Showing posts with label Article Family. Show all posts
Showing posts with label Article Family. Show all posts

Ka nu' hong laikhak

Hih thu pen a piang takpi Veitnam Nutate' thu ahi hi. America le Vietnam galven zawh ciangin Vietnam gam pen zawnna lianpi tawh hong kizom hi. A pasal gal sungah si ahih manin nupi khat a tapa ngeklai tawh meigong in hong om hi. Nupi nu a mel hoihin moi lai simin, a it, a ngai a om hangin pasalkik nei nawn loin, a tapa a hih theih tawpin hanciamin pilna sinsak hi.


Nisim nasep gim mahmah napi, a tapa sangkahsak zo ahih manin lungkim mahmah hi. Naupangno zong kum 16 pawl hong val ciangin lai pil hi ding hi ven scholarships ngahin America gam ah sang va kah hi. Sang a zawh ciangin NASA ah nasep hoih hong ngah suak ahih manin America ah tensuak tawh hong kizom hi. A Nu ahih leh a tapa thu galzakin lungdam luankhi tawh amah kia Vietnam ah teng suak hi.


Tangvalpa in a Nu phawkin khasimin US$100 ta kitatsat loin khak den hi. Gal huhau-in, Vietnam hitaleh America a kipan leitung bup phial kihaksa ciat hi. Tua hun lai adingin US$100 pen mannei-in zatcing lua peuhmah hi. E-mail, phone cih dante kizang nai lo ahih manin Nutate a kizopna uh hong tawm semsem hi. NASA ah engineer sem tapa in khasim a Nu sum khak den ahih manin ama tumtakin hong lungkim mahmah hi. Khrismas hun-awng cih bang ngah zel hinapi inn lam ciah ding ngaihsunkha ngei lo hi.

Ni khat, a Nu in sihsan ta hi, cih sikkhau sat hong ngah petmah ahih manin, a Nu luanghawm vui dingin hong ciah hi. Dah mai se loin, a Nu luanghawm hong vui hi. A khitui zong luang se lo hi. Hi bang teng hong sep khit ciangin a Nu lawmte khat lai-ip khat tawi-in "hih lai-ip na Nu in nang ading hong nusiat hi" ci-in pia hi. Tangval pa in tua lai-ip sah sim tham hong hon ciangin US$ 100 dal honpi khat le a Nu khutma laigual thum khawng hong mu hi. Tua tak ciangin NASA engineer tangvalpa ki-ip zo loin hong kapkhia petpet ta hi. Tua lai sungah ki-gelh pen:


“Son, I don’t spend too much money. I miss you a lot. Every time I hear a motorcycle passing by, I run out the door but it wasn’t my son. I saved this money for you in case when you get sick.” Nute pen a tate mipil, misiam, mihau, milian a suah lungdam tawntung uh hi. Sumlepai i khak zong lungdam uh hi. Tuate sangin a lunggulh zawk uh ahihleh a tate uh hong phawkin hong munuam penpen uh hi. Nisim phialin kongvangah hong gal-et tawntung uh hi. Lungdam luankhi tawh vai hong dawn ding leitung ah na Nu simloh midang om khol lo ding hi. I ciah zo pah keileh zong hopih tangtang leng i Nute a lunglen uh phatuam hi. Hih lai ka gelh kawmin kum 13 val US ah omin ka ciah teh ka Nu in lungdam lua-in khitui luangin hong dawntuah ka phawk hi.

Numeite a lapsang huai zia

1. Numeite thupi hi
Gam khat i khantohna kitehna piciang tampi lak ah numeite le naupangte cidamna zong kihel hi. Mipi tawh kizomin nasepnate ah numeite bulphuhin sem le’ng kilawhcing zaw, kici hi.
Pasal khat guak in inn suang zo lo napi, numei khat guak in inn suang zo lel hi. Innkuan sung nopna le noplohna pen numeite tungah kinga mahmah hi. Pasal guak bek a omna, numei om lohna bangkua ah kuamah kileengla nuam lo hi.
Numeite in pasal’ nasep khempeuh phial sem thei lel uh a, ahi zongin pasalte in numei’ nasep khempeuh sem thei kim lo uh hi. Tua hi a, innkuan sungah numeite’ dinmun thupi hi.
Numeite in pasalte sangin Pasian thu sang thei baihzaw, tuhun pau-in cile’ng piangthak baihzaw uh hi. Biakna sungah zong numeite mah hong khanglo uh henla, hong thahat le-uh pawlpi bup hong lawh zo pan uh hi.

2. Numei minthang pawlkhat
Leitung ah Nurse a phuankhia pen Florence Nightingale a kici Italy numei khat ahi hi. Hih nu in, “Nang tungah hong kibawl ding na deih bangin midangte tungah na bawl in,” (Mate 7:12) cih Topa Jesu’ kammal bulphuhin a phuatkhiat ahi hi.
Christian Hymn la dawng 8000 bang a phuak zong Fanny J. Crosby a kici mittaw numei khat mah hi. Zomite in i deih le i sak mun la pawlkhat pen hih nu’ phuah vive ahi hi.
Leitung ah lamdang a kisa, a mit taw-in, a beng zong ngong napi Manglai, Piantit lai, Latin lai, German lai le Greek lai cihte siam ban ah, Radcliffe College pan B.A degree ngahin mark sangpi tawh gualzawhna a ngah lai zong Helen Keller a kici numei khat mah ahi hi.
India gam ah “Association of Charitable Missionaries” phuanin, tagah kepna 127, sum bei lo zato 213, phak zato 54 le sum bei lo laisinna sang 60 a phuan, Kolkatta khuapi sunga miphak 10,000 bang a kem zong Mother Teresa kici Albanian minam RC sister khat ahi hi.
Leitung ah “Ni tum ngei lo British Empire” a kici gam zai pen a uk ngei le England gam kum 63 sung vilvel a uk zong Queen Victoria kumpinu ahi hi. England-te in Kawlgam hong uk hun pen ama’ kumpi sep hun sung ahih manin Zomite in tuni ciang dong mah kumpi nasemte pen “Kumpinu’ nasem” mah kicici lai hi.
A beisa-in India Prime Minister Indra Gandhi, USA State Secretary Condoleezza Rice leh Hillary Clinton, England Prime Minister Margaret Thatcher (Iron Lady) cihte zong numei vive ahi uh hi.
Tu laitak lianin zong numei gam makaite sungah Germany Prime Minister Angela Macle, S. Korea President Park Grun-hye le Kawlgam pan NLD makainu Daw Aung San Suu Kyi cihte leitung ah minthang deuh uh hi.
Tu laitak leitung ah a kipakta mahmah numei khat in Malala Yousafzai ahi hi. Amah pen Pakistan gam mi hi a, kum 15 pha pan hi. Amah in Pakistan gam Taliban migilote’ khut nuai-a om numeite pilna sinna le sangkah nading a hanciamna hangin 2012 October kha sungin Taliban-te in thau tawh kap uh ahih manin nasia liam mahmah hi. Pakistan gam galkap zato ah lum masa phot a, tua khit teh London khua Elizabeth zatopi ah va lum hi. 2013 January kha-in zato tuak hi. Time magazine in ama’ tangthu gelh nadingin US$ 3 million pia uh hi. The Kids Right Foundation in 2011 kumin International Children’s Peace Prize pia uh a, Pakistan kumpi in zong 2012 kumin National Peace Award pia uh hi. Tua pahtawina min pen Malala Peace Prize ci-in kheel uh hi. Naupang kum 18 nuaisiahte kipia pahtawina ahi hi. 2014 kumin Nobel Peace Prize kipia a, Nobel Prize ngah khempeuh lakah a khangmoipen ahi hi.
Ei Zomi numeite zong amaute mah bangin gam makai le mi minthang a suak thei lua mahmahte ihi hi. Thungen kawmin hanciam ciat ni.

