Showing posts with label Article Education. Show all posts
Showing posts with label Article Education. Show all posts

Rev. Dr. Pu Kam Khaw Thang' Kammalte

Rev. Dr. Kam Khaw Thang' Kammalte:
• I mawhnate im lo ding, mi tawh thu i neih leh maizum seelna peuhin pang tentan loin thumbawl zaw ding, i mawhnate im loin pulak zaw ding.
• I zawh ngap lohte langbawl se loin om hithiat ding.
• Sum leh paai, annek tuidawnte ah thang gamtat lo ding.
• Kineih khem se lo ding, a zawng i hih leh i zawn'na im lo ding, a hai i hih leh i haina im lo ding, a zawngpi kihausak, a haipi kipilsak, cih bangte hoih lo hi.
• Mi gensia se lo ding, midang khat peuh thu i gen leh zong tua i gente pen i gen mite' zakin i gen ngam dingte bek gen ding.
• I siamlohnate ah a siam kineih selo ding.
• Kamciamna khat peuh i neih leh tangtungsak ding, i tangtungsak zawh loh dingte kamciamna nei vet lo ding.

• Mi simmawhbawl in neu ngaihsut selo ding, tuhun a, a neute nidang ciang a lian suak thei a, tuhun a, a liante nidang teh a neu suak thei zel hi. I simmawhbawlte i mai-et hun hong tun ciangin zumhuai mahmah hi.
• Innkuan sum zeekna ah ngeina kip nei ding, sumpi, sumkhol, zattawm ding a nam tuamtuam ciatin sehkhenin a ma sansanah a val in zatloh ding.
• Leiba nei dingin sum zang lo ding, i ngahna tawh kituakin zang bek ding.
• I tungsiahte langpanhuai lo hi. I paunak ah ''Lamsak leh pute kizo ngeilo'' na ci hi. I tungsiahte langpan lehang eima gimna hi lel hi.
• Zuau gen se lo ding, ahi bangbangin gen den ding, mi khat kiangah thu khat gen, a dang khat kiangah a tuampi khat in gen zel cihte pawl hoih lo hi. Lungsim nam nih nei selo ding cihna hi.
• Hun-awng omsak loin manlah den ding, na tampi septheih ding hanciam ding, a awng khong luate siatna tawh kizom thei hi.
• I hat laitak, i liat laitak, vang i neih laitakin midangte' na sak dingin gamta in na sem lo ding, a thuakte in a khantawnin mangngilh lo hi.
• Thulian khensat ding a om leh khensat pah loin hong kikum phot nung, ci-in a hun sotin limtakin ngaihsun ding.
• Midangte ngaihsutna zui-in na semin gamta lo ding, ei mahmah in man i sak bang bekin na sem ding, midangte' ngaihsutna zui-in i gamtat ciangin thu haksa khat hong om leh e'n siansak nading siamna nei lo i hih manin zumhuai hi.
• Ei leh ei kiphattawm selo ding, midangte phat dingin i om leh lungdamhuai hi. Ei leh ei kiphatna pen zumhuai mahmah hi.
• Khangno lai a siamna leh theihnate kip ahih manin khangno lai-in pilna leh siamna tampi i sin ding kisam hi. Khangham khit a sinte kimangngilh kik pahpah hi. Hih pen khangnote in a hun lai in a phawk ding thupi hi.
REV. DR. KAM KHAW THANG' TANGTHU TOM
• October 17, 1927 Tuithang ah suak (Pu Sim Tung Nung + Pi Ciin Za Dim)
• October 18, 1936
Apa in Khristian suahpih.
• May 18, 1972
Apa'n sihsan (kumkhat phakma a Nu si)
• June 1937 - March 1941
Tonzang ah Zolai tan 4 dong kah
• September 11, 1938
Rev. Vial Nang in tuiphum
• June 1941 - March 1942
Tedim Manglai sangah Tan 4 dong kah
• June 1945 - March 1947
Tedim Manglai sangah Tan 6 dong kah
• June 1947 - December 1950
Nelson Lai Siangtho sangah kah
• June 1952 - March 1956
Insein Lai Siangtho sangah kah
• June 1956 -December 1956
Hakha Lai Siangtho sangah sem
• May 4, 1957
Sister Niang' Khan Ciin tawh kiteeng.
• February 1957 - February 1960
TBA Secretary sem.
• 1960 - 1982
Tedim Lai Siangtho tei
• April 1984 - 2006
ZCLS laitei.
Theih ding: Hih a tunga Sia Thang' kammalte leh a tangthu tomno pen Rev. Job Thawngno gelh, ''Tedim Lai Siangtho hong bawlsak Rev. Dr. Kam Khaw Thang' Pianzia leh Sepzia'' cih laibu pan ahi hi. Adang tampitak om.
Sia Thang'zat kammal Jesu hilo Jesuh, Khris hilo Khrih, Khasiangtho hilo, Kha Siangtho, Laisiangtho hilo, Lai Siangtho, le hilo leh, Kam Khua Thang hilo, Kam Khaw Thang... cihte ama' zat ahihi.
by. Job Thawngno

Dr. Pu Kam Khaw Thang ii thugen tomno


Dr. Kham Khaw Thang in a thuahkhak thute sungpan in zuih dingin hoih asak thu (18) te hong gelh suk ing.

(1) I mawhna te imcip lo ding. Mi tawh thu i neih leh maizum selna peuh in pang tentan loin thum bawl zaw ding. I mawhna te im loin pulak zaw ding.

(2) I zawh ngaploh dingte langbawl se loin om hihiat ding.

(3) Sum leh paai, annek tuidawnte-ah thang gamtat lo ding.

(4) Kineih khem se lo ding. A zawng i hih leh i zawn’ na imlo ding, ahai i hih leh i haina imlo ding. A zawngpi kihausak, a haipi kipilsak, cih bangte hoih lo hi.

(5) Mi gensia se lo ding. Midang khat thu i gen leh zong tua i gente pen i gen mite zak-in i gen ngam dingte bek gen ding.

(6) I siamlohnate-ah a siam kineih se lo ding.

(7) Kamciamna khat peuh i neih leh tangtung sak ding. I tangtun’sak zawh loh dingte kamciamna nei vet lo ding.

(8) Mi simmawh bawl in neu ngaihsut se lo ding. Tu hun-a a neute nidang ciang alian suak thei-a, tu hun-a a liante nidang teh a neu suak thei zel hi. I simmawh bawlte i mai-et hun hong tun’ ciangin zumhuai mahmah hi.

(9) Innkuan sumzeekna-ah ngeina kip nei ding. Sumpi, sumkhol, zattawm ding anam tuam ciat in ama sansan ah aval-in zat loh ding.

(10) Leiba nei dingin sum zang lo ding. I ngahna tawh kizui-in zang bek ding.

