Showing posts with label Article Development. Show all posts
Showing posts with label Article Development. Show all posts

Minam lapsangna pan Minam khantohna ah

Tan 10 results hangin a thanem huai tampi a om sam hang, a tha ngah huai tampite hangin Zomi te in khangthak siamsinte ki lungdam pih mahmah leh ki angtang pih mahmah tek cih pen kimu thei hi.
Hih mun ah, Zomi mimal kim khatciat in, a ma muntek ah na madawkin na gualzo peuh uh hileh, tua in minam lamsang khin zo hita hi.
Gtn. lasa te ong minthang semsem in, laisinte pilna sangpipi nei aa, sumbawlte sumhau minthang in ong om aa, zum nasemte zalianpipi in ong om uh leh, tua in minam min ngaihsak, a minam vangpia in, minthang sak, minhoih sakin minam lamsang hi.
Hih pen Minam lapsangna ciang hi aa, a mipihte in lungdam leh angtan pih cihciang bek hipan in, minam khantohna hi nailo hi.
Minam lapsangna cih tan ciang zongh hoih mahmah khin aa, hakai pahtaak lungheng cihdan hilo in,minam min a lamsang hih a madawk teng mah in, minam khantohna ding thasial hetlo aa ong sepkhiat uh ciang, minam khantohna om zo pan ding a hihi.
Zomite in minam lamsang baan ah, minam a khantohna ding,
1. Mimal kim in i sepna i omna ciatciat ah a gualzo a madawk i hihkim tek ding thupi hi. (hitan ciang pen minam lapsangna)
2. I gualzawh, i nopsak ciang, gam leh minam mangngilh loh aa, i muanpen zongh galsuak thei cih i lehbat khakloh ding kisam hi. (hitan ciang pen mimal nopsak, khantohna)
3. Hih bang in mimal kim khatciat, a mau muntek pan a hih theihna tek uh ong kigawmkhawm thei, ong kilemtuah in ong ki khuituah zo hi leh, minam aa dingin a bukim khantohna om in ong phungcing zo semsem ding a hihi. (hipen minam khantohna)
Zomi ulian, mipil, sumhau a tamzaw te pen hih numbat 2 na ciangtan ta ah lungkim kha pahpah uh tawh kibang pian mawk hi.
Tua a hihman in, kei sangkah hi nawnkei ing, kei minam nasem hikei ing, kei sum thalawh nasem bek hita ing cilo in, i sepna peuhpeuh ah Zomi te aw, hanciam in mainawt aa a khangto kim ciat hih sawm tek ni.

Zogam khantohna leh Zomite khantohlohna

Zogam khantohna ding a kigen ciang, lampi puahthak ding, gunlei lamthak ding, kumpi zuminn lamthak ding, mei hoih tui hoih ding, sanginn hoih ding cihte vive kigen in, tua pen Zogam khantoh nading thu hi aa Zomite khantohna thu higai khinlo hi.

Gamdang pan Zogam a va ciah pak pawlkhat tawh ka kiho khakna tungtawnpan a hizong, Zogam, Kawlgam pan gamdang a paite ii thugennate tungtawn pan a hizongin, ka phawk khak thu khat in, 

Khantohna i gen ciang, i mitkha leh i ngaihsutnate ah inn sangpipi, mawtaw tampipi, cihte kimu masa, kiphawk masa kha thei hi.

A diakin Tedim pen sumhau tam mahmah ta, inn hoih kilamthak ziahziah, mawtaw hoihnono a nei tampi om mawtaw cycle bel genvetloh cih ding dinmun kitungta in a khangto tawh kibang hi.

Lamkhat pan, lamsii-kaan ki neimello a ci zong om kieukieu lai hi. Tua sang' a suukzaw thamtham khat pen, mihing kideidanna lian mahmah lai cih thu a hihi.

Kumpi zumte ah va pai lehang, sum neileh neilo pen ong don dan, ong kinbawl pih dan kibang hetlo hi ci in a gen tam simsim lai hi. Biakna pawlpi sung ah zongh sum neileh neilo pen a pau ngamzia uh kibang hetlo ci hi. Khuasung vanzuakna saite ah zongh saingakte in lei ding aa a upmawhte uh leh a upmawh phatlohte uh pen, a hopih dan kibanglo ci hi.