3. Zomi numeite khantoh nading a dal thu pawlkhat
(1)Pianken lungsim
Zomi numeite in neu tung mah panin, “Kei pen numei san khat, a thanem khat, a picing lo khat hi lel ing. Bangmah sem zo kei ning,” cih pianken lungsim neuna khat nei pah uh hi. Tua in meidawisak a, bangmah semsak ngam lo hi. Tua in khantoh nading tampi dal hi.
(2)Innkuan sung kipattahna pan
Zomi nu le pate in tate sung pan ta numeite sangin ta pasalte kithupibawl zaw hi. Ta pasalte sang kikahsak a, ta numeite pen “Laipai thei peuh leh pha zo, nidang teh mi’ bangkua sung a tung ding uh hi lel” kici kha hi. Tua hang mahin khuak hoih pipi, lai zo pipite in pilna laitan nei lo uh hi. Hih in zong a khantoh nading uh tampi mah dal hi.
(3)Zawn luatna hang
Innkuan sung nuntakna haksat luatna hang le zawn luatna hangin Zomi numei tampite in nikhoih, puanhoih silh zo lo uh hi. Lim takin zong kipuah, kizem zo lo uh hi. Tua in a lungsim uh thanemsak a, mi lakah kihel ding nangawn utsak zo lo hi.
(4) Zo ngeina hang
Leitung ah numei a nenniam minamte sungah Zomite zong kihelkha hi. Zo ngeina ah numeite kiniam koih a, kithusim lo hi. Naungek suak khat a om teh pasal a hih leh “Pasalpi khat hi ee” kici a, numei ahih leh “Numei san khat hi” kici se hi.
Zo paunak ah zong “Numei thu le sialpi kii-in kilaam lo” “Numei khat le zabeel khat” “Numei hangsan in akpi kihta” “Numei khua le sakhi khua” cih bangin numeite nenniamna vive om hi. Tuate in numei hihna (Identity) niamsak mahmah hi.
Numei loin khang kizom thei lo napi, Zomite in khangsimna ah pasal’ khang bek mah kisim a, numei khang kisim ngei lo hi. Hih in zong numeite’ man (value) kiamsak mahmah hi.
Kikhopna, nopna dahna munte ah pasal peuhpeuh tutphah tungah kitusak hi. Numei peuhpeuh pen mipilpi khat ahi phial zongin sual tung (or) pheek tungah kitu se hi. Hih in numeite’ lungsim thanemsak a, a khantoh nading uh tampi mah dal hi.
Zomite in numeite pen makai a sem thei ding, milian a suak thei dingin kingaihsun lo a, inn sung na a sem ding, lo kho ding, sing pua ding, nau cing ding, buk teep ding, siamgan ding, cih ciang bekin kingaihsun kha hi. Hih in numeite meidawisak a, kalsuansak ngam lo hi.
(5)Kiimlepam hang
Zomi numeite in pasal’ zawhthawhna (Male dominent) bekbek thuakkha (Experience) uh ahih manin amau le amau-in kimuanna (confidence) nei lo uh hi.
Numeite in kiimlepam khuasakzia hangin pianken lungsim tawh gawmkhawm (Nature & Nurture Interaction) ahih manin amau le amau kineumuh den uh hi.
Kumpi lamte in zong numeite sangin pasalte hamphatna piazaw uh hi. Gentehna-in tan 10 laivuanna ah mark kikim ciatciat pen pasalte line hoih, major kipia tuan se a, numeite kipia lo hi. Pasal le numeite kideidan a, numeite mark a sangzawin kila tuan se hi. Hih in zong numeite’ lungsim thanemsak, guallelsak tuam mahmah hi.
Biakna sungah ahi zongin, kipawlna khat peuhpeuh ah ahi zongin numeite in khensatna pia ngam lo, makai ngam lo, pi ding ngam lo uh hi. Tua hang mahin numeite mun kipia phial taleh amau le amau in kimuanna (confidence) nei lo uh ahih manin hong sang ngam lo uh ahi hi.

4. Zomi numeite’ dinmun koici lapsang ding
(1)Pilna le siamna sinsak ni
Paunak ah “Pilna nei numei in a inn dingin khuam sagih phut” cih om hi. Tua ahih manin numeite in pilna neih ding kitangsam mahmah hi. Khuam sagihpi i phut zo kei phial zongin khuam khat beek peuhmah i phut zawh ding kisam hi. Numeite in pilna nei peuh leh tua in lungsim le nuntakna hong laamto ziau lel hi.
Nu le pate in ta pasalte bek pilna sinsak loin, ta numeite zong pilna sinsak ding kisam hi. Tuhun ciangin tapate sangin tanute in nu le pa vakzaw, donzaw, kemzaw uh hi. 
A thupi khat ah i tanute mo i khak ciangin moken dingin van manpha pipite i kengsak zo kei phial zongin pilna na kengsak le’ng amau a khantawn uh na khomzaw ding uh hi. Pilna tawh na kivak zo ding uh hi. A teekte’ mai-ah zong maipha ngah ding uh a, na simmawh ngam lo tuam ding uh hi.
Nu le pate in i tanute puankhui, khauphan cih khutsiam khatpeuh sinsak ding hoih hi. Tua hi leh pilna tawh a kivak zo kei phial uh zongin, amau le amau na nungta zo tuam ding uh hi. Tua hi leh deihloh penin a pasal in nusia vat leh zong amah le amah nungta zo veve ding hi.
Zomite in numeite kiniamkoih mahmah a, “Numei’ thu le sialpi kii-in kilaam kei,” kici liang hi. Ahi zongin numeite in pilna sangpi hong nei peuh le-uh thupi kisa mahmah lel a, numei’ thu-in kilaam lua ta hi. Gentehna-in Tedim bang ah Dr. Khin Win Shwe (General Khin Nyunt’ zi) hong pai lai-in Kam Hau tualpi ah nasia takin kidawn a, numei pasal kilam ziahziah hi. Daw Aung San Suu Kyi hong pai lai-in zong Zolam tawh nasia takin kimuak a, a kipasalsak gemgam pawlkhat bang lim lam mahmah lel uh hi. Amaute pen mipil ahih man uh ahi hi.
Zomi sungah teekte in mote thu kidong ngei lo a, papite in zong zite thu kikuppih ngei lo hi. Nu le pate in zong tanute thu kikuppih ngei lo hi. Tua hangin “Zomite in numei pongpong simmawh” kici ngei hi. A taktak pen Zomi numei a tamzawte in pilna na kinei lo a, lokho thei, singpua thei, an su thei, cih ciang bek kihi ahih manin thu dot taak le thu kikuppih taak hong kisa lo na hizaw gige hi. Tuhun ciangin numeite in pilna sangpipi kinei ta hi. Pilna nei numeite na kizahtak veve a, na kithusim veve hi. Mote in pilna na nei peuh leh teekte in thu kidong pah lel hi. Zite in pilna na nei peuhleh pasalte in thu kikuppih pah lel hi. Tanute in pilna na nei peuhleh nu le pate in thu kikuppih pah lel hi.
Papil sangin Nupil in tate makaih zo zaw a, zong khuasuah zaw, ci-in kigen hi. Bang hang hiam cihleh pate pen nuntak zongin zinsuk zinto uh a, tate pen inn-ah nu tawh tam omkhop zaw uh hi. Nute in pilna na nei phot limlim peuh leh tate in zong pilna hong deihtuam pah lel uh a, sawlsawl zong kul se loin, amau le amau-in lai hong hanciam tawm pah lel uh hi. Pilna nei nute in a tate laisim dingin pum sawl gawp pong lo uh a, a gei-ah tutpih ngiatin, simpih uh hi. Tua ahih manin a tate mipil, misiam suah zo uh hi. Pilna nei lo nute in a tate lai sim dingin pum sawl gawp pong uh hi. A tate in zong a nu khembawl pian thei uh a, lai sim lopi lai sim kineih khem pongin, sang lai ahi lo laibu dang peuh na sim hithiat thei mawk uh hi.
(2)Numeite mun pia ni
Numeite pen amau’ pilna le kivakna (talent) tawh kizui-in mun piak theih ding kisam hi. Kipawlna tuamtuamte ah panmun piak ding kisam hi.
Thukhensatna (Decition making) le vote piaknate ah numeite kihelsak ding kisam hi. Pasalte’ khensatna bek mang den lo ding hi.
Pasal le numei liangko kikimsak ding (Gender equality) kisam hi. Nasepna mun ah pasal le numeite thaman kikimsak ding kisam hi.
Kawlgam ah a beisa ciangciang gam ki-ukna lam ah numeite mun kipia khol lo hi. Numeite pen zum nasem ciang bekin kizang hi. Tuhun ciangin nidang tawh tehna-in numeite kithupi ngaihsut zaw ta a, mun kipia zaw hi. Tu laitak lian bang MP (Member of Perliament) sungah numei tampi mah kihel hi. Tua bek tham loin Vuanzi (Minister) sung le Vuanzi huh (Deputy minister) sungah numei pawlkhat hong kikoih ta hi. Hih zong a thangahhuai thu khat ahi hi. Gam lutang taktak dingin numeite hong koih mawk tam, cih pen kigen thei nai lo hi.

