Showing posts with label Article Nithupi. Show all posts
Showing posts with label Article Nithupi. Show all posts

Pate' Ni (Fathers' Day) Kipatna

“PATE’ NI”ci-in a Phuakkhia pen William Jackson Smart tanu neihsun ahi hi.Ama min ki theilo ahihhang in, a pasal ahih leh John Bruce Dodd ahi hi. William Jackson Smart te innkuan pen, Washington gam sunga Spokane khua ah teeng uh hi.

Tua khuaneu khat kiang aa, luiluang Big Bend River gei-ah lo nei uh a,tua lo ah a teeng uh hun tamzaw hi. W.J.Smart te nupa in tapa 5 leh tanu 1 nei uh hi.Nikhat a nu uh sih nungin, a Pa uh lungzuang khua ngai-in cih na ding theilo in, a inn mai uh ah tu in a kunn ngeungau hi. A tate lah bangmah thei nailo uh a hihman in,a Pa lungkham na dah na te bangmah a thei kei uh hi. Tua bek thamlo in, a Nu uh a sih lam na ngawn, a thei nailo a hi uh aa, khuasung ah a vaak ong ciah nailo, sasa lel uhhi.




Khua ong mial peeppeep mahmah cianga, a Nu uh hong tu’n theih nailoh ciangin,a ta no te khat a Nu zong dingin, a ding khia phengphang mawk hi.A Pa’n zong delh pah vinggvengg in, aphak ciangin,a-ang ah tawi-in inn a tu’n ciangin, a luppih hi.
W.J.Smart in a zi a sih a kipan in,nu leh pa nasep ong thuah khop lo hong phawmawh hi. Tua bang a,nu leh pa nasep a thuah khit caingin,a tanu neihsun zong pasal nei thei ding ong hita aa, John Bruce Dodd tawh ki teeng uh hi. 1910 kum ciangin,W.J.Smart zong hong si leuleu a,amzi han kiangah a vui uh hi.
A Pa uh sih khit a sawtlo in,Nute’ ni kikhop na khat hong om a, J.B.Dodd zi zong va ki khawm hi. Thuhilh Pastor pa in, Nute’ thupiit nate gen in,a pahtawi na te a zak ciangin,nu leh pa i nasep a thuah khawm a Pa phawk in, khitui naptui tawh a ki diah hi. Amah leh anau te khempeuh a khoi a Pa phawk lua mahmah a hihman in, Nute’ ni a om mah bangin,”PATE’ NI”ong phuankhia aa”, June kha Nipi Thumna” ki zang hi.

W.J.Smart pen hun man a,a ki khawm den mi mawkmawk khat hi aa, ahih hangin ama thu bulphuh in,”Note’ tungah hong kibawl ding na deih bangun,Midangte’ tungah bawl un” cih tawh a nungta ahi hi.Biakna nasem te a pi bawl siam mahmah khat hi a, leiba neih loh ding a thupi ngaihsut mahmah khat ahi hi.A ki lawm lopi leh a kheng val lua ina tate ki zep ding a deih hetlo khat ahi hi. A niik a puan leh a inn siangtho sak sitset a,etteh tak lim hoih a nei khat a hi hi.Tua ahihman in,a Pa pianzia phawk in ”Pate’ ni” cih a phuan khia ahi hi.

****(Na Pa a lungdam mahmah nite lakah khat in, Leitungah mi-in, na Piankhiat Ni ahi hi.)****
***Pate itna a telsiam thei tek ding in, Pasian in thupha ong pia hen***

Pate pahtawi ni

   PA TE NI "PA TE " PAH TAWI NI 

Laisiangtho--" Nangmah in nuamsa in Leitungah na nuntakna a sau nadingin na
                          NulehPa na zahtak in"---(Eph.6:2)

 Utenaute,
                       "PA TE NI, PA TE PAH TAWI NI" i cih ciangin a pahtawi huai Pate om ding a, a pahtawi huai khollo Pate zong om kha theiding hi Tuamah bangin Pate a pahtawi nuam mahmah zong i om ding a, a pahtawi nuam khollo zong ki om kha thei ding hi.IhPA te zong a hawmthawh huaina ,kisapna zong a tawm a tam om mah ding hi, ahizongin bangbang hi leh i Pianna Pa ahihmanin kumkhat sungah nikhat, nai (24) sungah nai khat sung buang Pa te a pahtawi huaina leh a zahtak huainate  pawlkhat kikum leeng ka ut hi

PA te Zahtakna Pan Khansauna Thupha

              Leitung mite a si baih nuam kuamah i om kei dingin ka um hi.Ei Zomite bang diakdiak cidamlopipi mah,nuamsalopipi mah,zawng mahmah khiu kheu napin a sibaih nuam ki omlo in, a nungta nuam vive i hihi.Tunin i Topan ci hi, "Nuamsa a,nuntakna a sau nadingin na NuelhPa zahtak in," ci-in hong sawl hi. NulehPa zahtak ding cih pen thu haksapi ahihiam?Tanutapa te in i hih zo ding hiam?Bangin hong khak ahihiam?Tuni PA a nei lai ten," Pa aw,hong it ing, hong ngai ing,hongphawk lua ing Pa aw,thupha hongpia in hopih pah ni.Na pianna Pan na " AW" za nuam hi.Na kisik kei dinghi.Nuamsa a na khansau nading ahihi.

