Showing posts with label Regional. Show all posts
Showing posts with label Regional. Show all posts

KALAYMYO KHUAPI TANGTHU TOMNO:

A. Kalaymyo Khua kilam zia:
Kalaymyo min masa pen " Karlaymyo" khuaveng, khuali in umcih( Kar) cih pan kipan ahi hi. Kalaymyo pen Sagaing huam sunga om khuapi lian khat hi a, Gamgi khua lian Tamu tawh tai 103 bek ki gamla in, Tedim khuapi tawh tai 43 bek ki gamla hi. Kalay khazai( district) khuapi pen Kalaymyo mah hipah hi.India leh Myanmar ading gamgi khuapi poimawh mah mah khat ahih ban ah Kawlgam sunga a khangto pen khuapite lak ah khat ahi hi. Kalaymyo a om masa leh aluah masa pen Shante kici hi.
B. Kalaymyo Khua hun:
Kalaymyo pen a lumpen hun March pan May kikal pen 100-112'F( 38-44'C) in ki ciamteh a, a votpen hun December-February 50-70'F( 12-21'C) in kiciam teh hi. Kum khat sung atangpi khuahun a ki-et ciangin 79'F(26'C) dan in kituat hi. Kum khat guah zukna atangpi in a ki-et kik ciangin 66.77 inchs( 172.1 cm) in ki ciamteh hi.

C. Milip omzah:
Kalaymyo pen milip tein li ( 400000) val pha a, Zomi/Chin- 55% , Bamar -35 leh adang 10% in ki ciamteh hi.
D. Nek leh Taak zonzia:
A diakin a khuapi kivaakna pen zanglo khawh hipha deuh a, setmuhzung (Kalay Industrial Estate) zong a kithei mah mah khat hi-in, Jeep, Tungbing (three wheeled motorcycles), a kipan atuam tuam bawl khia uh hi. Nisim/nitha nasep tawh a kivak zong a tam mah mah hi. Myanmar khuapi dangte mah bang kizopna mobile, internet a kipan a tuam tuamte noptak in kingah hi.
E. Ngeina leh Biakna:
Biakna din mun a ki-et ciang in, Buddhist- 50%, Christian-45% leh adang 5% in ki ciamteh a, Buddhist biakna inn(monasteries) 116, Christian biakinn(church) 508, Hindu temple -2, Muslim mosque -1 leh Sen(Chinese) ngeina biakna inn - 1 cih bang in om hi.
F. Lampi (kizop/kikawmna):
# Kalay-Tamu lampi pen Indiate makaih Border Road Organization in 1997 kumin bawl kipan a, 2001 kumin India Foreign Minister pa-in honna nei hi.
# Mandalay, Yangon tawh kizopna lampi nih om a, tuuk hun in Kalay- Gangaw-Monywa-Mandalay, khaal hunin Kalay-Myoma-Yarje-Monywa-Madalay lampite kitawn phadeuh hi
# Meileng( rail) station zong om a, Kalay- Gangaw pan in Myanmar khuapi tuam2 kizom in tung hi.
# Tuilam kikawmna (Inland water tranport) zong om a, Kalaymyo pan tai 15 bek gamlatna Kalaywa pan Myanmar khuapi tuam tuam kikawm thei hi.
# Vanlam kikawmna( air port) zong khua laizang ah om a, galpi nih- World War-II-1945 lai a Mikang kumpi in Vanleng bawh pak.nadinga a bawl a kizuun tosuak ahi hi. Vanlengtual pen pi (499 Ft) san na-ah omin, pi (295ft) zai-in leh pi (5502ft) sau hi.
Hoihna leh siatna a hon hon , a tat khopna khuapi zong ahi hi.(beh lap).
Ref: November Da Zos Hero, Wikepedia, 2014 census leh adang" via tongsan

A (2) Veina Zomi Numei Seminar

A (2) Veina Zomi Numei Seminar Yangon lawhcing.
Yagon- November 5 ni bup sung Tedim Baptist Church - Yangon, Social Hall ah thupi tak in kibawl thei hi.
Seminar tawh kisai in, "A (2) veina Zomi Numei seminar ah vai thupi tampi nusia in, sih le nat te nopna cih te paulap khat zong a nei vet lo numei vive 120 in pawllutna form la in at ngiat2 uh a, sun thaphai pikpek thu ngai in hall ( Social hall, TBC-Y) ah hong tut sitset uh ka muhtak ciangin Zomi Numei'te mailam pen sun nitaang hong bang ta ding hi cih khamuan ngeungau na khat ka nei hi!" ci in Sm Zen Dot Mang, Director, Zomi Numei ki pawlna Yangon in gen hi.
Seminar ah GZA Makaipi Rev. Dr. S. Pau Khan En, Zomi Numei MP, Pi Cing Ngaih Mang, ZCD, Zomi numei Sittni le Politician Pi Kan Kham Dim te kipan Zomi numei khangthak te in thugenna nei thei uh hi.
Abeisa kum in kibawl A (1) Veina Seminar ah thukigen te kaikhopna Laibu zong tuni mah in kihawm khia thei pah hi.
Ref and Photos Judih Niang, Zen Zen via Zingsol





A 10 veina Zomi Siamsin Kipawlna Seminar

The 10th Siamsin Seminar
Laitui village,Tedim Township,Chin State,Myanmar
Zomi Siamsin Kipawlna-Universities Myanmar in kum Khat sung a naseppi a aneihte ahi…Siamsin Medical Trip,Siamsin Seminar leh Siamsin Summit..etc. te lakah a Guk(6) veina Siamsin Medical Trip leh a Sagih(7) veina Siamsin Summit April khasung in kibawl khina,a Sawm(10) veina Siamsin Seminar pen hongtungding 15-21,November,2016 ni sung teng in “Learn more,Lead more,Teach more”cih thulupi tawh Laitui khuaah kibawl ding hi.
Zomi Siamsin Kipawlna-Universities Myanmar in sang khakhun sung ahi November khasung tain Tedim(2006), Kalay(2008), Tedim(2009),Tongzang(2010),Pyidawtha(2011),Tuithang(2012),Kalay(2013),Hakha(2014),Heilei(2015) khuate ah Seminar kibawl khin a,tua Laitui(2016) Seminar bawlzawh a Sawm(10) veina ahihi.
Siamsin Medical Trip pen Zato tawh kigamlatna,Lampi hamsatna cihte ah April kha sungta in kibawla Buanli(2011), Suanghoih(2012), Salzang(2013), Pimpih(2014), Langzang(2015) leh Guasing(2016) khuate ah kibawlkhin hi.
Siamsin Summit bawlna te Mandalay(2010),Yangon(2011),Kalay(2012),Hakha(2013),Pimpih(2014),Langzang(2015),Guasing(2016) khuate ah kibawl theihi.