5. Numeite thapiakna
Ka sangkah lai-in kipawlna khat ah panmun kiteelna om hi. Makai khat in, “Pawl lutang dingin numei hileh a thukim teng in khut lam,” hong cih ciangin numei tampi om napi, khat bekbek in a khut hong lam hi. Hih pen numeite sungah a muan taak om lo zong hi thei kha ding hi. Zomi numeite in i lungsim i niamsak loh ding kisam hi. Mun hong kipiak theih nading le hong kilapsang theih nadingin eimah mah zong mun a piak taak, a lapsang taak ihih ding kisam hi. Midangte in hong hehpih, hong neubawl ding sangin thu hong kuppih ding lunggulhhuai zaw hi.

Tate tungah cikmah hunin gen ding kilawm lo thu 7 te

Lei kep zawh ding pen thupi hi. A diakdiak in tano, naupangneu te mai ah pau ciangin kidop huai mahmah hi. Na kammalte in amaute tungah kaw bangin kimat in olno takin kilakhia kik theinawnlo hi.

Nulepa te in i tate ahoih dingin i lamen kim ciat hi. Ahi zongin, nulepa pawlkhatte in a tate mai ah kammal kilawmlo, kampau hoihlo a paukhiatna hangun a piangkhia ding a nungsang thute olmawh khalo uhi.
Naupang pattah dan ding tawh kisai in mipil ten kum tampi sung zong in, bawl in phuah in om uhi. Ahizongin khat veivei ciangin a hoihlam sangin a sia lam khawng zong piang thei mawk hi. Naupang khat koi ci pattah ding, koi ci makaih ding cih thu hoihte tawh kikop in a langkhat ah zong thusia in na zui veve hi.
Naupang khat a umbawk (bokbak pai) pai hun a kipan in nulepa te pattahna, bawldan thute tung kinga in a lungsim puak hong kilam ahi zaw hi. Hi bang hun ah hoihtak a makaih le apantah thei nulepa te pen lampi man a kha siam nulepa te hong suak uhi.


Hih anuai aa thu 7te pel hamtang in
(i.) Zuau gen kei in
Nulepa ten tate nasepna khat peuhpeuh pen aman neilo asuah ding ki deihlo hi. (Gtn. Laisin sangkahna, zatui zaha neknate). bangmah ci kei ni teh, bangmah hikei cih na le tua tawh akibang kampaute tate mai ah kidop huai hi. Nulepa pen tate aading in a etteh uh lamlak aksi ahi hi. Nulepa in zuau a gen uh leh, taten zong a sawtlo in zuau hong gen thei pah ding uhi.

(ii.) Atawntung in aw, he ci den kei in
Vaipuak laktheihna lungsim anei nulepa te in amau uukna le lunglutnate ah ahoih pen deih uhi. Ahizong in Itna icih pen nate tawh kiciamteh theilo in na khualna le na veina tung ah kinga zaw hi. Ahizong in, ihk, hilo na cih na hangtawh na tate ngaihsuttawm theihna lungsim (creativity) kisia sak kei in.
Khinkhai na leh thuman na (fairness) in a thupi pen ahi hi.

(iii.) Min khel vawh kei in
Phawh (sponge) khat in a kim aa om tuite a hup mang dan mah bangin, na tate in na kammal, kampau te hup pahpah uhi. Dahpa cin na sap le thadah pa, bangmah hanciam nuamlo mipa khat in hong khangkhia ding hi. Tua hi aa, min hoihlo, min khel te vawh kei in. A kicing sitset kua mah ki omlo hi.

(iv.) Teh-kak kei in
Nulepa te nisim gamtat kampaunate tungpan tate in tawmtawm in a gamtat kampau dan ding sinin la uhi. Mi khat tawh na tehkhak ciangin na kammal zat theih ahi Na nau sang nangh zaw lawmlawm, Na lawmten hoihtak bawl thei in, a bangcia nang hoihtak bawl theilo? A bangcia Cingpi bangin thumang lo na hia? cih te in naupangte angsung lungsim (childrens egos) te susia hi. Hi bang te hangin na tate amaule amau hi akisakna, thupi akisakna lungsim omlo in mikhat langpan nopna lungsim le hazatna lungsim lam ah lampial sak zaw hi. Hih in ahih leh naupang te tung bek ah hilo in khangno, upa khangham te tung ah zong a hi thukhat ahi hi.

(v.) Gensia, kosia kei in
O laimal bem velval a at ciangin bemkim lo in ki kui zingzeng kha thei mah ding hi. La asak ciangin a aw zaulen kha thei mah ding hi. Amau te sepna ah a manlohna te ah thapia in, amau te ngaihsutna, a maute sepkhiat ngamna te ah phat bawl zaw in. Amaute laisinna, nasepna, melpuak, kikholhpih lawmlegual, le a teel uh thute ah kosiatna le gensiatna zang kei in. Amaute gualzawhnate le hoihna te ah kipakna kammal genkhia zaw in.

(vi.) Na zak noploh kammal te paukhia kei in
Ki ciamna, phuisamna, hamsiatna, hapna, nu le pa lam tawh kisai ciamnuihte, midangte gensiatna, thu khat na khat peuhpeuh upmawh batlohna, za kiatna cihte hangin thumna tauna te kihel hi.