Pasian nasem sia khat, thau pian, hauh mel pian in zum ah hoihtak kihopih, a nasep ci aa a dot teh biakna sia a cih leh, a ho dan, a buaipih dan kidang lian ci zen sam hi. (tua siapa ngiat in, pulpit tung tektek pan a gen)

Hih te pen Zogam khantohna thu hilo aa Zomi khantohna thu a hihi. A gam bek hiloin, a mi zongh khantoh ding kisam a hihi. Hunkhat lai in, (sianggen lehang) Zomi i cih nop sung pan, sanggam Ngawn, Zo leh Sizang pen Tedim kici diak sung ah kideidanna lim om ngei kha hikha thei ding hi. (mawhsuut, thuumna, kilemna cihte bawl a kul leh bawl huai mahmah tawh kibang hi.)

Kideidanna om minam, guptuamna om sangkhan (classroom), kineu-ettuamna a omna pawlpi, kihazatna tamna khuasung, kilangpanna a tam kipawlna tuamtuam cih dan a tam lai siah, angsung khual, behpai, pawlpi pai, khuapai cihte tam kinken ding hi.

Lampi hoih i deih mah bangin, lamsii-kaan zongh i neih ding kisam aa,
makai hoih i lunggulh mah bangin, nungzui siam i hih ding zongh kul aa,
kipawlna tampi i neih mah bangin, ki panpah ding zongh thupi aa,
Pasian thu i up i theih mah bangin, i zuih i nuntak pih takpi ding zongh hoih aa,
mihing kicing cih bang omlo ahihmanin, ki telsiamna, ki maisakna, thapiak siamna cihte zongh kisam mahmah hi.