Malaysia ah Zomi leh Chin UNHCR vai

Laigelh: Khen Za Muan Thang,Denmark
2001-2003 sung thupiang theih khakteng hipha-deuh.
(Late: 81.10..... Isaiah: 61.9)
Thupatna:
Ih Biak Pasian in 2001 kum a kipan, Zogam leh Kawlgam sang' nuntak khuasak na a nuamzawkna gam a hi, gam ( 3 ) na gam ih cihcih gamte ahhi. Norway. Canada. Denmark. New Zealand. USA. Australia. Sweden. Czech Republic leh Netherland ( Holland ) gamte a zuanding in, Kuala Lumpur-United Nations High Commissioner For Refugees ( UNHCR ) Malaysia pan in, Zomi te a honhon in gamthum na gam zuandingin hong ki pansak in, hongkuankhia sak hi. ( Tu'hun pen, Zomi pawlkhat te a ding in, kuan khiat hun maw, Antawk hun, cihkhat tawh hong kibang thei khading hi. )
Canaan gam a kialtung nate hang in, Jakob ta mi 10 te, Egypt gam a' antaw dingin ah vapaisuk uhteh, Egypt gampan Jakob Ta mi 10 te ahna dawntuah dingin, Pasian in Jakob tate sung a khat a hi, Josef pen, Egypt gam aa, ah nama tung kholsaktawh kibang kasahi. Pian: 45.5,b. Hih hun laitawh a kibang pianmah in, Zomi te zong' gam ( 3 ) na gamte a lomlom aa ihtun'theih na dingin, Kuala Lumpur-UNHCR phualpi pan, Zomi te hong na dawntuah dingin, ih Sanggam Laimi te Pasian in KL-UNHCR phualpi aa, ahna tungkhol saktawh hong kibang kik hi.
2001 kumma laipek a kipan' Sanggam Hakha lamte in, Luala Lumpur-UNHCR phualpi na luah khinta uhhi. Tua hunlai in, CNF makai khat a hi, Dr. Sui Kha in KL-UNHCR pua lampan, gambel ngennuam a om’ ah Mite lamlak in, UNHCR Office sung a, kamphen dingte a kipan, thu leh late donpih vanpih in lamlak pupi khat in na pang hi.
A sanggam te ahna dawntuah ding in, Egytp gam a Pasian in Josef ahna tunkholh masak bangmah in, ih Sanggam Laimi te in, KL-UNHCR phualpi sung a Zomi te ihlut theih na dingin, hong na dawntuah in hong na muak uh hi. Zomi te sung a Kuala Lumpur-UNHCR pualpi a nazuan masa, Sia Khuppi, Tamu Khua mi leh keimah Khen Muan, Tungzang Khua mite, hong na dawntuah uhhi. Gamthum na gamte tung in, Gambel/peemta suahthei na ding lamhong hialh in ( Case ) bawldan ding ahthu ahla cihte a kipan’honghialh in hong makaih uh hi. Phulun phul na ding leikha in a napetlet masak mah bangin, ei Zomi te'n KL-UNHCR Liaison Office sung ihlut theih na ding in, ih sanggam Chin or Laimi te pen, ih leikha zong kici theiding hi. Tua a hih man in, KL-UNHCR phualpi pansan aa, Zomi gamthum na gamzuan khempeuh te a dingin, CRC leh Sanggam Laimi tepen, eite mai a ahsia ahpha te aa, ah na kikham masate a hihna ihtelkhial lo ding thupi kasa hi.
( Ciimnuai a Sa kibak Geeltui a kithuk cih phawk ding hoih hi. )
KL-UNHCR Office sung aa kamphen ( Interpreter ) sem masa te:
2002 kum malamsiah KL-UNHCR phualpi sung a, kamphen in, Mi 2 bek kizang hi. Hakha pau leh Kawlpau tawh, Khen San in kamphen semhi. Zopau leh Kawlpau mah tawh Sia Khuppi-in kamphen hi. KL-UNHCR phualpi sung a, Kawlgam pan a pai, Rohingya a kici te lobuang kamphen ( Interpreter ) na’sep a sem masa pen tegel zong a hih pah hi.
Zopau tawh kamphen ( Interpreter ) sem masa te:
Sia Khuppi, Tamu Khua mi-in, 2001-2002 sungteng sem hi. 2003 kumbul lamciangh Sia Khuppi in Norway gam hong lensan khitteh, Pa Hang Za Pome, ( Pa Pome, Australia ) Khuasak Khua mi-in kamphen hongsem zom to hi. Tua zom in, kei gam thum na ka lenzawh teh, Pa, Pau Khek ( USA ) in kamphen hongsem to kik leuleu cih Denmark ka tun zawh teh ka za hi. ( hih hun lai in, Kawlgam mi te sung a kipawl na, organisation cihte limlim khat zong om nai lo hi )
CRC hong pian khiat na:
2002 kum sung in, ko UNHCR pan gam 3 na zuattheih na ding. ( register ) a bawlsa Kawlten "Chin" hongcihte sung aa, Mi mal 50 kim khawngbek ka ompan uh hi. ( Zomi sung a keibek ) ka hi aa, UNHCR vaitawh kisai thu leh la khatpeuh a om ciangin, khat leh khat kizop na, kithu zakna ( Communication ) a nuamding deihna bulpi leh a om nuam peuhpeuh om theih na ding cih deihnapi tawh, Innkhan khat sapni cih, kamphen sempa a hi, Khen San in, hong vaihawm in, Mi khatteh sum RM, 50,00 ta ka kidong uh hi. Ka Inn sap na minding un, Chin Refugees Center (CRC ) cih ka min vawh uh aa, KL Khuasung a, Apartment, Inn khankhat kasap uhhi.
Hih hunlai ciangciang KL-UNHCR phualpi pan’ gam 3 na gamzuan in, Khawl ten "Chin" ahhong cihte sung aa kua mah kipai khia nai lo hi. Hun hongpai toto in ko'gam 3 na ka paizawh uhciangh CRC bangpen kipawl na ( organisation ) lianpi khat na suak to hi. Ko' om lai-in, CRC pen kipawlna (organisation ) min cihbangzong hihnai lo in, ka Innsap na min bek uh a hihi.
Zopau tawh kamphen ( Interpreter ) kisam:
2001-2002 sungteng UNHCR phualpi sung a, Zopau tawh kamphen ding, Sia Khuppi a om teisam hang, Pasian na septawh thuahkhawm a hih man in, kamphen hongsep dinghun, ahhun hong tampiak zolo in, ah mahpen kamphen in zong’ ki tamzat theilo pah hi. Kei leh Zomi a om sunsun a tamzawte in, Hakha lamte kamphen a hi, Khen San mah kamphen in ka na tam zatzaw uhhi. Hun masa lai-in Zomi te kamphen in, sanggam Hakha lamte mah kitam zatzaw hi. Zomi te kamphen masa pen a hi, Sia Khuppi-in Pasian na septawh thuahkhawm ahhih man in, UNHCR phualpi sung aa, kamphen hunding, ahhun hong tampiak zawhloh teh, Zomi te kamphen ding in, kamphen siamkhat ka zongthuah hi. A hang in, Zomi te kamphen ding, Sia Khuppi a hih hangh, Sia Khuppi pen kitam zatlo a hih man in, kamphen dangkhat a kisamthuah ka hi uh hi.
Tuabang tengtawh hun hongpai toto in, kamphen ding ka zonzon sung in, KL-UNHCR a gambel ngending’Yangon pan aa hongpai, eimi te Philippines pan’ LST sang man khinsa khat, gambel ngetding dan'dongnuam kawm in, Sia Khuppi kiang a zintung suakpah cih kazak ciangh, Sia Khuppi Pasian nasep na lah a hi, omna zong a hipah. Revival Mission Centre. Kuala Lumpur, West Malaysia, "Sen" ( Chines ) te Biak Inn khat a, Malaysia Centre For Burmese Mission a Pastor ahsep na mun ka vapai aa, Yangon pan a hongpai eimi kaki muhpih nop patawh ka va kimu thei hi.
Tua mun a ka va kimu a, kamphen hong sepding ka lunggualh na tengzong ka genpih thei hi. A man zong' kamphen in nong zatnop nak uh leh ka utmah hi hong ci hi. A hihhangh tua ka ki muhzawh a sawtlo khatteh, kamphen ding aa kazawt pa, Malaysia Police ten' na man citciat in "Thung" ( Jail ) na kia hi. Tua ni mah in, ZRA sung a galkap Bu a semngei khat zong’ tua ka kimuhpih noppa te tawh a kibang in, gambel ngennuam aa, Sia Khuppi kiang ah na belh lam, Nipi kal 2 khitkhawng teh kanung zakkik hi. Kazakphet in, tua ZRA bu pa tawh kimu nuam in, ka kankik pah leh ZRA bu Pa zong’ police te matna sung a na kihel kha in, ” Thung ” ( Jail ) sung mah na tung khin in ka kimu man kei hi. Tua ZRA sung aa bu semngei a cihpa pen ka nungtheih teh, Zo Khai ( Australia ) na hih tuak hi. A mau thung sungpan hong suahtak ma in, kei gam 3 na ka na lengkhin hi.
Tuahun lai-in, kei leh Sia Khuppi tawh hong kizom khempeuh CRC or Hakha lamte makai na vive mah a hihi. Zomi ko tawh hong ki zomlo khat leh nih kan omtuan lo ding aa, tua hong kizom lo sunsun te zong, ” C ” lamte mah ii makaih na tungtawn vive mah na hih veve hi.
Tua hi-in, hun sawtsim laipek a kipan, Online tungkhawng a ihsim khaktheih zelzel a hi, Luala Lumpur-UNHCR tungtawn a hongpiang, Zomi leh Chin kikal, kimuh khialna, kilang pan kha nate, eilam pan ihtelsiam theihding thupawlkhat hih kong lai atna tungtawn in, etkaak aa ihtelsiam theihding thu pawlkhat om dingin ka lam en hi. Kuala Lumpur-UNHCR phualpi tawh a kizom kha, Zomi khempeuh pen, CRC te lam sialsa tungtawn a ki zom toto ihhihlam hongphawksak nuamzong ka hihi. CRC te lamsial sa tungtawn aa ei Zomi te'n ahzui ihhih man in, a maupen ihlangte hi lo in, ihpawlte a hihi. A hi zong in, CRC te thuneih na nuai a om tawntung lo in, ei leh ei a hi, ZAM leh Zomi te kipawl na tuamtuam te in, Mipi a ding nahoih nalian tampi ihsep zawhpen thupi leh lungdamhuai hi. CRC or " C " tepen galte khatbang a ihmuhkhial loh ding hoih hi. Paunak: 14.23
Zomi Movement a hih leh ei om natek pan’ khauh pai to tektek ding a hihi.
2001-2016 Zomi pawlkhat te kuan khiat dan " KL-UNHCR. Chin. CRC. Zomi pawlkhat te. ZAM leh Zomi kipawl na tuamtuam. ACR " te, cihbang in, gam thum na gam ahkizom toto cihbang ih hihi.
Kuala Lumpur-United Nations High Commissioner For Refugees ( KL-UNHCR ) phualpi pan, Zomi gam 3 na gam zuan masak te:
( 1 ) Norway gam aa. January. 2003.
* Sia Khuppi leh kei Khen Muan tawh. Nu Mang te nupaa ( Nu Mang lawmpa sanggam Mindat lamte ) tawh ka hi uh hi. Kuala Lumpur-UNHCR Office pan, gam 3 na gam ahsam masa pen gam, Norway gam te zong a hihpah hi. Kei pen Norway gam painuam nailo ka hih man in, Norway gam paiding ka cancel phot hi. Sia Khuppi leh Nu Mang te nupaa vapai uh hi. Kuala Lumpur-UNHCR Phualpi pan, gam 3 na ahki paisak masa pente zong a hihpah hi.
( 2 ) New Zealand gam aa. July. 2003.
* Tg. Khup Khan Suan, New Zealand gam vapai thei hi.
( 3 ) Denmark gam aa. September. 2003.
* Tg. Khen Za Muan Thang leh Nu Luan Suan Cing & Pa Bawilian te nupaa,
tawh, Denmark gam ka pai thei uh hi.
2003 kum a kipan' KL-UNHCR phualpi pan' tawmtawm in gam ( 3 ) nagam kipaisak toto hi. Tua kum sung in, Canada gam in zong mitawm khat samin ei mite a kihel omlo hi. 2003 kum bei ciangciang, USA. Australia. Sweden. Czech Republic. Romania leh Netherland ( Holland ) gamte in, KL-UNHCR pualpi pan in, Gambel/ Peemta dingin, kua mah sapnei nai lo uh hi.
Tu' in ka theihkhial kei leh. Norway. Canada. Denmark. New Zealand. USA. Australia. Sweden. Czech Republic. Romania leh Netherland ( Holland ) hih Gam ( 10 ) te in, KL-UNHCR Office Malaysia pan in, Refugees te sam uh hi. Hih gam ( 10 ) te sung pan’ Romania gam sim loh a, Zomi te kitung kim hi. ( ke'n Zomi te cih kong zatciangh, kamphen kullo leh ngeina kibang tengbek, Zomi te ci a hongzang ka hihi )
