Showing posts with label Article Health. Show all posts
Showing posts with label Article Health. Show all posts

AIDS thu theihna in AIDS pan kidop ong siam sak thei

AIDS ngahloh nadingin AIDS thu thei in!
Thumasa
Leitung ah AIDS natna a piangsak lungno HIV (human immunodeficiency virus) le tua lungno hanga a damkik thei nawnlo natna AIDS (acquired immunodeficiency syndrome) tawh a nungta mi then 20 (lakh 200 or 20 million) tak pha hi, cih na theikha hiam? Tua then 20 sung pan a kimkhat pen leitungbup cidamna lam a sai World Health Organization (WHO) te in numei hi ci-in na ciamteh uh hi. Tua ahih manin, numei le AIDS cih thulu tawh hih lai kong gelh hi. Numeite in HIV/AIDS thu limtak i theih ding kisam ka sa hi.
Mihing sisan sungah natna a piangsak thei lungno nam khat HIV kici a om ciangin tua HIV lungno in natna a dal thei sisante susia-in a damkik thei nawnlo ding natna AIDS kici piangsak hi. Tua HIV lungno a nei khempeuh in AIDS natna ngah pah khin khollo napi, a tamzaw in a ngah hamtang uh hi. A ngahkha khempeuh lah damkik cih om lo hi. Tua ahih manin HIV lungno ngahkhak ding kidophuai a, AIDS natna ngahloh nading a bulpi ahi hi. HIV lungno a that thei zatui kimu nailo a, ahi zongin AIDS natna ngah pah nading panin themkhat a ziakaisak thei zatui bel om hi. Tua zatui min antiretroviral kici hi.
a. America ah HIV lungno le AIDS natna: America gam cidamna lam a saipawl Centers for Disease Control (CDC) te in a genna ah kum 2002 kumtawp tanin AIDS natna nei khangno le picing numei 159,271 phazo hi. Kum sawmlesagih sung, 1985 pan 2002 kikal sungin USA gam ah numei AIDS natna nei a zah li-in tam hi ci-in kiciamteh hi (7% to 26%). Ahi zongin hih kum sawmlesagih sung mahin zatui antiretroviral therapies tawh kidalna hangin HIV lungno nei za ah sawmlesagih (17%) in AIDS natna ngah lo hi. Hih zatui nekna panin HIV lungno in AIDS natna a piangsak ding pen khakcip ahih keileh ziakaisak hi dingin ki-ummawh hi. America ah AIDS natna ngah za ah sawmte pen numei kum 25 sanga naupangzaw vive ahi uh hi. A gambup numei lakah Spanish le mivom za ah sawmnihlenga sangin tawmzaw uh a, tua za ah sawmnihlenga sung pan AIDS natna nei za ah sawmgiatlenih sangin tamzaw leuleu hi. Spanish le mivom numei za lakah 82 in AIDS natna nei uh cihna hi.
b. Singapore ah HIV lungno: Kum 1994 August kha-in zato lam siamte in a kan uh ciang Singapore ah numei HIV lungno nei a masapen 1986 kumin kimu hi, cih na gen uh hi. 1991 zawh lam ciangin tua lungno nei numei tam semsem a, 1993 kum ciangin mi 16 pha in, tua 16 lak pan 14 te pen numei le pasal lupkhopna (omkhopna) pan kilawh hi. Mi khat in sisan kipiakna pan ngah a, a dang khat in zatui hoihlo kisutna pan ngah hi. Numei 8 inn nupi hi a, a dang nihte a pasal uh si zo hi. Nupi 8 in nasep nei a, tua lak pan mi 5 in AIDS natna hangin nasep zom zo nawn loin tawp a, khat in a nasep tawpin a innkuan kem hi. Hih AIDS natna nei nupi a tamzaw sangkahna kician nei lo, laitan sangpi nei omlo uh hi.
1. AIDS kici bang hiam
HIV lungno mihing sa sungah a lut ciangin a damkik thei nawn lo ding natna khat piangsak a, tua lungno hanga damkik thei nawn lo natna pen AIDS kici hi. Zolai-in mikhat in hih bangin a khiatna gen hi: Anbang Itna Damtheilo Sihna!
2. AIDS natna ngah nading hun bangtan sawt hiam
HIV lungno a nei khat in AIDS natna a ngah dong hun bangtan sawt hiam, cihna ah a tamzaw in kum 8 pan kum 10 sawt hi.
3. HIV lungno nei le AIDS natna nei a kilamdanna bang hiam
HIV lungno ngahte in AIDS natna ngah pah lo a, AIDS natna neite HIV lungno khangcing ta cihna hi. Mihing sa sungah natna om ding a dal tuisikte HIV lungno in dawn kang in, a dam thei nawn lo ding natna AIDS piangsak hi. HIV lungno nei khat AIDS natna a ngah mateng (HIV lungno a picin mateng) mi cidam ngeina bangin thahatin melhoih a, ankam limin, kigensiat nading nei vet lo hi.
4. HIV lungno koi pan kingah hiam
HIV lungno ngah za ah 80 sanga tamzawte in numei pasal omkhopna pan hi. HIV lungno ngah theih nading omdan hoih lo khempeuh lak pan a kikem lo peuhmah HIV lungno a ngah ding ol mahmah hi. HIV lungno ngah theihna pawlkhat a nuai-ah gualsuk ni.
a) HIV lungno a neisa khat tawh numei pasal omkhopna pan
b) Zatui khamtheih zangte in kisutna phim a zatkhop uh ciangin
c) HIV lungno nei nupi in a ta nawitui a piakna pan
d) HIV lungno omna sisan le sisan nam kipiakna pan
5. HIV lungno bangci kilawh hiam
Leitungbup ah HIV kilawhna a tampen numei le pasal lupkhopna pan ahi hi. Za ah 90 pen hih banga numei pasal thangtatna pan kingah hi. America ah za ah 42 pen numei pasal thangtatna pan kilawh a, za ah 21 pen zatui kisun (drug abuse) pan kingah ahi hi, ci-in kum 2002 tawp lamin kiciamteh hi.
HIV lungno pen numei le pasal thangtatna pan kingah himah leh hun tamzaw ah numei in ngahbaih diak a, pasal in ngahhakzaw hi. Numei zunthakna a naalsak nap tawh a kibang a man ditdiat tuite (viginal secretions) hangin numei in HIV lungno ngahbaihzaw hi, ci-in kiciamteh hi. AIDS natna a kimuh cil lai in, sisan kisam a om ciangin sisan le cituite HIV lungno om le omloh kisit masa ngei lo ahih manin mi pawlkhat in sisan kipiakna pan HIV lungno na ngah uh hi. Sisan siangtho lo kipiakha cihna hi. HIV lungno kingah theih dan pawlkhat gen lai ni.
a) Zatui khamtheih kisutna pan
b) Zatui khamtheih kisutna phimte zatkhopna pan
c) Pasal le pasal omkhopna pan
d) Sisan, pasal bawtui le numei zunthakna a kawtsak tuite kisawhkhakna pan, ahi zongin khua-ul le ciltui pan kilawh thei lo (body fluids such as blood, semen or vaginal secretions but not sweat or saliva)
6. Numei in HIV/AIDS neileh bangci kithei hiam
AIDS natna a piangsak HIV lungno a nei numei pawlkhat in tua lungno nei ahih lam zong kithei pah lo hi. Ahi zongin HIV lungno a nei peuhmah in a theih nading honkhat om hi, a omdan uh pawlkhat kikhek hamtang ahih manin, tua bang a kitheih baihna nam thum om hi.
a) Numei zunthakna ah meima le liamna om den hi
b) Numei zunthakna ah tuisik luang den, kawt den
c) Numei kalkawmah natna khatpeuh om leh damsak kik ding ol lo.