(vii.) Mawhsiat kei in
Pa, Nu dinmun pen nasia in, lianlua mahmah ahi manin tua dinmun lian tawh a kituaklian, a kicing sitset kuamah ki omlo hi. Khat veivei ciangin, tano te hangin lunggimnate ki tuakkha thei hi. Inn a nit aa leh innpuah ding vaipuak anei pen na tate zong kikha thei ding hi. Hi bang hun ah na tate mawhsiat suk pah kei inla, zong a vaipuak a zolo pen gawtbawl kei zaw in. Khutkhat tawi, khe khat khai bangin ki bat kim liailiaina (harmony) na inn sungah ultung sak in tua hileh na mailam hunte hong tangpha semsem ding hi.

xxx—-xxx
Lai at; Nk Khanno

Pa aw Pa...

"Pa aw Pa..."


Ka neulai thu hi
Ka pau theih cil hun pawl ee...
Ka NulePate in hong dot theih uh thu khat,
Nu Nu it zaw maw?  Pa Pa it zaw?
Kei dawnkik na,
"Nu Nu mah it zaw"
Ka Nu'n ka Pa en in nuihsan,
Ka Pa'n ahih leh maitai tak mahin hong en gige..
Hih a lamdang mipa' thu
Ka khuak neu lua ahi diam?
Ka ngaihsun kha kei mawk hi.

Hi bang teng zawh teh...
Khualzin in gamlapi ah tungin,
Hem lam nuih mai tampi ka tuahkhak ciang'
Ka Pa' itna nuih maitang ka mitkha ah,
Pa aw Pa...
Ka Nu it zaw ing ka cih hun lai?
Na nuih maitang na tak sinthu ahi zen diam?
Ka sinlung ah hong phawgkik veh!
Himah lo hia?
Pate I cih pen...,
A khasiatna cillum tawh valh!
A tate uh nuntakna khauvak na ding,
Phun lo, puam lo a hanciam den....

Ka neulai hun,
Innkuan kimin an kuang um khawm...
Ka ngaihsut sim'n, luankhi luang zel...
Nipi nitak an hi veh aw!
Aksa meh huan ka um khop uh'
Sasin, salungte ka Nu'n ka Pa suah den,
Ka Pa in bel....
Tua sasin, salungte balnen thiamthiam..
Ko a tateng hong hawm sak zen...
A ma ading, ak khe teng le ak ngawngguh la se,
Ka Pa kiangah...
Bang hang a guh teng bek ne na hia Pa?
Ka Pa'n nui kawm sa in,
Ken a guh limsa hi veng! hong ci,...
Hih a lamdang mipa' thu
Ka khuak neu lua ahi diam?
Ka theisiam kha kei mawk hi.

Tun ahih leh, hemlam sinthu tampi kawmkal ah,
Nunta, khuasa'n ka om kawmin,
Ka benghem ah ka Pa aw thawn!!
Pa aw, Pa...
Limsa ing na cih ak khe le ak guhte..
A lim takpi mah ahi zen diam?
Ka sin lungah hong phawngkik veh!
Himah lo hia?
Pate I cih pen...
Gentheih haksat palsat ngam,
Ei a tate nuntak nopsak nading...
Lamnop lammam hong sial sak.

Ka neulai-in, ka Nu' khut nel zaw
Ka Pa' khut pek len nuam lo'
Ham phiatphaut ci'n gen kha ngei ing,
Ka Pa'n ka biang hong nap khit teh,
Tupek khat tawh lo kuan dingin pai khia zel..
Hih a lamdang mipa' thu
Ka khuak neu lua ahi diam?
Ka thei ban kha kei mawk hi.

Tu ni in ahih leh..
Leitung nun zia,
Ka mang bang phial mawk veh, sumlepai lah lawh haksa diak..
Ka Pa' khutpek bang hang'n ham cih ka theisiam ta...
Ka sinlung ah hong phawng vat veh!
Himah lo hia? Pate I cih...
Aksi taang bang a mit ngei lo a phia sipsip...
Ei atate siksan dingin a nunna uh hong kipia zen...

Zan lam diakin, Inn ka ciah leh...
Ka gim, ka tawl hong telsiam sak,
Ka Pa in sa meh huan ding gen hiven...
Ka Pa' aw suah, ni dang bangin siang nawn lopi,
Ka Pa' hatangte zong kim nawn lopi...
Citciat ci ding maw?
Ka Nu'n aksa meh hong huan...
Ankuang um khop, ni dang zahin Innkuan kim lo,
Ka Nu'n bel a ngeina bang mahin..
Ka Pa' ading sasin, salung thuksak zel,
Ka Pa in bel...
A khut ling keuhkeuh kawmin,
Kei kuang sungah sasin, salung hong piak sawm lai..
Ka Pa' khut ling len khawmin, Pa aw nang' ne zaw in ci thei buang tang!
Ka luankhi mal gial bang hong kia, ki-ip zo keng...
Pa aw, Pa.. hong it ing ka cih kawmin,
Ka Nu' lam nga-in, "Nu aw ak khe teng le ak ngawngguh
Kei hong pia in" ka ci thei ta,
Ka Pa'n zong nuih mai kawmin hong et mu ing,
Kei mah bangin ka Pa' khitui zong luang hiven..
Ka Pa' ngawngkawi in lungdam lua in kapkhia kha ing.
Himah lo hia?
Hih a lamdang mipa' thu
Tuni in hoih phatakin ka thei siam ta hi....
Lungdam ing Pa aw, Pa..
Na khan kum khua sawt ta hen.....


Khat Thang

Pate' Ni (Fathers' Day) Kipatna

“PATE’ NI”ci-in a Phuakkhia pen William Jackson Smart tanu neihsun ahi hi.Ama min ki theilo ahihhang in, a pasal ahih leh John Bruce Dodd ahi hi. William Jackson Smart te innkuan pen, Washington gam sunga Spokane khua ah teeng uh hi.

Tua khuaneu khat kiang aa, luiluang Big Bend River gei-ah lo nei uh a,tua lo ah a teeng uh hun tamzaw hi. W.J.Smart te nupa in tapa 5 leh tanu 1 nei uh hi.Nikhat a nu uh sih nungin, a Pa uh lungzuang khua ngai-in cih na ding theilo in, a inn mai uh ah tu in a kunn ngeungau hi. A tate lah bangmah thei nailo uh a hihman in,a Pa lungkham na dah na te bangmah a thei kei uh hi. Tua bek thamlo in, a Nu uh a sih lam na ngawn, a thei nailo a hi uh aa, khuasung ah a vaak ong ciah nailo, sasa lel uhhi.




Khua ong mial peeppeep mahmah cianga, a Nu uh hong tu’n theih nailoh ciangin,a ta no te khat a Nu zong dingin, a ding khia phengphang mawk hi.A Pa’n zong delh pah vinggvengg in, aphak ciangin,a-ang ah tawi-in inn a tu’n ciangin, a luppih hi.
W.J.Smart in a zi a sih a kipan in,nu leh pa nasep ong thuah khop lo hong phawmawh hi. Tua bang a,nu leh pa nasep a thuah khit caingin,a tanu neihsun zong pasal nei thei ding ong hita aa, John Bruce Dodd tawh ki teeng uh hi. 1910 kum ciangin,W.J.Smart zong hong si leuleu a,amzi han kiangah a vui uh hi.
A Pa uh sih khit a sawtlo in,Nute’ ni kikhop na khat hong om a, J.B.Dodd zi zong va ki khawm hi. Thuhilh Pastor pa in, Nute’ thupiit nate gen in,a pahtawi na te a zak ciangin,nu leh pa i nasep a thuah khawm a Pa phawk in, khitui naptui tawh a ki diah hi. Amah leh anau te khempeuh a khoi a Pa phawk lua mahmah a hihman in, Nute’ ni a om mah bangin,”PATE’ NI”ong phuankhia aa”, June kha Nipi Thumna” ki zang hi.