2001-2016 kum 15 sung in, " KL-UNHCR " phualpi Malaysia pan, Zomi te mimal 7.000 ( Tul sagih ) kimding in, gam 9 sung a ih ki thehthang khin ta hi.
Phawk gige ding ka lunggualh thu:
Canaan gam a kialtun nate hang in, nuntak khuasak na'ahnuamzaw ding lunggualh na tawh, Israel leh Innkuan pihte mi 70 Egypt ah gambel in na paisuk uh hi. Pian: 46.27. Egypt a tunzawh kum 430 lianteh numei naupang kisimlo Pasal tingteng mi 600.000.00 ( tulza guk val ) Egypt gam pan, Canaan gam zuanding un na pai khiat pih in, tuapen "PAI KHIAT NA" ki ci pan a hih man in, ( Zomi te zong' tu'hun a Gambel/ Peemta ih va'suahna paikhiatna hih nai lo ding in, Zomi pawlkhat te kuankhiathun hih pan lo dia ka cihi. )
Israel te, Canaan gampan’ kuankhia in, Canaan gam mah zuandingin, " PAI KHIA " kik uhhi.
Egypt gampan' Israel te Canaan gam zuanin, Pasian in a paikhiatpih teh mawk paikhiatpih lo in, Israel te a makaih ding' Pasian in Moses na zang hi. Makai mah na zanghi. Tu'hun in zong' Zomi te gamthum na gam kuankhia in, a lomlom a ihtun theih na dingin zong' ( A diakdiak in ) Zomi te tamtun na pen a hi, USA gam a gambel, peemta ih va hihtheih na dingin, a mapangpen leh Moses bang a a kizang, a Mi mal in hong kitel sak hih leh, Dr. Zo Tung Mung mah Pasian in hong zang hih leh kilawm ka sa pen hi. ( Makai tuamtuam bel tam peuh mah in cin, tu'ih kuankhiat hun a, Moses bang khatdan a Pasian in hongzat pen a cinuam ka hihi. )
Israel leh Innkuan pihte, Egypt aa antaw a ahpan lai un, Canaan gamsangh nuntak khuasak na nuamzaw ding cih lunggualh na tawh, Egypt gambel in hong omsuak uhhi. Jakob leh Innkuan pih mi 70 te, Egypt gambel peemta dingin ahva tuncial hun lai un, Egypt mite a ding in, Israel leh Innkuan pihte a tualniam mahmah minam te na hihi.
Pian: 43. 32 ... Pian: 46. 34.
( Ei Zomi te zong’ tu laitak gambel, Peemta, a ih tuntun na, hih a tung a ihgen gam 9 gamte sung a,ah tualniam pente mah ihhih laitak mah a hihi )
Hun hongpai toto in, Israel te Egypt gam a tu'n zawh, a kum 400 val in hongsawt takteh, ahbelh gam Mite a ding in, Israel Mite thahat lua tamlua ta uh ahhih man in hong kitak uhteh' bawl siatna, Salsuah na ciangdong hong tungmawk uhhi. Cihnop na ah, Josef lobuang, Israel leh Innkuan pihte pen Canaan gampan "Sal" dingin ki man aa, Egypt gam ki paipih hi lo hi. Gialkial dangtak na tehang in, ah gambelh na Egypt gam aa, ah tualtang mahmah ah Innteek mahmah khitzawh nung aa, Sal hongsuak pha phing uh a hihi.
Pai: 1.1-22
Israel leh Innkuan pihte bangmah in,Tu'hun pen Zomi pawlkhat te a dingin, Zogam leh Kawlgam sang' nuntak khuasak na ahnuam zawding lunggualh na mah tawh, a kuankhia ih hi aa, "kuankhiathun, ahhih ke'h, Antaw hun" zong ki ci thei veve ding hi. ( Mipawl khatte in, tu'n hun pen, Zomi te paikhiat hun a ci ki om hi ) kenbel Paikhiathun hih nai lo hi ka ci nuam hi. Zomi Mi mal 7.00.00 ( Tul sagih ) sang' a tawmzaw lo kikuan khia khinta a hihman in, Tu'n hun a, ahkuan khia Zomi 7.000.00 valte suan leh khakte in, ihkuan khiatna te a hi, hih gampi 9 te sungpan, tu'zawh kumbang zah? hiam khatteh Zogam zuankik in "PAI KHIAT HUN" hongtung kik kha thei ding aa, tuahun ciangh' mimal bangzah hiam khat in, Pasian hongpiak Pupa luahsa Zogam Leitang tung aa ihciah kik hun dingzong' ih Biak Pasian in geelna neiding hicih ka um hi.
Israel te Egypt a peemta va hi-in, peemta a hih na pan' hong kuankhiat na "Canaan gam" a paikhiatpih a nungta Pasian hi cih um kahih man in, tu'hun a Zogam pan' Zomi te hong kuankhiatpih zong' ih biak Pasian mah hicih ka um aa, hunkhat teh Zogam mah zuankikding in zong' hong " PAI KHIAT PIH "kik theikhading hi cihpen ka umhi. Tu'hun a Zomi gambel, peemta, teng khempeuh zong’ Ih Pu Abraham, Isaac leh Jacob te Pasian, ih biak Pasian geelna mah hihding hi cih ka um hi. LST OT sungteng ih etciang in, Israel te tung a, Pasian in, note Pasian ka hihi cih' tamveipi na gen ciatciat hi. ( A Pasian uh a mangngialh loh na ding uh, a na hopih ciatciat a hihi.) Hih kammal pen, adiak in, tu'hun a Zomi gam ( 3 ) na gamte hong tunpih, ih Biak Pasian in, ei Zomi te zong hong hopih ciatciat na zong' a hih pah a hihi. Tua a hih man in ihtu ihta te ahkhang ahkhang in ih Biak Pasian ihtheihsak aa, ih kihelh sawnsawn dingzong Pasian deih na a hihi.
Thukhup na:
Kuala Lumpur-UNHCR leh Zomi te tawh kisai in, tu'lai pau leh " C " te pen Josef din mun a Pasian in ahna koih hih leh kilawm ka sa aa, " Z " te ihhih leh Judah suante dinmun a, Pasian in a hong koihkhawng ih hih kha tam maw.. Pian: 49. 8-13 "C" leh "Z" te Pasian in hongkoih na ih dinmun tuak hoih mahmah hi. Z ii huamteng ih-hizong in, C te huamteng a hizong in, Topa hoih na in hong ompih tawntung ta hen.

