Showing posts with label Innpi Emperor. Show all posts
Showing posts with label Innpi Emperor. Show all posts

Minam lapsangna pan Minam khantohna ah

Tan 10 results hangin a thanem huai tampi a om sam hang, a tha ngah huai tampite hangin Zomi te in khangthak siamsinte ki lungdam pih mahmah leh ki angtang pih mahmah tek cih pen kimu thei hi.
Hih mun ah, Zomi mimal kim khatciat in, a ma muntek ah na madawkin na gualzo peuh uh hileh, tua in minam lamsang khin zo hita hi.
Gtn. lasa te ong minthang semsem in, laisinte pilna sangpipi nei aa, sumbawlte sumhau minthang in ong om aa, zum nasemte zalianpipi in ong om uh leh, tua in minam min ngaihsak, a minam vangpia in, minthang sak, minhoih sakin minam lamsang hi.
Hih pen Minam lapsangna ciang hi aa, a mipihte in lungdam leh angtan pih cihciang bek hipan in, minam khantohna hi nailo hi.
Minam lapsangna cih tan ciang zongh hoih mahmah khin aa, hakai pahtaak lungheng cihdan hilo in,minam min a lamsang hih a madawk teng mah in, minam khantohna ding thasial hetlo aa ong sepkhiat uh ciang, minam khantohna om zo pan ding a hihi.
Zomite in minam lamsang baan ah, minam a khantohna ding,
1. Mimal kim in i sepna i omna ciatciat ah a gualzo a madawk i hihkim tek ding thupi hi. (hitan ciang pen minam lapsangna)
2. I gualzawh, i nopsak ciang, gam leh minam mangngilh loh aa, i muanpen zongh galsuak thei cih i lehbat khakloh ding kisam hi. (hitan ciang pen mimal nopsak, khantohna)
3. Hih bang in mimal kim khatciat, a mau muntek pan a hih theihna tek uh ong kigawmkhawm thei, ong kilemtuah in ong ki khuituah zo hi leh, minam aa dingin a bukim khantohna om in ong phungcing zo semsem ding a hihi. (hipen minam khantohna)
Zomi ulian, mipil, sumhau a tamzaw te pen hih numbat 2 na ciangtan ta ah lungkim kha pahpah uh tawh kibang pian mawk hi.
Tua a hihman in, kei sangkah hi nawnkei ing, kei minam nasem hikei ing, kei sum thalawh nasem bek hita ing cilo in, i sepna peuhpeuh ah Zomi te aw, hanciam in mainawt aa a khangto kim ciat hih sawm tek ni.

Zogam khantohna leh Zomite khantohlohna

Zogam khantohna ding a kigen ciang, lampi puahthak ding, gunlei lamthak ding, kumpi zuminn lamthak ding, mei hoih tui hoih ding, sanginn hoih ding cihte vive kigen in, tua pen Zogam khantoh nading thu hi aa Zomite khantohna thu higai khinlo hi.

Gamdang pan Zogam a va ciah pak pawlkhat tawh ka kiho khakna tungtawnpan a hizong, Zogam, Kawlgam pan gamdang a paite ii thugennate tungtawn pan a hizongin, ka phawk khak thu khat in, 

Khantohna i gen ciang, i mitkha leh i ngaihsutnate ah inn sangpipi, mawtaw tampipi, cihte kimu masa, kiphawk masa kha thei hi.

A diakin Tedim pen sumhau tam mahmah ta, inn hoih kilamthak ziahziah, mawtaw hoihnono a nei tampi om mawtaw cycle bel genvetloh cih ding dinmun kitungta in a khangto tawh kibang hi.

Lamkhat pan, lamsii-kaan ki neimello a ci zong om kieukieu lai hi. Tua sang' a suukzaw thamtham khat pen, mihing kideidanna lian mahmah lai cih thu a hihi.

Kumpi zumte ah va pai lehang, sum neileh neilo pen ong don dan, ong kinbawl pih dan kibang hetlo hi ci in a gen tam simsim lai hi. Biakna pawlpi sung ah zongh sum neileh neilo pen a pau ngamzia uh kibang hetlo ci hi. Khuasung vanzuakna saite ah zongh saingakte in lei ding aa a upmawhte uh leh a upmawh phatlohte uh pen, a hopih dan kibanglo ci hi.

Pasian nasem sia khat, thau pian, hauh mel pian in zum ah hoihtak kihopih, a nasep ci aa a dot teh biakna sia a cih leh, a ho dan, a buaipih dan kidang lian ci zen sam hi. (tua siapa ngiat in, pulpit tung tektek pan a gen)

Hih te pen Zogam khantohna thu hilo aa Zomi khantohna thu a hihi. A gam bek hiloin, a mi zongh khantoh ding kisam a hihi. Hunkhat lai in, (sianggen lehang) Zomi i cih nop sung pan, sanggam Ngawn, Zo leh Sizang pen Tedim kici diak sung ah kideidanna lim om ngei kha hikha thei ding hi. (mawhsuut, thuumna, kilemna cihte bawl a kul leh bawl huai mahmah tawh kibang hi.)

Kideidanna om minam, guptuamna om sangkhan (classroom), kineu-ettuamna a omna pawlpi, kihazatna tamna khuasung, kilangpanna a tam kipawlna tuamtuam cih dan a tam lai siah, angsung khual, behpai, pawlpi pai, khuapai cihte tam kinken ding hi.

Lampi hoih i deih mah bangin, lamsii-kaan zongh i neih ding kisam aa,
makai hoih i lunggulh mah bangin, nungzui siam i hih ding zongh kul aa,
kipawlna tampi i neih mah bangin, ki panpah ding zongh thupi aa,
Pasian thu i up i theih mah bangin, i zuih i nuntak pih takpi ding zongh hoih aa,
mihing kicing cih bang omlo ahihmanin, ki telsiamna, ki maisakna, thapiak siamna cihte zongh kisam mahmah hi.