(11) Midangte’ ngaihsutna zui-in na simin gamta lo ding. Eimah mah in man isak bang bekin na sem ding. Midangte’ ngaihsutna zui-in i gamtat ciangin thu haksa khat hong om leh e’n sian’sakna ding siamna neilo ihih manin zumhuai hi.

(12) I tungsiahte langpan’ huai lo hi. I paunak-ah,“Lam sak leh pute kizo ngeilo,” na ci hi. I tungsiahte langpan’ lehang eima gimna hi lel hi.

(13) Zuau gen se lo ding. Ahi bangbang in gen den ding. Mi khat kiangah thu khat gen, adang khat kiangah a tuampi khat-in gen zel cihte pawl hoih lo hi. Lungsim nam nih nei se lo ding cihna hi.

(14) Ei leh ei kiphattawm se lo ding. Midangte’ phat dingin i om leh lungdamhuai hi. Ei leh ei kiphatna pen zum huai mahmah hi.

(15) Thulian khensat ding aom leh khensat pah loin, hong kikum phot nung, ci-in a hun sotin limtak in ngaihsun ding.

(16) Hun awng omsak loin manlah den ding. Na nam tampi sep theih ding hanciam ding. A awngkhong luate siatna tawh kizom thei hi.

(17) Khangno lai-a siamna leh theihnate kip ahih manin khangno lai-in pilna leh siamna tampi i sin ding kisam hi. Khangham khit-a sinte kimangngilh pahpah hi. Hih pen khangnote in a hun lai-in a phawk ding thupi hi.

(18) I hat laitak, i liat laitak, vang i neih laitak in midangte’ na sak dingin gamta-in na sem lo ding. A thuakte in a khan’tawn in mangngilh lo hi.

‘Kineihkhem se lo ding. A zawng ihih leh i zawn’na imlo ding, a hai ihih leh i haina imlo ding. A zawngpi kihau sak, a haipi kipilsak’, acih mah tamvei sim pen in ki-um ing. Nang zong na simgaih khit ciangin dikna sak penpen khat hong genkik ve leh, Tawng, na pa’n zong hong gen kaih teh!