Thangmual dung gamsingte kepcing ding thusunna

THANGMUAL DUNG PEN NATURAL HERITAGE LE BIODIVERSITY KEPCINGNA DINGIN GEELNANEI


Sep 19, 2016
Tedim gamkhen sungom Thangmual kici (Kanedy mountain) kawlten Litataung hongcihsak, pen limtakkivelcian in Pianngeimunkepna (Natural heritage) bawlding hoihmaw hoihlo cihte ento in kepcinghuaimunte hoihtakkepcingtheihnading lampi zongtotoding cih Myanmar Natural Resource and Environment Ministry ah tanupi ahi Union Minister U Onh Win in gen hi.

Sep 19 ni a, Amyota Hluttaw anihveina thukikupna ah, Chin State, Mee luina mun (6)na pan tangmi ahi U Cin Khan Pau in “Chin State, Tedim gam Thangmualdung kepcingding geelna ommaw omlo cih adotnapan, tuadan in akidawngkik ahihi.

Tuaban ah Union Minister pa in, Tedim gamkhensung om Kanedy Mualkici, Litataung ( ThangMual) dungkim pen kepcingna leh Ganhingnamtuamtuam tepianna phualpi ahihzawhnadingin Gamsa, Ganhing le Singkunglopa tawhkisai kimlepan kepcingna thukhuntawhkituak in panlaktheihnading in, akimnai a om khuanu khuapa te ngaihsutna te gawmkhawmin thukhunle sepdantetawh kituak in vaihawmtohtohding in genbehna nei hi.

Manipur ah Zogam salpha 9 te kum 1 cin phawkna kibawl

India gam a Manipur Government in abeisa August 31,2015 ni a,Anti-Tribal Bill 3 a pass na hang a nuntakna apiakhia Zomi hangsan Salpha 9 te' luanghawm tuni dong kivui/phum nailo in kumkhat cing ding hita hi. Hih Salpha mi 9 te kum khat cin phawkna pen August 26,2016 ni-in JCA makaihna tawh All Churachandpur District Diesel Auto Owners Association (ACCDDAOA) khempeuh in Lungphona (Peace Rally) thupitak nei uh hi. Lungphona i deihna le ngimna bulpi ahih le Singtang mite' kipumkhatna (Tribal Unity) thahat semsemna ding cih thu Pu Mang Cin Khup (Covenor of JCA)in pulakkhia hi.
Zomi Salpha 9- te Luanghawm vuiloh zawh kum khat cing ding hi mah le Manipur Government in Singtangmite' deih ngetnate awlmawh loin, piakhia nai tuanlo uh hi. A hi zongin JCA makaihna tawh Singtang mite in Kipumkhatna (Traibal Unity) khahsuah loin, mainawt suaksuak lai ding cih kiza hi. Hih Lungphona (rally) pen Lamka khuapi sung Tedim road tawn in Sielmat lei kiangah lutto uh a, Hiangtam Lamka ah suakkhia in, Salphate luanghawm koihna Pumbuk ah salphate zahtakna leh paak piakna program kinei-in, lungphona (rally) lawhcing takin kizothei cih kiza hi.