W.J.Smart pen hun man a,a ki khawm den mi mawkmawk khat hi aa, ahih hangin ama thu bulphuh in,”Note’ tungah hong kibawl ding na deih bangun,Midangte’ tungah bawl un” cih tawh a nungta ahi hi.Biakna nasem te a pi bawl siam mahmah khat hi a, leiba neih loh ding a thupi ngaihsut mahmah khat ahi hi.A ki lawm lopi leh a kheng val lua ina tate ki zep ding a deih hetlo khat ahi hi. A niik a puan leh a inn siangtho sak sitset a,etteh tak lim hoih a nei khat a hi hi.Tua ahihman in,a Pa pianzia phawk in ”Pate’ ni” cih a phuan khia ahi hi.

****(Na Pa a lungdam mahmah nite lakah khat in, Leitungah mi-in, na Piankhiat Ni ahi hi.)****
***Pate itna a telsiam thei tek ding in, Pasian in thupha ong pia hen***

Pa aw

PA AW



By Pa Cinpi (Zomi Khangthak)

Kaneu lai-in
Leitung ah ka Pa mah ka muangpeen,
Mi’ Pate saang
Ka Pa pil zaw, hatzaw, hau zaw
Ka Pa adem zo kuamah om kei,

Ka Tangvaal ciang
Ka Pa peen mite’ Pate tawh
Ki bang kei si,
Mi’ Pate Saang
Hai zaw, zawngzaw, haatkei zaw
Hawmthawh huai zensi ka Pa,

Ka kum hong tam ciang
Ka Pa hong thuhilh te maan si
Ka pa in thusau mukhol si
Kaki pilsak hang
Ka Pa a baan hetlo kaive maw
Ka Pa pil zen si
Leitung haksatna nuai ah
Kei hiciang hong tun
Ka Pa lamdang zen si
Aw ka Pa itlua ing……

Ref: Zogam Laaizom Dec 2005, p-5

Pate pahtawi ni

   PA TE NI "PA TE " PAH TAWI NI 

Laisiangtho--" Nangmah in nuamsa in Leitungah na nuntakna a sau nadingin na
                          NulehPa na zahtak in"---(Eph.6:2)

 Utenaute,
                       "PA TE NI, PA TE PAH TAWI NI" i cih ciangin a pahtawi huai Pate om ding a, a pahtawi huai khollo Pate zong om kha theiding hi Tuamah bangin Pate a pahtawi nuam mahmah zong i om ding a, a pahtawi nuam khollo zong ki om kha thei ding hi.IhPA te zong a hawmthawh huaina ,kisapna zong a tawm a tam om mah ding hi, ahizongin bangbang hi leh i Pianna Pa ahihmanin kumkhat sungah nikhat, nai (24) sungah nai khat sung buang Pa te a pahtawi huaina leh a zahtak huainate  pawlkhat kikum leeng ka ut hi

PA te Zahtakna Pan Khansauna Thupha

              Leitung mite a si baih nuam kuamah i om kei dingin ka um hi.Ei Zomite bang diakdiak cidamlopipi mah,nuamsalopipi mah,zawng mahmah khiu kheu napin a sibaih nuam ki omlo in, a nungta nuam vive i hihi.Tunin i Topan ci hi, "Nuamsa a,nuntakna a sau nadingin na NuelhPa zahtak in," ci-in hong sawl hi. NulehPa zahtak ding cih pen thu haksapi ahihiam?Tanutapa te in i hih zo ding hiam?Bangin hong khak ahihiam?Tuni PA a nei lai ten," Pa aw,hong it ing, hong ngai ing,hongphawk lua ing Pa aw,thupha hongpia in hopih pah ni.Na pianna Pan na " AW" za nuam hi.Na kisik kei dinghi.Nuamsa a na khansau nading ahihi.

                Khat vei tangval nih tha kipiakna khatah ka om kha hi.Amah pen Malaysia pai
ding,sum thalawh ding, kikhakna hunkhat ahihi.A kicihna ah," lawm aw, na NUlehPa dam lai ahihi leh hampha hongsa ing.Zangkongah omsak inla, a hunhun in hopih zelzel in.Lungleengsak het kei inla,anneek tuidawn bangmah kisamsak het kei in,Antang a ipip in leisak in, sathau zong a bungpipi in leisak inla,nikten puansilh pan kipan sumlehpai kisamsak kei in,kei zong ka tua cih hi," ci-in teci pang kawmin kihanthawn uh a,thupi kisa mahmah hi.Tua val thu hoih bang om nawn mawk ding ahihiam? kici nuam liang zah dong ahihi.
                Tua nitak Sermon pia ding siapa hong ding to leuleu in Sanggamte lawmta tha kipiaknate thupi sa ing.Thangah huai mahmah hi.Pianna NulehPate lungleengsak lo a na kep na huaina te uh pen hoih mahmah hi.Ahizongin tua na pianna NulehPa te en kei mawk leucin Note zong na kumtam a,teek a, bangmah na sep zawh nawnlo ciangin kuanman hong enlo pah dinga,zong hong kivaklo pah dinghi..Laisiangtho in "na vawh bangin a gah na at kik ding" ci-in hong hilh hi.Na NulehPa na vaak na tah nate pen zahtakin kici nailo hi.Tuate pen tate sep ding, seploh phamawh tavuan hi zaw hi, cin limtakin hong haw to ziahziah a,lem   pah hi.i.
A Zahtak Huai PA TE Din Mun.
                   Laisiangtho sungah PA TE i cih Pasalte pen Numei lutang na  ci a,innkuan lutang zong a cihna hipah hi.Hi pen mihingte kiseh tawm hilo in Pasian seh hi a,Pasian deihna hi a,Pasian hong sawl ahihi. Laisiangtho sungah.. Evua in Pasian thu hongnial napin Evua mawhna kicilo in a pasal Adam mawhna kici mik mek mawk hi.Zawma alian 5 a neu 14 sungah,"Ahihangin Adam khangpan in Moses khang dongin mawhna in Adam' khialhna hangin a khiallote nangawn a uk hi."in kigelh hi.Numeite khialhna pen Pasalten thuak cih thu i gen phapha nuam hi.Tuamah bangin i innkuan sung vai khempeuh a sia, a pha thuak ding a om khempeuh"PA" ten thuak uhhi.Tuabang "Pa te" bangzah takin it huai ahihiam?
                      Falam ka omlai in Ciinmual vengah innkhat, a pate nitak homecell a pai kalin naupamngten mei tawh kimawl napan a inn hong halkha uh a,inn 4 bang kilawh in kangtum hi.Palikten delhpah in innteekpa koi om hiam ci in a pa uh kanpah hi.A Pa in zong" Kei hikeng, a om loh kal thupiang hi, ka tate hal khak hi" ci peuhmahlo in Palikte zui in thongkia dingin va pai ngeungeu hi.Tate mawh nate  phunlo puamlo in thuak ngam hi.Pate bangzah in it huai a, zahtak huai ahihiam?Tua bang a zahtak huai, na Pa na zahtak theihmanin iTopa lung dam a, nuamsa in, nakhan sau ding hong ci pah ahihi.Amen. Halleluijah. 
   