AIDS thu theihna in AIDS pan kidop ong siam sak thei

AIDS ngahloh nadingin AIDS thu thei in!
Thumasa
Leitung ah AIDS natna a piangsak lungno HIV (human immunodeficiency virus) le tua lungno hanga a damkik thei nawnlo natna AIDS (acquired immunodeficiency syndrome) tawh a nungta mi then 20 (lakh 200 or 20 million) tak pha hi, cih na theikha hiam? Tua then 20 sung pan a kimkhat pen leitungbup cidamna lam a sai World Health Organization (WHO) te in numei hi ci-in na ciamteh uh hi. Tua ahih manin, numei le AIDS cih thulu tawh hih lai kong gelh hi. Numeite in HIV/AIDS thu limtak i theih ding kisam ka sa hi.
Mihing sisan sungah natna a piangsak thei lungno nam khat HIV kici a om ciangin tua HIV lungno in natna a dal thei sisante susia-in a damkik thei nawnlo ding natna AIDS kici piangsak hi. Tua HIV lungno a nei khempeuh in AIDS natna ngah pah khin khollo napi, a tamzaw in a ngah hamtang uh hi. A ngahkha khempeuh lah damkik cih om lo hi. Tua ahih manin HIV lungno ngahkhak ding kidophuai a, AIDS natna ngahloh nading a bulpi ahi hi. HIV lungno a that thei zatui kimu nailo a, ahi zongin AIDS natna ngah pah nading panin themkhat a ziakaisak thei zatui bel om hi. Tua zatui min antiretroviral kici hi.
a. America ah HIV lungno le AIDS natna: America gam cidamna lam a saipawl Centers for Disease Control (CDC) te in a genna ah kum 2002 kumtawp tanin AIDS natna nei khangno le picing numei 159,271 phazo hi. Kum sawmlesagih sung, 1985 pan 2002 kikal sungin USA gam ah numei AIDS natna nei a zah li-in tam hi ci-in kiciamteh hi (7% to 26%). Ahi zongin hih kum sawmlesagih sung mahin zatui antiretroviral therapies tawh kidalna hangin HIV lungno nei za ah sawmlesagih (17%) in AIDS natna ngah lo hi. Hih zatui nekna panin HIV lungno in AIDS natna a piangsak ding pen khakcip ahih keileh ziakaisak hi dingin ki-ummawh hi. America ah AIDS natna ngah za ah sawmte pen numei kum 25 sanga naupangzaw vive ahi uh hi. A gambup numei lakah Spanish le mivom za ah sawmnihlenga sangin tawmzaw uh a, tua za ah sawmnihlenga sung pan AIDS natna nei za ah sawmgiatlenih sangin tamzaw leuleu hi. Spanish le mivom numei za lakah 82 in AIDS natna nei uh cihna hi.
b. Singapore ah HIV lungno: Kum 1994 August kha-in zato lam siamte in a kan uh ciang Singapore ah numei HIV lungno nei a masapen 1986 kumin kimu hi, cih na gen uh hi. 1991 zawh lam ciangin tua lungno nei numei tam semsem a, 1993 kum ciangin mi 16 pha in, tua 16 lak pan 14 te pen numei le pasal lupkhopna (omkhopna) pan kilawh hi. Mi khat in sisan kipiakna pan ngah a, a dang khat in zatui hoihlo kisutna pan ngah hi. Numei 8 inn nupi hi a, a dang nihte a pasal uh si zo hi. Nupi 8 in nasep nei a, tua lak pan mi 5 in AIDS natna hangin nasep zom zo nawn loin tawp a, khat in a nasep tawpin a innkuan kem hi. Hih AIDS natna nei nupi a tamzaw sangkahna kician nei lo, laitan sangpi nei omlo uh hi.
1. AIDS kici bang hiam
HIV lungno mihing sa sungah a lut ciangin a damkik thei nawn lo ding natna khat piangsak a, tua lungno hanga damkik thei nawn lo natna pen AIDS kici hi. Zolai-in mikhat in hih bangin a khiatna gen hi: Anbang Itna Damtheilo Sihna!
2. AIDS natna ngah nading hun bangtan sawt hiam
HIV lungno a nei khat in AIDS natna a ngah dong hun bangtan sawt hiam, cihna ah a tamzaw in kum 8 pan kum 10 sawt hi.
3. HIV lungno nei le AIDS natna nei a kilamdanna bang hiam
HIV lungno ngahte in AIDS natna ngah pah lo a, AIDS natna neite HIV lungno khangcing ta cihna hi. Mihing sa sungah natna om ding a dal tuisikte HIV lungno in dawn kang in, a dam thei nawn lo ding natna AIDS piangsak hi. HIV lungno nei khat AIDS natna a ngah mateng (HIV lungno a picin mateng) mi cidam ngeina bangin thahatin melhoih a, ankam limin, kigensiat nading nei vet lo hi.
4. HIV lungno koi pan kingah hiam
HIV lungno ngah za ah 80 sanga tamzawte in numei pasal omkhopna pan hi. HIV lungno ngah theih nading omdan hoih lo khempeuh lak pan a kikem lo peuhmah HIV lungno a ngah ding ol mahmah hi. HIV lungno ngah theihna pawlkhat a nuai-ah gualsuk ni.
a) HIV lungno a neisa khat tawh numei pasal omkhopna pan
b) Zatui khamtheih zangte in kisutna phim a zatkhop uh ciangin
c) HIV lungno nei nupi in a ta nawitui a piakna pan
d) HIV lungno omna sisan le sisan nam kipiakna pan
5. HIV lungno bangci kilawh hiam
Leitungbup ah HIV kilawhna a tampen numei le pasal lupkhopna pan ahi hi. Za ah 90 pen hih banga numei pasal thangtatna pan kingah hi. America ah za ah 42 pen numei pasal thangtatna pan kilawh a, za ah 21 pen zatui kisun (drug abuse) pan kingah ahi hi, ci-in kum 2002 tawp lamin kiciamteh hi.
HIV lungno pen numei le pasal thangtatna pan kingah himah leh hun tamzaw ah numei in ngahbaih diak a, pasal in ngahhakzaw hi. Numei zunthakna a naalsak nap tawh a kibang a man ditdiat tuite (viginal secretions) hangin numei in HIV lungno ngahbaihzaw hi, ci-in kiciamteh hi. AIDS natna a kimuh cil lai in, sisan kisam a om ciangin sisan le cituite HIV lungno om le omloh kisit masa ngei lo ahih manin mi pawlkhat in sisan kipiakna pan HIV lungno na ngah uh hi. Sisan siangtho lo kipiakha cihna hi. HIV lungno kingah theih dan pawlkhat gen lai ni.
a) Zatui khamtheih kisutna pan
b) Zatui khamtheih kisutna phimte zatkhopna pan
c) Pasal le pasal omkhopna pan
d) Sisan, pasal bawtui le numei zunthakna a kawtsak tuite kisawhkhakna pan, ahi zongin khua-ul le ciltui pan kilawh thei lo (body fluids such as blood, semen or vaginal secretions but not sweat or saliva)
6. Numei in HIV/AIDS neileh bangci kithei hiam
AIDS natna a piangsak HIV lungno a nei numei pawlkhat in tua lungno nei ahih lam zong kithei pah lo hi. Ahi zongin HIV lungno a nei peuhmah in a theih nading honkhat om hi, a omdan uh pawlkhat kikhek hamtang ahih manin, tua bang a kitheih baihna nam thum om hi.
a) Numei zunthakna ah meima le liamna om den hi
b) Numei zunthakna ah tuisik luang den, kawt den
c) Numei kalkawmah natna khatpeuh om leh damsak kik ding ol lo.
Tua lo adang pawlkhat pan zong numeite in HIV lungno nei hi cih kitheithei hi.
d) Numei zunthakna ah meima dam thei lo om den
e) Numei zunthakna sunglam (taisung) meikang bangin sa den (pelvic inflammatory disease, PID)
f) Zunthakna pan tui luangkhiate a mel kidang
g) Zunthakna le a kiimteng thakin bawk
h) Zunthakna kiim le a sunglam keugawin kilip
i) Zunthakna sung khempeuh zuul gawp
Atamzaw ah, numei in HIV lungno a ngah ciangin a ngah pan khakhat sung khawngin bukvei bangin khuh kheuhkheuh uh hi. Mi pawlkhat leuleu in HIV lungno a ngah pan kum tampi sung ngah ahi cih a kitheih nading bangmah kilangkhia lo hi. HIV lungno a ngah zawh ciang natna khatpeuh ngahkik leh tua natna uang semsem a, a nuai-a bangin a natna kilangkhia thei hi.
j) Gawl sung bawk, lenuai bawk, khaal bawk cihte hong kipan hi
k) Khuasik cisa dam thei loin zan ciangin khua-ul kai den
l) Anngawl hang hi loin gawng hanhan
m) Thazawm den, tha nei lo (thabei)
n) Ankam lim lo, sungpai, sungkhawh, ektui den
o) Kamsung na-in bawk, tangsiat bangin kang tiptep cih bang om den hi.
7. HIV lungno pan AIDS natna ngah cih bangci kithei hiam
a) HIV lungno a ngah khat in tua lungno ngah hi cih zong kithei lo hi.
b) Tua zawh a sawt loin cisa, kamsung pol, vun tungah cithak nei cih bangin om hi.
c) Hih bang nopmawhna omte dam zel, kilangkik zel cih bangin hun sawtpi kivei hi.
d) Tua zawh ciangin gawlbawk, lenuai bawk, khaalkawm bawk cih bang om hi. Hih in khathum sung bang sawt hi. Hih bang hong om ciangin HIV lungno khangcing dekta, pumpi hatna le natna dal zawhna kiam cihna hi a, AIDS natna picing kingah tading cih a kilatna hi. Hih hun ciangin natna neuno bukvei nangawn pumpi in dal zo lo ahih manin lungtang, mit, gilpi, vun le thagui natna cihte tawh kizom suak a, pumpi tawh kilawi nawn lo ahih manin pumpi thazawm den ta hi.
e) Cisa, ankam lim lo, sungtholh cihte in bawm den ahih manin gawng semsem a, thakiam deuhdeuh hi.
f) Hih bang hun ciangin mi pawlkhat in sameng natna (cancer) zong ngah thei hi.
g) Hih banga HIV lungno a nei khempeuh in midang lawh theita hi.
8. HIV lungno olno a kilawh ziauziau theih ahi hiam
HIV lungno pen innsungah tenkhopna pan kilawh thei lo hi. Ekbuk, ankuang, le umlekeute zatkhopna pan kilawh thei lo hi. Tuibual khopna pan kilawh thei lo hi. Puansawpna van zatkhopna pan zong kilawh lo hi. Zum nasep khopna, sangkah khopna cihte pan zong kilawh thei lo hi. Tho le ganhing pehna pan kilawh lo hi.
9. HIV lungno nei le neilo bangci kithei hiam
a. HIV antibodies test pan kithei: HIV lungno ngah ciang a piangtawm HIV antibodies neih le neihloh etna panin HIV lungno neih le neihloh kitel hi. HIV antibodies pen HIV lungno a ngah zawh a sawt loin mihing pumpi tungah piangtawm hi. HIV antibodies a om leh HIV lungno nei, HIV antibodies a om keileh HIV lungno nei lo cihna hi. Atamzaw ah HIV lungno ngah pan khathum sungin HIV antibodies piang hi. Ahi zongin khat veivei antibodies piang pahpah lo thei ahih manin HIV antibodies om lo cih man bek tawh HIV lungno nei lo kici thei lo hi.
HIV antibodies a kimuh leh HIV lungno om takpi hi cihna hi a, ahi zongin AIDS natna ngahta cihna hipah lo hi. AIDS natna pen HIV lungno a khangcin ciangin a damkik thei nawn lo ding natna hi bek a, HIV lungno nei khempeuh AIDS natna nei hi lo hi. HIV lungno pen a picin ding a kidal pah keileh AIDS natna ngah pah ding cihna hi. AIDS natna ngah tampi in sameng natna (cancer) zong ngah khawm hi.
b. Sisan le sa sungah tuisikte etna pan kithei: Sisan le ciitui (pumpi sunga tuisik omte) sitna pan HIV lungno neih le neihloh kitel thei hi. Hih etna pan HIV lungno nam nih HIV-1 le HIV-2 om le omloh kitel thei hi. Hih bang sisan le ciitui etna in minit 20 bang bei hi.
10. Bang hangin HIV lungno neih le neihloh etsak kul hiam
Ki-etsakna panin HIV lungno neikha hileng cih lunghihmawhna beisak a, neikha ihih leh a dalna zatui nek pah ding hong theisak hi. Mailam kikepzia ding zong kitelpah hi. Numei pasal thangtatna pan kikep a kul dan le, ta le nau neih ding zong kikep a kulzia hong telsak hi. Cidamna hoihtak neih a kul dan hong theisaka pumpi cidam a kisapzia hong telsak hi.
11. Sisan hawm leng HIV lungno ka ngah thei hiam
Sisan piakna phim le thawlte siangtho hi peuh leh HIV lungno kingah lo hi. Phim le thawlte khatvei zat khit ciangin pai pah ding.
12. HIV lungno ka ngahloh nadingin bangci kikep ding
Koppih khat bek nei ding. Numei pasal thangtatna pan kikem siangtho ding. A thangtat nuam numei le pasalte tawh kipelh ding. Zatui khamtheih kisun lo ding. Sisan piak ciangin phim le thawlte siangtho ding, mi zatsa zang lo ding. Sisan le ciitui a siangtho bek sang ding, zang ding. Kisutna phim khatpeuh zat ma-in siangtho takpi hiam cih tel masa ding (use sterilized needles and piercing matenials only).
13. Numei pasal kizopna siangtho kici bang hiam
Numei pasal kizopna siangtho cih ciangin numei le pasal sung pan hong luangkhia bawtui le ciituite kisawhkha lo ding cihna hi. Hih bang ahih theih nadingin atuamna (condom) zat ding cihna hi. Numei pasal omkhop ciangin zu kham lo ding.
14. HIV lungno nei ka hi cih thei leng bang ka lawh dia
HIV lungno nei na hih lam na kitheih leh zato ah HIV/AIDS lam a siamte kiangah pai pah inla, kivelsak in. Na sisan sitsak inla, zatui le kikep dingdan dong in. Numei pasal omkhop kidaangin pelh inla, sisan le ciitui midang zat dingin pia, hawm kei in. Nau neih ding pelh in. Tha neih nading le thahat nadingin anhoih ne inla, na cidam nading hanciam semsem in.
15. AIDS natna a damsak thei zatui a om hiam
Tu ciangciang ah AIDS natna a damsak thei zatui kimu nai lo hi. Zatui pawlkhat NRTI kicite AZT, ddl, ddC, 3TC, d4T le protein inhibitors kici honkhat le NNRTI te in AIDS natna ngah ding ziakaisakin pumpi cidamna hoihsak tuam bek a, damsiangna bel pia lo hi. Zatui bang hoih ding ci-in a kizon san laitak hi.
(Nu Vung Deih Cing in Yangon General Hospital pan Diploma in Nursing and Midwifery a zawh ciangin University of South Australia pan Bachelor of Science in Nursing zo leuleu a, tu laitak Singapore ah sem hi.)