Zomi Government Structure leh Tax System

- Ciau na ngawn aa om Zomi Innkuan, Leitungbup ah Zomi Innkuan Kipawlna pen, mun 100 val ah om kha ding hi. (Pawlkhat te a gam zui, pawlkhat te a khua zui, pawlkhat te state zui)
= hih teng kigawmtuah na LZI Leitungbup Zomi Innkuan in khawmpi ong nei zo leh
- Zomi Siamsin Kipawlna, India lam leh Myanmar lam teng kigawm in Khawmpi ong nei khawm zo uh leh (Zomi Siamsin Kipawlna India lam aa te cih thadah, Myanmar sung bek zongh hat mahmah khin sa ing, khua tampitak ah om khin uhin thupi hi.)
- ZYA te zongh Kawlgam sung ah khua 50 val tham ah om uh a hihman in, hih teng kigawm in Khawmpi ong bawl zo gaip mengmegn uh leh ngaklah mahmah ing.
* Hih khawmpi bawl ciang, namdang kipawlna te zongh sam/invite in, a mau tawh hun saupi aa ding network khat in khut kilen khawm suak pah ding.
* Kawlgam Media liante hoihtak in lungkim sak in, Zomite dinmun a thahat mahmah i hihlam kilangkhia sak ding.
Namdangte in Zomi ong langpan leh tua pen phamawh deklo aa Zomi veve khat in Zomi ong taihtaih leh, tua pen, a tal tawh inn kawmzawl a phuphu bang ding hi. Hih Inn sung ah om aa, a sung aa a hoih ding aa kizem TV, Table, Tutna te a taihtaih mihai khat tawh kilamdanglo ding hi.
Zomi Siamsinte in tua khawmpi pan Zomi Students Union cih tawh ong ding khia zo uh henla, Tua ZSU nuai ah University sang naupangte Siamsin min tawh department khat in om in, Laisiangtho sang naupangte department min dang khat tawh om in, Sang tuamtuam pan a man te Alumni min tuamtuam tawh om in, a vek aa tua ZSU min nuai ah kigawm khawm thei uh leh.
ZYA in zongh tua khawmpi pan Zomi Youth Union cih tawh ong ding khia zo uh henla, Tua ZYU nuai ah, ZYA a hi sese lo, khangno kipawlna tuamtuam a lut nuam bangbang kilut thei hen aa ZYU min nuai ah kigawmtuah thei uh leh. Bg hg hiam cih leh a kipawlna min uh lah khel nuamlo, kipawlkhop kipumkhat ding lah lunggulh i hihmanin, Union min nuai ah ei kipawlna tek tawh kilutkhawm in kigawmtuah thei leng.
Tua hi leh Zomite in Youth Union leh Students Union kinei ding hi.
Azom ah Zomi Women Union om in, pawlpi pan, veng pan, khua pan nupi kipawlna teng tuah kigawm tuah leh. Union 3 pha ta.
(Nasep ding: Zomi Numeite lapsang, khutsiamna leh a tuamtuam na hoih hilhna sepna nei ding)
Tua bek thamlo in, Zomi Religion Union ci in, Christian min pua saklo aa, tua ZRU nuai ah, Zomi biakna kipawlna tuamtuamte (Laipian dongin) kigawmkhawm thei leh. Union 4 pha ta.
(Nasep ding: Biakna suaktat lohna te phu khia ding, Singlamteh kiphuk, Biakinn hon ding kiphallo, Biakna simmawh thuak khakna te encik ding)
Myanmar gambup aa om, Zomi kumpi nasem teng kipawlna khat zongh nei thei lai uh leh lunggulh huai hi. Tua teng kizopna khat om in, kei nasepna lam nasep awng, kisiau theih cih bang a om sim, manlangtak in thu kizakna nei thei aa, Zomi nasep deihte mah i ki guan samsam theih ding ong vaihawm thei uh leh. (Hih pen Labor Union lian cih theih lam omlo in, Public Service Union / Employees Union khat)
Tua khit ciang, Zolai tawh kisai kipawlna tuamtuam te zongh, a mau min tek mah tawh om ding, a hih hg' Zomi Education Union -ZEU cih min nuai ah ong kigawm khawm thei uh leh.
Zomi Media kipawlna: Media kipawlna cih ciang, thusuaksak ding, thuthak tangko ding cih bek hilo in, media etcik nasep zong neih huai hi. Media dang tampite in thumanlo/deihkah in Zomite thu bangci gen uh hiam cih te pawl, statement khah a kul leh khah ding. Tua baan ah, namdang a tuahsia te, namdangte makai sihna natna a om ciang, media pan in dahpihna tangko in, namdangte tawh picin suahtak in kalsuan huai mahmah ta hi.
ZYU, ZSU, ZWU, ZRU, LZI, ZEU, Media te leh Kumpi nasem kipawlna teng (ahunzui in a kisam bangbang) Zomi Council nuai ah kigawm tawh sawn thei leh hoih mahmah dingin ka um hi.
Hih mun ah Zomi Council aa panmun ngah zo dingte pen, a sung aa Union khat teitei ah panmun a len ngeisa te bek ding.
Tua Union aa panmun len dingte pen, tua sung aa kipawlna ah makai ngeite bek hi ding.
Tua hileh, panmun mawk deihna peuhtawh, tanau hauhna sum hauhna cihte peuh ciang tawh panmun ki ngah zolo pah ding aa, makai a sem ciatciat ngei, a hunhun in mapang toto sa te bek in panmun ngah toto ding uhhi.
Tun Siamsin makai ci, sangkah nawnkei leh bang siksan ding cih a thei mello zongh ki om hi. Tua a hihman in, hih lampi ki khungto diudeu thei hi leh, ZSU pan a man ciang, ZYU ah tung to ding hi. ZYU khit teh, ZRU lam maw ZEU lam maw banglam ah cih telthei lai ding aa, kumtam picin hun ciang Zomi Council ah tut hun tawh ong kituak to ding hi. Note: Advisor/consultant bel, a kul bangbang in seh theih huai hi.
Tua bang hi leh, kipawlna ki mawk phuat phuat cihte zongh om tawm tuam ding aa, om leh leh thahat nawnlo ding hi. Gamdang pan aa te in zongh, hih kipawlna teng mah tawh khut kilen in, mapang hi peuh leh thahat in awkhat lawngkhat in kiging khawm thei ding hi.
Atawpna ah, Zomi Council tawh GZA leh a hunhun aa Zogam MP a ngah peuhpauh teng tawh, hih 3 pen USA government structure dan in genteh lehang
Congress= Zomi Council
Supreme Court= GZA
President Department= Zogam sung Election zo peuhpeuh
Hih bangin, Zomite minampi i hihna khat zui in, Official takin kilamthak aa hizelzul lo in, i om zawh ding ka lunggulh mahmah hi.
Kipawlna tuamtuam Union nuai ah a lut nuam peuh lut thei ding. Union nuai ah lutlo in,
Mipi lampan, GZA leh Zogam MPs te tawh kizop nasep mapan nop leh hih Zomi Council tungtawn pan hi ding. Hih laibup ah ka genloh khat om aa, tua pen GZA panmun kitel dan ding genlo hing.
Zomi tax: Kipawlna te ah Member te in tua kipawlna ah Member fees pia tangtang ding, Tua kipawlna te Union nuai ah a lut ciang, Union tung ah member fees pia tangtang ding. Tua Union in Council tung ah member fees pia tangtang ding. Tua Council ii ngah pen GZA, ZC leh MPs te in, ong manage ding uh. Emergency ciang bek aa sum kidong bapbap cihte, sep ding khat om ciang bek aa Fund kizong cihte hilo in, khasum aa member fees te om den aa, a kul bangin zeek, metbawl ding hi hoih mahmah hi. (Union ah member fees na ngawn a pia zolo, a pia nuamlo te in, kipawlna khawng phuatloh ding mah hoihzaw pah ding hi. Phuan teitei in Union tawh Council tawh kizom tuankei leh, Zomibup Level in thahat zo ngeilo pah ding hi. Tax ginat lohna gamte a tamzaw zawng pah uhhi.) Ei omna gam ah piak ding, ei sepna gam ah piak ding himah ta leh, i omomna pan Zomite i dinmun in hibang in ong kal a hihlam kiphawk tek huai hi.
Genleng bel baih mah hiven, ....&^*%$"
Hih pen, makaipi leh kipawlna piteng ong kisatsuah ngeingai uh leh a piangthei lua ding thu hi in ka um hi.
Kipawlna phuan thakthak a omsa teng zongh,.....&^*%$"
Tua a omsa kipawlna teng a khuituah ding leh kipawlna thupilote bei aa, kipawlna thak phuat ding baihsak ziauhziauh nawnlohna ding hih, hih bang dan system kisam hi. Dongtuah ciang bek aa, mapang khawm hilo in, Zomi cih a om lai teng mapang khawm thei dingin, tung Sianmang in Zomite ong siamta hen aw...
Ldam mahmah ei (Ngaihsutna kibat pihlohte picinna tawh kitelsiam ni.)
INNPI