 PA TE Thupha Naak
             PA te in i thupha naak ahihi.Pasian in Minamte thupha hong nop ciangin Minam makaite tung tawn in thupha hongpai hi.Isrealte Moses tungtawn hopih in makaih hi.Pasian in Pawlpi thupha hongpiak nop ciangin Siampite tung tawnin thupha hong pia hi.Pasian innkuan thupha hongpiak nop ciangin PA te tungtawnin hongpia hi.Pasian kiangpan thupha hong luan ciangin tuizawn zui in, tui hong luan mah bangin Pa te tungtawn in tate tungah thupha hong luanghi.Pa hoih leh hoihloh tawh kisailo hi.PAte gina in,gina ta kei leh Pa ahih nungsangin Pasian in PAte tungtawnin tanutapate tungah thupha hong luangsak hi.Pilna nei in, nei ta kei leh PA pen PA munah na koih theih nak leh thupha hong luang ding ahihi.
           Abraham tungtawnin Leitung innkuante ah thupha hong luangsak hi.Tuhun ciangin innkuan pawlkhat sungah Pa te sangin NUte pilna lamah, laitan lamah zong sangzaw thei hi.Tei zaw ahihmanin innkuan sung zong vaan zaw thei uhhi. Tua zong ahi theiding khat mah hi.Ahizongin Nute in bangzah takin a pil zaw a,a tei zaw ta zongin Palo tawh vaihawmlo ding a,PA in lutang semin letmat thuu a,tavuanla ding cihna ahihi.A telnop dingin PA in innkuan lutangpi hiding a, NU in thuvanpi hongsem ding uhi.Tua bangin i PA te PA bawl in, zahtakna i piak theih leh Topan cidam khansauna  hongpia taktak dinga, innkuan nuam, Van gam malep i suak dinghi.Amen. Halleluijah.

PA te Lungngulh Lian Pen--
                   PA te in tanu tapa te tungpan a lungngulh lian pen  in sumlehpai hi masalo hi.Anneek tuidawn leh nikten puansilhte zong hilo hi.PA te lungngulh pen in tate tungpan PA bang a bawl ITNA, leh PA bang a bawl ZAHTAKNA ahihi. Laisiang tho in,"na nuntak a sau nadingin na NulehPa zahtak in,"ci hi. NulehPate pen it a, zahtak ding ahihi.
         Myitkyina ka sangkah lai in Kawlte tangval khat in Dek nungak khat ngai a, tangvalpa nulehpan phallo uhhi.Tua nu tawh na teen leh innpan paikhia ding ci hi.Tua pan a lawmnu nusia zolo ahih manin teenpih teitei hi.A inn pan a paikhiat ding ciangin a lawmnu tawh anulehpa mai ah khukdin suk in zahtakna  pia uhhi. Milim biate nangawn innulehpa tuazah dongin zahtakna pia thei uh ahihi leh ei Christiante in i Topa Pasian kammal bangin Nulehpa te zahtak ding, bangzah takin kilawm zaw ding ahihiam?Nulehpa zahtak ding cih pen Pasian kammal hi a,theihding ciang bek hilo in,zatpah ding leh zuihpah ding ahihi.Na cidamna ding nakhansauna ding leh na nopsakna ding ci hi.Amen. Halleluijah.

Na PA Simmawh Kha Kei In.
                 Paunak alian 30:17 sungah,"A Pa a simmawh mipa,a Nu' thu a mang nuamlo mipa, Va-ak in a mittang khelkhiatsak in, Musanete in a sa nee ding uhhi".ci ngeu mawk hi.Va-ak in na mittang khelkhia henla,nasa hong kinee leh bang man nawn ding na hihiam? Tua hi a,na PA simmawh kha kei in.Na thupha naak kikhak in, na hehpih huai kha dinghi.Na pianna Pa na simmawh  manin nang hong kithupi muh zawlo ding a,hong kineu muh zaw ding cih thei gige in.Na Nu zong simmawh tuan kha kei in.Amaute pumkhat ahi uhhi.Na Pa a om nawn kei leh zong na Nu kiangah pai inla, thudawh in.
SIMMAWHNA- cih pen Mawhna khialhna lianpi dingin kingaihsunlo kha thei hi.Ahihangin Pasin in deih hetlo hi.Simmawh paupih, simmawh hopih,simmawh bawl, hai bawl cihte PA ten zong thuak haksa uhhi.Na Pa a kumtam ciang bang mah sem zo nawnlo ahihmanin simmawh kha kei in.NUte in zong Pate zahtak bawl ding kisam hi.Adiakdiak in Nute in tate mai-ah na Pasal nasimmawh bawlkhak leh na taten zong hong simmawh nuam pah ding uhhi.

Na PA Khasia Sak Kei In.               
                        Ka khua vengte Papi khat khuado lawm anneekna khat ah,a Piancik paina vai kidong pen a gengen laitak a tapa kipilsak khat in a Pa bang ci sa ahitam maw,," hai mahmah teh Puteek",cin lit khat a suah phei leh a Pa zong paulo hamlo in khawlpah lian a, puai piatpah hi.A Pa in bang ci haim cih leh" lawmlawm, kei zong ka hat lai, ka khanlai om mah hi ven,"ci-in khitui luang ziahziah hi.Tua ziau tawh a pianna Pa khasia mahmah zo mawk hi.A Pa zong ciah pah vingveng a, kisam zo nawnlo hi.
        A sawtlo in bang thu hong piang hiam cih leh tua a tapa kipilsakpa gunah tuikia in si a,a Pa in va delhin a luang va pham a, sialpi khat kengsak hi.PAte bangzah takin thupi a,it huai ahihiam?Bangzah in zahtak ding kilawm ahihiam?A khuapihte in, "A Pianna PA khasiasak kha uh ahihmanin Pasian' dan thuak a, sihsia in si uh aa, a tate zong tagah suak in hehpih huai thei mahmah uh," ciin kikum khiankhian uhhi.
           Sanggam,Cidamin, nuamsa in na khansau nop leh na NulehPa zahtak inla,khasiasak kha kei in.Na Pa a dam lai hiam?Tunin Na PA hopih in",Pa aw , na dam hiam, hong phawk mahmah ing, thupha hongpia in Pa aw" cin hopih in. Laikhak in.Na Pan " Na -aw" za nuam hi." Na Aw " a zak ciang dam lawh liang ding hi.Tunin Pate khempeuh kipahtawi in,zahtakna ngah ta uh henla, Topa Pasian in cidam khansau, nopsakna thupha hongpiaksak tahen. Amen.

Sum om peuh leh na khempeuh a kicing takpi mah hiam?

Sum om peuh leh na khempeuh a kicing takpi mah hiam?

(1) Sum in hong laamto thei-in, hong niamkiatsak thei hi.
(2) Sum in hong puksak thei-in, hong phongkik thei hi.
(3) Sum in, lam hong musak in, lam hong pialsak thei hi.
(4) Sum in, hong ki gawmsak in, hong kikhensak hi.
(5) Sum in hong behlap in, hong lakik thei hi.
(6) Sum in, nupa bangin hong omkhawmsak thei-a, nupa banga ki-itna hong pia thei lo hi.
(7) Sum in, hong tawldamsak in, hong gimsak hi.
(8) Sum in, lupna lei thei-in, ihmut nuam lei theilo hi.
(9) Sum in, an leh mehte lei thei-a, ankam limna lei thei lo hi.
(10) Sum in, zatui lei thei-a, damna lei thei theilo hi.
(11) Sum in, hong lungnuamsak pak a, tawntung lungnopna hong pia theilo hi.
(12) Sum in, inn hoih lamzo a, innkuan nuam lam zolo hi.
(13) Sum in, laibu lei thei-a, pilna lei zo lo hi.
(14) Sum in, hong gualnuamsak thei-a, lungnop tawldamna hong pia theilo hi.
(15) Sum in, i muhna hong liansak thei-a, i upna hong neusak thei hi.
(16) Sum in, hamphatna hong pia thei-a, manphatna hong pia zo lo hi.
(17) Sum in, leitung tawh hong kinaisak in, Pasian tawh hong kigamlasak hi.
(18) Sum in, Pawlpi mi lei thei-a, kha mangthang lei zolo hi.
(19) Sum in, leitung nuntakna nuamtuamsak a, kha nuntakna hong pia zolo hi.
xxxxx
Khazih sungah,
David Tuang

Malaysia om Zomite' dinmun etkikna

Thupatna:

"Banghang in Malaysia gamah Zomite kipai muaimuai hiam?" ci-in poimawh sakna tawh lung himawh minampih tampi ki om hi. Ahi ding mah hi. Banghang hiam cih leh, Malaysia pen biakna lamah enlehang zong, Islam gam hi-in, Zogam panin zong gamlapi ahih banah sum leh pai tampi bei in, luangkham lianga kipai hitanghial hi.