Tua lo adang pawlkhat pan zong numeite in HIV lungno nei hi cih kitheithei hi.
d) Numei zunthakna ah meima dam thei lo om den
e) Numei zunthakna sunglam (taisung) meikang bangin sa den (pelvic inflammatory disease, PID)
f) Zunthakna pan tui luangkhiate a mel kidang
g) Zunthakna le a kiimteng thakin bawk
h) Zunthakna kiim le a sunglam keugawin kilip
i) Zunthakna sung khempeuh zuul gawp
Atamzaw ah, numei in HIV lungno a ngah ciangin a ngah pan khakhat sung khawngin bukvei bangin khuh kheuhkheuh uh hi. Mi pawlkhat leuleu in HIV lungno a ngah pan kum tampi sung ngah ahi cih a kitheih nading bangmah kilangkhia lo hi. HIV lungno a ngah zawh ciang natna khatpeuh ngahkik leh tua natna uang semsem a, a nuai-a bangin a natna kilangkhia thei hi.
j) Gawl sung bawk, lenuai bawk, khaal bawk cihte hong kipan hi
k) Khuasik cisa dam thei loin zan ciangin khua-ul kai den
l) Anngawl hang hi loin gawng hanhan
m) Thazawm den, tha nei lo (thabei)
n) Ankam lim lo, sungpai, sungkhawh, ektui den
o) Kamsung na-in bawk, tangsiat bangin kang tiptep cih bang om den hi.
7. HIV lungno pan AIDS natna ngah cih bangci kithei hiam
a) HIV lungno a ngah khat in tua lungno ngah hi cih zong kithei lo hi.
b) Tua zawh a sawt loin cisa, kamsung pol, vun tungah cithak nei cih bangin om hi.
c) Hih bang nopmawhna omte dam zel, kilangkik zel cih bangin hun sawtpi kivei hi.
d) Tua zawh ciangin gawlbawk, lenuai bawk, khaalkawm bawk cih bang om hi. Hih in khathum sung bang sawt hi. Hih bang hong om ciangin HIV lungno khangcing dekta, pumpi hatna le natna dal zawhna kiam cihna hi a, AIDS natna picing kingah tading cih a kilatna hi. Hih hun ciangin natna neuno bukvei nangawn pumpi in dal zo lo ahih manin lungtang, mit, gilpi, vun le thagui natna cihte tawh kizom suak a, pumpi tawh kilawi nawn lo ahih manin pumpi thazawm den ta hi.
e) Cisa, ankam lim lo, sungtholh cihte in bawm den ahih manin gawng semsem a, thakiam deuhdeuh hi.
f) Hih bang hun ciangin mi pawlkhat in sameng natna (cancer) zong ngah thei hi.
g) Hih banga HIV lungno a nei khempeuh in midang lawh theita hi.
8. HIV lungno olno a kilawh ziauziau theih ahi hiam
HIV lungno pen innsungah tenkhopna pan kilawh thei lo hi. Ekbuk, ankuang, le umlekeute zatkhopna pan kilawh thei lo hi. Tuibual khopna pan kilawh thei lo hi. Puansawpna van zatkhopna pan zong kilawh lo hi. Zum nasep khopna, sangkah khopna cihte pan zong kilawh thei lo hi. Tho le ganhing pehna pan kilawh lo hi.
9. HIV lungno nei le neilo bangci kithei hiam
a. HIV antibodies test pan kithei: HIV lungno ngah ciang a piangtawm HIV antibodies neih le neihloh etna panin HIV lungno neih le neihloh kitel hi. HIV antibodies pen HIV lungno a ngah zawh a sawt loin mihing pumpi tungah piangtawm hi. HIV antibodies a om leh HIV lungno nei, HIV antibodies a om keileh HIV lungno nei lo cihna hi. Atamzaw ah HIV lungno ngah pan khathum sungin HIV antibodies piang hi. Ahi zongin khat veivei antibodies piang pahpah lo thei ahih manin HIV antibodies om lo cih man bek tawh HIV lungno nei lo kici thei lo hi.
HIV antibodies a kimuh leh HIV lungno om takpi hi cihna hi a, ahi zongin AIDS natna ngahta cihna hipah lo hi. AIDS natna pen HIV lungno a khangcin ciangin a damkik thei nawn lo ding natna hi bek a, HIV lungno nei khempeuh AIDS natna nei hi lo hi. HIV lungno pen a picin ding a kidal pah keileh AIDS natna ngah pah ding cihna hi. AIDS natna ngah tampi in sameng natna (cancer) zong ngah khawm hi.
b. Sisan le sa sungah tuisikte etna pan kithei: Sisan le ciitui (pumpi sunga tuisik omte) sitna pan HIV lungno neih le neihloh kitel thei hi. Hih etna pan HIV lungno nam nih HIV-1 le HIV-2 om le omloh kitel thei hi. Hih bang sisan le ciitui etna in minit 20 bang bei hi.
10. Bang hangin HIV lungno neih le neihloh etsak kul hiam
Ki-etsakna panin HIV lungno neikha hileng cih lunghihmawhna beisak a, neikha ihih leh a dalna zatui nek pah ding hong theisak hi. Mailam kikepzia ding zong kitelpah hi. Numei pasal thangtatna pan kikep a kul dan le, ta le nau neih ding zong kikep a kulzia hong telsak hi. Cidamna hoihtak neih a kul dan hong theisaka pumpi cidam a kisapzia hong telsak hi.
11. Sisan hawm leng HIV lungno ka ngah thei hiam
Sisan piakna phim le thawlte siangtho hi peuh leh HIV lungno kingah lo hi. Phim le thawlte khatvei zat khit ciangin pai pah ding.
12. HIV lungno ka ngahloh nadingin bangci kikep ding
Koppih khat bek nei ding. Numei pasal thangtatna pan kikem siangtho ding. A thangtat nuam numei le pasalte tawh kipelh ding. Zatui khamtheih kisun lo ding. Sisan piak ciangin phim le thawlte siangtho ding, mi zatsa zang lo ding. Sisan le ciitui a siangtho bek sang ding, zang ding. Kisutna phim khatpeuh zat ma-in siangtho takpi hiam cih tel masa ding (use sterilized needles and piercing matenials only).
13. Numei pasal kizopna siangtho kici bang hiam
Numei pasal kizopna siangtho cih ciangin numei le pasal sung pan hong luangkhia bawtui le ciituite kisawhkha lo ding cihna hi. Hih bang ahih theih nadingin atuamna (condom) zat ding cihna hi. Numei pasal omkhop ciangin zu kham lo ding.
14. HIV lungno nei ka hi cih thei leng bang ka lawh dia
HIV lungno nei na hih lam na kitheih leh zato ah HIV/AIDS lam a siamte kiangah pai pah inla, kivelsak in. Na sisan sitsak inla, zatui le kikep dingdan dong in. Numei pasal omkhop kidaangin pelh inla, sisan le ciitui midang zat dingin pia, hawm kei in. Nau neih ding pelh in. Tha neih nading le thahat nadingin anhoih ne inla, na cidam nading hanciam semsem in.
15. AIDS natna a damsak thei zatui a om hiam
Tu ciangciang ah AIDS natna a damsak thei zatui kimu nai lo hi. Zatui pawlkhat NRTI kicite AZT, ddl, ddC, 3TC, d4T le protein inhibitors kici honkhat le NNRTI te in AIDS natna ngah ding ziakaisakin pumpi cidamna hoihsak tuam bek a, damsiangna bel pia lo hi. Zatui bang hoih ding ci-in a kizon san laitak hi.
(Nu Vung Deih Cing in Yangon General Hospital pan Diploma in Nursing and Midwifery a zawh ciangin University of South Australia pan Bachelor of Science in Nursing zo leuleu a, tu laitak Singapore ah sem hi.)