Source: Zogam.com via Tongsan

GZA in Laaitui lo cim innkuan te huhna pia

1, 9, 2016|Laaitui
Global Zomi Alliance ii hiang khat ahi Zomi Disaster Rescue Committee (ZDRC) tung pan abeisa Aug 14, 2016 zingsang lam aa Laaitui khuataw mencipna pan lo kisai innkuan (7) te huhna panpihna pia hi cih thu Laaitui- ZYA president Pa Thawng Lam Pau tung pan kiza hi. Hih thu tawh kisai in Laaitui—ZYA in ZDRC tung ah panpihna angetna tawh kizui in hi bang in huhna hong kia ahi hi.
“ZDRC pan sumtang 350,000 ks, innkuan khat 50,000 ks ta panpihna pen Aug 31, 2016 ni in ZDRC pan hong khak cih thu kazak uh ciang in tua ni Aug 31, 2016 mah Laaitui ah tua sumte na sang thei pah ung.”Pa Thawng Lam Pan in Zingsol ah hong gen hi.
Laaitui –ZYA in hih panpihna te pen Sep 1, 2016 ni in lo cim innkuan te tung ah hawmkhiatna nei uh hi.
Huhna ngah teng pen (1) Pa Thang Cin Suan, (2) Pa Gin Khen Pau, (3) Pa Cin Za Lian, (4) Pa En Za Khup, (5) Pa Langh Deih Lian, (6) Pa Kham Suan Mung, (7) Pa Kai Za Tuang te innkuan teng ahi hi.
“Dongtuak mipih te in hih huhna te hangin a lungkham simkhanna te uh pan noptuam pih ding in lam-en ung. GZA makaipi te in Zomi mipih te ading thunget sak den uh hi cih thu atuakkha khuami te tung na gensak un” cih ZDRC ii secretary Dr. Sian Nun Siam ii laikhakna sung pan thuvaikhakna zong genna nei thei ung” ci in Pa Thawng Lam Pau in gen hi.
“Ko bang bel an minsa zong ane thei lo liang hi aa ka kamsiat kawmkal uh ah ka lam-et ngam loh uh leh abeisa hun lai in athu zong ka tel melloh uh GZA te tung pan hibang panpihna ngah kha zenzen ka hihman in GZA makai khempeuh le no hih ihkhua pan hong ngetsak ta no te ih biak Pasian in thupha tampi hon pia hen o. Ka lungdam mahmah ei” ci in Pa En Khan Khup in Zingsol ah hong gen hi.
“Ko bang GZA makai kua teng hi aa, amau bang teng semsem bang dan kipawlna cih nangawng atello te hi aa ko ka telloh ka theih loh uh hang in amau non na nusia lo, non na pampaih lo in hih bang aa ka tuahsiat uhteh hong phawk aa hong huai aa hong huh uh pen ka lungdam lua ka gen dan ding zong thei kei liang ing” ci in Pa Thang Cin Suan in lungdamna thugenna nei hi.
Aug 14 ni zingsang in Laaitui khuataw ah logam kuampi acres 10 kim ding azai mencipna lianpi khat hong piang hi. Tua logam kuam aa lokho pen innkuan (7) pha uh hi. Tua innkuan te in alogam uh leh athaigui athaigah te uh tampi taan lawh uh hi.
—Zingsol tanute

Chin State bup huam 21st century panglong vai kimuh khop ding tangkona

Yangon, 12 July 2016
Asawt lo-in Gambup (nation-wide) huam a akibawl ding Second (21st century) Panglong Conference om ding cih thu huhau in 15 June 2016 ni-in, ZCD President makaih natawh Yangon ah ZCD CEC aom thei teng kamkupna ki neihi. Hih ki muhkhopna pan hong pai ding Gambup huam Panlong nihna khawmpi ki bawlma Chin State bup huam in kamkup khopna khat nei zo leng cih thu khensatna ki nei hi.
15 June 2016 ZCD CEC kimuhkhopna ah Chin State bup huam kimuhkhopna apian theih nading Standing Committee anuai a bang in ki seh khia hi.
  1. Anthony Kap Khan Khual
  2. Vungh Khen Mung
  3. Pau Kim Tuang leh
  4. Bob Tuangpi (Mauvom)
July 3, 2016 in anih veina Standing Committee kamkup na ah anuai a makaite ki behlap hi.
  1. Zam Khan Suan
  2. Zam Za Mung
  3. Nang Sian Muang
Standing committee teng 29 June, 9 leh 12 July 2016 nite ah kimuh khopna kei ki neih beh toto in sepkhiatna leh ngaihsutna te mipi tungah atom in kong pulak khia uhhi.
Pawipi hun, amun, kamkup dingding thulute leh thu tuamtuam;
Thubulphuh: State-wide Consultation, Chin State - In Preparation for the 2nd (the 21st century) Panglong Conference
Ni masa: July 22, 2016 - Federalism and Resource sharing
Ni nihna: July 23, 2016 - Security and Ethnic equality
Pawi Mun: Orchid Hotel, Yangon
Sumbei pia khia ding: United States Agency for International Development (USAID)
Media sapding: Local and International
Broadcasting live: https://www.facebook.com/zcdemo (TBC)
Hih anuai a makaipi te’n thukong honna leh thukong khakna hong neihsak ding’in ki cial hi. 1. Pu Chin Sian Thang – MP, ZCD President 2. U Phyo Min Thein – Chief Minister of Yangon Region 3. U Tin Oo – NLD Patron 4. Nai Ngwe Thein – MNP President
Sapding mimal leh pawltuamtuamte


Contact person:
1. Zam Khan Suan - Phone: +95 (0) 942 110 6179
2. Anthony Kap Khan Khual - Phone: : +95 (0) 942 110 8592, Email: kapkhankhual@gmail.com

Tonzang ah guah tamna pan aa piang bualli khat in mencim beh sak kha thei

Zogam Tonzang khuahuam Mawng Zang khua pan tai 6 na a om ama tawm a piang Bual (mem kicipna hanga piang) tuite pen hon kheh nadingin June ni 3 ni in kipan ta ding hi.
Guah hong zuah ciangin guahtui dimin hong kitapkhap ding pen kipatau mahmah in tua banga patauhna atawm zawk nading leh lauhuai na a om loh nadingin tui guam neu to in tui te tawntawn ta in paii khia ding cih kithei hi.
Hih apiang tawn bual pen tuitam in hong kitam leh Kawlpi huam teng ading in lau huai mahmah hi. Nungkum in zong hih Bual lamah guah tam in mualte kicim in buan leh tui kihel in luang hi. Kawlpi huam sung ankung ciinnate tampi kisiat banah khuasung ah buan tampi dim hi.
Tuuk ciang guah hong tam bang hi leh nungkum bangin buan leh tui kihel hi leh Kawlpi khuahuam adingin ngaihsut ngam huailo hi.

Kawlpi a Lui guam leh tui zatna lamte geelna phualpi (4) na pan kumpi nasem khat in "Hih Bual tui sunga tuite mihing tha tawh kipaii khia ding hi. Tui luang nading lui guamneu to in tawntawn in tuite paii khiat nasep te tawh Bual a om tuite kipaiikhia tading hi. Gam sungah giahphual satin tuipai nading guamte to in tui kipaii khia ding hi" ci in gen hi.
Leisung sumpiang leh Kiim leh Paan kem phualpi , Forest department leh Nepal gam pansan a la in mual gam te khangtoh kim nading kipawl na te tawh mapang khawmin May 20-27 dong Bual ah pai in thukan na nei in muhna te tungtawn in thute ki enpha kik in men kicipna hang a hong piang theiding lauhuai nate kidal khawlh theih nading kidal nading nasep leh sepding geel nading nasep te akibawl thu kithei hi.