                Khat vei tangval nih tha kipiakna khatah ka om kha hi.Amah pen Malaysia pai
ding,sum thalawh ding, kikhakna hunkhat ahihi.A kicihna ah," lawm aw, na NUlehPa dam lai ahihi leh hampha hongsa ing.Zangkongah omsak inla, a hunhun in hopih zelzel in.Lungleengsak het kei inla,anneek tuidawn bangmah kisamsak het kei in,Antang a ipip in leisak in, sathau zong a bungpipi in leisak inla,nikten puansilh pan kipan sumlehpai kisamsak kei in,kei zong ka tua cih hi," ci-in teci pang kawmin kihanthawn uh a,thupi kisa mahmah hi.Tua val thu hoih bang om nawn mawk ding ahihiam? kici nuam liang zah dong ahihi.
                Tua nitak Sermon pia ding siapa hong ding to leuleu in Sanggamte lawmta tha kipiaknate thupi sa ing.Thangah huai mahmah hi.Pianna NulehPate lungleengsak lo a na kep na huaina te uh pen hoih mahmah hi.Ahizongin tua na pianna NulehPa te en kei mawk leucin Note zong na kumtam a,teek a, bangmah na sep zawh nawnlo ciangin kuanman hong enlo pah dinga,zong hong kivaklo pah dinghi..Laisiangtho in "na vawh bangin a gah na at kik ding" ci-in hong hilh hi.Na NulehPa na vaak na tah nate pen zahtakin kici nailo hi.Tuate pen tate sep ding, seploh phamawh tavuan hi zaw hi, cin limtakin hong haw to ziahziah a,lem   pah hi.i.
A Zahtak Huai PA TE Din Mun.
                   Laisiangtho sungah PA TE i cih Pasalte pen Numei lutang na  ci a,innkuan lutang zong a cihna hipah hi.Hi pen mihingte kiseh tawm hilo in Pasian seh hi a,Pasian deihna hi a,Pasian hong sawl ahihi. Laisiangtho sungah.. Evua in Pasian thu hongnial napin Evua mawhna kicilo in a pasal Adam mawhna kici mik mek mawk hi.Zawma alian 5 a neu 14 sungah,"Ahihangin Adam khangpan in Moses khang dongin mawhna in Adam' khialhna hangin a khiallote nangawn a uk hi."in kigelh hi.Numeite khialhna pen Pasalten thuak cih thu i gen phapha nuam hi.Tuamah bangin i innkuan sung vai khempeuh a sia, a pha thuak ding a om khempeuh"PA" ten thuak uhhi.Tuabang "Pa te" bangzah takin it huai ahihiam?
                      Falam ka omlai in Ciinmual vengah innkhat, a pate nitak homecell a pai kalin naupamngten mei tawh kimawl napan a inn hong halkha uh a,inn 4 bang kilawh in kangtum hi.Palikten delhpah in innteekpa koi om hiam ci in a pa uh kanpah hi.A Pa in zong" Kei hikeng, a om loh kal thupiang hi, ka tate hal khak hi" ci peuhmahlo in Palikte zui in thongkia dingin va pai ngeungeu hi.Tate mawh nate  phunlo puamlo in thuak ngam hi.Pate bangzah in it huai a, zahtak huai ahihiam?Tua bang a zahtak huai, na Pa na zahtak theihmanin iTopa lung dam a, nuamsa in, nakhan sau ding hong ci pah ahihi.Amen. Halleluijah. 
   
 PA TE Thupha Naak
             PA te in i thupha naak ahihi.Pasian in Minamte thupha hong nop ciangin Minam makaite tung tawn in thupha hongpai hi.Isrealte Moses tungtawn hopih in makaih hi.Pasian in Pawlpi thupha hongpiak nop ciangin Siampite tung tawnin thupha hong pia hi.Pasian innkuan thupha hongpiak nop ciangin PA te tungtawnin hongpia hi.Pasian kiangpan thupha hong luan ciangin tuizawn zui in, tui hong luan mah bangin Pa te tungtawn in tate tungah thupha hong luanghi.Pa hoih leh hoihloh tawh kisailo hi.PAte gina in,gina ta kei leh Pa ahih nungsangin Pasian in PAte tungtawnin tanutapate tungah thupha hong luangsak hi.Pilna nei in, nei ta kei leh PA pen PA munah na koih theih nak leh thupha hong luang ding ahihi.
           Abraham tungtawnin Leitung innkuante ah thupha hong luangsak hi.Tuhun ciangin innkuan pawlkhat sungah Pa te sangin NUte pilna lamah, laitan lamah zong sangzaw thei hi.Tei zaw ahihmanin innkuan sung zong vaan zaw thei uhhi. Tua zong ahi theiding khat mah hi.Ahizongin Nute in bangzah takin a pil zaw a,a tei zaw ta zongin Palo tawh vaihawmlo ding a,PA in lutang semin letmat thuu a,tavuanla ding cihna ahihi.A telnop dingin PA in innkuan lutangpi hiding a, NU in thuvanpi hongsem ding uhi.Tua bangin i PA te PA bawl in, zahtakna i piak theih leh Topan cidam khansauna  hongpia taktak dinga, innkuan nuam, Van gam malep i suak dinghi.Amen. Halleluijah.

PA te Lungngulh Lian Pen--
                   PA te in tanu tapa te tungpan a lungngulh lian pen  in sumlehpai hi masalo hi.Anneek tuidawn leh nikten puansilhte zong hilo hi.PA te lungngulh pen in tate tungpan PA bang a bawl ITNA, leh PA bang a bawl ZAHTAKNA ahihi. Laisiang tho in,"na nuntak a sau nadingin na NulehPa zahtak in,"ci hi. NulehPate pen it a, zahtak ding ahihi.
         Myitkyina ka sangkah lai in Kawlte tangval khat in Dek nungak khat ngai a, tangvalpa nulehpan phallo uhhi.Tua nu tawh na teen leh innpan paikhia ding ci hi.Tua pan a lawmnu nusia zolo ahih manin teenpih teitei hi.A inn pan a paikhiat ding ciangin a lawmnu tawh anulehpa mai ah khukdin suk in zahtakna  pia uhhi. Milim biate nangawn innulehpa tuazah dongin zahtakna pia thei uh ahihi leh ei Christiante in i Topa Pasian kammal bangin Nulehpa te zahtak ding, bangzah takin kilawm zaw ding ahihiam?Nulehpa zahtak ding cih pen Pasian kammal hi a,theihding ciang bek hilo in,zatpah ding leh zuihpah ding ahihi.Na cidamna ding nakhansauna ding leh na nopsakna ding ci hi.Amen. Halleluijah.

Na PA Simmawh Kha Kei In.
                 Paunak alian 30:17 sungah,"A Pa a simmawh mipa,a Nu' thu a mang nuamlo mipa, Va-ak in a mittang khelkhiatsak in, Musanete in a sa nee ding uhhi".ci ngeu mawk hi.Va-ak in na mittang khelkhia henla,nasa hong kinee leh bang man nawn ding na hihiam? Tua hi a,na PA simmawh kha kei in.Na thupha naak kikhak in, na hehpih huai kha dinghi.Na pianna Pa na simmawh  manin nang hong kithupi muh zawlo ding a,hong kineu muh zaw ding cih thei gige in.Na Nu zong simmawh tuan kha kei in.Amaute pumkhat ahi uhhi.Na Pa a om nawn kei leh zong na Nu kiangah pai inla, thudawh in.
SIMMAWHNA- cih pen Mawhna khialhna lianpi dingin kingaihsunlo kha thei hi.Ahihangin Pasin in deih hetlo hi.Simmawh paupih, simmawh hopih,simmawh bawl, hai bawl cihte PA ten zong thuak haksa uhhi.Na Pa a kumtam ciang bang mah sem zo nawnlo ahihmanin simmawh kha kei in.NUte in zong Pate zahtak bawl ding kisam hi.Adiakdiak in Nute in tate mai-ah na Pasal nasimmawh bawlkhak leh na taten zong hong simmawh nuam pah ding uhhi.