Sm Vung Deih Cing, B.A(History), B.Sc(Nursing)
Singapore

Sikhang natna tawh kisai theihhuai pawlkhat

Sikhang Natna Theihuai Pawl Khat

Sikhang Natna
A theih huaithu pawl khat

A sunga thu kihel teng:
1. Sikhang Natna a cih bang hiam?
2. Bang hang sikhang hiam?
3. Bang hang si khang natna lauhuai in ki dop huai hiam?
4. Bang teng in si khang natna ding piang sak hiam?
5. Ken si khang natna ka nei hiam? 
6. Ih sitha ki teh ciang bang teng ki sit hiam?
7. Si khang ngah baih loh na ding koi cih ki dop ding?


1. Si khang natna a cih bang hiam?
Hih sitha pen a hun hun in khang thei, kiam thei a, mi-hing khat leh khat zong ih si tha ki bang lo hi. Ih sitha ii ngeina maan a hih leh, nasep tam hun leh lungbuai hun teh khang thei a, tawlngak hun teh kiam hi.


Hih a ngeina bang lo in, a hun tam zaw_ na tawlngak sung na ngawn in a khan pai suak leh ‘’SI KHANG NATNA’’ a nei na hi ding hi. A theih huai khat ah, khangno khat a hih leh, a si a khan loh ding a ngeina a hihi.


2. Bang hang si khang hiam?



Ih lungtang sung a ki khol si teng pen, lungtang kisai sim in ki suuk khia hi. Tua a ki suk khia na sitha tawh si gui dung zui in pumpi ah si ki zel hi.

Hih sitha a khang sak thei thu (3) om 
a:

(1)Ih nek ci (salt) a tam luat ciang
(2)Ih nek a thau a tam ciang 
(gentehna,vok thau, aksa vun)
(3)Zu dawn leh za tep na teng a hihi.


Bang hang si khang natna lauhuai in ki dop huai 
hiam?

Si khang natna ih neih cil in ih theih na ding lim om 
mel lo a, ih ngeina mah ki bang thei hi. Ahi zong in, ih kidop kei leh tua natna in ih pumpi meeng teng dam dam in na susia hit hiat hi. Hih thu hang in sikhang natna pen ong ‘’THATSIM THEI NATNA’’ khat in ki thei hi.


Si khang natna a nei pi in, ih ki dop kei leh, hih natna tungtawn in hih nuai aa a kigelh natna tampi ong kizom thei hi.


Bang teng in si khang natna ding piang sak hiam?

I. Kum a tam sem sem ciang in, si khang natna ki ngah baih hi.

II. Sikhang natna in khang gui ki zui thei hi.

III. Pumpi thau luat na
(Thadah aa tut tut na leh, gamta lo aa om den na in ong thau sak thei hi. I pumpi a thau luat ciang in, lungtang in i pumpi a golna zah tawh kizui in, na naak sep kul ahih man in sikhang natna ong ngah sak baih hi.

1. Lungtang natna
2. Khuak sung a om si gui ki siat na pan in a ki ngah pum lang zawt na,
3. Kal siat na leh
4. Mit khua muh loh na

4. Bang teng in si khang natna ding piang sak hiam?


I. Kum a tam sem sem ciang in, si khang natna ki ngah baih hi.

II. Sikhang natna in khang gui ki zui thei hi.

III. Pumpi thau luat na
(Thadah aa tut tut na leh, gamta lo aa om den na in ong thau sak thei hi. I pumpi a thau luat ciang in, lungtang in i pumpi a golna zah tawh kizui in, na naak sep kul ahih man in sikhang natna ong ngah sak baih hi.

IV. Cidam na tawh kituak lo an neek leh tui dawn na: 

 A thau tam neek luat na (gtn: ganthau, thawhbat leh sathau tawh a ki kang neek theih tam neek na). Hih a thau te in si sung ah a lauhuai sathau hoih lo(cholesterol) te in kikhol aa, i sigui sah in khauh sak ahih man in “Sikhang natna” ong piang sak hi.

 Ci tam zat luat na: Ci tam zat luatna hang in, ci sungah a om ‘Sodium’ a cih in, i si gui sungah tui hup thei aa tua hang in, “Sikhang Natna” ong ngah sak baih hi.
 

Zu tam dawn luatna: Zu sungah ‘calorie’ a kici i 
pumpi ong lumsak thei na tampi kihel hi. Tua 
hangin, zu tam dawn luat na in i pumpi ii kisap zah 
vaal ‘calorie’ tampi ong ngahsak hi. Tua pan in, 
‘thauluat na’ zong piang sak hi.

V. Za teepna: Za teep sung aa a kihel za nam tuam tuam te in sigui te kisia sak thei aa, ih sitha (blood pressure) zong khang sak hi.

VI. Sikhum/ Zunkhum Natna : Sikhum/ Zunkhum natna in i sigui te ong susia aa, sitha a ngeina bang sak thei nawnlo ahih man in “Sikhang Natna” piang sak hi.

VII. Lungsim om zia: Lungkham, dahna, launa te in i sitha tawmvei sung khang sak thei hi. Ahi zong in, hih bang lungsim tawh i om den a sawt leh “Sikhang Natna” ong ngah sak baih thei hi.

VIII. Sikhang a piang sak thei thu dang dang te:
 Kal natna
 Nau daal na ding aa kizang zatang te 'Steroid’ a ki ci zatui zatna

5. Ken si khang natna ka nei hiam? 
Si khang natna ih neih lam ih theih na ding pen ih 
sitha teh na tawh bek ki thei thei hi. Na sitha pen siavuan  (doctor) a hi kei leh ei eh ei sitha ki sit zel kul ding hi.


6.Ih sitha ki teh ciang bang teng kisit hiam? Ih sitha nam nih in ki khen thei hi.

1) A tung sitha a ki ci, ih lung tang a ki sai 
sung a ki suuk laitak a ong piang sitha 
leh

2) A nuai sitha a ki ci , ih lung tang ki sai 
khit a tawlngak hun aa piang khia sitha 
hi.

A ngeina a bat leh a tung sitha pen a nuai sitha sang a tam zaw den hi .Sitha a ki teh ciang a tung si tawh a nuai si a nih a ki teh aa, a nih in ki gen ciang:

“Sikhang Natna” na neih leh a tung si bek ahih kei leh a nuai si tawh a nih in, na atawlngak sung na ngawn khang in om den ding hi.

Khat vei siteh a na sitha khang ahih leh “si khang natna” nei ki ci pah thei lo aa, nih vei thum vei, a ni kihal in na teh sim a khang den ahih leh “Sikhang Natna” nei ki ci thei bek ding hi.