Suahtaakna leh Pilvangna

Suahtaakna leh Pilvangna
===============
US (gam khangto sa te) leh Kawlgam, koi ah kisuaktazaw?
Kawlgam ah mawtaw cycle pen mi 3 mi 4 tuangin lukhu khu selo aa hatsak mahmah theihna mun tampi om in US ah ki ngah khollo kha ding hi. Kawlgam ah mawtaw tuankawm zatep, seat belt gaaklo in phone len kawmsa aa i hawl zong, US gam zah in buaina omlua lo kha ding hi. US ah bank card zat sim, phone location turn on sim, i zat hun, i zatna, koi mun ah cihte auto in theihsa hi pahpah aa, thukante'n a theih nop khat sulzuih ding baihin, kawlgam ah tua zah aa ong ki enciklo hi.
US ah cash in hand te thukhat, sumlut zah, sum neih zah theilua kisa in, tax pen ong dok ciatciat thei uh aa, golhguk kipia theilo lai in, kawlgam ah sumlut zah neihzah cihte ong encik lo baan vuah, niangtui man ci ziau leh vai tampi siang thei lai hi. Mawtaw i kawi sak ding khawng ciang, signal light lak selo in kawlgam ah a kihawl theihna mun tampi om aa US ah hi leh kawlgam sang' strict zaw veve ding hi.
(tua leh, hih gam te 2 koi suaktazaw?)
Cih nopna ah, suaktatna cih pen, a huampi in nam 2 om cih theih a hihi. kawlpau in, baung (ciangtan nei huang) sung ah suakta tak in om theihna, sep theih pau theihna cih leh, baung (ciangtan nei huang) a omlo suaktatna cih a hihi. Thukhun tawh kituak a hih naak leh suakta takin pau thei, gen thei sem thei, bawl thei in a hizong, thukhun pua a pial sat aa leh, thukhun tawh kizui in thu kikhen hi. Gtn. freedom of speech ci in, kisuakta sak aa mimal pilvangna (pin-ko a thih-sate) tawh a kikop kei aa leh, a suakta gam kici US ahizong, a suakta nailo gam kici, kawlgam a hizong, gam tampi ah tuabang dan mite in mat thuak veve uhhi. 
Facebook sung aa lai a post na hang bekbek in kiman pen mi tampi om khin cih IT news sim zelte'n thei tek ding hihang. Fb sunglo a pua lam ah zongh, a hang tuamtuam tawh a kiman tampi mah om lai ding hi.
Cihnopna ah  freedom cih pen, utbang aa pau, gen, sem, bawl theihna license hilo aa, liangko kikimna cih zongh, mihing khatciat nuntakzia, sumneih zah, zaliatna, thu neihna cihte kikim ding cihna hi tuanlo hi. Suahtaakna pen, mimal pilvangna (a thih-sate) tawh a kithuah kei aa leh, tua pen buaina piang thei aa zatkhialhna lam ah langkaaizaw hi. Tuahangin, pawlkhat bangin Kawlgam pen democracy tawh a mite kituak nailo hi ci-in a gen bang tampi om ngei hi.

Zomi sungah banghangin kigensiatna leh kihawmthawhna tam

Zomi sungah banghang kigensiatna leh kihawmthawhna tam
================================================

(Zomi tampi in Zomite namdangte lak ah angtang nop laitak, gualtung tuan ding hanciam laitak, 
pawlkhat te in a mau tanau teng khawng, beh leh phung, pawlpi khat ciang, Zomite lak ah angtang nuam, gualtung tuang nuam a hihman un, 
Zomi veve, a mau tanau lo, pawlpi, beh leh phunglo te ii nasepte gensia nuam, pahtawina ngahte lungdampih theilo, thu vaihawmte langpan aa hawmthawh bawl nuam kihi kha ding hi.)

Pawi khat kibawl leh kigensia, thu khat kivaihawm leh kihawmthawh


Lungsim tangzai, picing, minam lian: Mikangte in, Human Rights thupisak in, a mau minam aa ding bek cilo hi. (Mi khempeuh huam uhhi.)

Lungsim tangzailozaw deuh: Korean te, Japanese te in, Chinese te a mau gam leh minam, leitung level in bangci run zawh suaksuak ding cih ngaihsun uhhi. (Amau gam, leitungbup en in huam uhhi.)

Lungsim toizaw deuh: Thailand, Indonesia, Laos cih te in, a mau gam leh minam, Asia level in bangci run zawh ding cih ngaihsut in nei uhhi. (Amau gam Asia level en in huam uhhi.)

Lungsim toizaw kaan lai: Kawl kumpi in, Kawlgam sung ciang ah, mualtung mite sang bangci dinmun sangzaw ding cih bek thei uhhi. (Amau dinmun, Kawlgam sungciang en in huam uhhi.)

Lungsim toizaw kaankaan lai: Kachin te, Shan te in, mualtungmi tektek lak pan, koici madawk pen ding cih ngaihsun uhhi. (Amau minam, Kawlgam sungciang en in huam uhhi.)

Lungsim toi penpen: Zomi pawlkhat Zomi leh Zomi kikal, kidembawl, ki el bawl, ki haza in, a dang, a pua lam, a zaizaw cih peuhmah ngaihsut in neilo uhhi. (Zomi sungpan, koimah a khuadaklo, a mit keuh thei nailo tengin Zomi sung ciang bek en uhhi._ Tua baan ah, Zomi sung na ngawn pan, tanau ciang, beh leh phung ciang, pawlpi ciang bek a ensuk teutau sawnsawn kiom mahmah lai hi.)

Hih bangdan, lungsim toi, Zomi sung ciang bek a en, i om lai man in, Zomite khat leh khat tha kipia theilo, kipanpih theilo hi hang.

Zomi sung pan lungsim toi kaankaan lai pen, ko beh, ko pawl, ko tanau a cite kaankaan aa lungsim toi, lungsim neu,angsung khual kiomlo ding hi.

A limlim in, ko beh leh beh dangte, ko pawl leh pawl dangte, ko tanau teng leh mi dangte cici nawnlo in,

Zomi te leh Chin deihte kikal cih ciang beek en hile hang, Zomite leh Mizo, Zomite leh Mualtungmi dangte cih bangin i ngaihsutna level sangto sakzaw in, i muhna mit zaisakzaw lai lehang, Zomite khat leh khat kilamsang nuam ding hi hang, kipanpih nuam ding hihang. 

Hih bang i genciang, mite tawh kidembawl ding, kitehkaak ding cihna hi pahpah samlo aa, i ngaihsutna koi bang ciangin zai, bangzah takin toi lai a hihiam cih i kiphawkna ding a hihi.

Zomi tampi in Zomite namdangte lak ah angtang nop laitak, gualtung tuan ding hanciam laitak, 
pawlkhat te in a mau tanau teng khawng, beh leh phung, pawlpi khat ciang, Zomite lak ah angtang nuam, gualtung tuang nuam a hihman un, 
Zomi veve, a mau tanau lo, pawlpi, beh leh phunglo te ii nasepte gensia nuam, pahtawina ngahte lungdampih theilo, thu vaihawmte langpan aa hawmthawh bawl nuam kihi kha ding hi.

Tanau, beh leh phung, pawlpi itna hoih aa, a hizongin
tanau khat bawng khat i gup nopluat manin, Zomi pihte va nial gaakgaak, va gensiat keei, va hawmthawh pen bel, ong haivai veve hi.

Australia gam khuapi ii thu tawm


Zomi tampi omna, gam Australia ah khualian khuagol kici leh Melbourne leh Sydney mah kithei pen hi. A khua 2 in khangto mahmah hi. A hizongin, Australia gam ii khuapi pen, hih khualian te in ngahlo in, hih khua 2 zah aa a khangto hetlo, Canberra khua hi sese hi.
A hang pen, hih khualiante 2, Melbourne leh Sydney in Australia gam ii khuapi ding kituhtuh uh a hihciang aa kua mah piak zawk sang' a omlo ding ci-in, hih khua 2 kikal aa om khua neu khat a piak suk uh a hihi.
Tua kikal ah khua neu tampi mah om aa, guptuam, piaktuam neilo lua kisa,  tua khua neu teng na ngawn pan, hih khualian 2 ii, a laizang theithei aa khua khat a piak uh a hihi. (Sydney lam bel tawm nehzaw deuh).
Lamkhat pan, a genna vuah bel hih khualian 2 te pen tuipi gei ah hi-in, gal tung leh, khuapi laakna baihlua ding a hihman aa, tuipi tawh kimat lo khua khat a kiseh hi ci in, a taktak ah, tua pen a vang uh a kepna hi ci in kigen hi. bg hg hiam cih leh tua khuapi zongh, tupi tawh kigamla tuanlo hi. Ldam (INNPI)

Technology leh sahang nambat 666

Leitung pen khangto bekthamloin khantohna manlang mahmah ta hi. Mipil misiamte ii bawlkhiatna zui-in nasep silbawl ziate tampi kikhel toto hi.

