung uh h.
Hih thu tawh kisai tua hun laitak in Prime Minister ahi U Nu tawh kimu dingin Shan, Kachin leh Zomi makaite va pai uh hi. A kimuh phetin amau teng tangin Shan Council panin a Chairman Saw Khun Cho in U Nu kiangah, “Ih gam dinmun pen suksia mahmah ta mawk hi. Yangon khuasung nangawn a muanhuai nawnlo dinmun hi in Kumpi pa leh gam makaite zong kituah akul leh Yangon pan kituah huai thei ding hi. Hih bangin vaihawmna na neihleh ko zong hong theisak hamtang in. Kawlzang ah galte I do zawh kei leh Kaya gam pan do ding hi hang. Kaya gampan in I lelh leh Shan gampan do ding hihang. Shan gam pan I lelh lailai leh Kachin gam pan do ding hi hang. Tua pan I lelh zenzen khak leh Zogam pan do ding hi hang. A kisam ding thauvai thautang ding nang hong vaihawm dih in. Galte maiah khuk din lo ding hi hang. Ko Mualtung mite in Belpawl Gam leh Kumpi tungah kamciam ka pel ngeikei ding uh hi” ci in gen hi.
Gam sung khimkhua a zin mahmah laitak, U Nu’ makaih Belpawl kumpi makaite in a it a muan tengin a langpang laitak leh belh ding a neihloh laitak hun ahi hi. Mualtung mi makaite’ tungpan tua bang kammal a zak ciangin U Nu in thangah lua mahmah hi. Hih Mualtung mite pen akisap mahmah hun laitakin citak takin hong dinpih lawmhoih taktak hi, ci in a lungsim ah ngaihsun aa, lungdam lua in a nehno tha bang suak gawp hi. A khitui a tak khak loh nangin kidawm kawm sa in “Ka lungdam lua mahmah hi, ka lungsim zong hong sukha lua mahmah hi” acih kawmin pau theinawnlo phial in minutes 2 sung bang hici om uh hi, ci in U Nu in ama tangthu bu sungah ciamteh hi. Hih Mualtung mite leh Belpawl kumpi te in a suakthak a moilai mahmah Belpawl gam a dingin ciam pello in khut kilen a mapanna te ki mu thei hi.
Lungleng huai leh a ngaihsut huai thu
(1) Tua laitak in Karen mite tawh kitalsik ding vai aom ciangin No.2 Chin Rifles Batallion a commnader masa leh Zomi sungah Colenel ngah masate Col. Dal Za Kam makai in galkap ulian Lt.Col Hrang Thio leh Lt.Col Son Khua Pau tawh Belpawl Gam I galvailam zumpi ah va pai in, hih Karen tawh kikap na dingah Zomite in Karente tawh kikap lo in mun dangah vaipuak apiak nangin ngen uh hi. Hih KNDO tawh buaina pen Kawlmi leh Karen mite minam kikal ki muhdahna hang hi ci in Kawlmi leh Karen kikal ah kuama lam ah dinglo in alaiah aom nangin ngen uh hi. Ahih hangin angetna ngahlo bek thamlo in amah zong mundang ah kipuak in a sawt lo in Pension kipia ziau hi. Hih mun ah, Zomi makaite in lungsim siantho lua in Kawlte’ cih bangbang mang uh hi cih pen amanlohna lak hi. Pilvai takin ava gen uh pen Belpawl Gam makaiten na mang zolo ahih man, Zomi galkapte lo in hitheilo cih thei ahih man leh Belpawl tungah a cihtak tintenna hangin a kipia vaipuak a sem ahi hi.
(2) 1949kum beikuan lam ciangin Lt.Col Lian Chin Zam’ makaih Chin Hill Battalion (Chin Hill Battalion-Anti Tank Regiment) pan in No.3 Chin Rifles Battlion in laih hi. Hih bangin alaih pen amin bek alaih dingtawh aki bat hangin a thuneihna zong alaih ahih gige na kimu thei hi. Rifles Battalion in Anti Tank thaupi te len hetlo ding ahih manin Mualtung mite khut sungpan a thuneihna, a za neihna a suhkhiatsak hi kici thei hi. 1952kum pawl pan in damdam in Minam min pua Battalion sungah, a Commander leh galkap nautang te kihelh zau sak mangin 1956kum bang teh Zomite Battalion khat ah Zomi taktak 20-30 bek om ta hi ci in Col. Khen Za Mong in ciamteh hi. Tua kum mahin Belpawl kumpi galkap sung paizia , mun leh za neiha te khek uh hi. 1948kum in minam dang Karen minam pen Belpawl Gam galkap makaipi 10 lak ah 5 bang hi in, ahih hangin 1956kum taktak teh galkap makaipi khempeuh pen Kawlmite vive hita hi. Tualgal sung citak takin a mapang Zomite khat zong akihel loh pen thu lamdang mahmah leh a ngaihsut huai mahmah ahi hi.