7. Si khang ngah baih loh na ding bangci ki dop ding?

Ih nisim nun zia: om daan, neek leh dawn puah phat na pawl khat in si khang natna ngah baih na pan ong daal thei ding hi. Khang kizom aa “Sikhang Natna” ngah theih ding pan na ngawn nisim nuntak zia kidop na tawh ki daal thei hi. Tua baan ah, kidop zawhna in hih nat-na pan in a kingah beh thei thu

1. Thau luat loh na ding ki dopna:

Cidam na ding in, I tun tawh kituak in pumpi gihna (Body Mass Index: BMI) neih ding thupi hi. Na tun tawh kituak pumpi gihna (BMI) na theihna ding in, hih a nuai aa bang in na tuat in.

(Hih a tung aa bang in na tuat theih kei khak leh, zato siam zato syama leh siavuan te’ kiang ah na dong un.) Na tun tawh a kituak lo in, na gik luat leh cidam huai lo aa: lungtang natna, sikhang natna, sikhum/zunkhum, guh leh taang natna, leh pumlang zaw natna (stroke) kingah thei ahih man in thau luat loh ding hanciam ding hoih hi.


Na gawng tuam na ding in na tun tawh kituak thahoih na ngah mateng in, nipi khat 1-2 lb (pound) ciang bang na kiam sak zawh na ding tupna nei in la, an neek khiam in, kimawl den in. 

Tha khat in gawng vat ding zong hoih tuanlo hi.


Na tun tawh kituak tha hoih na ngah khit teh, na kum leh na nasep zah ding tawh kituak zah bek an ne in. (Gentehna: Na sep ding a tam kei aa, na tha zat na ding a tawm leh an tawm ne pah in.)


2. Cidam na ding Neek le dawn zia
 Cidam na tawh ki tuak in neksiam na in ih pumpi thau luat na leh tua pan a a piang sigui siat na pan ong dal thei hi.


 Thau tuam tuam leh sathau hoih lo tam ne kei in.


(Gentehna: Sa thau tam na neek loh na ding in, a thau leh a thau tam a paa aksa vun te pai khia/ hok khia tangh tangh in. Sathau tawh a ki kang gam te tawm nek in. Ngasa tam nek zaw in. Sa sungkua, ak gil, sa sin cih te tawm bek ne in. An leh meh kan na ding in vaimim leh mawngphal pan aa piang sathau nam te zangh zaw in. Ahih theih leh, an leh meh na huan ciang in sathau tam zat lo zaw in tui huan, ngan huan leng ci dam huai zaw hi. Mehteh,  mehgah te na huan ciang in huan min lua kei in. Huan min luat na in tua te sung ah a kihel tha neih na ding ki sam (vitamins) te bei sak thei hi.)


 Ci leh mehza tam zang lua kei in la, tua te ai taang in siing, lothaang leh Tan-pa-ya tui (lime juice) cih te zang in. Mehza taang in cikhum ahih kei leh ngasa neu keu suvui in la, tua zang zaw in.


 Mehteh leh singgah tam ne in. Buh kaang sang in, Buh ham te pen cidam huai zaw hi.


 Zu tam dawn lua kei in. Na tan zawh kei ding leh, Pasal te aa ding ni khat in a tam pen: 
Beer (bawngnawi bung hai 3 <600mls>)
 Wine (bawgnawi bung hai 1 leh lang <300mls>)
Zu/ Alcohol (Bawngnawi bung hai lang <90mls>) bek dawn ding 
hoih hi.
 Numei te aa ding ni khat in a tam pen:
 Beer (Bawngnawi bung hai 2 <400mls>)
Wine (Bawngnawi hai 1 <200mls>)
Zu/ Alcohol (Bawngnawi bung seh thum suah seh khat) bek dawnding hoih hi. 

3. Cidam na ding kimawl in!
Kimawlna in thau na ding pan in ong daal aa, na lungtang aa  ding hoih hi. Tha tam a kizang kimawlna na hih zawh kei ding leh, lamsiau zo den leteh zong cidam nang ahoih pen hi pah hi.

4. Za teep loh ding hanciam in.
Za teep laitak na hih leh dam dam in khiam in la, na khawl zawh 
na ding hahkat in ki-uk tawm in. Zateepna ding aa sum bei ding paam 
maih lua a, cidam na aa ding zong ahoih beek hilo hi. Tuibuuk le Khaini zong zaa pan mah ong piang ahih man in, cidam na ding hoih lo aa, zat loh ding in nang leh nang ki-uk tawm in.

5. Lungsim cidam ding thupi hi. 
Thu khat peuh peuh ah a kisam zah vaal lung himawh lua kei in. Ihmut hun leh tawlngak hun ding la hamtang in.

Zomi Innkuan (Singapore)

Cidam nading akisam thu bulpi nam (3)

Cidamna i cih pen Pasian’ hong piak thupha khat a hih na thu i theih sa ahi hi. Mihing i hih nungsang kuamah a cina ki-utlo hi. Ahizongin mi khempeuh kicidam kimlo hi. I cidamlohna leh akilawhthei natnate i ngah khakna thu lianpi thum om hi.
Tua thu nam thum te in,
(1)        I neulai in a khauh lua zatui, zaha te i zat hang
(2)        I pumpi aading akisam dat (nutrition) kicing takin i ngah loh hang le
(3)        Khuahun zui in a kilawm omdan, khawldan le kikep zia te i theih loh hangte ahi hi.
(1)        Ei mihingte pen i ngei na ah natna khat peuhpeuh ingah ciangin a manlang thei penin kidamkik nuampah hi. Tua ahih manin i damkik mengmeng nadingin zatui zaha tuamtuamte le lamtuamtuamte i zangh hi. Gentehna in, lutangna sungkhak ci pak ni. Lutang natna apiangsak sungkhakna hemkhia masa lo pi-in lutang natza akhauh theithei i neek leh tua lutang natna dampak lel ding a asau veilo in hong nakik pah veve ding hi. Tuabang zatuite in a na adamsakpah hang in adeihhuailo sapna tampi (side effects) a piansak lam aphawk, atheikha  kitawm mahmah hi.
Tua ahih ciangin natna khat peuhpeuh i ngah khak leh tua natna zungpi te zong masa in kibawl ding kisam masa hi. Ahih hangin natna khatpeuh ahizongin, akilawh thei natna khatpeuh i ngah ciangin ahi zongin zatui khauh theithei kizangh pahpahnuam ciathi. Natna hong piangsak thu zungpite hepkhiat ding, natna lungno te i do zawhna dingin a kisam thate i ngah nadingin nekdan, khawldan siamdingahte tuni akipan phawk tawnntungin zang ciat ni.
(2)        I sanggam Kawlte in “An zong zatui, zatui zong an” ana cih mah bangun, nuntakna neite khempeuh cidam takin i nuntaktheih nadingin nek le dawn mah akisam thupha bulpi khat ahi hi.
Mihing, ganhingte khempeuh an le tui tawh akinungta ahi hi. Tua hi a, naupaai nupite anaupaai sungun akisam dat (nutrition) te akicingin ngah kha kei leh, ta cidam asuah nading uh hamsa hi. Hihte pen neek le dawn tawh kisai thule la theihhuaite i theihlohman leh i neihsa, i lamsa in atawklohman ahi hi. I hih zawh ciangciang, i sum i paite i zattheih banah cidamna tawh kituakin i neek. i dawntheihding zong kisam hi. I nek ngeina ahi buh, vaimim, mim tuamtuamte, be sa le meh teh mehgahte i huan ciangin akisamlo supna te aom loh nading in i huansiam ding kisam mahmah hi.
“Limsa” cih bek tawh i lungkim ding hilo hi. Gentehna ah buhtang i huan ciangin thumvei bang i sawp sangin nih vei ciang sawp dingin, antui khit kullo dingin huan ding or nganhuan ding. kilawm zaw hi. Tuamah bangin mehteh mehgahte zong siangtakin i sil khitteh huan ding, sathau / tuite ahoih bek zah zang ding, mehza i zat tangin ngapik, cikhum cihte zang ding, mei zong sasak lualo lah daisak lualo ding, cihte pen anbuk sung aa anhuante theih ding cidamnading thu bulpite ahi hi.
Buh le mangbuh tawh kibawl nate tampipi ne in meh tehmehgah le sa te i ngawlh nate in a phiatkhiat huai ngeina khat ahi hi. I tha ahat nading in i zingsang nate ah tha adim be le sadat kihel nek le dawnte i nek ding hoihzaw hi.