1. Zogam ah nektawm zonna haksa:

I Zogam ah nektawm zon haksa in, nikhat thapai i thalawh ngiatngiat sum tawh innkuan khat genloh mimal khat in zong hoihtak kikhom hetlo bek thamloh in, a tamzaw in nasep ding ngiat zong kimu zolo ahih manin, Malaysia gam akitung khengkhang suak photphot hi.

2. Tu leh ta-te' mailam ding khualsakna:

Nektawm zonkawm in, Leitungbup huam ngaihsutpih kipawlna UNHCR te' vaihawm sakna tawh gambel ngah theihna lampi tawnin kipai a, Malaysia gam pen khawlmun khat hongsuak kik bek hi. Tua ahih manin, Malaysia pen gam nihna ci-in, tangpi tangta in kiciamteh a, gambelhna ding mun pen gam thumna ci-in ki ciamteh ciat hi. 

Ei tek a ding ahih leh koikoi ah piangthei sam mah hi. Ahi zongin, Zogam sungah sum khuambul neilote' a dingin, nek leh dawn, tu le ta-te' pil sinna ah ki tuantual ahih manin, suan leh khakte' pilna ding ngaihsutna tawh Malaysia tawnin gambel dingin kipai khengkhang ahihna akua mapeuh in telkim ding kisam kasa phapha hi.

3. Tulaitak Zomite' Dinmun:

I theihsa tek mah bangin, Zomi a tamzaw pen Refugee hizaw a, work permit tawh nasem ngiat a om pen 0.1% khawngbek ki om ding hi. Tua sungah tulaitak in UNHCR Status ngahsa pen 45% bangbek ki om ding hi. Zomi vekpi pen 25,000 bang ki om lai ding hi.

4. Malaysia gam sungah Nekzonzia:

Hauhzawh taktakna ding nasep asem ki om khollo in, nektawm zon tawh kinamtaak pian vive kihi zaw tek hi. Tua nasep ziate leh dinmun anuai ah envat ni.

a). Own Business:

Hih Own Business pen ansai hizaw pian hi. Pawlkhat ten Zosai hongin, pawlkhat ten Chinese food zuakin Ansai nasep "Own business" tawh a khuasa pen 00.02% khawng mah ki om ding hi. Hih sungah Ansai lianpi hilo in, Ansaipite' pangbel in, Saino khat hong a, khuasa kitamzaw hi.

b). Restaurants Staff:

Milip 50% phial bangin Ansai nasep semin, Ansai general work kitam zaw hi. Tua sung panin, Chef (Mehkang), Suppervisor, Cassier leh Team Leader ciang bang angah Ansai nasem khempeuh lakpan 1% bang kipha hi. Tualo teng pen Factory, Construction, Plantation, TV Game khawngpeuh semin kikhuasa hi.

c). Minam Nasemte:

Hizah mihingte amun munah haksatna atuak hunah hong van dingin, Minam kipawlna, Naupangte' pilna lamah pattahna leh biakna kipawlna ah nasem zong honpi khat mah ki om a, tuate zong amau hih zawh tantan in, Minam' a dingin gamtang ciat uhhi. Adiak in Zomi tawh kisai vaipuak lianpi anei ZAM zumpi ah full time Staff bekbek pen 12 bang pha uhhi.

Theih ding pawlkhat:

Malaysia gamah khuasa a om Zomite' a dingin, Malaysia pen aki dinkhawl bialbual himawk a, mainawt ding maw, nungkik ding, lampi nih kikhung den hi. Tua ahih manin, tulaitak dinmun mah thupi seh in, hun zatsiam ding thupi hi.

Work permit tawh hongtung namdangte pen kum 3 sungbang hamsa tangpi-in,  na hong sem gaigai uh a, sum khuambul hoih khop ngahsa in a gamtek uh zuan ciat uhhi. Ei Zomite pen UN peuh muangin sum zon ngiatngiat lamah ki polhteh mahmah mawk hi.

Tu a kipan in nasep mah thupisak ngiat in, sum i khol tinten tek ding kihan thawn hang. Tua banah Minam kipawlna in ama' sep zawh tantan hong sem ding a, na khempeuh ah zong aki konlawh thei hikhinlo ahih manin, eimah mah mimal kikhualna bulphuh a, adiak in, cihmawh dongtuakna ah kiallap belhtheih ding, "Khua Kipawlna" ciat ah Innpi neihzawh sawmtek in, Khua Kipawlna sum khuambul kician zong neihsawm tek ni.

Tua mah bangin, Biakna lamah makaite leh Biakna nasemte khempeuh in amun khempeuh leh ahun khempeuh in ihaksatna hongvan kimzo tuanlo ahih manin, aveng veng leh amun mun, aphual phual panin, Homecell te nei in, Zomi khempeuh amun mun pan kituah khawmin kimuh khop zelzel ding kisam hi.

Athupi ah, Minambup huam genvai ah gamtang kipawlna ah genvai tawh kisai kipawlna sum mahmah ikhiat tek ding thupi hi. Gentehna: ZAM kipawlna huamah Social Welfare kinei ahih manin, kumkhat ai dingin, RM. 10 bek kila hi. Minam kipawlna ah Membership pen RM. 50 bang hi a, avekpi gawm in RM. 60 bek ahihi. 

UN tawh i om a, permit tawh i om zongin hih minam vai ah kipawlna pen ei mimal kihelna hipah ahih manin, bawl ngiat ding, neih ngiat ding kisam hi. Biakna Pawlpi zong na lunglutna pen munkhat ah kihel hamtang inla, mival suah sawm kei in.

1). Minam kipawlna ah kihel in!
2). Biakna kipawlna ah kihel in!
3). Khua kipawlna ah kihel in!

Hih mun thum tengah nakihel nak leh navei natak ah hong domsang dingin, Zomi a lomlom in kiging khin a, haksat dongtuahna in nang hong vuknelh zo peuhmah lo in, Leitung azo mihing nasuak ding hi.

Thukhupna:

Malaysia panin Zogam zuanin naciah sawm leh lampi nih om a, khat pen illegal Agent tawh leilam tawn a ciahna hi in, Agent te' tungah sum pia ziau a, ciah vingveng theihna ahihi.  khat pen tunglam tawh ciahna hi in, Myanmar Nationality khat nahihna tawh Myanmar Embassy ah Document ngenin, tua tawh Immigration zumpi ah khutpi mek a, kumpi phalna tawh Air Ticket lei-a ciah vingveng theihna ahihi.