Nidangin, sumdal zatna pan in, bank card vive kizangh ta hi. Tu-in a hihleh, smart phone pan zongh kipia ziauziau thei ta hi.

Sumhau tampitakte ii a tuakkhak uh thu khat pen, a tate in, a pa card or phone tawh zinmang thei uhhi. A pa te in a theih uh ciang, bank ah report in, tua bank card khakcip sak aa, tua ma sung tampi na kizang khin thei hi. Tua danlo hacking ci in, kizatsak sim, kiguksak sim thei hi. Tua a hihman in, hih tawh kisai buaina a omlohna dingin mipilte in ngaihsun in sin kawikawi uhhi.

Tu-in, iPhone in, finger print bek tawh phone a kihong thei dingin bawl khinta uhhi. Password zat ziauh bek pen, hackers te aa dingin piang thei lai a hih man a hihi. Phone zongh mangthei, kisut thei a hihmanin, tua sang' a kipzaw ding ngaihsun toto lai uhhi.

Video sung khawng ah a kimu thei, kongkhak khawng lut dingciang, finger print or mitang scan cih dan bek tawh a kihong thei, kilut thei cih bang om hi.

A tomin gen leng, bankcard te zongh, a kia theilo, a mang theilo, a kisut theilo dingin vunnuai ah koih sin uhhi. Baanvun nuai ah koih uh aa lem hi. Ahih hangin, khut kitan thei ci in, pum tung ah koih ding ngaihsun uhhi. Sumpiakna nuam dingin, taltang tung ah hi leh, sai ngakte in scan mengmeng thei pen ding ci uhhi. A hihhangin, Laisiangtho sung aa kigen khol sahang numbat tawh kituak ding a hihman in ci-in, tal tung ah koih nuamlo uhhi. Gawngvun nuai ah a koih sin vua leh, scan ciangin maanlo thei, kipelh thei a hihman in, a tawpna ah, taltangvun nuai mah ah koih ding a hoih pen ong suak veve hi. 

Mangmuhna 13:16
Tua ganhing in a lian a neu, a hau a zawng, sila leh sila a hilo, mi khempeuh in a taklam khut tung uh ahih kei leh a taltang uhah ciamtehna a neihna dingun thu a pia hi.

Tuabangdan tawh vanlei vanzuakna ah vai ong lem mahmah ding aa, card thun dihdih, sumdal piak dihdih pen nawngkai ong kisa dingin, a tamzaw in, talvun nuai aa card pan piak bek ong sang nuam ding uhhi. Supermarket tampite in, member card, club card cih bang nei uh aa, tua hun caing, club member lutte bek in lei thei ding a cih hun zongh ong om kha ding hi. A zuak nuamte in zongh, tua bang talvun nuai aa card system a zat keivua leh kisanglo cih khawng ong om ding hi. Banghanghiam cih leh, tua bang system tawh a hih uh ciang bek, nasepna lem leh olzaw ding, bit zaw ding a hihman in, tua bang a zanglo te tawh kizopna nawngkai kisa ding hi.

Mangmuhna 13:17
Tua ahih manin tua ganhing min ahih kei leh a min tangin a nambat ciamtehna a tungah a neilo mi peuhmah, vanlei vanzuakin paikhia theilo uh hi.

Hih bangdan pen, taltung ah a hih hangin, computer tawh check ciang, scanner tawh scan ciang bek ki ngah ding aa, mihing mittang tawh kimu thei tuanlo lel ding hi. Taltang tung ah 666 ci aa ki suan venvan ding cihna hilo hi. Hih pen van khat i leisim a tung ah a om den, Universal Code hi ding aa, 666 cih nambat lian hi khin tuanlo hi. Ahizongin, a system khempeuh pen 666 mah kawkna, 666 tawh kisai cihna vive mah a hihi.

Mangmuhna 13:18
Hih thu-ah pilna kisam hi. Hih nambat pen 666 hi a, mihing khat min tangin a ding hi a, mipil mitei peuhpeuhte in hih ganhing nambat a cihnopna thei ding uh hi.

Pasian kammal pen, a tangtung baih leh a tangtung hak bek om aa, tangtung pelmawh a hihi. Laisiangtho pen, lunghianglo takin za ah za i up ding, i sang ding, i sim det ding, thupi mahmah a hihi.

Vanman khawng zongh, a khangkhang ding mah hilel aa lamdanglo hi. Laisiangtho in, kham hai khat leh an tawi khat a man kikim ding hi a cihsa a hihman in, tua danin a kikim dong, van man a khangkhang ding hi lel hi. Khangzel kiamzel mah ding aa, a kiam hun sang' a khan hun tamzaw in, a kiamzah sang' a khangzah tamzaw ding hi.

Vanman kiamna ding thu nget ding hilo aa, a mat zahzah man leizawh ding thu nget ding hizaw hi.

Lungdam mahmah
Innpi Emperor

ဘယ္လိုလို႕ ခ်င္းေတြ သင့္သင့္ျမတ္ျမတ္ေနႏိုင္မွာလဲ

လြယ္လြယ္နဲ႕ နားလည္လို႕ရေအာင္ စကားေျပာဆိုဟန္ျဖင့္ ေရးသားတာပါ။

ဇိုမီး ဘာသာစကား၊ ဇိုမီး ရိုးရာ၊ ဇိုမီး ယဥ္ေက်းမႈ၊ ဇိုမီး ဝတ္စုံ စသျဖင့္ ဇိုမီး ဇိုမီး နဲ႕ ျဖစ္ေနတာကို
ခ်င္း ကိုလက္ခံေသာ ညီအစ္ကို တစ္ခ်ိဳ႕က  မၾကည္မညိဳ ျဖစ္ေနသည္။

အကယ္၍ ဇိုမီး ေနရာမွာ ခ်င္းကို သုံးလိုက္ပါက
ခ်င္း ဘာသာစကား၊ ခ်င္း ရိုးရာ၊ ခ်င္း ယဥ္ေက်းမႈ၊ ခ်င္း ဝတ္စုံ ဟု ဆိုရမွာပါ။
ဒါဆိုရင္
ခ်င္း ကိုလက္ခံေသာ ညီအစ္ကိုမ်ားက
ဒီ ခ်င္း ဘာသာစကား၊ ခ်င္း ရိုးရာ၊ ခ်င္း ယဥ္ေက်းမႈ၊ ခ်င္း ဝတ္စုံ တို႕ကို လက္ခံ သုံးစြဲမွာလား။
သိပ္ေတာ့ မထင္ရပါ။
ဒါဆို
လူ၊ (ညီအစ္ကို) ေတြကိုခ်စ္တာ မဟုတ္ဘဲ ခ်င္းဆိုတဲ့ ေဝါဟာရ တစ္လုံးကိုပဲ ခ်စ္တာ ျဖစ္လိမ့္မည္။