Sm Vung Deih Cing, B.A(History), B.Sc(Nursing)
Singapore

Zogam khantohna leh Zomite khantohlohna

Zogam khantohna ding a kigen ciang, lampi puahthak ding, gunlei lamthak ding, kumpi zuminn lamthak ding, mei hoih tui hoih ding, sanginn hoih ding cihte vive kigen in, tua pen Zogam khantoh nading thu hi aa Zomite khantohna thu higai khinlo hi.

Gamdang pan Zogam a va ciah pak pawlkhat tawh ka kiho khakna tungtawnpan a hizong, Zogam, Kawlgam pan gamdang a paite ii thugennate tungtawn pan a hizongin, ka phawk khak thu khat in, 

Khantohna i gen ciang, i mitkha leh i ngaihsutnate ah inn sangpipi, mawtaw tampipi, cihte kimu masa, kiphawk masa kha thei hi.

A diakin Tedim pen sumhau tam mahmah ta, inn hoih kilamthak ziahziah, mawtaw hoihnono a nei tampi om mawtaw cycle bel genvetloh cih ding dinmun kitungta in a khangto tawh kibang hi.

Lamkhat pan, lamsii-kaan ki neimello a ci zong om kieukieu lai hi. Tua sang' a suukzaw thamtham khat pen, mihing kideidanna lian mahmah lai cih thu a hihi.

Kumpi zumte ah va pai lehang, sum neileh neilo pen ong don dan, ong kinbawl pih dan kibang hetlo hi ci in a gen tam simsim lai hi. Biakna pawlpi sung ah zongh sum neileh neilo pen a pau ngamzia uh kibang hetlo ci hi. Khuasung vanzuakna saite ah zongh saingakte in lei ding aa a upmawhte uh leh a upmawh phatlohte uh pen, a hopih dan kibanglo ci hi.

Pasian nasem sia khat, thau pian, hauh mel pian in zum ah hoihtak kihopih, a nasep ci aa a dot teh biakna sia a cih leh, a ho dan, a buaipih dan kidang lian ci zen sam hi. (tua siapa ngiat in, pulpit tung tektek pan a gen)

Hih te pen Zogam khantohna thu hilo aa Zomi khantohna thu a hihi. A gam bek hiloin, a mi zongh khantoh ding kisam a hihi. Hunkhat lai in, (sianggen lehang) Zomi i cih nop sung pan, sanggam Ngawn, Zo leh Sizang pen Tedim kici diak sung ah kideidanna lim om ngei kha hikha thei ding hi. (mawhsuut, thuumna, kilemna cihte bawl a kul leh bawl huai mahmah tawh kibang hi.)