Na PA Khasia Sak Kei In.               
                        Ka khua vengte Papi khat khuado lawm anneekna khat ah,a Piancik paina vai kidong pen a gengen laitak a tapa kipilsak khat in a Pa bang ci sa ahitam maw,," hai mahmah teh Puteek",cin lit khat a suah phei leh a Pa zong paulo hamlo in khawlpah lian a, puai piatpah hi.A Pa in bang ci haim cih leh" lawmlawm, kei zong ka hat lai, ka khanlai om mah hi ven,"ci-in khitui luang ziahziah hi.Tua ziau tawh a pianna Pa khasia mahmah zo mawk hi.A Pa zong ciah pah vingveng a, kisam zo nawnlo hi.
        A sawtlo in bang thu hong piang hiam cih leh tua a tapa kipilsakpa gunah tuikia in si a,a Pa in va delhin a luang va pham a, sialpi khat kengsak hi.PAte bangzah takin thupi a,it huai ahihiam?Bangzah in zahtak ding kilawm ahihiam?A khuapihte in, "A Pianna PA khasiasak kha uh ahihmanin Pasian' dan thuak a, sihsia in si uh aa, a tate zong tagah suak in hehpih huai thei mahmah uh," ciin kikum khiankhian uhhi.
           Sanggam,Cidamin, nuamsa in na khansau nop leh na NulehPa zahtak inla,khasiasak kha kei in.Na Pa a dam lai hiam?Tunin Na PA hopih in",Pa aw , na dam hiam, hong phawk mahmah ing, thupha hongpia in Pa aw" cin hopih in. Laikhak in.Na Pan " Na -aw" za nuam hi." Na Aw " a zak ciang dam lawh liang ding hi.Tunin Pate khempeuh kipahtawi in,zahtakna ngah ta uh henla, Topa Pasian in cidam khansau, nopsakna thupha hongpiaksak tahen. Amen.

NISUH NIPI PANIN SIN DING

– K. Lang Kap, Champhai

Thumasa : Tukum ZBC thulu, ìKisinnaî (I Tim. 4:8) ahih mah bangin NISUH NIPI tungtawna thupiangte enkhawmin kisin ding omte sinkhawm dih ni. ZBC in Nisuh Nipi pen hun thupi mahmahte laka khatin zang den i hih manin gualzawhna tawh Jerusalem ah Topa Jesu a lutna hanga min tuamtuam i muhte nuntakzia (character) enkhawm ding hi hang.

1. Topa Jesu : I Topa Jesu pen leitungah a hun nunung ding a zang hi ta hi. Pahtawina leh phatna tam ngah het lo hi. Nidang laiin Juda pasal teín kum simin Paisan Pawi zang dingin a gante tawh a paikhawm zelzel uh hi. I Topa Jesu zong Jerusalem ah tua Paisan Pawi zang dingin pai a, aman bangmah keng loin, ama nuntakna apia dingin a pai ahi hi. Pasian leh mihing kikala kikhenna om pen, ama pumpi kipiakna hanga mawhmaina i ngah kik theih nadingin kithoihna dingin amah mah kipia ahi hi.

Kilemna Kumpi a kicih mah bangin mihing leh Pasian kikalah

kilemna Kumpipa ahi hi. Kilemna Kumpipa ahih hangin a kiniamkhiatna lim lah nadingin gualzawhna tawh Jerusalem alut niin Lano tungah tuang hi. Nidang laiin kumpi leh kumpi kilemna a bawl uh ciangin La tunga tuang thei zel uh hi. Kilemna Kumpipa ahihzia hong kilang mahmah hi. Tulai kumpi uliante dinmun tawh enkak lehang kilamdang mahmah hi. Kiniamkhiatnain gualzawhna ahi hi. Nupa kalah, Pawlpi sung leh vaihawmna khat peuhpeuhah kiniamkhiatna loin kilemna om thei lo a, a kam tamtam, a pau hangsan tata gualzo tuan lo hi. Jesu limpua-in, i omna ciatah gamta ni.

2. Lano : Mizogam ah La tam muh lo hihang. Ahi zongin, a tangthu a thei teín a gen uh ciangin, gan dangte sangin kiva zaw ci uh hi. Tua mah bangin sin nai loh Lano zong khalva-in, lee mahmah ding hi. Jesu tuan nading Lano ahih leh, a kisin lo ahih hangin Jesu tuan ding ut mawk a, Jesu thu mang ta zen hi. Gensa mah bangin Jerusalem ah gualzoa Jesu a lut niin Lano mel kidawklo hi. Mipiin Lano mu loin Topa Jesu bek mu uh hi.

Eite zong Jerusalem thak, Vangam lam zuana i pai laitakin, Pawlpi sungah, innkuan sungah ahi zongin Jesu mel kidawksak ding hi hang. Jesu mel kidawk loa, i siamna, i pilna, i hauhna sum le pai, i beh i phung leh i hatnate a kidawk zawk ciangin tuate in Jesuí mel liahin, haksatna leh ze- etna lianpi kituak lawh thei hi. Lano pen ganhing ahih leltak hangin, a tunga tuang Jesu pen Kumpipa ahih manin amah zong kipahtawikhawm hi. Eite zong miten ganhing bang lelin hong mu phial ahi zongin, Jesu neiin i tungah tuangsak peuh lehang, vantung Jerusalem ah hong kipahtawi veve ding hi.

3. La neite : Topa Jesu in, mi nih sawlin Jerusalem ah luta, a tuan nading Bethani khua ah La a kikhih a om ding thu leh va suut dingaasawlthuimuhi.Anei teín a dot uh leh, ìTopaín deih hiî cih lel ding pen thu haksapi hi ding hi. I kileisa nangawn zong a leipa leh a zuakpa muhloh a na kilei ngei lote i hih laitakin, La neipa in Topa deih thu a zak ciangin, a La tungah thu nei nawn het lo a, phal taka a kaihsak pen ettehhuai mahmah hi.