အဲလိုပဲ
ဟားခါးေတြ ဖလမ္းေတြ က သူတို႕စကားကို news ေတြ websites ေတြမွာ chin version, chin version နဲ႕ေရးေနၾကတာ
တစ္ျပင့္ မ်ိဳးႏြယ္စုေတြတြက္ လုံးဝလုံးဝ မေကာင္းပါ။ ဒါကို ျပတ္ျပတ္ သားသား ကန္႕ကြက္ ရွုပ္ခ်သင့္ပါသည္။
အမွန္ဆို
ဇိုမီး ဘာသာစကားကို ခ်င္းျပည္ ေျမာက္ပိုင္း ထက္ဝက္ေက်ာ္က အခုခ်ိန္မွာ သုံးစြဲေနၾကတာ ျဖစ္သည္။
မသုံးတဲ့ မ်ိဳးႏြယ္စုထဲမွာလည္း ဇိုမီး ဘာသာစကားကို ေရးတတ္ ဖတ္တတ္ ေျပာတတ္ ၾကသူေတြ အမ်ားၾကီးရွိပါသည္။
Zomi songs ေတြကို ဂီတာနဲ႕ေတာင္ ေကာင္းေကာင္းေလး တီးခတ္တတ္တဲ့ ဖလမ္း ဟားခါးေတြလည္း သူငယ္ခ်င္းမ်ားထဲမွာ ေတာင္ ေတာ္ေတာ္မ်ားမ်ား ရွိပါသည္။
ဆိုလိုတာက
ဇိုမီး ဘက္က ခ်င္း နာမည္ကို monopolise လုပ္ခ်င္ရင္ တစ္ျခား မ်ိဳးႏြယ္စုေတြထက္ တစ္ပန္းသာပါတယ္။
သို႕ေသာ္
ခ်င္း ဆိုတာ ျပည္နယ္ကို အေျချပဳတဲ့ ဘံုနာမည္ ျဖစ္သလို
မည္သည့္ မ်ိဳးႏြယ္စုတစ္ခုတည္းကမွ မူပိုင္လိုလို မသုံးစြဲသင့္ေပ။
ဥပမာ။ ဒီမ်ိဳးႏြယ္စု၏ စကား ခ်င္းစကား ခ်င္းဝတ္စုံ စသျဖင့္

ထို႕ေၾကာင့္
အားလုံး သင့္သင့္ျမတ္ျမတ္ အတူတကြ ခ်စ္ခင္စြာ ေနထိုင္ႏိုင္ဖို႕ ကိုယ့္စကား ကိုယ့္ဝတ္စုံကို ခ်င္းစကား ခ်င္းဝတ္စံု ဆိုျပီး မေဖာ္ျပပဲ
ရွင္းရွင္းလင္းလင္း သဲသဲကြဲကြဲအျဖစ္ လိုင္မီး ဘာသာစကား လိုင္ဇို ဘာသာစကား ခူမီး ဘာသာစကား ဒိုင္ ဘာသာစကား ခ်ိဳ ဘာသာစကား
လိုင္မီး ဝတ္စုံ ခူမီး ဝတ္စုံ ဒိုင္ ဝတ္စုံ ခ်ိဳ ဝတ္စုံ စသည္ျဖင့္ specific စြာနဲ႕ သတ္မွတ္ ေခၚဆို ေရးသား ေဖာ္ျပ သင့္ပါသည္။

ဤသို႕ မဟုတ္ပဲ
ခ်င္း နာမည္ကို ကိုယ့္ဝတ္စုံ ကိုယ့္စကားေတြ ခ်ည္းနဲ႕ပဲ လြမ္းမိုး ဖို႕ ၾကံစည္ေနသေရြ႕ေတာ့
We are one in Chin ဆိုတာ အေျပာသက္သက္သာ ျဖစ္ျပီး ေျမာင္းပုတ္ထဲပဲ ေရာက္မွာ ေသခ်ာပါတယ္။

Zomite namdangte lak ah, bangci kilapsang theih ding

Zomite namdangte lak ah, bangci kilapsang theih ding
======================================

1. Zomite Zomi mah kici ngiat in, Chin kicih loh kawmkal ah,
i nampuan pen Chin kicici nuamte puan sangin nam dangte in ong theihpihzaw lai veve uhhi. Angtang huai.

2. Zomi/Chin cih a om hetlohna mun ah, Kawlgam minam kim lamlakna dingte ah, Chin a kicih ciang, i nampuan na kizangh hi. Gtn. Russia ah Myanmar Ethic Group Dance a kibawl ciang (ei bang a tamzaw in na phawk khalo zawsop liang hihang.)

3. Kachin, Kayar, Kayin, Chin, Burma, Mon, Rakhine, Shan a kicihna ah
Chin mun ah Zomite' ngeina puan kizangh in, Chin kicicite aa kizanglo hi.
Lam khat pan, ngeina puan in en lehang,
Kachin, Kayar, Kayin, Zomi, Burma, Mon, Rakhine, Shan cihna hipah hi.

4. Zomite pen ngaihsutna toi, muhna tomte hilo hi hang. Ei tapkual sung bek ah om sawm keini. (Mipilte thugen leh, "think out of the box")

Tua ahihmanin, Zomite ngeina hita leh hita kei leh, Zomite lak hita leh hita kei leh, i ngeina, i pau i ham, i puante i promote theihzah in i promote ding pen, minam kilapsangna lampi tampi pan, hih zongh nam khat mah ahihi.

*Azenzenin, khalkha falam te puan vive ong kizangzangin, Zomite puan ong kidawk ngei kei leh, ei aa zongh kidawk sak nuam veve ding hihang.
Ei tapkual sungah Zomi namni, Khuado leh Sialsawm ciang bek zat sawm i hihiam?

Tedim khuapi ah, Hallelujah pawipi a kibawl khitzawh, Zopuan pen zomi namni ciang bek kisilh nawnlo zawdeuh cih kaphawk kha hi.
Tuama Zopuan silh khat om leh, Zomi namni lah hilo kici thei hi.

Tua bang tektek mah in,
tun zongh, Zongeina lah hilo ci in, tapkual lungsim kuaciik, zaipi en khollo pawlkhat in
namdangte pawi tuamtuam ah Zomi a lamsang pawlkhat a gensia nuam kiom lai lawmlawm zen sam hi.

Hihbang dan ki promote (lapsang) nate pen, a hunpha (chance) khat a om hiin, metbawl siamin i laak theih ding thupi hi. Kisam hi.

Tualo minam kilapsangna ding bel, minampi lungsim neih ding, pilna sang nei tampi i om ding leh Pasian zahtak i hih ding a bulpi hisa ing. A lungdamhuai thute ah lungdam thei in, a angtang huai thute ah i angtang theih ding zongh pilvangna teina nam khat hi. Ldam

Minam lapsang siam ciat ni
Innpi

A nengno khat tawh zongh Laisiangtho Pasian kammal pan lam kipial kha thei

Pasian in a ma min kiphat a haza vantungmi seh thum suah seh khat te van pan lawn khia hi. (hazatna lungsim leh phat ngai luatna lungsim nei uh a hihman) Tua a kilawnkhia vantungmite leitung ah mihingte tawh ong mawh in, mihing sitnawnlo, mihing leh vantungmi kigawm pan aa suan leh khak ong piang hi. 

Topa Zeisu pen leitungmi khempeuh aa ding aa ong si bek hi-in, mihing hilo, ganhing te aa ding ong si hilo aa, vantungmi leh mihing kahbiaa, mihing sit a hilote aa ding zongh hilo hi. Tua a hihmanin, tua bang mite leh a suan leh khakte uh pen, vantung gam tung ngeingeilo ding uh a hihi.

Tua dan mite leh a suante uh pen, mihing taktakte in zongh gim neih hi. Tua te khat tawh a kiteng kha mihing taktak khat zongh, a suan leh a khakte ciang, mihing sit hinawnlo aa tua ii suante in zongh vangam ngah nawnlo ding uh a hihi. Tua a hihmanin, pelh theih zah in kipel nuam hi. Hih bang upna pen, hih Christian biakna bek ah hilo, Zomite lawki upna, Kawl milim bia upna leh biakna tuamtuamte ah zongh om hi. Hih te pen a khanggui uh a sianglo ci in, kiciamteh hi.

Piancial 6:1 Leitungah mite tam dingin hong kipanin, amau' sung panin tanute hong suah ciangin, 2 van aa om mite in leitung mite' tanute hoihsa uh ahih manin a deih bangun amaute zi-in a la uh hi.

Tuabangin, Pasian in vantung pan a lot khiat vantungmite leh mihingte leitung ah ong thangtat in ong om luat uh ciangin, leitung pen nin semsem hi. A tawpna ah nu leh nu, pa leh pa na ngawn mawhna ong kibawl hi. (Hih bang dan tatsiatna pen, tuhun gay te lak bek hilo aa, tuma kum zalam tampi lai pek in  a om khin a hihi.)