(3)        Khuahun kikhel zui in cidamna tawh kituakin i nuntak theih ding kisam hi. A masa in pumpi siantho ding kisam hi. I naupangte kum 3, kum 4 bang hong phak ua kipan in amau le amau ihmutma khut le khe sil, maiphiat, hanawt, anneekma le dailenkhit khut silsiang ding cih zongsat hoihte i pattah siam ding kisam hi. Akipumsil uh ciangun zong natna lungno te bawm theihdiak na ahi lenuai le kalkawmte hoihtak silsiang ding cihte zong gensiam, pattahsiam ding kisam hi.
I nek khit i dawn khit ciangin i sung i lai ahoih ding zong hong kisam zel hi. Ne ne-ding in hong pusuak kik thei kei mawkleh i sungah muatgawpin i omdan nuamlo ding hi. Thamlo in akisamlo natna tuamtuam hong thuaksak lailai hi.
Tua ahih manin i sung i lai ahoih nadingin tui tampi i dawn ding hi. I pumpi seh thum suah seh nih pen tui ahi hi. Ahang khat peuhpeuh tawh i pumpi pan tuitampi i supna hangin i nuntakna beilawh thei hi. Nikhatin tuithawl 6 bang i dawnding akisam hi a zingsangtuungin dawn 20 le’ng hoihpen hi. Mai i phiatnop leh phiatin, ha bel nawt kul nailo hi. Tua khit teh tui thawl nih bang dawn ding hi hang. Tua hi leh tua tuite le Thyroid gland pan ahongphulkhia tuite in igilpisung lam manhawh uh aa, angawi nading le sungnawi nadingte hong sepsak uh hi. Tui i dawn ma in awng i hawhnop leh hawhphotin, tua tui i dawnkhit minutes 5-10 ciang bang lamsiau ni. Tua hi leh i thate hong zang mahmah ding aa i om hongnuam ding hi.
Sanggam aw, a zenzen in tuabangin tui na dawn ngei kei leh tuni mahmah in kisin pah in. A patcilin haksa sa mahmah ding hi teh. Ahi zongin dawndawn leel in. Asawtvei ciang kisekin na dawnzo lel ding hi Tua bangin tui nadawnna hang in cisa natna, lungtang natna le thagui natnate tawh na kipelh ding hi.
Tua ahih manin, hih atung aa thu thum teng zui lecin na nuntak hunsung in sumle paii tawm bei leh huntawm bei napin nopsakna nangah dinghi.                                             
Lia Margaret Niang Ngaih Mang

Sikhum, zunkhum neite theih ding kilawm anletuite

A. Nek vet loh ding anletuite
Suaklu/muamkhum, cikhum (cikhum kihel nektheih te nekloh ding), thangkhuai, chocolate, tuikhal moh (ice-cream) thongmoh, lah moh, malai moh, akhum avot tuite (beverage)..



B. Duh zah nektheih anletuite
Hi anaui aa anletuite ahih leh an duh nak leh gilvah dongin ne thei hi teh.
(I.) Mehteh tuamtuam
Umteh, tui kawlkaiteh, makengteh, anthulteh, ling-uih, sakol khekhap,
gawbilum, gawbi pak, ankam ...cihte

(II.) A khumlo singgahte
Mehthuk, sahawk, gam suaklu, gaw-tuai, gualkha di, manta, mehnal, tanpaza..cbt

(III.) Sa
Aksa, vatawt sa, keel sa, bawngsa, voksa, ngasa, kaikuang, aktui, vamim tui...

(IV.) Coffee le niangtui
Cikhum, bawngnawi bung, bawngnawi vui cihte zanglo/ kihello ding.


C. Ahi ciangkhat nek theih anletuite
Hih anuai aa anletui te sungah carbohydrate/starch tampi kihel hi.
Nisim nakisap zah ding Siavuan te tawh kikum inla ne in.

(I.) Buh tawh kibawl anletuite
Buhsih, buhcim, moh ti, moh hing ga, buhman

(II.) Mangbuh tawh kibawl anletuite
Khauhsuai, mohlum, pauksi, nanpia, chapatti, puri, biscuit, ekyiakui,
palata.. cihte

(III.) Mehteh mehgah
Aalu, mai, kawlkai, bal, be nam tuamtuam, lengthei, lingmaw, hai,
nahtang, munawi, kawlsing..cihte.

...................
Dr Nang Khan Lian via Zingsol

Ha nawt dan, a ki theikhial pawlkhat

1. Thakhauh tak zangin hanawtna hangin ha hong kangtuam ding kisa kha hi. Hibang tatna hangin hani leh hate kisia tuamsak zawin hana sak baihzaw hi.
2.Meihol ahkl ci (salt)te zangin ha anawt ki om hi. Hibangte zatna hangin ha atungtuam ahi enamel paatuam sak ahihmanin avot alum nekciangin hazek ahkl hana thei hi. Tuahi aa haza leh hanawtna zat ding hoihzaw hi.

3.Ha sawtveipi nawt ahizong nawtmun/nawt thithe leng ha ahoih tuam zaw ding kisa hi.Ha sawtvei nawtna le nawt thithe na hangin ha atungtuam (enamel) paatuam sakin haze ahizong hana sak thei hi.Tua hi aa nikhat thumvei ahkl atawmpen nihvei zingsang le zanlupma nawtden leng hoihpen hi. Khatvei nawt ciangin minutes 2-3 ciang sawt leh hoihzaw hi.
4.Ankhat peuhpeuh nekkhit phetin ha kinawt pahpah khathei hi. Hibang tatna in halehkamsung aading hoihlo zawhi. Banghang hiamcih le annek khit phetin an sungaa kihel aciddatte in ha tungtuam thanem sak hi. Tuahi aa annekkhit atawmpen nailang (minutes30) khit ciltui in kamsung aa aciddatte apeng sakkhit hun ah nawt pan leng hoih zaw hi.
5.Athuk (gtn.vit C) nekna in kamsung le ha cidamna ding ahoih hangin kamsung ah sawtvei muamna in ha tungtuam thanem sakin pilhkhia sakthei hi. Tuahangin ha kilamzia hoihlo le haze sak hi. Tuahi aa athuk khatpeuh nek ciangin kamsung ah sawtvei muamloh ding thupi hi.
Zoplai ding (B)
............
Lai at: Dr Nang Khan Lian (BDS)
ref; healhupdatesjournal
Oral medicine Fourth year BDS textbook
Paediatric dentistry Final BDS lecturenote on Fluoride
Preventive and community dentistry textbooks





Gas tawh anhuan meh bawlte theihhuai thu

Leitung aa tui omzah leh pumpi sung aa tui om zah

Leitung ah, tui maitang pen 70.9% (71%) om in, 29% (29.1%) pen leitang maitang hi ci in, mipil te'n gen hi. Tua mah bangin, i pumpi sung ah zongh, tui pen 72% bang a om hi ci in gen hi. Gtn. i sa sung ah % bangzah, i si sung ah % bangzah cih bang dan hi aa, tui tampipi dawn det ding pen hoih mahmah hi. I kum zui in zongh, i pum sung aa tui omzah kilamdang hi.