I Lai Siangtho in a La neitedinmun gen kha lo hi ding hi. Mimal maw, nupa kop maw, innkuan khat maw kithei lo hi. Bangbang hileh, Topa adinga a kiphalna ettehhuai hi. I gamah Topa na sem dingin ei i pai thei kei zong, Topaín a deih banga a zat dingin i tanu-tapa khat beek zong phal lo, sawl zo lo, sawl ngam lo, sum tha tawh lah pang tuan lo, neihsa tawh lah pang tuan lo, i piak sunsunte lah a zat tak loh tata, a hoih lo tata i phal uh hi. I hun leh ni hi taleh, ahoih teng sun khuavak hun sung eima na semin zan kikhawm ding nangawnin i hun i pia zo kei hi. Cim lua, sep ding phamawh neih loh ciang bekin Lai Siangtho a sim, a kikhawmte i hi hiam? Topa Jesu tuanna Lano neipa in ahih leh, a Lano a zatman ngen loin pia hi. Topa adingin i zi, i pasalte, i nu leh pate, i tu leh tate, i neihsa lamsa, i pilna siamna, i hun leh nite piak kisin dih ni.

4. Mi sawl nihte : Topa sawl ahih tei hangin man kipiasa lah hi lo, a neite phalna om lopi a La va kaih mawk ding pen thubaih hi lo ding a, thumaní kisam mahmah ding hi. Amaute nih in Lano kaiin Jerusalem a lutpih uh a, Jesu ki- ang a tunpih mah bangin eite zong mawhna henkol tangte a suutkhiading leh Van Jerusalem ah Jesu khephung a tun dingte i hi hi. Kamtaia mapai mi nihte bangin ei teín zong Jesu i huh theihna, i panpih theihna hun leh ni tampi om ding hi. Vaksuk vaktohna ah Jesu thu-um, Khristian hoih tak i hih nak leh, hih ding leh hih loh ding, sep ding leh sep loh ding i theihtawm ding, i sin tawm ding tampi om hi.

5. Mipite : Mipite ahih leh kamsang Zakhariah in a genkholh Messiah hong tung ding a cih uh hong tung ahih manin cihna ding thei loin, lungdam lua kisa a phat ziahziah, a awng ziahziah uh hi. Aneupen pan a lianpen dongin a nunglam leh mailamah apaite in, ëHosana …..í ciin awng ziahziah uh hi. ëHosanaí cih pen ëtuín hong hon iní cihna ahi hi.

Rom kumpi ukna nuai pan suahtak ding ngaklah luain thum uh hi. A neihsa uh khat zong siit loin, Kumpipa pai nadingin a puansilh lai uh lei-ah phahin, a neilo teín sawl hing siak uh hi. Rom kumpi ukna nuaiah a hau a zawng kideidan lua ahih manin, mipil mimawlte dinmun a kibang ding deihna ahi hi. Tulai huna mihon lamzuihna (procession) tawh a kibatna zong om hi.

Lungdamna Ni ahih laitakin mihon teín zong nget/kalh (de- mand) mah na nei uh hi. Ahi zongin tulai hun tawh a kibat lohna khat in, hih lamzuihna pen phatna, pahtawina tawh lamzuihna ahi hi. Tulai hunin, kumpi hoih hi, ci a pahtawina lamzuih sangin, lungkimloh lah nadingin lamzuihna tam zaw hi.

6. Farisaite : Tua bang, mihon teín Topa pahtawi leh phata a kiko ziahziah laitakun Farisai teín Topa Jesu kiangah mihon awngte kham dingin ngen uh hi. Tua mah bangin Satan in Topa i phat ding, i pahtawi ding hong phal loin hong kham thei hi. I zi leh tate tungtawnin, i pasalte leh lawm le gualte tungtawnin, amah phatna lasak ding, biakpiak ding hong kham thei hi. Nungakte pen tangvalteí zangin, tangvalte pen nungakte tungtawnin, sum le pai leh atuamtuam zangin Satan in leitung hoihna a vul pak dingte a kip ding bang kekin hong khem thei hi. Ahi zongin, Topa Jesu in, ìHih mi teín hong phat loin khawl ta le uh zong, lam dung a suangte beek in phatin awng veve ding uh hi,î ci hi. Sing le suangte a kiko sangun, phatna ding aw nei a, pahtawina ding khut le khe,mit leh bil neite’n i phat ziahziah ding a kilawm hi.

Thukhupna : Topa Jesu in Jerusalem a tamlawh thu zong i mu hi. A Judah mipihteí sung pan uliante, siampiliante leh laitheiteín a Kumpipa uh Jesu a theih loh lamtak Jesu in thei hi. Jerusalem khuapi zong A.D 70 a Rom kumpipa Nero in mei tawh a hal tum ding zong mu khol hi. Tua ahih leh, tuni-in ah, ulian tampi, laisiam tampi, mihau tampi teín a Kumpipa uh Jesu sangin kumpi dang,Pasian dang bia aphat a,hun hoih tampi a zang khialte bang kei ni. Mi teín Topa Jesu Honpa in sang a, zing sima bia a, phatna leh pahtawina tawh akikhop ziahziah laiun, nang koi laiah na om hiam? A aw neih zah uh siit loa, mi teín Topa a phat ziahziah laiun, siampiliante leh uliante tawh na kibang kha hiam? Na Topa phatnain awng kei lecin suangte hong kiko veve ding hi. Topaín a thu thhupha hong piaksak ta hen. Amen!

Source : Laitai#March/2010 via FGA Tulsa

Valentine's Day hong kipatna

Mi siangtho Valentine ii’ ni pen Valentine’s Day kici hi. Kumsim in February 14 ciang leitung gam tuamtuam ah kizang hi. Kum thak khitcianga ni thupi masa pen ci leeng kikhial lo phial ding hi. A tom in a ki it, a ki ngai te’ ni cihna hi pen hi.