FALAM KHUA AH ZINLIN NAHANGIN KUMPI NASEMTE OMNA INN 3 KISIA

May 21/2016
Tuni May 21 ni,nai 12:40 PM kimin Falam khuaah Zinling guahzuk man in,kumpi nasemte omna inn 3 kicim ci'n Irrawaddy News in taangkokhia uhhi.
Pasian kepna hangtawh inn kicim sunga a om mite bangmah cilo hi.


Tedim Leh Kawlpi Kikal Mawtaw Lampi

Tedim - May 20
Kawlpi pan Chin State leilu lam leh adiakin Tedim tawnin Mizoram tawh kizopna lampi pen May 18 - 20sung guah zu hangin nakpi-in mincimin lampi nal gawp ahih manin khualzin mite in haksatna lianpi tuak uh hi.
May 20 ni-in Taingen khang Aiciksak mual kicim hangin nitak lam nai 3 dong mawtaw pai thei lo hi. Tua banah Hiangzing lam pan tuahsuk Theizang tun ma deuh lamkawipi ah luitui leh leinen luangsukin lampi ah dim cip ahih manin mawtaw awk den hi. Mun khempeuh phial ah suangtum kia kawikawi hi. Hih thu hangin mipite gilkial dangtakin pum kawt a ling keuhkeuh tampi om hi.
Lampite atam zaw hawk lam kibawl lo ahih manin lampi khempeuh hawktui tawh kidim hi. Lamkhang leinen tawlh a, lamphung kicim hangin mawtawpite adingin lauhuai mahmah hi. Cycle tawh apaite zong nikhat bup mah pai kul hi.
Guahzuk laitak ahih nak leh numei naupang tawh ahih theih lai teng khualzin loh hoih zaw hi, ci-in mipite in gen uh hi. Tedim Post
A video:





TBC makaihna tawh Tedim ah Khangno Camp kibawl

Tedim - May 19

Tedim Baptist Convention makaihna tawh Rev. Pau Lian Mung leh a team te zangin Tedim khuapi CMBC biakinn ah Youth Camp nasia takin a kibawlsan laitak ahi hi. May 17 - 21 sung hi ding hi.
Kham leh zang Pawlpi namkim kigawm camp lut mi 1200 val min kikhum hi, cih information department vaisaite tung panin kiza hi. Kawlzang panin manlong mawtawpi 2 dim tawh mi 100 val hong pha uh hi. Kham lam pan khua 70 val pan hong kihel uh hi, ci hi.
Pasian' maipha a zong khangno hizah ta lamdang bang sa zawzen ing. Pasian in Zomite khanggui hong khel toto lai ding cih ka khamuang tuam hi... ci-in Tedim papite kikum litlit uh hi.
Limla: Thorthon 
Credit: ZYA Tedim Post

Tedim ah galpi 2 na lai aa a site guh kizong

Khuangkhan - May 19

America pan guhzong dingin Vanleng neu tawh hong pai Mr. Aaron Michael Korkki leh a lawmte in May 18, 2016 ni in Tonzang gamhuam Khuangkhan Khua Tai 5 a gamlatna munah Galpi 2 lai a akia valeng sik pawlkhat etcianna nei uh hi, cih thu kiza hi.
Source : Khuangkhan Hausa via ZYA, Tedim

Tedim ah palikte innvak in mipite tawh holim

Tedim - May 19
Bo Win Naing, Tedim township palik lian pen nihna makai-in tuni Khualai veng tengah palikte inn vak uh a, guih theih kham theih abei nading, numei buanna a bei nading, kumpi phalloh galvan/thau tawi loh nading cih thute kuppih uh hi, cih kiza hi.

Tua banah mipite kiang panin palikte in bang sem leh deih, bang danin palikte om leh kilamen, cih thute mipite tung panin ngaihsutna ngen uh hi, cih kiza hi.
Naupang kumcinglote cycle hawl vai, cycle hatsak luat vai, mi 3 le 4 cycle khat tungah tuan loh ding vai leh lukhu khuk hamtang ding a kulzia cihte ban gen ngekngek uh hi.
Gam hoih nading leh siatna a ven nadingin palikte in pan la mahmah uh a, nidang palikte bangin siat muh nawn het loh ding leh vai khat peuhpeuh suak ta takin koh hamtang ding thupi ta hi, ci-in Tedim nupite in gen uh hi. ZYA - Tedim Post
Palikte i sap nop leh:
ျမုိ့နယ္ရဲတပ္ဖြဲ့မွူးရုံး 070 50043

USA te Helicopter Tawh Tedim Khua Huam Ah Pai

Tedim: May 1 ,2016 ni in Zogam Tedim khuahuam ah USA gam pan misi guh omlai te azong pawl te in helicopter tawh hong pai in galpi II hun lai a misi guh a omlai te zong uhhi.
Hih pen USA gam adingin akhatvei na hong pai na ahihi. Tedim khua kianga Ai Pha khua ah pai in zong uhhi. Caimtehnate zong mu uhhi. USA pan hong paite mi 4 pha uha kamphen zong azui om in, tua ni mah in Kawlpi ah paikik uhhi.


A (6) veina Siamsin Medical Trip le A (7) veina Siamsin Summit Nuamtak ki zo

A (6) veina Siamsin Medical Trip le A (7) veina Siamsin Summit Nuamtak ki zo;
=============================
Convenor Dr. Thang Sian Sing (Siamsin)
Convenor Tg. Dim Kop Sang (Inntek)




Zomi Siamsin Kipawlna - Myanmar in Zogam sungah nuntak khuasak hatsatna leh kizopna lampi haksatna khua te ah ahun lapin aki bawl zolo cina luna tampi tak te anatna uh velin zatui,zaha piakna akong in ki nei hi. 2010 pan kipan kumsim khua khat bulphuhin khuakiim aom khua te tawh kigawm khawmin Sangmansa Siavuan,Simah asem te leh asin lai Siamsinte, Siamsin sangnaupang ahi thei zah kipai hi. Siamsin Seminar (9) Heilei khuapan aki vaihawm ahi a (6) veina Siamsin Medical Trip to Guasing 15-17 April, 2016 kumin nuamtak ki zo hi.
Hih hun sungah kawlgambup Siamsin Makai teng thu kikupna Siamsin Summit zong kibawl hi. Kum lang nasepna teng report puakna leh mailam kalsuan zia dg kikup khopna kinei hi. 2009 pan kipan Siamsin Summit aki nei toto hi aa tukum 2016 in a (7) veina Siamsin Summit nuamtak kizo hi.
*Cina velna le zatui piakna
*Ha tawh kisai (Bot,phop)
*Naupang pattahna
*Thusinna
*Survey
*Summit
*Cidamna tawh kisai thugenna le leitung thu tuamtuam

Note: Guasing khua pen Zindo vaimuak siam,Anhuan meh bawl siam, etc...... ahi manin nuam kisa mahmah hi.
Lungdamna lianpi ih ciamteh hi.