Kideidanna om minam, guptuamna om sangkhan (classroom), kineu-ettuamna a omna pawlpi, kihazatna tamna khuasung, kilangpanna a tam kipawlna tuamtuam cih dan a tam lai siah, angsung khual, behpai, pawlpi pai, khuapai cihte tam kinken ding hi.

Lampi hoih i deih mah bangin, lamsii-kaan zongh i neih ding kisam aa,
makai hoih i lunggulh mah bangin, nungzui siam i hih ding zongh kul aa,
kipawlna tampi i neih mah bangin, ki panpah ding zongh thupi aa,
Pasian thu i up i theih mah bangin, i zuih i nuntak pih takpi ding zongh hoih aa,
mihing kicing cih bang omlo ahihmanin, ki telsiamna, ki maisakna, thapiak siamna cihte zongh kisam mahmah hi.

khangno leh khangual batna

Khangbat-na ( modernity) cih kammal in akhangkhangin mikim paaktat kammal khat ahi hi. Khangno kim zong khang kiban nuamtek ding hi. Hih bang tawh ei hanciam theih dan tekin khang ih bat na’ngin ki hanciam tek hi.
Tu hunah leitung bup omdan/ khawldan (global lifestyle) hong kideihin puansilh, annek te, Emo, Punk cihte in khangno te limkhat hong suak hi. Hih bang teng amitdong ulian te-in khangbat-na icih te tungah hong sinso pian uh hi
Athutakin khangbatna in atungtham ciangbek hilo in lungsim i ngaihsut theihna ciangbek hilo in tua sang’n thuk zaw leh kilawm hi.
Khangbat-na kantelna ( Research)
Harvard University pan Alex Nkeles le David Smith te makaih kantel pawlte muhkhiatna tea hi hi. 1974 kimpawl hi ding hi. Hih pawlte in akhangto-san gam ahi Argentina, Chile, India, Israel, Nigeria le Pakistan cih gamguk pan khangno 6000 valte tawh kimu in thudong uh hi. Tua nungah amuhte uh tungtawnin laibu khat hong suak hi. Khangbatna’ng ( Becoming Modern) ahi hi. Hih laibu ah khangban mi ( modern man) i ki ciaptehna te akhentelna uh lunglut huai hi.
Pilna tawh kizawl ( ki lawmta)
Khangban khat i amasa pen limin pilna tawh ki zawlhna ahi hi. Hih munah pilna icih in pilsinna ( education) bek hilo in theihpilna ( knowledge) cih nopna ahi hi. Adiakdiak in ama tunna khang (age) ah sunglut in kantel nopna( informed participant ) limgen uh hi. Veng, inn le sang cih ciangah hilo in theihna vantung azai thei penin keek nopna ‘pilna duhna’ acih nopna hih tuak hi.
Hih lim i lehlangh ( reflection) in amah le ama khang i kizopna ( contact with social changes) hi ding hi. Ei kuak sung bekah kha bangin taang ding ciangbek hilo in, pilna vang tawh leitungbup vaaksak ding ahi hi.
Tangtha khauhna (Personal Efficacy)
Anihna limin ciim/pil/ theibaih/ telbaihna ci uh hi. Hih munah tangtha (personal efficacy) limgen uh hi. Alamdangin hih lim i lehlangh ( reflection) agen ding uh teh tunai a thupiang tawm’ tawh khentat lo uh hi.Asun, azan in ahi hanhan khangnote tung thu khentat pah loh ding kha-m uh hi. Ahih hangin mawl milmelna ciangtawh bel khang kiban zolo ding hi, ci uh hi. Nidang aki gen , ‘ ahun atun the pianglel, thei lel ngel ve’ng’ cih tawh hong ki banglo hi.
Ngaihsut suakta
Mite zongsat muhna/ thute (paradigm) te omthei hi. Thupiangte ih et ciangin hih ih zongsatte pan ih kaakkhiat phot kul hi. Ngaihsut suaktatna ahi hi. Hih lim i lehlangh ( reflection) pen ama tatzia/ sepzia te ci hi. Pilna sinna ah sang teelna, kivakna ding nasep teelna, atawpna ah innkuanpih ding teelna ciangdong ah teel ding khatpeuh a-om ciangin suakta takin teel uh hi.
Akihong lungsim
‘Hih amaan hi’icihlian ciangin ngaihsutna dangte kikhak nelh pah hi. Tua ahih manin kong kikhak thumaante pan suakta nawnlo in tawntung thong bangin kiman’cip thuak uh hi. Adiakdiak in leitung pilna te ah amaan kilkel cihin dawlkhat khit dawlkhat ikah khit ciang bekin kitung hi. Tua ahih manin ‘aki hong lungsim’ pen ali-na lim in na ciamteh uh hi.
Hih ading lehlangh( reflection)in kikhelna ahi hi. Kikhelna te koici phuuk ding, kip takin len ding maw, khah lel ding. Anih in ih nolh kul hi ci hi. Neemtakin kikheldiam theihna ( flexibility) limgen hi.
Hih lim li-te in atunga thukanpawl te kantelna pan hong muhkhiat uh khangbat-na’ i thute ahi hi.
( Kyaw Win gelh ‘ Khangno le khangbatna: Ref- Becoming Modern’ pan)
Lungdam,
Thang Sian Sing

Laisimna i a hoihna

Laisimna in…
  1. Khuak siatna pan hong dal thei hi.
  2. Laisimna in lunggimna hong kiamsak thei hi. (Lungsim tawmvei apualam khuadak sakthei hi.)
  3. Thu ciaptehna hoihsak semsem hi.
  4. Nuntak dan ding hong hilh in i nuntakna hong picing sak thei hi.
  5. Thu hong ngaihsun sak thei hi. Thu khat peuh ah hong lunglut (Concentration)sak thei hi.
  6. Agik niai nuai ih pumpi tawmvei hong tangzang sak thei hi. Ih natnate hong nuamtuam sak thei hi.
  7. Lungkia in thanenna te hong damsak thei hi. Ahoihlo ngaihsutna te pan hong honkhia thei hi.
Nisim in laisim in. Na nuntakna ah lungnop daihna te nang tawh hong om khawm den tahen.


Peter Suumpi

Nung zuih theih pilna

(Pilna kaci liang hi. Siamna ciang hilo in, theih pilna ahi hi.)
‘Naupang in ulian/uham te’ Pa hi,’ cih laigual khat kamu ngei hi. Akhelpi khat-in katuat hi. Ka leh ngaihsut kik ciangin thupi kasa sem hi. Ulian khat pian na’ngin naupang’ hun nawk-loh phamawh hi. Suahtung’ akipan ‘ulian/uham’ in asuak omlo hi. Thu bulpi ih cih ding hi.