Zomi Government Structure leh Tax System

- Ciau na ngawn aa om Zomi Innkuan, Leitungbup ah Zomi Innkuan Kipawlna pen, mun 100 val ah om kha ding hi. (Pawlkhat te a gam zui, pawlkhat te a khua zui, pawlkhat te state zui)
= hih teng kigawmtuah na LZI Leitungbup Zomi Innkuan in khawmpi ong nei zo leh
- Zomi Siamsin Kipawlna, India lam leh Myanmar lam teng kigawm in Khawmpi ong nei khawm zo uh leh (Zomi Siamsin Kipawlna India lam aa te cih thadah, Myanmar sung bek zongh hat mahmah khin sa ing, khua tampitak ah om khin uhin thupi hi.)
- ZYA te zongh Kawlgam sung ah khua 50 val tham ah om uh a hihman in, hih teng kigawm in Khawmpi ong bawl zo gaip mengmegn uh leh ngaklah mahmah ing.
* Hih khawmpi bawl ciang, namdang kipawlna te zongh sam/invite in, a mau tawh hun saupi aa ding network khat in khut kilen khawm suak pah ding.
* Kawlgam Media liante hoihtak in lungkim sak in, Zomite dinmun a thahat mahmah i hihlam kilangkhia sak ding.
Namdangte in Zomi ong langpan leh tua pen phamawh deklo aa Zomi veve khat in Zomi ong taihtaih leh, tua pen, a tal tawh inn kawmzawl a phuphu bang ding hi. Hih Inn sung ah om aa, a sung aa a hoih ding aa kizem TV, Table, Tutna te a taihtaih mihai khat tawh kilamdanglo ding hi.
Zomi Siamsinte in tua khawmpi pan Zomi Students Union cih tawh ong ding khia zo uh henla, Tua ZSU nuai ah University sang naupangte Siamsin min tawh department khat in om in, Laisiangtho sang naupangte department min dang khat tawh om in, Sang tuamtuam pan a man te Alumni min tuamtuam tawh om in, a vek aa tua ZSU min nuai ah kigawm khawm thei uh leh.
ZYA in zongh tua khawmpi pan Zomi Youth Union cih tawh ong ding khia zo uh henla, Tua ZYU nuai ah, ZYA a hi sese lo, khangno kipawlna tuamtuam a lut nuam bangbang kilut thei hen aa ZYU min nuai ah kigawmtuah thei uh leh. Bg hg hiam cih leh a kipawlna min uh lah khel nuamlo, kipawlkhop kipumkhat ding lah lunggulh i hihmanin, Union min nuai ah ei kipawlna tek tawh kilutkhawm in kigawmtuah thei leng.
Tua hi leh Zomite in Youth Union leh Students Union kinei ding hi.
Azom ah Zomi Women Union om in, pawlpi pan, veng pan, khua pan nupi kipawlna teng tuah kigawm tuah leh. Union 3 pha ta.
(Nasep ding: Zomi Numeite lapsang, khutsiamna leh a tuamtuam na hoih hilhna sepna nei ding)
Tua bek thamlo in, Zomi Religion Union ci in, Christian min pua saklo aa, tua ZRU nuai ah, Zomi biakna kipawlna tuamtuamte (Laipian dongin) kigawmkhawm thei leh. Union 4 pha ta.
(Nasep ding: Biakna suaktat lohna te phu khia ding, Singlamteh kiphuk, Biakinn hon ding kiphallo, Biakna simmawh thuak khakna te encik ding)
Myanmar gambup aa om, Zomi kumpi nasem teng kipawlna khat zongh nei thei lai uh leh lunggulh huai hi. Tua teng kizopna khat om in, kei nasepna lam nasep awng, kisiau theih cih bang a om sim, manlangtak in thu kizakna nei thei aa, Zomi nasep deihte mah i ki guan samsam theih ding ong vaihawm thei uh leh. (Hih pen Labor Union lian cih theih lam omlo in, Public Service Union / Employees Union khat)
Tua khit ciang, Zolai tawh kisai kipawlna tuamtuam te zongh, a mau min tek mah tawh om ding, a hih hg' Zomi Education Union -ZEU cih min nuai ah ong kigawm khawm thei uh leh.
Zomi Media kipawlna: Media kipawlna cih ciang, thusuaksak ding, thuthak tangko ding cih bek hilo in, media etcik nasep zong neih huai hi. Media dang tampite in thumanlo/deihkah in Zomite thu bangci gen uh hiam cih te pawl, statement khah a kul leh khah ding. Tua baan ah, namdang a tuahsia te, namdangte makai sihna natna a om ciang, media pan in dahpihna tangko in, namdangte tawh picin suahtak in kalsuan huai mahmah ta hi.
ZYU, ZSU, ZWU, ZRU, LZI, ZEU, Media te leh Kumpi nasem kipawlna teng (ahunzui in a kisam bangbang) Zomi Council nuai ah kigawm tawh sawn thei leh hoih mahmah dingin ka um hi.
Hih mun ah Zomi Council aa panmun ngah zo dingte pen, a sung aa Union khat teitei ah panmun a len ngeisa te bek ding.
Tua Union aa panmun len dingte pen, tua sung aa kipawlna ah makai ngeite bek hi ding.
Tua hileh, panmun mawk deihna peuhtawh, tanau hauhna sum hauhna cihte peuh ciang tawh panmun ki ngah zolo pah ding aa, makai a sem ciatciat ngei, a hunhun in mapang toto sa te bek in panmun ngah toto ding uhhi.
Tun Siamsin makai ci, sangkah nawnkei leh bang siksan ding cih a thei mello zongh ki om hi. Tua a hihman in, hih lampi ki khungto diudeu thei hi leh, ZSU pan a man ciang, ZYU ah tung to ding hi. ZYU khit teh, ZRU lam maw ZEU lam maw banglam ah cih telthei lai ding aa, kumtam picin hun ciang Zomi Council ah tut hun tawh ong kituak to ding hi. Note: Advisor/consultant bel, a kul bangbang in seh theih huai hi.
Tua bang hi leh, kipawlna ki mawk phuat phuat cihte zongh om tawm tuam ding aa, om leh leh thahat nawnlo ding hi. Gamdang pan aa te in zongh, hih kipawlna teng mah tawh khut kilen in, mapang hi peuh leh thahat in awkhat lawngkhat in kiging khawm thei ding hi.
Atawpna ah, Zomi Council tawh GZA leh a hunhun aa Zogam MP a ngah peuhpauh teng tawh, hih 3 pen USA government structure dan in genteh lehang
Congress= Zomi Council
Supreme Court= GZA
President Department= Zogam sung Election zo peuhpeuh
Hih bangin, Zomite minampi i hihna khat zui in, Official takin kilamthak aa hizelzul lo in, i om zawh ding ka lunggulh mahmah hi.
Kipawlna tuamtuam Union nuai ah a lut nuam peuh lut thei ding. Union nuai ah lutlo in,
Mipi lampan, GZA leh Zogam MPs te tawh kizop nasep mapan nop leh hih Zomi Council tungtawn pan hi ding. Hih laibup ah ka genloh khat om aa, tua pen GZA panmun kitel dan ding genlo hing.
Zomi tax: Kipawlna te ah Member te in tua kipawlna ah Member fees pia tangtang ding, Tua kipawlna te Union nuai ah a lut ciang, Union tung ah member fees pia tangtang ding. Tua Union in Council tung ah member fees pia tangtang ding. Tua Council ii ngah pen GZA, ZC leh MPs te in, ong manage ding uh. Emergency ciang bek aa sum kidong bapbap cihte, sep ding khat om ciang bek aa Fund kizong cihte hilo in, khasum aa member fees te om den aa, a kul bangin zeek, metbawl ding hi hoih mahmah hi. (Union ah member fees na ngawn a pia zolo, a pia nuamlo te in, kipawlna khawng phuatloh ding mah hoihzaw pah ding hi. Phuan teitei in Union tawh Council tawh kizom tuankei leh, Zomibup Level in thahat zo ngeilo pah ding hi. Tax ginat lohna gamte a tamzaw zawng pah uhhi.) Ei omna gam ah piak ding, ei sepna gam ah piak ding himah ta leh, i omomna pan Zomite i dinmun in hibang in ong kal a hihlam kiphawk tek huai hi.
Genleng bel baih mah hiven, ....&^*%$"
Hih pen, makaipi leh kipawlna piteng ong kisatsuah ngeingai uh leh a piangthei lua ding thu hi in ka um hi.
Kipawlna phuan thakthak a omsa teng zongh,.....&^*%$"
Tua a omsa kipawlna teng a khuituah ding leh kipawlna thupilote bei aa, kipawlna thak phuat ding baihsak ziauhziauh nawnlohna ding hih, hih bang dan system kisam hi. Dongtuah ciang bek aa, mapang khawm hilo in, Zomi cih a om lai teng mapang khawm thei dingin, tung Sianmang in Zomite ong siamta hen aw...
Ldam mahmah ei (Ngaihsutna kibat pihlohte picinna tawh kitelsiam ni.)
INNPI