Misiangtho Valentine pen kumpi Claudius II hun laiin Rome ah siampi khat ahi hi. Tua hunlai in kumpi Claudius II in a kumpi gam ahih theih zah in kemcing hi.Melma ten do zel ahihmanin Claudius II ading galkap hong tawm sem sem hi. Zi nei khinsa ten a zi leh tate uh nusia nuam lo uh hi.Lawmngaih nei tangval ten lah a lawmngaihte uh paisan ding haksa uh hi. Tua ahihmanin galkap a lut nuam mi tawm hi. Galdo ding galkap hong tawm tak ciangin kumpi Claudius in Dan thak khat bawl hi.Tua Dan in nupa nungak leh tangval kiteen ding phallo hi. Valentine in tua dan hoihsa lo ahihmanin a sim tham in zi nei veve hi.

Valentine in kiteenna kitangsam sa hi.Nupa suahna om kei leh kiteenglo a nupa banga omkhawmna(Living together) mawhna khang zaw ding ci hi. Zan khat kiman in Suangkulh sungah kikhum hi.Thusitna banah vuak leh sat thuak in February 14, in si hi.A sih khit AD 496 ciangin Pope Gelasius in February 14 ni pen misiangtho Valentine zahtakna ni a zat dingin ciamteh hi. Valentine in amah a leh hek Asterious ii’ tanu Julia tangthu, tuatdan(arithmetic) leh Pasian’ thuhilh zel hihtuak.Valentine in Julia thunget sak zel hi. A sihkuan ciangin Lai khat gelh in tua ah Julia tawh a kilawmtakna hangin lungdam thu gen hi.Tua banah Pasian tawh kinai den dingin hanthawn hi. A tawpna ah “Na Valentine kiang pan”(From Your Valentine) cih gelh hi.

Ki it-kingai te adingin ni thupi khat ahi hi.Ki itna kilawmtakna ki latsakni ahi hi.Thu kigelh Card leh present tuam tuam piakna tawh hun kizang zel hi.Valentine’s Day symbol a tuam tuam om in lungtang, Vakhu lim etc. khawng ki limzat peuh mah hi. Thangpi Naulak

Innpi pan, Christmas hanthotna tomno

Zeisu min suangin, nungzuipi te leh thu ummi tampite in dawi gilote hawlkhia uhhi. Zeisu min in, Vanglian hi. Zeisu min suangin Pa Pasian kiang upna tawh thu ngen leng ki ngah hi. Zeisu min in, Ngaih hi. Zeisu min tawh khat leh khat thupha kipiakna in thupi hi. Zeisu min in, Khum hi. Zeisu min suangin natna te hawlkhia in damna ki ngah thei hi. Zeisu min in, Vanglian hi.

Hih pen, Lamdang Thulakpa Vanglian Pasian Tawntungpa Nopsakna Kumpi a kici, naungek ong suak eite tawh hong om khawm den, Emmanuel kici, Zeisu ii vangliatna ahihi. Hih zah aa vanglian Zeisu, a min suangin thu ngetnget huai hilo a hi hiam?

Zeisu min ii vangliat dan, tel taktak hilecin,
Hatsat hunciang, Zeisu min suang aa thu nget suk ziauh ding hi lel hi.
Lungkham hunciang, Zeisu min suang aa ki ap suk ziauh ding hi lel hi.
Lungdam hun ciang, Zeisu min suangin Pasian minphat aa lungdamkoh ding ahihi.

Lamdang Thulak, Vanglian Pasian a kicih pen, gualtung tuan nop man, ka tungnung kituhna hi hetlo aa, a lamdang takpi, a vanglian takpi a hihi. Tua a hihman in, na nget kei leh nang mah a sum ding hiteh.
Zeisu min suangin ngen lehang, a ki ngah thei gegu pen, ngenlo in, banghang omom ding i hihiam?
Vangliatna khempeuh ii tung ah a om Zeisu ii min in, min khempeuh sang aa Min ngaihzaw a hihlam, na nuntakna sung ah ong kilang khia ta hen. Amen.

Khuado pawi thu


A masa in kong thumnop ah i mun imual zui in i zatdan kibang lo di a hih man in a kibang lo a om leh zatdan kibang lo hong suak ding hi.


Khanglui i pu i pa te in dawi mah na kihta pen uh a hih man in kum 1 khat vei khuado pawi kibawl zel2 hi .hih hun sung ah bang teng ki zangh hiam cih leh ..... khuanawl pan in Ta'ngSuak ci in meide sa in phitmut kawmsa in innlam zuan in kipai hi



(A)Phit la (Aw)



(1) Phit Phut Phit Phut Phit =Taang suah kipatna pan a,lampai kawm aa kitum phit hi.



(2) Omlai,Omlai Muakin Sang a Omlai Phit =Inntual zang a kitun ciang a phit tumdi khempeuh tawh lamna ding aa kipat na hi-in a sangpen mah tawh kibang hang a cih na hi.



(3) Simbu In Builu lam ee,Ciau gal Kaipih Zota e,Phit! =Khuado a lungdam uh a hih mah bang in simbu in a lungdamna Builu a na lampih pen phit aw tawh la in a sa uh hi.



(B)Kau Hawl Khak Na



= ( Dawi aw ciah in na ni na kha cingta nazun na ek namsia na zi na ta in honglam et na sawt zo na gam na khua ah ciah in)ci-in kau na hawl khia uh hi.



(C)Khuai La( Aih Na La)



(a) Khuai va la'ng khuai va la'ng e tuitum ah khuai va la'ng ee..



(b)Khuai aw hkng deh kha na cia gialgiak bu kawm nuam ing ee...



(a)Vah khuai kalak tam tah e sing tan hong lel tam ta ee...



(b)Seino gual in hong lel zongh in sanggah kilbang khang leng ee...



(a)Vah khuai lak na tuanglam tung ah pengpum huiva mau bang ee....



(b)Pengpum hui vamau bang e tungciang sih al khawl bang ee...



(a)Tu lil lel a gamvah khuai aw ,nasau bel bang hal ing ee...



(b)Na saubel bang hal ing e lenkhuang in aizo ing ee...



(a)Tu lil lel a gamvah khuai aw,na sauzang bang gial aw ee...



(b)Sauzang bang gial kalam na aw ka zua cial nemno aw ee...



(a)Vah khuai lapna ka cialdawh ka zua sang lap lai bang ee...



(b)Zua lap hilo la lap hilo hibang nunnop km diam? aw ...



(a)Gam a vahkhuai hangzawng aw e mono gual hang zaw aw ee...



(b)Gam a vahkhuai hang kisa a mono ten tuibang la'ng ee...



(D)KhuaDo La



(a) Pengpum ka saitan aw e gual tawh kalep siam aw ee...