Ahizongin tui nin dawn sangin, dawnloh mah hoihzaw aa, tuisiang vive dawn det ding hoih a hihi. Coke te, Pepsi cih bang Gas om te sangin tuisiang mah dawn ding hoihzaw a hihi. Hih anuai aa limte ah kician takin kilak in, hih limte en lehang, tui zongh dawn tangtang nopna lungsim ong guan thei hi.





Kaal (kidneys) cidamna ding thu 3

Kaal cidam nading in hih a nuai aa thu (3) te zuih huai hi.

A. Tui akicing in dawn den in

Pumpi sungah tui a kicing in a om ciangin pumpi cidam pan hi. Tua hi a, tui akicing in dawn den in. A tam omna mun te (gtn lasim na khan, anbuk..cbt) ah dawnding tui koih in. Na dangkeu sim tui dawn in. Tui a kisam pumpi ah kal nat theihna ding 20% om hi. Ahi zongin tui kicing pumpi ah ahih leh kaal natna pianloh nading 60% bang dal hi.

B. Nawi le nawithuk (yogurt) dawn zel in
Nawi (keel nawi, bawng nawi) le nawithuk te ah kicing takin a om calcium dat in si akhan theih nading kiamtuam sak in kaal nat theih nading pan zong 20% bang dal hi. Hi thei leh nikhat in nawi hai 1 ahkl nawithuk hai nih ta dawn zo leng hoih pen hi.

C. Ci le a al nektheih te tamne kei in
Ci le a al date in pumpi sungom calcium datte paihkhiat nading thapia ahih manin guhletang te thakhauh nem tuam sak in kaal ah suang om theih nading zong tam tuam sak zaw lai hi.

xxxxx--------xxxxxx
Dr Nang Khan Lian
Ref; Salt and Kidney infection, Good Health via Zingsol


Kum 5 nuai naupangte Vitamin A, tawm leh mittaw thei

Kum 5 nuai siah naupangnote Vitamin A kicing neilo te a sawtna ah a mit nangawn uh tawt lawh thei uhi. Nute in naupaai hun aakipanin Vitamin A kicing in ne kei leh a suak nau-no pen Vitamin A kisam thei hi.

Vitamin A kisapna hang a apiang mit natna pen mit keu natna kici hi. Hih natna in protein (sadat) kisam natna (protein deficiency), hunsawt vei sunghoihlohna, sensi natna vei naupangte ah mit khumuhlohna, mittawt na piangsak thei hi.


I. Vitamin A
Vitamin A pen sathau sungah a tuisuakthei (lipid soluble) thaza khat ahi hi. Pumpi khantohna, mit khuamuhna, huihdikna gui (respiratory tract), gil gui (GI tract), zunpaina gui (urinary tract) tea a a om sapangpuat (membranes) te thakhauhna dingiin kisam pha hi. Tua bek thamlo natna dal pumpi thakhauh sak thaza khat zong ahi hi.


II. Banghang in kisam thei
Nau suah tung in a luangkhia nu nawizugel piak lohna hangin nau-no vitamin A kisam sak hi. Tua nawizugel ah vitamin le thaza tuamtuam kicing in a om ahizaw hi.
Nawizu pialo in bawngnawi vui, keelnawi cihte piakna hangin zong vitamin A kisam sak tuam hi. Tua bek thamlo a annekna sungah vitamin A kicingtak in a kihel lohna hangin zong hi thei hi.

III. Kicingtak anei nektheihte
i) Sasin, tui tuamtuam (Aktui, vatawt tyui...cbt), nawi le nawi panin a piang nektheihte (gtn. Cheese)
ii) A suaktung naungek nu nawizu luangtung piakna
iii) Kha 6 a phak dong nu nawizu lianbek piak na
iv) A dangnektheih te ah a kumtawh kizui in hai gah min, nunun min, mai gah, kawlkai sungsan, a engcik mel mehteh te, sasin, tyui tuamtuam te piakna in vitamin A kicing sak hi.
IV. Vitamin A avalluat leh
A kisam zah sangin a vallua nek na hangin Vitamin A vallua natna kivei thei hi.
i) Ankam limloh vatna, awk suak, lung-am, lutangna, mitmang, khutlekhe khaidan nopmello cihte piangthei hi.
ii) Nawi ne naungekte ah ahih leh a sip uh bawk (pawm) thei hi. Ahizongin hih pen ni tawmkhat sungah mangkik pah thei hi.
iii) Hunsawtpi Vitamin vallua leh lutangna, sam pulh, muk puakkham, vun keu in thak, guhletang na cihte piang thei hi.

Lailet; Dr Nang Khan Lian
Sr; Modern Journal, no. 435 via Zingsol

A theihhuai HIV/AIDS natna

HIV/AIDS natna lungno pen
Sex hih khitzawh kilangh pahlo hi.

I nek i dawn zui in 
a natna signs(symptoms) te 
i ci i sa i vun tung ah a kisuak baih leh a kisuak hak om hi.

A sawttan
#######

A tamzaw pen sex hih khitzawh kum 8 kiim ciang natna kidawk pan a hihi. Kum 7-12 kikal in suak phadiak a hihi.
Gtn.
2008 lai in sex hih aa natna ngah khinkhian na hih leh tubang kidawk nailo ding aa ng leh ng zongh kiphawk kha nailo ding hi teh.
Kum 2000 lai in sex hih a tun dawklo a hih leh tua lai aa sex pan natna ngahlo bel hi in tua khit ah sex na hih lai leh a kum zui in tuat tohtoh ding ong hi pah hi.

A hizongin
Sex na hih khitzawh kha 3 in na sisit sak lecin na sisan sung ah natna lut khin maw lutlo cih ki tel ta ding hi. 
Hibangin a pua tham pan et aa kithei kha pahlo hi. 
Kha 3 in a suak nai kei leh a kha 6 khit ah khat vei sitsak leuleu in. Tuah lungno omlo a cih leh tua ma kha 6 aa sex panin natna ngahlo cihna a hihi.

Tua bgin natna dawkma lungno ngah lam na ki theih kholh aa leh kidalna ding hun tampi ngah cih hipah in sex hih ngei khempeuh in si sit sak zel huai hi.
Note: si sit cihna ah bg natna sit cih om a hihmanin HIV sit sak ngiat huai hi.
Sit sak selo in hici omom aa leh
Natna te a pua lam ah ong dawk ciang zumhuai in zongh ziakai luata a hihi.

Signs
####

Pawlkhat te sex hih zawh nipi 3 nipi 4 khawng ciang (sex hih khempeuh hilo)
- cisa
- lutangna
- lungam/ lungvai
- nattun
- hani siluang
- cithak
- natgual dan pian
Cihte tawmvei sung nei pak kha thei in tua pen kha khat sung khawng in damkik pah ziau lel aa natna mawkmawk dan mah kisa kha thei hi. (Hidan a suak sim hih natna ngah cih zongh hipahpah tuan samlo hi.)