(3) A diakin 1988 khit lamteh, Mualtung mite leh Thu-um mite in Galkap sung bek ah ahi lo, apua lam ki ukna te ah zong Mualtung mite in panmun thupi lua ngahzo nawnlo uh hi. Pilna siamna in cinlo maw, ahkl Kawlmite in panmun a ngah theihlohna dingin dal cip hi zaw ding hiam cih ngaihsut huai hi. A kician mahmah ah Mualtung mi khempeuh, Kawl biakna, Kawl ngeina, Kawlmi vive suah gai ding cih a minampi lungsim (ahoihlo lam) hipen ahi hi.
(4) Zomite’ tha tawh Yangon kumpi (Belpawl Kumpi) ahunkhia zo uh ahi hi. Zomite pen Belpawl gam, amau inntek amau phuhsa gam tungah citak leh anuntakna piakhia in a gam hung uh hi. Zomite leh Karen minamte kikal ah kimuhdahna kihuatna aom hilo in khat in a gam tungah ciam pello, khat in a gam a dingin amanawt , hih minam nih tegel aki do kha ahi hi. Tua ahih manin Zomite in Karen mite pen “Dekte” cih huai lo in, Karen mite in zong Zomite tung akhasiat loh ding ahi hi.
(5) Tangthu te kan in theihtel ding thupi a, tua bek tawh khollo in bangci bangin Zomite leh Mualtung mite in a hihna uh ngah kik ding, a kilawm hamphatna te a ngahkik na dingin hoihtak lungngai in a kalsuan khawmloh phamawh ta ding hi. Belpawl Gam sunga om, a citak leh gam I haksat dongtuah mahmah hun laitak in ciampel hetlo in mapang ahi Mualtung mite aa dingin , 1962kum khit zawh 2016kum in akah thak ahi Daw Aung San Suu Kyi’(State Counselor) makaih National League for Democracy (NLD) kumpi pen amuanhuai pen leh a lamet huaipen hikha ding hi. Hih bangin hunhoih te Mualtung mite leh ukna nei Kawlmite, thunei Galkap makaite in a zatsiam ding thupi mahmah ding hi. Zomite hita leh Mualtung mi khempeuh aki thutuak ding pen thupi pen dinga, Kawl makaite(NLD leh Galkap te) in zong a Belpawl Pih Mualtung mite’ deihna te ki theihmawh bawl lo in a zahtak ding thupi ding a,Belpawl Gam tungah a cihtaknate uh amangngilh loh ding thupi ding hi. Tua hi peuhleh 1947kum, 12th February aa Mualtung mite leh General Aung San kithu tuakin gam thupi, gam thahat khat aa din ding alunggulh nate tangtung zo thei ding hi.
(6) Belpawl Gam tungah, Mualtung mite cihtak mahmah uh hi. Ahih hangin mimal tam leh ukna khempeuh tuni ciang dong a lencip Kawlmi makaite’ cihtak lohna tungtawn in, mailam ah Zomite leh Mualtung mite in, gamvai minam vai ah bangci bangin ngimna nei ding, bang ci kalsuan ding, cihte siangtakin a muh ding kisam hi. Thuk kik ding lamsang hi zaw lo in, pilna in lak theih ding thupi mahmah hi. Tua tungtawn in gam leh minam makaite in a mipihte akalsuan pih ding thupi ding hi. Lam tampi om kha ding ahih manin laisim mimal khempeuh in zong hoihtak lungngai pha in na ngaihsutna na lungsim tawngah at inla, nasep zong kipanpah dih in.
(7) Karen mite tua hun lai in a deihna uh hoihtak sungin, kumpi lehdo gawp mang keileh tu laitak adinmun sangin a sangzaw, gtn; State bang alian zaw ngah khathei ding uh hi. A supna dangkhat leh athupi pen ah aki sailo mi tampi in sih lawh lai hi. Amau pianzia migi mahmah himah leh, tua hun lai in a makai ten apaikhialh pih kiau na hangin tangthu ah abei ngeilo ding, minam bup kalsuan khialhna suak hi. A minam kipawlnate zong ki thutuak lo uh sawnsawn uh hi(KNU/KYO).Lamkhat pan in, amipil galkap mangpite leh KNU makai te in pangkhawm liailiai lo uh hi ( General Smith Dun te ). A tawpna ah hih bangin Kawlmite lehdo sawm ahih leh zong Mualtung mite hoihtak zawn in a ngah donguh hanciam leh , gualzo lua veve ding uh hi. Karen mite tuahkhak thute tungtawn in Zomite’ a dingin pilna tampi ngahtheih ding om kha lai ding hi. Laisim mimal kimin zong na ngaihsut beh lai nangin kong zawn hi.
Khup Lian Thang
Ref:
(1) Lest We Forget, Col. Khen Za Mong (2) Saturday’ Son, U Nu ( Former Prime Minister ) (3) Saw Ba Oo Gyi leh minam neuter gamvai buaina, Mg. Sin Kyae (4) Kawlgam gamvai etkikna ( 1948-1988 ), U Kyaw Win (5) General Ne Win leh gamvai, Dr. Mg Mg (6) Aung San Thuriya Taik Chon, Tetkatho Sein Tin (7) Zahre Lian of Burma, Dr. Stephen Hre Kio ( 8) Chin Hill Batallion-Anti Tanl Regiment, Salai Van Cung Lian’ article (9) Interview , Pu Major S. Khup Cin Pau