(b) Pengpum saitan gual tawh lepsiam khua vannuai ah thang aw ee ...



(a) Ciau gal pengphuh deih a kalak kumkhua khenciang cin khuang tawh thuah zel ing ee...



(b) A lawm nam aw seino gual aw thel bamg ka tuah tawm hi ee...



(a)Kum ki khen e solkha dang e zin in vang khua zongh hen lawm aw ...



(b) Zin in vang khua lam zongh hen la siangsung tuibang siang hen lawm aw...



(a)(Do na ling)2 e gual in kumkhua do na (ling )2ee..



(b)Gual in kumkhua do na ling ling e do han ah nau bang vakap tangh ee.



(a) Mualdawn nahneu lahmei ciimta kasan ta'ng bang dam aw lawm aw ee...



(b) Ka san ta'ng bang dam aw lawm aw ,lungsim khaubang hual aw lawm aw ee...



(a)I lam lam a,i lam kil zawl ah (ngaih tawh lam khawm)2 zai deih khaubang sut (tong san nuam ee)2 aw ee...



(b)I san san hang san cim la'ng e (san sa ngaihno )2 tong san (tuai man niang )2 aw ee...



Genkhelh sutkhelh a om leh nong theih siam ta un lungdam .



Zampu

Israel te' ni thupi teng

Mar 16Adar II 14Purim (Tel Aviv)
Mar 17Adar II 15Shushan Purim (Jerusalem)

Apr 15Nisan 15Pesach I (First day of Passover)
Apr 16Nisan 16Pesach II (Passover)
Apr 17Nisan 17Pesach III (Passover)
Apr 18Nisan 18Pesach IV (Passover)
Apr 19Nisan 19Pesach V (Passover)
Apr 20Nisan 20Pesach VI (Passover)
Apr 21Nisan 21Pesach VII (Last day of Passover)
Apr 28Nisan 28Yom HaShoah/Holocaust Memorial Day

May 5Iyar 5Yom HaZikaron (Memorial Day)
May 6Iyar 6Yom HaAtzmaut (Independence Day)******

Jun 4Sivan 6Shavuot (Pentecost)

Aug 5Av 9Tisha B'Av

Sep 25Tishri 1Rosh Hashana (New Year)******
Sep 26Tishri 2Rosh Hashana II (New Year day 2)

Oct 4Tishri 10Yom Kippur
Oct 9Tishri 15Sukkot I
Oct 10Tishri 16Sukkot II
Oct 11Tishri 17Sukkot III
Oct 12Tishri 18Sukkot IV
Oct 13Tishri 19Sukkot V
Oct 14Tishri 20Sukkot VI
Oct 15Tishri 21Sukkot VII/Hoshanah Rabah*****
Oct 16Tishri 22Shmini Atzeret/Simchat Torah

Dec 17Kislev 25Hanukkah I (Holiday of lights)
Dec 18Kislev 26Hanukkah II
Dec 19Kislev 27Hanukkah III
Dec 20Kislev 28Hanukkah IV
Dec 21Kislev 29Hanukkah V
Dec 22Kislev 30Hanukkah VI/Rosh Chodesh Tevet
Dec 23Tevet 1Hanukkah VII
Dec 24Tevet 2Hanukkah VIII

Bible Sunday pen Bible Day ci-in kilaih

Kawlgam ah Pawl namkim kigawmin August nipi thumna pen Bible Sunday ci-in thungetna, piakkhiatna le Lai Siangtho tawh kisai thupi takakidemna, phatna la sakna tuamtuam a kizang den ahi hi. Hun khat lai in, Anglican (Church of the Province of Myanmar) in November kha in tuam zat uh hi. Sunday i cih hangin SDA in kiginni (sabbath ni) in zang uh hi. I kibat lohna tuamtuam a om hangin Lai Siangtho ah a kigawm Christian pawlpite in tua bang a Bible Sunday tuamzat ding sangin a kibang a zat ding hoih kisa zaw ahih manin kivaihawm khawm hi.
1. A beisa kum 20 khawng a kipan Anglican (Church of the Province of Myanmar) pawlpi in a tuamin zang nawn loin, August nipi thumna ah zang suakta hi.
2. SUNDAY icih ciangin Sabbath ni kikhawmte kihel lo zel ahih manin nipi ni bek hi lo, a thupi theithei a zat ding utna tawh BIBLE DAY kici hi. A huamkim ding deihna ahi hi. a nei tuam om lo ding deihna ahi hi. Min hanga thanemna a om loh ding deihna ahi hi.
3. Tu in pawlpi tampi (Kawlzang ah tam phadiak) Bible Day pen kal khat sung zang uh a, tatsat loin Lai Siangtho sim uh hi. Nitak sim kikhop bawl uh hi. (Zanitakin Kawlpi pan phone tawh hong kihopih a, Pyidawtha khua kiang Samit Kwin ah nipi ni nitak a kipanin Piancilna a lian khat pan pan ciatciat in Lai Siangtho sim hi, hong kici hi. BIBLE DAY kalkhat sung Kawlpi dungsuk ah a tawm pen pawlpi 20 bangin tatsat lo Lai Siangtho simna nei den hi.) Lai Siangtho lo tawh leitungah bangmah KHO LO hi. BIBLE DAY pen Bible Society ading a bawl i hi kei a, ei ciat ading a bawl ihi hi.
Rev. Khoi Lam Thang
General Secretary
Bible Society of Myanmar

Nute' ni (by. Pu Hang Khan Lian)