A ‘naupang’ ngeilo ‘ulian’
Ulian/ham khat alian-sa/ham-sa in mite lakah atung thak dingin ngiahsun ni. Amah in neu akipan ih sintoh an neek, puansilh dante thei ngeilo hi. Agol ngiangua hangin mi’tatzia in ta theilo hi. Ulian/ham i cih in akilamm toto ahi hi. Gamtat luheek ziate kisiam pah lo-in hun tampi la hi.
Mite tawh kizop theih na’ngin sintoh kul hi. Amasa in, naupang lai-in deih khatpeuh om-in ngah kei leh kappah, lungkimlo ngam pah, heh pah ngamin ama ngah ding ciangbek ngaihsun zo hi. Hong khangto in agol zawk deuh ciang mite’ mit-heek tawh kizui in hong gamta thei in, apicing’ ciang ahileh aman’ adeih hangin mikhatpeuh ading ahoih kei leh suplawh ngam zah ciangin hong khangto hi. A ‘naupang’ ngeilo ulian/ham khat ahih leh apumpi gol zong khuallo in hong naupang vai keei leh, apumpi golna (ama thahatna) zong mite’ nopneh ding pikhat hi ding hi.

Makai hoihte in nidangin nungzui hoihte nahi ngei uh hi.
Atunga gentehna mah bangin makai icih ulian/ham khatin tuma hunte ah nungzui (naupang) khat na hi ngei tawntung hi. Hiciang atun theih na’ngin makai hoih tampi te nungzui hoih khat nahi masa hi. Lai-at khatin, ‘Mipil khatin Sia kician khat nei tawntung hi,’ ci hi. Athu nengno ah zong hong kihilh kei leh ih sangsiam kei leh ih theihloh ding thu pawlkhat om hi. Makai khat pian na’ng kal khatna in nungzui hoih khat suakna ahi hi.

Kha Siangtho sathau nilhna (anointing) zong atungpan anuai ah
Unau bangin mite ki thutuakin  aom uh ciang bangzahin etlawm hiam. Siampi Aron lutung pan kibua in, akhaa ah luangin, angawng dung ah aluangsuk sathau tawh kibang hi. (Late 133)
Lai Siangtho sungah sathau in Kha Siangtho limpua in, Pasian’ mite khempeuhin Pasian kiangpan nakhat peuh asep dinguh ciangin sathau nilhna omlo in na mawksep lo uh hi. Hih munah ih gennop in sathau luan zia ahi hi. Atungpan kibua sathau in atung pan anuai lamkhat bekah luangsuk hi. Lehluan cih bang omlo in ki thutuak- na, ki thumanna lim ahi hi. Pasian’ nasep zia zong ici thei ding hi. Nungzuite’ ngaih ding thupha in makai te tungpan (sathau in lutung pan kibua) hi-in, lamkhat bek (leh luanlo) ahi hi. Makaite kicin/cinlohna in ama vai ahi hi.

Kithutuahna mun bekah Kha Siangtho in nasem thei hi.
Biakpiakna apia ding mikhat kiangah anungta Pasian abiakma-in, asanggam pa tawm kilemna abawl masa sak Pasian ahi hi. Kilemna/ ki thutuahna amu nuam Pasian ahi hi.Khat le nih ki thutuakin thungetna in vang nei hi ci hi. Mitam/ tamlo kaal lo in khat le nih ahih leh zong cise hi. Ki thutuakna i vangliatna ahi hi. Pasian nasep te ih muhno leh ki thutuak masak kul hi.

Pasian in ahun atungciangin makai dingin hong lamsang ding hi.
Makai khatin vantung mikhat bangin thaneemna nei kilkel lo ding cih theih na’ng zong omlo hi. Makai-te lehdo-na in nungzui khat peuhin amah le amah amakaipa sang’n pilzaw, siamzaw in akingaihsut ciangin piang thei hi. Makai khat sang’ in ih pilzaw, ih siamzaw zong’n eite vaipuakin makaite panpih ding ahi hi. Pasian’ phalna tawh makai khatin sia-in/apha zong’n hih dinmun atung ahi hi. Ih pilzawk, siamzawk leh lehdo hamtang ding lungpuakin ki sittel huai hi. ‘Angakzo mi in thupha ngah’ ci hi. Ahun atung’ ciangin nang hun tung peelmawh ding hi. Leitungin zong mihoih/ misaim te adding mun khat siit den hi.

Makaite’ tungpan sinthei ni! 
Makai ut nungzui khatin ih sep theih nalianpen in ‘ Ke’n ka makaih ciang’ ci-in makaite tungpan asia/ apha te muthei in sintheih na ahi hi. Stage tunga dingding mikhat in Stage nuai panin kigih kholh kul hi. Tua hileh bek Stage tungah ih mai miallo ding ahi hi. Asin thei te adingin naupang khat kiangpan ahi zongin, ahai pen khat kiangpan ahi zongin sintheih thu khatpeuh ki seel thei hi.
Nungzui siamni!
Eite’ kipawlna te ah makai hoih, nungzui hoihte tawh hong etlawm ding ih lunggulh hi. Ki thutuahna ah tha om hi. Ki thukhat theihna in pilna ahi hi. Khantohna ding zong kal masa hi ding hi. Ei muntekah siamtek ni.

Lungdam,
SING 

A tangcing thu ngaihsutzia

A tangcing thu ngaihsutzia
A tangcing ngaihsutna icih in aki thuap ngaihsutna (vertical thinking) le a tumdang/pheipai ngaihsutna (new think/lateral thinking) te akikop aa zat theihna (ahkl) khek kawikawi theihna ahi hi.
1967 kumin De Bono in “A tumdang thu ngaihsutzia (the use of lateral thinking)” cih laibu khat hong bawl khia hi. Tuahun aa kipanin ama ngaihsutna thu te in sumbawlna lam, leitung gamvai lam, nuntak khuasakna le pilna tuamtuamte ah kizel mahmah hi. De Bono ahih leh kum 15 aphak in university kah ta hi. Kum 21 ah doctorate dingin a pilna kicing mahmahta hi. Oxford le Cambridge sanginnpi te panin lukhunelkai 5 bang ngah hi.

image
A tumdang thu ngaihsutzia icih in ‘Ngaihsutna thak khat ngah na dingin a omsa/ i neihsa ngaihsutna, theihna te pan pusuah khiat theih nading hanciamna ahi hi.” ci hi.
Eite zat det ahi a kithuap ngaihsutna icih pen dum khat a thuk nading in a to suksuk tawh kibang hi. Mundang ah kikhinlo in tua dum bek mah toto lel hi. Kal khat khit kal khat ngaihsun hi. 
A tumdang ngaihsutzia ahih leh tua bang hilo hi. Dum khat pan dum khat ah kikhin hi. Thu khat tungah kip tak in ki ngalo hi. Lampi thak le kikhelna zong kawmin ki khin kawikawi hi.” ci’n De Bono in gen hi.