Piancil 6:4 Van aa om mite in leitung mihing tanute luppihin, amaute in ta a neih hun laitak hita leh tua khit hita leh, amau' suanlekhak Nefilim a kici mite leitungah om hi. Hih mite pen tang lai-a mi thahat, mi minthangte ahi uh hi.

Tua bang lak kawmkal pan Pasian in, a mah a it leh a zahtak, mihing sit lai a siang Noah mu hi. Noah samin tembawlpi bawlsak aa, leitungbup ah lei a dawklo zah dongin, tuicinpi tungsak in, tua bang mihing sitlo a sianglo teng leitung maitang pan hemkhia hi. Tua aa kipan, Adam leh Ave suan cih mah bangin, tua leitungmi khempeuh pen Noah suan vive i hihi. Tua a hihmanin, den aa a sianglo, vantungmi leh mihing kahbiaa suan leh khak cih pen, tua Noah hun khit zawh, tuabang dan mipen tuhun ah om nawnlo a hihi. (Pastor Joseph Prince: New Creation Church, Singapore)

Piancil 6:7 Tua ahih ciangin { Topa } in, “Ka pian'saksa mihing, ganhing, a bokvak ganhingte leh huih lak vasate, leitung panin ka phiatkhia ding hi. Bang hang hiam cih leh amaute ka bawl ka khial hi,” a ci hi. 8 Ahih hangin Noah in { Topa' } maipha mu hi.

A hizongin, satan pen hailo a hihman in, mihingte upna Laisiangtho tawh a kipelh theithei dingin ong khemkhem ong bumbum a hihi. Hihbang suan leh khakte tudong mah a om lai bangin, a upmawh huai theithei dingin ong khemkhem lai hi. Pasian tate thanem theihtheihna dingin, i kihenhenna dingin, khat leh khat kigim neih, a mah leh a mah kisungsia sak, kisuangsuang sak cih bangin ong bawlbawl lai hi aa, Laisaingtho Pasian Kammalte upna tawh pulaak in nial pahpah ding a hihi. Gtn. mihing khat si leh a kha pen leitung ah vak kawikawi nawnlo hi. Tua pen, sikha vak dan in ong um khial sak thei hi. A si pen ii kha taktak hilo aa, satan pen tua a si pen ki neih in a tangtang, a mel sun in kibawl aa zongh kilak khia mai cih zongh om thei hi. Tua pen, a taktak ah a si pen ii kha na hihetlo hi. Tua mah bangin, itna ngaihna cih hoihlo cih bang om kei ci aa, han ah tuibuk koih, an kholh cih bang dan tawh zongh upna ong pial sak thei hi. Han ah singlamteh bang kiphut sam napi-in, tuibuk khawng tua singlamteh phung ah a tungtung lai kiom kha thei hi.

Khua lam ah mangkang mel mahmah naungek khat ong suak hileh, sunglut ci-in kigen ding hi. A hizongin, Zomi nupa khat mangkang gam ah a tung khit uh ciang, a zi in, mangkang mel mahmah naungek khat ong suak hileh, sunglut ci-in ki ummawh nawnlo ding aa, DNA bang sitin kua mikang khat tawh mawh kha hi ding hiam kici ding hi. Cih nopna ah, a mun leh a hun zui in satan in ong bumbum ong mengmeng a hihi. Mun khat ah a uphuai khat pen, mun dang khat ah up ding san ding ong hi thei nawn mahmahlo cih bang om thei hi. Ahizongin, a tawntung in mun khempeuh ah a kitukalh ngeilo Laisiangtho siksen in upna te lenkip hi peuh lehang, hibang dan buaina leh khemna te kithuak khalo ding a hihi.

Upna paikhialhna ding, Lasiangtho pan tawmcik aa i pialkhialh kiau na dingin, upna leh ngeina tuamtuam Santan in i minam, i ngeina, i nisim nuntakna ah ong guan den a hihi. Zulei sam sukkan/tokan, mikhuling, kawlte' biden, veilam/taklam khut thak cih bang a nengno khat na ngawn tungtawnin satan in, upna tawh Pasian maipha i ngahna ding pan ong dal ong khaktan nuam den a hihi.

Santan aa ding pen, Lasiantho tawh kituaklo a hih naak aa leh a lung a kim a hihi. Christian i hizong, Buddish i hi aa Muslim, Hindu i suak zong, Laisiangtho pan lam i pial naak aa leh a mah a lungkim a hihi. Upna biakna tampi a om hangin, Santan mitmuhna leh ngaihsutna ah, nam 2 bek om aa tua pen, Laisiangtho Pasian kammal tawh kituak upna leh kituaklo upna cih a hihmanin, bang pawlpi bang biakna ah i om kawikawi zongin, Satan aa dingin Hindu, Muslim, Lawki, Buddish leh Christian gupna ngahlo teng khempeuh a kibangmang veve a hihi.

Laisiangtho gelhna ah a kidophuai lai malgawm

pasian leh Pasian kibanglo hi.
topa leh Topa kibanglo hi.
pasian tuamtuam tampi om in, a hih hang' Pasian khat bek om hi.
i lai gelhna te ah zongh, Pasian zahtak piakna leh thupitbawlna in, kidawm tak in zat tektek huai sa ing.


Kum zui-in ki nungphawk leh kisik theih thu pawlkhat


Kum 30s+ khit ciang aa pawlkhat ii kisik thu tawm
1. Sum khollo kha (Van hoih deihlua kha, a lim bekbek duhlua kha, cbd...)
2. Hun mawk bei sak kha (A thupilo tam tawh buailua kha, cbd...)
3. Tenpih hetloh ding khat peuh (pawlkhat peuh) tawh buaibuai kha (Ut tawh utloh tawh, thupi tawh thupilo tawh hunbei aa vakkhawm, chatting, cbd...)
4. Pilna sang' nasep thupi simzaw kha (Tu leh tu aa ding tanciang bek ngaihsut aa neilua kha, cbd...)
5. A omna namdangte pau siam sawmlo kha (Pau namdang a thupi lua theih cian mel neilo kha)
+


Kum 40s+ khit ciang aa pawkhat ii kiphawk thu tawm
1. Kum 30 kiim a phak lai aa kum tam a kisak luat khak pen a tamloh lam phawk, tun lah 40 hita
2. Hun hoih, hun manpha tampi (khantohna ding) a khahsuah lam kinung phawk
3. Na khat peuhpeuh a hih ding ziakai kisa ta
4. Amah leh amah a kiupmawh zah in mi te'n a na awlmawh luatloh lam kiphawk
5. Vaanpi mualpi dongin ngaihsun nuam nawnlo aa, Innkuan sung ciang bulphuh in a thak aa kilam pha nuam
+



Kum 50s+
1. Mi tung thupha a na bawl khak hetloh lam kiphawk
2. Deihsakna lungsim nei semsem
3. A pumpi kikep siamloh teng kisik (gtn. kawng, mit, ha, cbd...)
4. Na khatpeuhpeuh deih teltalna lungsim beizaw deuh
5. A lungnop theihtheihna ding mah ngaihsut in nei bel
+

Tua ahih manin, na hoih khat peuhpeuh kipat ding ziakai kisa kha kei in.

Kei zongh kum 30 pha nai samkei ing in,
article pawlkhat pan in kong gawmtuah hi.
Hih kumzah i phak ma in, mite kisik thute theikhol hi lehang
hun khatciang ki nung siklohna dingin, 
i sep kholh theihte semin, i pelh kholh theihte pelh ding, 
kidop kulte i kidop theihna ding deihsakna tawh hi.