Nu leh Pa lo aa piang leitung mihing omlo ahihman in Ipu Ipa te’n, “Singhawm suanghawm aa piang kuamah omlohi” naci uh aa khat leh khat kithupi simding acihnopna ban ah, tua sang athuk zaw ahi, piansakna (creation), kimawkpianlo hi, ong piangsak Khat (Pasian) omhi cihna hipahhi. Theology Thuthukpi ahihi. Hih lungsim pua, hih lungsim anei, Zomite, ongpiangsak Pa’n minam khat aa ong bawlcil in, tuni tuhun a Laisingtho’ Piansakna ihsung ah ong guankhin ahihlam kilanghi.
Tuadungzui in, leitung mite’n Pate pahtawina ‘NI’  ihneihtheih pen alungdam huai mahmah ahihi. Ipianna Pate pahtawina anei hih leitung leh Vantung gambek hiding aa a angtan huai mahmah ahihi. Leitungdang te in neilo uhhi. Nute pahtawina ahihleh Vantung ah zong kibawllo in leitungbek ahihman in, amanpha mahmah cihna ahihi. 2010, tukum in leitung aa ong kipiansak zawh kum 55 kapha aa, leitungbup tawh igenngam kei zongin Zomite lak ah, kazi kata nangawn in angahloh Pasian tungpan hamphatna Thupha lian angah ci-in kakigen ngamhi. Banghanghiam cihleh kum 55 kaphakdong kaNu leh kaPa in ong nuntaakpih, mit ciim, bilpil, lungsim pil, lai aa, tuabang Thupha mikim in kingahkim khollo hi. Kei sangin ka U pii kum 62 apha pen Thupha ngahzaw hilai ahihi. Topa minthanna hita hen.
Khatvei, Tedim ah khualam  papii meltheih khat tawh kaki ho kha aa, “Nang zong nanaupangte, USA aa om khat om hilo ahia?” kacihleh, “Ommah hiven tuate khakuun huai lel, khakham veina hilel ee, genvet ding hikei” ong cihsan aa kakan kikkik leh, asawtnailo lai in India lam tawn in ongciah aa aPa kiang kihillo, baanglo in, azi leh atate’ omna Kawlpi delhsuk suak ci-in katheihi. Khakuun huai takpi kasahi.
Khatvei mah Singapore zatopi ah cina gimsimsim khat kaveh leh, kacina vehpa ong gim, ong kipan tawm biangbuangin, abei kuanciang, “KaNu leh kaPa tung  nathum sak un, ong ci aa, “Tuni dong sumlepaai bangmah puak zolo hi’ng” ongcihi. Ka lungsim sung ah, gamdang aa sum thalawh aa tutanvei om, NulePa tung dangkasan peekkhat zong puaknailo cihbel thuum aa patvet ding zong hikei, Kawlte’n, “Leitung gik tuamsaklel, kimanna neilo” acihte nahihman in asi hakzaw hiteh kaci simsimhi.
1970 pawlmah in Zomi sumbawl masa khat khanglaipi in ong sivat aa, sigalte kiho sim kazak ciang ahiding mah hi kacihtha ongsuak hi. Amah pen a innkuan sung vuah, sum muthei pen ahihna tawh kizui in aNu, aPa leh asanggam a-u, anaute tung ah kiphasak mahmah, simmawh mahmah hihtuak aa, heh nading zongden in, ahehciang, Zongeina zong ahihetlo Kawlte hehciang aa kisimmawhna aa azat uh azummawh nangawn aNu, aPa mai ah leemngam hihtuakhi. Ipianna iNu, iPa mai aa zummawh lakngam mipa bel iplah huai hetlo mawk mahhi. Hihbang aa thusia theihsunsun, tuahkhak sunsun  ikaihkhopna in hici gamtat kha hetkei ni ikicih nopman ahihi.
Khatvei mah Singapore pan aa ciah tangvalno khat, Ygn atunteh, khualzinna tawh gim, ihmut cimlo ahihman in,  tutphah zal tung kingam(lum) kawm, mitsi kawm leh akhe khaam hiding hiven akhe asanglam ngato kawm in, innlam aa om aPa phone tawh hopih aa, tua laitak naupang te’n, gamdang pan aa ma’ camera ken mah tawh maan(photo) nala kha uhhi. Innlam aNu leh aPa kiang tung, avanpuakteng leh a maan(photo) puakteng vel ngeingai a om laitak un, Ygn atun ni aa aPa tawh akiho laitak aa a omdan aPa’n amuhteh, “Suan Kim, hih Ygn nong tunni aa kei tawh ihkiho laitak aa na omdan maw?” ci-in dongpah aa maan sung ah ani, anai kigelh himawk ahihman in nialtheih omlo hihtuakhi. A Pa lupna khansung lutpah liana a, aNu aa kipan a unau teng un athuum takteh, “Nidangciang kei kahi aa, na Nu ahi zongin,  nagei ah ka om uh aa ka om kei-uh zongin, ihkiho aa, ko tawh kisai kizopna khatpeuh nasep, nabawl uhteh hibang tutdan, khawldan za nuamlo hi’ng, ko, note’ hiciciang aa hopih ding hilo hi-ung, lungsim takpi tawh nong hopih nop kei uhleh ong hopih dah zaw un” kici pah uh hihtuakhi. Hi kasa mahmah hi. NulehPa muhna bek aa kihoihsak ding hizenzen lohi. Nu leh Pa lungkimna sum leh paai zong na hikhin pah khollo mawk mahhi. Avaang uh tanding ahihi.
Ka Upiipa  kum 62 aphaak ciang nasep tawlnga aa, “Kei pen ka tate  kazon, kavaakna in katha kangal beitahi, Tua ahihman in ka tate ading Pa hoih kakici theihi. Ahihhang kaNu leh kaPa ii tapa hoih kahih nading in ta hoih kaneih kisam hi” ci aa, hi kasa mahmahhi. Pa hoih hihding athupit mahbangin tahoih hihding thupi zaw laihi. Nute, Pate pahtawi icih pen amau pahtawi ihi kei aa ei leh ei kipahtawi ihi zaw hi. Khatguak nasep hilohi.
Khatvei, sang aa sang sia ka sep lai, sangnaupangte khat in ak gualno khat ong puak aa, nuamlua kahihman in kakhawi leh khanih, khathum khitteh ong tui hi. A tui masa  nambat “1” ci-in kaciamtehhi. Azingteh khat ong tui leuleu in “2” ci-in kaciamtehhi. Athumna ong  tuiteh, akhatna leh anihna la in, kaNu leh kaPa akhatna pia in, ka Panote nupa anihna kapia uhhi. Alungdam dan uh ka mangngilh thei keihi. Aktui tang 100 lei in kapia zongin tua zah in nuamlo ding uhhi. Ne le uh zong khamtaak ahilo aktui pum khat hang aa anuamna uhpen, a aktui hilo in “athu” ahihi.