Gentehna (1)
Paupi le Sumtang 
Paupi pen kum 5 apha naupang khat ahi hi. Amah pen Austrilia ah a nulepa tawh om hi. Khat vei a lawmte in a khelbawl nop na un sumtang nih tel sak hi. Khat pen a tang gol Austrilia dollar pek 1tang le khat pen a tangneu dollar pek 2 tang ahi hi.
“Paupi, sumtang tegel ah nang koi tel ding? Na deih pen la inla tangsuak o”
Paupi in tua sumtang tegel hong en gige hi. Tua pan in a golzaw pek 1 tang hong tel hi. A nungsang ah a lawmte in zahpih in ciamnuih in gen uhi. Paupi pen ciimlo, teilo ci uhi. A tangneu pen a manphat zawk lam theilo hi ci uhi. A khelbawl nop sim un alawmte in Paupi sumtang tel sak thithe uhi. Paupi in lah a lak ngeisa a tanggol pek 1 tang mah tel den hi. Khat vei a ute khat in mu ahih manin Paupi hong sam in “Paupi aw ka gen hong um o. Sum tang a neuzaw pen a golzaw sangin a zahkhat bang aa manpha zaw ai maw. A gol zaw na tel pen khial teh” ci’n hong genpih hi.

Paupi in zong a upa deihsaknate hoihtak hong ngai hi. Tua khit ciangin
“He himah, ken zong theimah ingh. Ahih hang a manpha zaw a tangneu pen ka theihna bangin a tel hi zenzen leng amaute in hong telsak thithe nawnlo ding uh hiven.” ci in hong dawng hi.
Paupi ngaihsutzia pen tumdang diak hi. Ama ngaihsut zia in a dinmun uh (situation) ki lumlet sak hi. Amau le amau thei akisa a lawmte mihai suaksak hiau hi.

Gentehna (2)
Pata tegel le aalu lei
Khat vei putek khat in thonginn sung aa mat a thuak a tapa kiang ah hi bangin lai hi. “Ka ta aw thonginn sung ah na om zawh ka lungsim thanem mahmah inleh ka kum tam tawh bangmah zong semzo nawn keng. Tun aalu tuh hun hita mahleh i aalu lei kiak le lopa tawh khawhloh in om….”
A tapa’n zong a pa lai a sim khit ciangin lai khat hong at in a pa hong khakkik pah hi. A lai at na sungah “Pa aw, na patau kei in. Lo aa ka phum aksa vuite (bengvui) na zuak inla asem ding mi na cial in…” hong ci hi.
A zingciang in palikte a lo vuah aksavui zongin mun citeng to in thapai uhi. A tawpna ah bangmah mulo ahih man un ciahkik uhi.
Tua zawh a sawt lo in a pa kiang panin lai khat hong tungkik leuleu hi. “…Ka tapa aw, aalu na tuh thei ta ing…” cih ahi hi.
Thonginn sung pan in a lo uh kigal khawh theih lo hi. Mi cial ding cileh zong sum kicing neilo kha ding uhi. Ahizongin a ngaihsutna akhuak a zat theih na in hih buaina khat lemsak leuleu hi. Khat veivei ciangin i ngaihsutzia te suakta tak in daipua lam (out of the box) ah khah khiat ding kisam zel hi.
Gentehna (3)
Daipualam ngaihsutna (Thinking out of the box)
image
Tuma kum za tampi lai in ah, Italy gam khuaneu khat ah sumbawl khualzin khat sumbawlna ah tuahsia ahih manin khuasung aa sumhau pa tung a lohkik ding sum leibat tampi hong nei hi.
Sumhau pa pen putek, mel hoihlo meigong khat ahi hi. Sumbawl pa tanungak pen hoihsa in pakta hi. A kiciamsa uh ahi sumte lohkik ni ding hong tuntak ciangin sumhau pa in sumbawl pa kiang hibang in thu khat ong gen hi.
“Na tanu tawh nong kiteen sak leh nong leibat teng hong maisak ding. Nong kiteen sak kei aa leh na neihsa teng hong matsak ding” ci hi.
Ahih hangin sumhau pa in khuasung mite theih khat le zahtak khat ahih na tawh hibang a sep ding kilawm kisa lo hi.
Tua hi aa hibang in ngiankawi khat hong ngaihsun hi. “Hih na huansung aa suangpak tangkhat le suangvom tangkhat ka ip sungah koih ning in na tanu in tel hen. A zenzen in suangpak a lak khak leh na leibat teng hong maisak ning. Na tanu zong nangmah tawh om khawm ding hi. Ahih hangin a vom a lakkhak leh kei tawh kiteng ding hi. Sum leibat pen lohkik kullo ding hi. Hih kong cih dan na ut kei aa leh lah na neihsa teng hong matsak ding bek thamlo thonginn hong puak ding hi ingh” ci’n lungsim dik khat bangin hong pau hi.
Hi bang hun ah Sumhau pa cih bangin san ding lo siah a dang lampi omnawn lo hi.
Sumhau pa’n huan sung aa suangtang nih hong tawm in a ipsung ah hong guang hi. Hi mun ah sumhau pa zuautat hi. Sumhau pa in suangtang a vom tangnih a ipsung ah a guan lam nungaknu in mukha citciat hi.
Hui.. himun, hibang hun ah koi cih ding. (i.) “Suangtang vom tegel lak khia in sumhau pan hong khem sawm” cileh zong kingah ahih hang a leibat uh lohzo tuanlo ding.
(ii.) Suangtang tegel a vom ahih lam thei pipi aa sawk ding” in a pa thonginn taan nading pan hon khia ding ahih hanglah hibang mi tawh kiteng nuamlo zel.
(iii.) “Sawk vetlo ding” ci lelah a tuahkhak uh haksatna pen kiamtuam tuanlo ding le piangtheilo hizel.
Ama mailam nuntakna tawh kisai thu khat ahih manin nakpi tak in hong lung ngai hi. Tua panin Sumhau pa ip sung aa suangtang hong sawk hi. A khut sungah humcip in kawl-tuikhuk sung ah thakhat thu in hong lawnsuk hi.
“Nu! Na heh kei o.” hong ci seisai pong hi.
“Na sawk pen a vom hi ei. Ken thei ingh.” ci’n sumhau pa hong awngkhia hi.
“A vom cih ding hithei pah kei” – Sumbawl pa le a kim a om mihon te in ci ngeingai uhi.
Sumhau pa zong maisia tak in “tua leh khat vei sawk  pha kik leh hilo dia” hong ci hi.
Nungaknu in “Sawk phat ding kul sam ken cia. A cian lai suangtang pen enle hang kei sawkkhak pen kithei pah ding hiven” hong ci phei hi.
“Na ipsung aa a cian pen suangpak ahih leh kei sawk pen a vom hi ding. A cian pen a vom ahih leh kei sawk pen a kang hiding hi ven” hong ci lailai hi.
Sumhau pa’n a sumte lah ngahkik lo a lunggulh nungak nu lah ngahlo in a inn ah khutguak tawh hong ciah kik hi.
Hih thu in ahih leh a tumdang/a pheipai ngaihsutna (lateral thinking) ziale dan hong telgen mahmah hi. Nungaknu ngaihsutna in a pa’ haksatna, buaina pan honkhia zo bek thamlo amah zong suakta zo cih imu ding hi. A tumdang in a ngaihsun den mi khat in hi dan ngaihsutnate nei thei zel hi. Hih a tumdang ngaihsut dan neih theih nading in kisin ding kisam hi. Mite kivak ngaihsutna ahi a kithuap thu ngaihsutzia (vertical thinking) pen thupilo hi cih na hipah lo aa hidan a tumdang ngaihsutzia zong om hi cihnopna hi zaw hi.
Edward De Bono in khuak i ngaihsutzia, ngaihsutdan ah namnih na khenlai hi. Zomi ten kha mit icih/ lungsim theihna (perception) le theihna te a paizia (processing) te ahi hi. Hi tegel pen ki helh diamdiam/ki kan zingzeng hi. Tua hi aa mihing’ khuak pen computer tawh kibang lo hi.