Sex hihzawh kum 8 kum 10 pawlciang (HIV signs)
- pumpi gikna kiam
- gawng
- lei san sitset zo nawnlo
- ankam limlo
- zan aa khua ul luang
- husam
- cithak
- a hang mel omlo aa lungzing lunggim lungkham
- a lua bel hilo sa ik dan lah hilo aa diiptan or ngawn tan ciang an pai khia kik dekdek thei zel
- ci leh sa hik thei zel
- lenuai or gawng or bil nung ah natna po
Cihte pan 1 hamtang suakin a banban in kibehlap toto hi. (Hidan a suak sim hih natna ngah cih zongh hipahpah tuan samlo hi.)

Natna damna ding zatui omlo sawtvei thuakzawhna ding ciang bek omin tua zongh tampipi man ci hi.
HIV te zah a hilo sex pan kilawh thei natna khat lai pen
Herpes kici aa tua pen 
muuk tung, baan tung khawng ah cikeu dan or a phual dan or a pol dan or tangsiat salsa dan khawng om thei hi. Tua bg a om ciang zongh si sit sak huai hi.

Mi khat hici et ziauh in natna nei ding maw neilo ding cih kigen theilo hi. Tua a hihman in kidop ding kankan a dang omlo hi.
Sisit sakna ah
###########

A namnam in om hi.
A sitna khat lei aa inn ah ei leh ei kisik thei. Maan khin taktak samlo.

Zato clinic cihte ah zongh kisik thei.
Rapid test ci in minutes 15-20 sung aa kithei thei in natna ngah a cih leh a kician dingin lab ah sit toh kul.
Lap ah sit leh ni 2 ni 3 kai in pawlkhatte a lab zat hunzui in nipi 1 bg a kai zongh om thei.

Note: Rapid test tawh sit khit aa ong gen pah kei vua leh rapid test ah natna dawk cihna hi. Sisitna pen upmawh sang ong sawtzawk aa leh natna mu uh a hihman in a kician aa sittel phapha uh aa sawtto cihna hizaw pian den hi.
*
Zi pasal neihma
Kithukim aa leh nih tuakin si sit sak masak phot ding zongh mi tampi ii zat kikepsiamna nam khat a hihi.

Google image search pan
HIV symptoms
Herpes symptoms 
cih dan in en sin le uhcin a natna ngah te koici bg cih
Cikzek huai takin ki mu thei hi.

Khatvei khialh khak pakna pan zongh ki ngah thei aa
Hun tomno sung minute 1 leh 2 bek a hipak phial zongh in kilawh thei hi.

A neilo tuaktuak a hiphialzong khat tawh hilo aa khat khit khat tawh a hihleh kilawh cih hiloin i sung ah a lungno suak thei ci hi.
Hibg te tawh a kipelh siam dingin i biak Pasian in mimal kim ong kemcing ta hen.
Ldam

DNA leh a ma nam ciat (Knowledge)

DNA leh Ama’ Nam Ciat



A Lamdang A Piangsakpa Pasian in singkung lopate leh ganhingte a piansak khit sialin “amau’ nam ciatin” a piangsak hi, cih LSTho Piancil 1:21 pan kimu suksuk a, “according to their kinds,” ci-in na gen suk ngelhngelh hi. Kind cih santakah i theih bap tan ciangin Hebrew kammal en le hang “min” kici kammal na kizang hi. LST siamte’ hilhcianna ah “min” in ama’ nam bek piangthuah sak thei [min can only regenerate its kind alone] (procreation) hi, ci a; 

gtn:

tehno, tawsawte pen a phungpi Quercus kici hi. Hih Quercus sungah ama’ nam 800 val pha, cih botanical scientist-ten Pasian’ piansaksa damdamin mukhia uh hi. Cihnopna ah Quercus tawsaw nam panin Phuitong [cherry] nam ii phungpi ahi, “Prunus” nam tuamtuam khawng piangsak thei peuhmah lo hi. 

Mihing’ DNA leh Cell thu LSTho tawh kap lai leng Late 139:15~16 ah na kigen khin dipdep hi. “...Keimah hong kikhuituah lai takin;...na mitte in a kilemtuah nai lo ka pumpi na mu khin hi…” na ci khin ta zen hi. Hih LSTho mun hoihtak sim pha ding hi hang.

DNA thu na theih banah a' tanau ahi, RNA kici, Ribonucleic Acid cih khat zong na om gige a, hihte kua piansak hiam? Natural select tawh ahi, Evolutionism/Darwinism… thupom tawh hi thei mawk ding hiam?

Zawng pana kipiang dingin lah, i DNA kibang lo, kisun lo, kivalak beek lo lai ahi manin zong kisel tak vet lo, vokpi upna cih san nilnel lel dingin ngaihsut huai mahmah hi.


Laisim sanggam Zomite thuman thutakah kipkho ngitnget den dingin Tung Sianmang in hong Khuatuah ta hen!

Phalbi khuadam ciang aa ki ngah thei diak natna te

Phalbi khate ah akidawp huai haihut natna


Daitui te hong kia in phuitong te hong pakta hi. Vaan hong siangin leitang hong keu hi. Huihkhi nung bek zong vot satsat in, singtehte zong pulhta hi. Lungsimte no suah leh lawptak in aom lai hun zong hi thei hi. Lungdam bawl leh kumthak te khit ah Zomi Namni cih pawipi te hangin Zomi te aading in “Phalbi hun sung pen a lawphuai pha deuh hunkhat ahi hi.


Hih phalbi khuahun sung teng ah kum khat sung aa a dai khipkhep, a om khinkhian ahi haihut/awm-bing (ashma) natna pen hong suak khia thei hi. 
Hih natna pen a kilawhthei natna hilo hi. Huihdikna guipi aa om ahi huih hui vangneute bawk ahih manin huih huite bing aa huih dik haksa ahkl husam natna khat ahihi. Hih natna pen luahsuk/guizui natna khat zong ahi hi. A pualam panin na nengkhat (gtn. Thoza, zapi khu, paak gimnam, leivui khu..) ahkl ganhing khat mulnei/lo (gtn.thokaang ,miksi, zawhngeu, ui..)cihte leh nektheih pawlkhat cihte hangin huih huite abawk thei ahi hi.


(A.)Natna limlemelte
Gim/tawl thithe, awmbing in “sui-sui” cih a ging kiza
Zan ihmu theilo zah dongin bukkhuh
Banghang pianghiam?
Natna a piangsak thei ahi leivui, ganhing ahkl nektheih khat hang hithei in, phalbi hun ah khuadamna in suksia sak hi.
Koi ci kibawl ding?
Huih hui vangbing te a kihon theihna dingin a kidik zatui sipte (inhaler) dik ahkl siavuante hong piak zatangte ne in
Na nop tuam kei aa leh zato ah kilak pah in.
A suksia natna i limlemelte
Khutcin, khecin te, leei leh pumpi bup dum (van mel) ding
Hu san dan hamsa semsem
Khua-ul nel kaai,
tawl leh sibup dekdek zel cih bang ahih leh nunna nangawn lauthawn ta ahi hi.