Photo: Lian Bawi Siamsin & Zompi

Tedim khua huam ah gial lim kiat mahmah

22/4/2016 ni zingsang Tedim ah gial khutpi ciacia kia in akiat tungin ngaihlua ahihmanin inntung suangtawh khat leh kaht a kideng bang kisa man hi. Minutes(10) sung kia in lei lakah vuk paak zihziah hi. Hih pen Kawlgam leh India khanglam teng ah zin tawmvei a lin khitzawh ni tam kihallo in a hihi.

Tedim gamhuam ah zingsang nai 1:30am hunpawl in Gial nak kiat mahmah hi. 
Hih Gialkiat na hang in Tedim gamhuam, Lailui khua ah zong inn 72 dingtang bang Sikkang teng vang in, avang lote zong dep zihziah hi.

Tuithang khua ah zongh innsia pawlkhat om a hihi.

photo-Mung No




Laitui



Tuithang
Tuithang



Cikha khuapi ah Chin State minister Pu Pau Lun Min Thang pahtawina kibawl

Chin State Cabinet Minister sungah Social Welfare Minister panmun hong ngah Pu Pau Lun Min Thang pen ateenna le khankhiatna khua ahi Cikha khuamite in Chin State Cabinet ngahna lungdampihna & Pahtawina pen April 17,2016 ni-in Cikha khuapi ah thupitak nei uh hi. Tua lai ah ZCD MP teng ahi; Pu Chin Sian Thang, Pu Gin Kam Lian, Pu Kham Khan Thang, Pi Cing Ngaih Mang te'n zong va zui thei-in, Khuazangbup in khuamual ah Thau le Zola, Zongeina Lam tuamtuam tawh nasiatak vaidawnna nei uh ci hi.
Tua Lungdampihna le pahtawina hun tun madeuh kalkhat sap April 11-16, sung a (1)veina Cikha khuabup Siansuahna & Thupha Dawhna cialpi nei-in Rev. Dr. Do Suan Mung (President- FBBC&S) le Rev. Kham Suan Go (Director- Mual hoih Gospel Ministry) te'n " Ka gam le ka minam uh hong dam sak In- (2 Khang. 7:14) bulphuh in Pasian thu tangkona nei uh cih kiza hi.
Tua banah India gam Manipur State, Lamka khuapi lam pan Zomipih mipil, makai pawl khat zong pai thei in, Zongeina Puanlaisan, Tangcing cihte tawh pahtawina a neih banah Lungdampih thugenna nasiatak nei uh ci hi. Kawlpi, Tedim lam pan Motor 8 tawh honkhat in zuito thei cih zong kiza hi. Hih bangin Zomite sungah Zogam (Chin State) ah Pasian in makai thak hong piak manin, Tongsan Media Group pan lungdampihna i puak phapha hi. Zomi MP teng Topan thupha pia in, hong zat sak semsem ta hen!

Zogam sung guahtam dongtuakna pan, kizopna a haksa pen khua

August 15/2015
Tonzang gamkee sung a om,Mawng Laang khuapen tu-ni dongin mundang khuadang tawh kikawmthei naivetlo ci uhhi.Khua dangpan Mawng Laang khua a,azinpak ahawhpak a pai pawlkhatzongh tuni dongin ciahthei nailo cih thu kiza hi.
NGO nasem tampi te'n leh INGOs lam nasemte'n huhna tampitak napia khinta uh a,a hizong kizopna lampi hoihloh manin tu-ni dong tua huhnate ngahthei nailo uh cih thukiza hi.

Zogam guahtam dongtuah sung Tedim leh Tonzang antang man

Tedim - August 14
Khuahun siatna hangin Kawlgam mun tuamtuam leh Zogam mun tampi mah ah lampi kisia, lei kisia, inn cim lo cim cih bangin haksatna namcin in hong tuam hi. A diakin Tedim leh Kawlpi kikal lampi pen van akipuak theih nawn loh ciangin van man hong khang hanhan hi.

Tedim khuapi ah thukhual sumbukpite hangin tampi nuam tuam a, tua kawmkal mah ah lampi vang thei tuan lo ahih manin antang selin a zuak nuam nawn lo zong om hi. ZYA in vanman khangsak lua lo dingin sumbukte tungah kithum zel hi. Ip khat Ks. 50 ciang kah man hi. Tedim gam uk Pu Go Suan Khai vaihawm siamna tawh Mizoram pan tax free dingin antang kila ziahziah hi. Sumbawlte in Ks. 35000-32000-31000-30000 cih bangin hong zuak thei uh hi. ZYA-Tedim in avaikhah ciangin amet them zong om loin Ks. 28000/- tawh pia thei a, Tedim antang man khang lua ding akikham zo suak ahi hi. Hih pen tawmvei sung bek ZYA in hanciamin inn khat bung khat Ks. 9000/- tawh akizuak ding ahi hi.

Tonzang khuapi ah July kha bei pan kipan tuni dong antang lei ding them khat zong om lo a, asang pen leh anunung pen Ks. 70000/- tawh kilei man hi. Tu-in ZYA-Tedim leh Tonzang Taungpyatann, Tonzang Dongtuak Huh Pawl cih bang leh Tedim pan sumbukpi thukhualte hangin Ks. 36000/- tawh lei theih ziahziah dingin antang om thei ta ahi hi. The Tedim Post