Ldam
Innpi

Langpanna leh gensiatna thuaksiam dan ding

Mi tawh ki nialnial te
mi tawh ki tawngtawng te
mi tawh kilem thei mello te
mi a gensiasia te

na en gige le uhcin
ng tawh a ki nial kei leh mi dg khat mah tawh na ki nial lel ding uhhi
ng tawh na ki tot kei leh zongh mi dg khat mah tawh na ki tawngtawng lel ding hi
ng ong gen siat kei leh zongh mi dg khat mah na gensiasia lel ding hi

na ong phin or ong ko or ong gensia or ong nial a hih aa leh
mi dg te in awlmawh nawnlo aa kua man a thusim loh ciang ng kiang ong tung hi lel ding hi
ng zongh thu aa sim selo in a ut bg in hai ciakciak sak lel lecin
mi dg khat na pan kawikawi leuleu lel ding hi

a taktak ah natna hoihlo nam khat mah hi ci aa a hehpih huai mahmah hi ei ci in i telsiam theih ding kisam hi.




Zomi sungah a om kha kiaukiau thei zel ding buaina them

Kawl te'n sa sung pan, than pusuak (a thaa htae hma, lout htwat) a cih dan mah un,

(1) Khangthak te a diakdiak kawlgam sung ah gam leh minam vai nasem nuamte sung pan Zomi hi napi, Chin mah zat ding hoih asazaw pen a hunhun in ong om to veve kha ding hi.
(Zomi or Chin khatzawzaw a bei masiah or siangtak in a ki hingkhen masiah)

(2) Gam leh minam paulap in, sumbawl, angsung khual, nektawm zong zongh a kilang tawh a kilangkhia lo tawh om kawikawi lel kha ding hi.

(3) Zomi mah citentan samnapi, a Zomi pihte mah a langpan/a haza  vetse cihdan pawlkhat mah a hunhun in ong om toto lel kha ding hi.

(4) Gam leh minam vai ah a kigum pilsak, thu khatpeuh thupi ta leh thupi ta kei leh ki nialnial khawng nop asa, mi cih peuhpeuh a sang thei ngiatlo zongh ong omom kha ding hi.
(Hih bang mite in, i mipil i uliante thadah sak kha thei uhhi.)

(5) Hoihna leh hoihlohna, kisapna leh kipuah ding khinkhaina cihte om khollo aa, thu uang gen, mipi a hai lawpsak nuam, mi deih mi zaknop thute bek a gengen pongmawk cih zongh ong omom lai kha lel ding hi.

- Pawlpi/ upna/ biakna leh behthu phungthu bel thutuam.

Ei mipi lam pan, khat in thu a gen leh hipa a koici dan cih pilvang takin i khen siam ding kisam hi.






Zomite Ziakai/ minung/ minuai ah omlam a kitheilo maw a awlmawhlo

Zomi tangpi a tamzaw in innlam thu, Zomi thu a lui a thak a tuamtuam mah kilunglut leh kithei nuam pen veve hi. Zongh lah theih ding, ki hopsawn ding a thupi a hihi.

Ei tawh kisai khollo, zak ngei mellohna mun khat khawng aa nupa kithat thu cihte peuh khawng sangin, Zomi tawh ki nahvawh a hih kei leh theihna ong khangsak knowledge tuamtuam cihte mah thupizaw veve hi. Mipi in, media or news post te ii share bangbang beh a sim uh dinmun ciang ah om lai a hihman in,  mipi aa ding phattuam pih leh minam itna khangsak, mitkeuh sak, theihna kibehlapsak thute mah, mipi aa dingin lim post huai pen hi.

Zomi te news lam manlang mahmah tawh a kibat pong sam hang,
Zomi informer tampi kisam lai hihang.
Official suah aa news/aritcles ki post cih dan a om nai mello cih theih lai phial dinmun ah Zomi media te kiom lai hi.
Namdangte in ong sim sak ding uh media gina a kician zongh om nailo cileng kikhiallo maitak ding hi.

I dinmun kiphawk kik zelna ding leh Zomite ei leh ei a hi kisa pahpahlo aa muhna zai-in, gualtung i tuang zo pah keizong, namdangte tawh liangko kikim in i taizawhna ding ciang beek vision neihhuai mahmah ta hi.

Sanggam Falam Khalkha Mizo Khumi te in, Kawllai, Mikanglai leh a mau lai tawh tampi nei uh aa, video news (TV) zongh 2 sang' a tamzaw neikim dimdiam uhhi.
Tuabek thamlo, Human Rights tawh kisai ngiat kipawlna kician nei baan ah, English version in kiciantak aa nei uh aa, thu leh la kholna, kepcingna in zongh nei uhhi. Hih tungtawn in, BBC manghun na ngawn ah, interview kibawl liang a hihi.
Zomite pen Zomi cih tentan pong bek mah kihi lai aa, a bangbang a bangbang ah ki tualniam leh kiziakai zaw lai lua mahmah hi. Tapkual pan tatkheh zawh ding kisam hi.

A beimang thei lai dinmun Zomi

Kawlgam khangto hi leh,
khuano dong ah, mei leh internet nuamtak kizangh thei ding,
media tuamtuam ong hat semsem ding,
video te music te ong hoih semsem ding,

Tua hi leh,
mun khempeuh pan, news tuamtuam kisim thei ding,
video hoih nono ki en thei, la hoih nono ki ngai thei ding.

Tua pan,
a neu a lian, koi mun koi mun pan, 
news sim te, video et te, la ngaihte pen,
a tamzaw
kawlla kawl movie, kawl lai tawh news cihte mah ong hi hamtang ding hi.

Banghang hiam cih leh,
tua kawllai tawh kibawl, movie, music, media/news/books te sang'
a hoihzaw in a bawl zo ding minam haksa ding hi. 

Tua bek thamlo in, 
news khempeuh zolai in kigelh kik zo denlo kha ding aa, i theih nop i sim nop khat,
kawllai manglai mah tawh sim ong kul semsem lai ding hi.

Tua pan,
Zolai Zopau pen local langauge bek in ki thei ding aa khangthak te hun ciang kawlpau theilo kiom nawnlo phial ding hi. Kawlpau mah lah manpha kisapen, kisam kisapen ding aa, khangthak tampi in, a mau minam pau thupi simlo, thu donlo in, kawlpau kawllai (mangpau manglai) thei leh kicing ong sa ta ding uhhi. 

Tua bek thamlo, 
Kawlgam bup level in tai nop leh kawlpau kawllai mah ong hihloh phamawh ding aa, Kawl te lo na ngawn in Kawlla hoih tampi phuak in, Kawl te lo na ngawn in, Kawlte lai ngiat mah tawh laibu tampi, news/journal tampi ong gelh ding uhhi. Tua pen, Zolai tawh gelh sangin, Zopau tawh Zola sak sangin kimetzaw leh tangzaizaw lai ding a hihciang, Kawllai Kawlpau a hilo, mualtungmi te pau peuhmah pen a man ong kiam semsem ding hi.

Tua pan,
Zomi cih mimal a tam hang, Zolai, Zopau zangh mi ong tawm semsem ding aa, khangsawnte hun ciang, kawlmin vive kiphuak suksuk lel ding a hihi. Zolai Zopau Zongeina cihte lah theinawnlo aa a min in Zomi ci aa a om lai tawh, a kici nuam nawnlo tawh ong hi lel ding aa, kua ma phawk khak loh, Zomi hina pi kawlte mah a kisasa (ahk) Zopau kizatna lak ah kihel ding nop asa nawnlo, khangthak tampi ong om behbeh kha lai ding hi. Tua pen, minam bei ding kipatna a hihi.

Hih bangmah in, US aa tungte zongh mangpau in ong vuknelh lel ding aa, Sweden aa tungte zongh Swedish pau in vuknelh in, i tuntunna pau leh ham in ong huupkang lel ding a hihi.

Mi tein 10 zongh a phalo eite cih thadah, million tampi a pha, kawlte na ngawn, China leh India kikal ah a om man un, minam a man ding uh a lau dinmun ah om lai uhhi. Media lah hatlo, video hoih, laibu manpha lah a neilo Zomite koi bangin, leitung bei dong kip zo mawk ding.