(B.)Koici kikep ding?
Hih haihut (ashtma) natna pen sikhum zunkhumnatna, sikhang natna cihte mah bangin khantawn adamsiang theilo natna hi aa, kikepcing ding a kisam natna khat ahi hi.
(i.) Siavuan te tawh kizom den in. Natna a suakkhia sak thute (risk factors) zong in. Na dawn ding zatui zaha te a zatdan ding sin in la na innkuanpihte zong theisak in.
(ii.) Natna a suakkhia sak thute (risk factor) na theihzawh aa leh tua te tawh ki sukkhak na ding pan kidawm in.

a. Za khu, meikhu, leivui khu cihte, ui, zawhngeu cihte tawh kinai om kei in.
b. A thupi penin innsung siantho ding ahi hi.
(iii.) Na natna nangmah in encik in.
Haihut na vei hun, sunlezan aa na thuak natna i limlemel te, a kidik ahi zatuisip (inhaler) na zat leh zatloh hunte cihte ciamteh in la siavuante tawh kilak in.
(iv.) Awmbing lua in husam in na om aa leh siavuante tawh kilak pah in.

Lai at; Nk Khanno
Ref;. Fashion Magazine (vol. 14, no. 12)
Pg. 108-109  via Zingsol

Cidamna ding kikepzia nam 3

Cidamna i cih pen Pasian’ hong piak thupha khat a hih na thu i theih sa ahi hi. Mihing i hih nungsang kuamah a cina ki-utlo hi. Ahizongin mi khempeuh kicidam kimlo hi. I cidamlohna leh akilawhthei natnate i ngah khakna thu lianpi thum om hi.
Tua thu nam thum te in,
(1)        I neulai in a khauh lua zatui, zaha te i zat hang
(2)        I pumpi aading akisam dat (nutrition) kicing takin i ngah loh hang le
(3)        Khuahun zui in a kilawm omdan, khawldan le kikep zia te i theih loh hangte ahi hi.
(1)        Ei mihingte pen i ngei na ah natna khat peuhpeuh ingah ciangin a manlang thei penin kidamkik nuampah hi. Tua ahih manin i damkik mengmeng nadingin zatui zaha tuamtuamte le lamtuamtuamte i zangh hi. Gentehna in, lutangna sungkhak ci pak ni. Lutang natna apiangsak sungkhakna hemkhia masa lo pi-in lutang natza akhauh theithei i neek leh tua lutang natna dampak lel ding a asau veilo in hong nakik pah veve ding hi. Tuabang zatuite in a na adamsakpah hang in adeihhuailo sapna tampi (side effects) a piansak lam aphawk, atheikha  kitawm mahmah hi.
Tua ahih ciangin natna khat peuhpeuh i ngah khak leh tua natna zungpi te zong masa in kibawl ding kisam masa hi. Ahih hangin natna khatpeuh ahizongin, akilawh thei natna khatpeuh i ngah ciangin ahi zongin zatui khauh theithei kizangh pahpahnuam ciathi. Natna hong piangsak thu zungpite hepkhiat ding, natna lungno te i do zawhna dingin a kisam thate i ngah nadingin nekdan, khawldan siamdingahte tuni akipan phawk tawnntungin zang ciat ni.
(2)        I sanggam Kawlte in “An zong zatui, zatui zong an” ana cih mah bangun, nuntakna neite khempeuh cidam takin i nuntaktheih nadingin nek le dawn mah akisam thupha bulpi khat ahi hi.
Mihing, ganhingte khempeuh an le tui tawh akinungta ahi hi. Tua hi a, naupaai nupite anaupaai sungun akisam dat (nutrition) te akicingin ngah kha kei leh, ta cidam asuah nading uh hamsa hi. Hihte pen neek le dawn tawh kisai thule la theihhuaite i theihlohman leh i neihsa, i lamsa in atawklohman ahi hi. I hih zawh ciangciang, i sum i paite i zattheih banah cidamna tawh kituakin i neek. i dawntheihding zong kisam hi. I nek ngeina ahi buh, vaimim, mim tuamtuamte, be sa le meh teh mehgahte i huan ciangin akisamlo supna te aom loh nading in i huansiam ding kisam mahmah hi.
“Limsa” cih bek tawh i lungkim ding hilo hi. Gentehna ah buhtang i huan ciangin thumvei bang i sawp sangin nih vei ciang sawp dingin, antui khit kullo dingin huan ding or nganhuan ding. kilawm zaw hi. Tuamah bangin mehteh mehgahte zong siangtakin i sil khitteh huan ding, sathau / tuite ahoih bek zah zang ding, mehza i zat tangin ngapik, cikhum cihte zang ding, mei zong sasak lualo lah daisak lualo ding, cihte pen anbuk sung aa anhuante theih ding cidamnading thu bulpite ahi hi.
Buh le mangbuh tawh kibawl nate tampipi ne in meh tehmehgah le sa te i ngawlh nate in a phiatkhiat huai ngeina khat ahi hi. I tha ahat nading in i zingsang nate ah tha adim be le sadat kihel nek le dawnte i nek ding hoihzaw hi.
(3)        Khuahun kikhel zui in cidamna tawh kituakin i nuntak theih ding kisam hi. A masa in pumpi siantho ding kisam hi. I naupangte kum 3, kum 4 bang hong phak ua kipan in amau le amau ihmutma khut le khe sil, maiphiat, hanawt, anneekma le dailenkhit khut silsiang ding cih zongsat hoihte i pattah siam ding kisam hi. Akipumsil uh ciangun zong natna lungno te bawm theihdiak na ahi lenuai le kalkawmte hoihtak silsiang ding cihte zong gensiam, pattahsiam ding kisam hi.
I nek khit i dawn khit ciangin i sung i lai ahoih ding zong hong kisam zel hi. Ne ne-ding in hong pusuak kik thei kei mawkleh i sungah muatgawpin i omdan nuamlo ding hi. Thamlo in akisamlo natna tuamtuam hong thuaksak lailai hi.
Tua ahih manin i sung i lai ahoih nadingin tui tampi i dawn ding hi. I pumpi seh thum suah seh nih pen tui ahi hi. Ahang khat peuhpeuh tawh i pumpi pan tuitampi i supna hangin i nuntakna beilawh thei hi. Nikhatin tuithawl (6) bang i dawnding akisam hi a zingsangtuungin dawn 20 le’ng hoihpen hi. Mai i phiatnop leh phiatin, ha bel nawt kul nailo hi. Tua khit teh tui thawl nih bang dawn ding hi hang. Tua hi leh tua tuite le Thyroid gland pan ahongphulkhia tuite in igilpisung lam manhawh uh aa, angawi nading le sungnawi nadingte hong sepsak uh hi. Tui i dawn ma in awng i hawhnop leh hawhphotin, tua tui i dawnkhit minutes 5-10 ciang bang lamsiau ni. Tua hi leh i thate hong zang mahmah ding aa i om hongnuam ding hi.
Sanggam aw, a zenzen in tuabangin tui na dawn ngei kei leh tuni mahmah in kisin pah in. A patcilin haksa sa mahmah ding hi teh. Ahi zongin dawndawn leel in. Asawtvei ciang kisekin na dawnzo lel ding hi Tua bangin tui nadawnna hang in cisa natna, lungtang natna le thagui natnate tawh na kipelh ding hi.
Tua ahih manin, hih atung aa thu thum teng zui lecin na nuntak hunsung in sumle paii tawm bei leh huntawm bei napin nopsakna nangah dinghi.    
                                         Lia Margaret Niang Ngaih Mang
src: zingsol