1. Myanmar Embassy:  00.00 +
2. Immigration Office: RM. 400 +
3. Air Ticket: RM. 400 +

Theih dingin, tunglam tawh naciah sawm leh Immigration zumpi ah na khutpi mekna hangin, Malaysia ki lutkik thei nawnlo hi. Nalut kiknop leh kum 6 khit bangbek ciangin, legally in kilut kik thei pan ding hi.

Malaysia ah dinkhawl a om ka mipihte khempeuh' a dingin, khitui luang a thungetna anei tawntung leh Malaysia gamah note tawh khuasa khawm,

Dal Sian Hung
Kuala Lumpur, Malaysia.

Innkuan kimakaihna a thupitzia

Research findings khatin Naupang breakfast pongman taka nei loten a virginity kepzolo deuh uh ci mawk mik mek hi. Ka lungsim khatin ki naak sai kei zen si ka ci pian hi. Ahizongin a ban ka sim ciang a hilhcianna ah breakfast sangin a neeklohna hang thupoi zaw hi. Naupang ten breakfast mumal leh pongman taka, a neeklohna hang tampi om thei hi. A nute uh gina zolo hi thei hi, tuabanah a nu leh pa kikal cidamlo zong hi thei hi. Bek thamlo in problem dang zong om thei lai ding hi. Naupang frustrate lua ten tension release nangin sex zang nuam se ci hi. Chinese nungaknote breakfast kician taka ne zel te a average a lakin  kum 19 tan  virgin uh hi. Breakfast ne mumal ngeilo te bel a average in kum 17 ciang bek virgin uh hi. Breakfast pongman taka nete amau pumpi kikem zo in sawtvei virgin zaw uh cihna hi.

Hih research Findings te bel zong thukhat hi in, innkuan ki ukna a thupizia a gen nuam ihi zaw hi. Leitung mihingte innkuan meel neilo a khuasa hi jen lehang bangzah ta in a buai huai zen tam?Hih thute khawng ngaihsun leeng innkuan thupizia kithei thei hi. Khristian ahi lo biakna dangte nangawn in innkuan nuam thupi ngaihsut uh hi.Innkuan nuam a om theih nangin kiteen ma pek pan in ngaihsut khawlh ding kitangsam hi. Mihingte pen a hoih lam thu kihilh tang tang kuul hi.Lai siangtho in, “Naupang khat a neulai in lampi man tawnsak lecin, a teek dongin lampial nawn lo ding hi ci hi. Tua lampi man a tawt theih nang ua kisinsak masakna pen inn sung pan ahi hi.Inn kuan sung pen na khat peuh peuh kisinsakna masa ahi hi. Sang masa, biak inn masa leh society masa hi mai hi. Khuasung leh mundanga tate omdan ding khempeuh innsung pan kihilh masak ding ahi hi.Nu leh pa ten inn sung pen kisinsakna mun masa ahihlam telsiam kuul hi. 

Innkuan sunga thunei pen pa himahleh tate pahtahna ah nute in mawhpua zaw hi.Pa pen vak khia zel sang mahleh nu te innsungah om leh hoih hi. Numei vaak hat lua te  a tate un sun hi.Tate pen nu kiangah tamzaw ahihmanin pa sangin nu sun zaw uh hi.Lai siangtho in zong”a tanu ten a nu sun” ci hi(Ezk 16:14). Innkuan nuam leh hoih a om theih nangin Nu Hoih kitangsam mah mah mawk hang e.D.L Moody in “Ka nu’n hong pattah bang in nuten a tate pantah le uh thawng(Jail) om lo ding hi” ci hi. General Napolean leh George Washington te khawng zong mi minthang a suahtheihna hang uh pen Nu hoih a neih man uh hi.

A thupi khollo tawh aki bang Innkuan ann neek khawm pen thupi peuhmah hi. Ann ki neeksan ziau mawk lo in kingakin a ki tuak mah a, annkuang umkhawm ding hoih hi. Discipline(sii-kaan) neihna khat ahihmanin a khanglai naupangte makaihna khat hipah hi. Ta nu leh tap ate pen numei mawhpuakna leh pasal mawhpuakna hilhcian ding kitangsam hi.Tapa te pen tanute kepsiamzia ding hilh inla, pasal ahihmna tawh kituakin tanute etteh tak dingin omdan kisin sak in. Tanu leh tap ate pen vang kipiak tuah siam ding thupi hi.
Nute manphatna pen kam a gen zawh ding hi lo hi.Bangci bangin innkuan sung makaih zel na hi hiam? Hi leitungah a nuam pen innkuan nuam ahi hi. John Randolph American Statesman in, “ Ka naupan lai in ka nu in ka khutah hong len in,a kiangah hong khukdinsak zel hi.’Vantunga om kote’ pa aw, na minsiangtho kizahtak hen’ hong cihsak zel hi phawk kha lo hi zen leeng, pasian um lo leh biakna nei lo ka suak ding hi” ci hi. Mihingte in a pua lama i muh leh theihte sangin innsung pan ate’ ki nuntrakpih zaw hi. Tua manin na ta pattahzia pen a lungsim puak dan ding uh hi mawk hi
Mi siam te gendanin leitung numei 94% ten pasal neih sawm uh hi. Tuate’ laka 3% bek nu cing(nu hoih) hih sawm zen uh hi.Pasal nei a ta neih ziau pongmawk pen nu cing hihna hi lo hi. A kuul leh a kitangsam banga nuntakna a zang thei te nucing kici zaw hi.Thankik banga ta nei pong in thu lah hilh sam lo, cihte pawl nuking hi lo hi. Thuneu khat tawh heh mana theih khempeuh genkhia cihte pawl khawng zong e.Lungsim kip a nei, numei ahihlam a mangngilh lo, tate pahtah a thupi ngaihsut numei hoih hi.

Innkuan ki makaihna a thupizia a thei Susana Wesley in, “ Innkuan kima kaihna pen Pasian nasepna thupi pen hi” ci hi.Innkuan sungah Pasian deihdan bek a gamtat ding thupisa hi.Amah pen tu dongin leitung nuhoih te laka kiciamteh khat hi.Zomi nute sungah innkuan sung Pasian nasepna field a ngaihsun a om diam?Pasian thu in zong innkuan vai thupi ngaihsut masa dingin hong hilh hi.(ITim 3:4).

Innkuan sunga nute thupizia pen kama gen zawh ding hi lo hi. Hatsatna leh damlohna ah nute min ki lo masa hi. Ahih theih uh bangmah a om kei phial zongin i kianga hong tut bek uh nuam tuam hi.Thu sia thu pha nute kiangah ki gen ngam hi.Tu ahihmanin nu te ki ngai diak hi.Nu hoih te tate bek tham lo in pasal te adingin zong manpha hi.Laisingtho in zong Pasal te adingin pahtawina lukhu ci liang hi. Nu hoihlo te leu leu bel a pasal a mualpho sak leh innkuan a kitamzan sak hi zen hi.

Innkuan haksatna manin nu pawlkhat in sum zongin a tate uh nasemte keemsak uh hi.Tuadan te pawl hoih lo mah mah hi.Nidang lai in Greek mite in, “ Na sal khutsung pan na ta khangkhia sak lecin, sal khat bek hi lo in sal nih nei suak ding hiteh” ci hi.Naupang ten  muh leh theih khakte uh sun mawk uh hi.France gam bekah zong nupi tam mah mah ding hi. Ahizongin innsung a uap lum nupi tam tuak lo hi.Napoleaon in,”France gam kitangsap pen nute ahi uh hi” ci mawk hi. Innkuan sung kimakaihna ah pa te thupi lo cihna hi lo in nute thupi diak uh hi. Thangpi