Minam na ngawn, it dan a siam nailo Zomite

Minam itna leh Racist cih kibanglo
========== ===========

minam itna leh mi gensiatna kibanglo 
minam itna leh mi el bawlna kibanglo

minam itna leh mi langpanna kibanglo
minam itna leh mawh maisak lohna kibanglo
minam itna leh phulaak kikna kibanglo
minam itna leh kamkhauh bakbakna kibanglo

Zomite Minam ki it, a hih hang tampi mah Racist tawh kibang
Zomite Minam ki it, a hih hang tampi mah mi gensiatna tawh it
Zomite Minam ki it, a hih hang tampi mah mi el bawlna tawh it
Zomite Minam ki it, a hih hang tampi mah mi langpanna tawh it
Zomite Minam ki it, a hih hang tampi mah mawh maisak lohna tawh it
Zomite Minam ki it, a hih hang tampi mah phulaak kik nopna tawh it
Zomite Minam ki it, a hih hang tampi mah kamkhauh pau bakbak sa aa it

mi gensiatna pen, minam itna hilo
mi el bawlna pen, minam itna hilo
mi langpanna pen, minam itna hilo
mawh maisak lohna pen, minam itna hilo
phulaak nopna pen, minam itna hilo
kamkhauh pauna pen, minam itna hilo
racist hihna pen, minam itna maan taktak hilo





Zomite' sum zon dan nam khat

Gan khawng khawi keei, huan khawng bawl, gimpi tak aa lo kho keei in, gan khan ciang (gawh phat ciang), mehteh mehgah limci ngah ciang, ne zongh ne ngamlo aa danghkaa deih luat man in, duhpipi aa zuak khia.

Sen sumbawl siamte'n tua teng lei ta.
Tua mehteh mehgah leh sa te, meh in, a limnono aa bawl in zuak kik.

Amet (sum leh hun): gankhawi, huan bawl cihte in hun saupi leh thatang tampi la aa, sum tawmno bek tawh kikhawng (tawm bek lawh) lailai hi. 
Meh bawl pak pen sawtlo in, tampi manin zuak kik sawnsawn uhhi.


Zomite khang kizomin hauhlohna ahang

Zomite sungah a hun a hun in, sumhau minthang kiza theizel hi. Pawlkhatte khangkhat sungah zongh a min uh a dawk nawnlo zongh om thei aa, a tate khangciang ki phawk kha nawnlo cih zongh om thei hi. A hang a tuamtuam om kha ding aa, Innpi Admin ii ngaihsut khakte a nuai aa bang a hihi. Hih a nuai aa teng pan, khat a hih kei leh a dang khat teitei tawh kituak kha dingin ka lamen hi.

1. Baihno takin hauhzia tawh haupak. Tua mah bangin beikik pah thei hi. Hauhna pen a pia Pasian hi aa, ei thagum hatna hang hilozaw cih phawkhuai hi. 

2. Khang kizomin sep theih ding nasep nam tawh haulo, tua dan nam tawh sumlut neilo. A pa te nasep a tate in a zop theih ding nam hilo. Gtn. Suangbawl hoih lai in, a pa te hau thei ding aa, a ta te hun ciang, tua suangbawl hoih nawnlo a hihman in, a tate'n zom thei nawnlo. Galkap lut hoih lai in, galkap hi aa, a ta te in tua a pa nasep zom thei nawnlo. Tua a hihman in, sumlutna khanggui kitat cih theih a hihi. Kala te bang hi leh, saivan na ngawn,  khotloh hang sawtvei kikoih thei ding, sikvan vive zuakin neizaw lai uhhi. 

3. Pa te hauhna nopsak pih lua kha in, kisia. Ki phasak khial a hih kei leh noptat in thadah. Septheih kician mel a tate in neilo.

4. Zomite kitual niamlua mahmah laisam a hihciangin, taihinn khat leh mawtaw khat nei peuh leh a hau in kimu. Midangte in a hih kei leh a mau  leh a mau zongh a hau takpi kisa kha uh cih bang om thei hi. Tua ciang pen, bangmah bulkipna neilo a hau aa kitheihna bek cih theih hi mai hi. Tua a hihmanin, a tate khang ciang, bangmah gen luat ding, na om tuanlo.

Hih bang dan a hihman in, tate ii zop theih ding mabaan khat, ei khangin bangmah pi sumlutna hi tuan keimah ta leh kipat huai neih huai hi. Sum tampi nusiat aa tate mabaan neiloh sangin, a zop suak pah theih ding uh nasep nusiat theih ding kisam mahmah hi. Tua hileh bek, a khang a khangin hauhna kibehlap toto thei pan ding hi. Tu in a hihleh, a tamzaw a tate khansim, bem pan kitaw pat den a hihmanin, hauhna kibehlap in khangto semsem cih theih ding kitam nailo hi.  Ldam

Post khempeuh ki share kim den zolo a hihmanin, nisim aa post om masasa gawmtuah aa, ni khat in, khatveita email ah lut dingin kila thei hi. > Click Here <



Kum 2015 leh a beisa thu pawlkhat

1945 kum in, galpi 2 na man hi. Kum 6 sung sawt aa, galdo ding thu kipat hun teng tawh galdo hun teng tawh kigawm leh kum 7 sawt hi.

Hih 1945 pen 7 gawm lehang 1952 hi aa, 7 vive baan gawm tohtoh lehang, 1959, 1966, 1973 cih bang dan a hihi. Hih bangdan 7 ta gawm sim in thu lianpi khat ta leitungbup huam in piang den hi.

I theih pak dingin, 1973 kum in, leitungbup aa inn sangpen World Trade Centre innpi New York khuapi ah kilam hi. Hih 1973 kum pan 7 vive baan gawm tohtoh lehang, 2001 tawh ong kituak to hi. 2001 pen World Trade Centre a kicip kum tawh ong kituak to leuleu hi. 2001 pen 7 gawm leuleu lehang, 2008 hi aa, leitungbup sumbawl a kiat, a siat kum a hihi.

Tua leh hih 2008 zongh 7 gawm lehang, leitungbup in mun khempeuh man in a dawn kumthak 2015  a hihi.

Leitungbup aa linglawng thu tuamtuam pen kum 7 in khatvei ta peuhmah a piangden a hihi. Kumsim in thusia lasia om mah ta leh hih a kum 7 na ta pen leitungbup huam hi pahpah zaw hi.

Ahizongin, hibang aa thusia buaina tampi kawmkal mah pan in, a hauhlawh, a nuamsazaw cih bang zongh lah kiom kha thei veve lai a hihi.

Late 91 na sung aa mah bangin, ka mai ah mi tul khat, ka kiim ah mi tulsawm a si a puuk zong in kei ong sukha lo ding, Late 23 sung aa mah bangin, sihna limguam sung na-ngawn i nawk hangin siatna kihtalo ding ci aa Pasian kammal tung i ki ngakh zawh den ding thupi a hihi.

Egypt (thu-umlo mite) te in, kum tampi a khol, a zon uh neihsa lamsa, hauhna te pen, zankhat thu in, Pasian a um, a thu a mang, a aw a ngai Israel mite tung ah kipia gai ziau hi. Tua mah bangin, 2015 kum pen, thu umlo mite in haksa pitak in sawtveipi a kholte thu umpi te in hun tomno sungin a ngah kum a hihi. (a umte aa dingin). Paunak Laisiangtho sung ah, thu umlo te' neihsa tengh thu umte tung kipia gai ding hi ci hi. Migilo te in, midik te aa dingin gim thuak uhhi, neih leh lamh zong uhhi ci hi. Hipen, thadah man, huaiham man leh a baihlampi totna lam doot, a ol lam cih banghilo aa, Pasian ii zia leh tong a hihlam Laisiangtho sung ah teltak in kimu thei hi.