Gentehna (1) aa Paupi thu en kik ding hileng, Computer khat hileh Paupi bangin ngaihsun het lo ding hi. Dollar pek 2 tang pen mah tel ding hi.
Tua hi aa hih Edward De Bono thu ngaihsutna ah lungsim theihna le theihna piazia (perception and processing) kikal aa aom kilamdanna pen a bulpi ahi hi.
Khat veivei ciangin ei mihing te in i khuak ngaihsuhzawh na pen i ciangtan thei hi. Dai kikai huang suk ciang bek ah ikhuak nasep na i neusek suk hi. Tua in i khuak pen computer khat hih theih nading a hanciam tawh kibang hi. Hih in bang hang hiam ci’n i ngaihsut tak ciangin eite pen a man/ahi bek i ut man ahi hi. Khialh ding i lau man ahizaw hi. A zenzen tuni aa man hi, khial hi nacih thute in a khial thei thute vive mah ahi lel hi. Hih thu te in kum, kha, ni kici hun hawlpi hong nawk khak ciangin damdam in hong ki hei thei hi.
Gtn. Tuma kum zalom 14 lai in Leitung in Ni kimkot hi cih thu athei le a genkhia Nicolas Copernicus pen zuau thu gen ci’n sih dan kipia hi. Ahi zongin tuhun ah Leitung in Ni kimkoh lo hi ci leng miten ahai aa hong kithei ding cih ahi hi.

Tua hi aa buaina, haksatna khat peuh ah dawnna (solution) khat bek hi thei denlo hi. Khuak ngaihsutna zaisak in, khahkhia leng buaina alem sak ngaihsutna te zong kingah thei hi cih ahi hi. Tua hi aa dai pua lam ah suakta tak le zai tak in ngaihsutzia khantoh nading hahkat ni.
(Pasian in leitung uk dingin mihing hong bawl ahi aa, mihing khuak in leitung ah seplah neilo hi. Hi khuak nasem dante ahih le a kikhel den leitung thu te ah kinga aa kong gelhkhiat ahi zaw hi.)

xxxxxx—–xxxxx
Lai-at; Nk Khanno
Ref; Lateral thinking by De Bono
Lateral thinking le khuak zalen na by Lutlat Eing (Kawllai)
Inspirational Short Story

Suahtaakna leh Pilvangna

Suahtaakna leh Pilvangna
===============
US (gam khangto sa te) leh Kawlgam, koi ah kisuaktazaw?
Kawlgam ah mawtaw cycle pen mi 3 mi 4 tuangin lukhu khu selo aa hatsak mahmah theihna mun tampi om in US ah ki ngah khollo kha ding hi. Kawlgam ah mawtaw tuankawm zatep, seat belt gaaklo in phone len kawmsa aa i hawl zong, US gam zah in buaina omlua lo kha ding hi. US ah bank card zat sim, phone location turn on sim, i zat hun, i zatna, koi mun ah cihte auto in theihsa hi pahpah aa, thukante'n a theih nop khat sulzuih ding baihin, kawlgam ah tua zah aa ong ki enciklo hi.
US ah cash in hand te thukhat, sumlut zah, sum neih zah theilua kisa in, tax pen ong dok ciatciat thei uh aa, golhguk kipia theilo lai in, kawlgam ah sumlut zah neihzah cihte ong encik lo baan vuah, niangtui man ci ziau leh vai tampi siang thei lai hi. Mawtaw i kawi sak ding khawng ciang, signal light lak selo in kawlgam ah a kihawl theihna mun tampi om aa US ah hi leh kawlgam sang' strict zaw veve ding hi.
(tua leh, hih gam te 2 koi suaktazaw?)
Cih nopna ah, suaktatna cih pen, a huampi in nam 2 om cih theih a hihi. kawlpau in, baung (ciangtan nei huang) sung ah suakta tak in om theihna, sep theih pau theihna cih leh, baung (ciangtan nei huang) a omlo suaktatna cih a hihi. Thukhun tawh kituak a hih naak leh suakta takin pau thei, gen thei sem thei, bawl thei in a hizong, thukhun pua a pial sat aa leh, thukhun tawh kizui in thu kikhen hi. Gtn. freedom of speech ci in, kisuakta sak aa mimal pilvangna (pin-ko a thih-sate) tawh a kikop kei aa leh, a suakta gam kici US ahizong, a suakta nailo gam kici, kawlgam a hizong, gam tampi ah tuabang dan mite in mat thuak veve uhhi. 
Facebook sung aa lai a post na hang bekbek in kiman pen mi tampi om khin cih IT news sim zelte'n thei tek ding hihang. Fb sunglo a pua lam ah zongh, a hang tuamtuam tawh a kiman tampi mah om lai ding hi.
Cihnopna ah  freedom cih pen, utbang aa pau, gen, sem, bawl theihna license hilo aa, liangko kikimna cih zongh, mihing khatciat nuntakzia, sumneih zah, zaliatna, thu neihna cihte kikim ding cihna hi tuanlo hi. Suahtaakna pen, mimal pilvangna (a thih-sate) tawh a kithuah kei aa leh, tua pen buaina piang thei aa zatkhialhna lam ah langkaaizaw hi. Tuahangin, pawlkhat bangin Kawlgam pen democracy tawh a mite kituak nailo hi ci-in a gen bang tampi om ngei hi.