Tua ahihman in, ZIS kikhopna ah tukum Nute’ Ni in, “INu, iPate pe’n anlim tuilim tawh nungta hizenzen lo-in, “huih” tawh anungta ahihi” kacihi. Ong kinuihsan hi. Ngaihsun kikkik hi lehang NulehPa lungdamna pen, sumlehpaai neih leh lam hikhin khollo in, athu hi aa huih ahihi. Khemna huih hilo in zahtaakna, pii bawlna, itna huih ahihi. Ahamsa hihetlo hi. Kawlte paunaak ah, “Nupa kop khat in ta 1000 vaak zo aa, ta 1000 in Nu leh Pa kop khat vaak zolo uhhi” naci hi.
Zomi ulehnau kong hanthot nop in, “NaNuteek, naPateek neekding nazi nata tawh kisut liang mah in nakhen khiat kei leh bangmah napia zo ngeikei dinghi”. Hihbang kacih ciang ihzi ihta in pia nuamlo, gitloh sakna hilo in tuazah dong aa thupi ngaihsutding kacihnopna ahihi. Zomi pasal pawlkhat in asung, apu(azi’ nu leh pa) pen Nu leh Pa in simlo in etding ngaihsunlo, zi lel akicihding patauh ngaihsutkha uhhi. Ngaihsut khialhna lian mahmah ahihi. Nuteek, Pateek bangmah sem zo nawnlote, ei atu, ata te’n en kei lehang kua’n en aa ummawk ihihiam? Tuate neek ding dawnding, vaihawmsak kei lehang kua’n vaihawm sak aa um ihihiam?
Gamdang ah sum thalawh in ka om aa, kha sum kasan aa kipan kaNu, kaPa kakhakdenhi. Zong akisim thei pian kahihi. Khatvei inn lam ciah in Nuteek, Pateek tawh tawm vei ka omleh, ihNu, ihPa te ateek uhteh agenhak zia uh kigen theilo hi. Ei zong teek in ihkum tamleh akituaci luading ahihi. Anneek ding nanagwn ne nuampaklo in zolzol akuul uh nahimawkhi. Tuatawh kizom in kangaihsutna ong kilamdangsak lianhi. Azenzen in kaNu kaPa in, “Zinkhia nawn ke’nla ko ong ompih in” ongci hileh bangtanvei kithuah in, kangeek bawl zotam ci-in kei leh kei kakidonghi. Kei pen kasanggam numei nih kaNu, kaPa keemding omthei aa, tuate thupitna, alungsim duaiziate uh kei sumkhak sang thupi zaw ahihna kaphawk phaphahi. Tuate hang aa kaNu, kaPa tutanvei anungta na hizaw aa kei sum khak hang nahihetlo zawhi. Kei pen sum thalawh kahihman aa sumkhak kahi aa, kasanggamte pen sum ngah taleh ngah takei leh Nu leh Pa keem ahi uhhi.
Zomi ulehnau, innlam aa ihNuteek, ihPateek ong kepsak, ihsanggam, ihzi, ihta te ei sumzong paaizong tesang thupi zaw kaanlai ahihlam mangngilh kha hetlo ding hihang. Adiakdiak ei pasalte kipasal sakna anuihzaak huaipi nahi mawkhi. Khatvei, nasepna pan ciah, kasung nuamlo, ka awnghawh tha suak kawm in inn katunghi. Ka Nu’n ong dawn aa ka kiho kawmkawm un, ka omdan man sa phalo hiding hiven, “Na dailen tha suak ahia?” ongci aa, “Hidihdih veh aw” kacihi. Ka tate’n lamdangsa mahmah uh aa, “Pi, nang bangci  theih  nahia?” ci-in dong ngeingai uhhi. Ka Nu’n atute kiang ah, “Leltak, nasuahtung  vua kipan, mitkhahlo aa ih ong et gige hiven, na omdan uh en lehang akithei lel veleh” cihsan aa, atu te’n lamdangsa mahmah in, “Pi, nang na tate it taktak ciai” ci-in nui ngeingai uhhi.
Ih  Nu i Pa te’n hawmthawhna tawh mitkhahlo aa ong encik gige ahih man in, ong tel mahmah uh himawkhi. Ihihbangbang ong naak tel lua mahmah ahihi. Sum zong paai  zongin ih omciang, amau khutsung ah ih-ap lohhang  ihngahzah athei lua mahmah uh nahi aa, hop noploh man, piak noploh man aa angahlo kineih khakding hilohi. Thei lua mahmah mawk uhhi. NulehPa ahai mahmah zongin tate khem zawhding hilo aa, atheilo akineihbek uh ahihi. Tua pen akheemsawm tate ading gu suakhi. Khemtawh patkhak vetding nahihetlohi.
Zomi ulehnau in tuni aa kipan ihNuteek, ihPateek zahtaak, thupi bawl, it, khemsawm hetlo in lungkim sakding hanciam ding hihang. Khansauna Thupha ahihi. Adiakdiak gamdang ihtunteh, gamdangte tatzia in ta mawklo in, ihZongeina limcite khahsuah loding hihang. Nu leh Pa ompih aa, vaak aa zawng omnailohi. Nasep manlah in Nu leh Pa ompih manlo, Piteek, Puteek kepna ah puakziau cihte zuaupi hi aa, puaksawm kei peuh lehang tua hangin puuksi hetlo ding hihang. Tuni aa Nuteek, Pateek limbawllo khat in nateekteh ong kilim bawlding lam-en kha kei in. Ihvawh bangtek in atding hihang.
Zongeina ah, Nuteek, Pateek pen upen, innluahte etding vilding kisa kha aa hizenzen tuanlo hi. Nuteek, Pateek pen ta ihihnaakleh etding hi aa, uzaw, innluah cih gengenloh, numei, pasal kikhen ding thu hilohi. Ta ihihnaakleh etding ahihi. Tam ngahte’n tam etzo ding aa tawm ngahte’n tawm etzo dinghi. Thupha akibang ngahciatding ahihi. Etzawhzah athupi hilo aa etnopna lungsim athupi ahihi.
Nu leh Pa akhasia saklo dingin Pasian in ong siamciat tahen.
(Hih kalaigelh tawh Nu leh Pa a en, avaak, azahtaak, a it khempeuh zahtaakna kapiak ban ah, pianna Nu leh Pa taang aa cimawh genthei bangmah asem zo nawnlo ihBiakna Siamasate leh Siate nusiatsa aZite huhna apia, nisim ankuang a umkhawm ZIS pawlmi tetung lungdamna kako hi.) Hih ih Pi, ih Pute agilvah, akhangno suah masiah, ih Zogam khangno suah in, alei hoih ngeilo dinghi.
By Hang Khan Lian (Singapore)