Kum zui-in ki nungphawk leh kisik theih thu pawlkhat


Kum 30s+ khit ciang aa pawlkhat ii kisik thu tawm
1. Sum khollo kha (Van hoih deihlua kha, a lim bekbek duhlua kha, cbd...)
2. Hun mawk bei sak kha (A thupilo tam tawh buailua kha, cbd...)
3. Tenpih hetloh ding khat peuh (pawlkhat peuh) tawh buaibuai kha (Ut tawh utloh tawh, thupi tawh thupilo tawh hunbei aa vakkhawm, chatting, cbd...)
4. Pilna sang' nasep thupi simzaw kha (Tu leh tu aa ding tanciang bek ngaihsut aa neilua kha, cbd...)
5. A omna namdangte pau siam sawmlo kha (Pau namdang a thupi lua theih cian mel neilo kha)
+


Kum 40s+ khit ciang aa pawkhat ii kiphawk thu tawm
1. Kum 30 kiim a phak lai aa kum tam a kisak luat khak pen a tamloh lam phawk, tun lah 40 hita
2. Hun hoih, hun manpha tampi (khantohna ding) a khahsuah lam kinung phawk
3. Na khat peuhpeuh a hih ding ziakai kisa ta
4. Amah leh amah a kiupmawh zah in mi te'n a na awlmawh luatloh lam kiphawk
5. Vaanpi mualpi dongin ngaihsun nuam nawnlo aa, Innkuan sung ciang bulphuh in a thak aa kilam pha nuam
+



Kum 50s+
1. Mi tung thupha a na bawl khak hetloh lam kiphawk
2. Deihsakna lungsim nei semsem
3. A pumpi kikep siamloh teng kisik (gtn. kawng, mit, ha, cbd...)
4. Na khatpeuhpeuh deih teltalna lungsim beizaw deuh
5. A lungnop theihtheihna ding mah ngaihsut in nei bel
+

Tua ahih manin, na hoih khat peuhpeuh kipat ding ziakai kisa kha kei in.

Kei zongh kum 30 pha nai samkei ing in,
article pawlkhat pan in kong gawmtuah hi.
Hih kumzah i phak ma in, mite kisik thute theikhol hi lehang
hun khatciang ki nung siklohna dingin, 
i sep kholh theihte semin, i pelh kholh theihte pelh ding, 
kidop kulte i kidop theihna ding deihsakna tawh hi.



Ldam
Innpi

Zomite Ziakai/ minung/ minuai ah omlam a kitheilo maw a awlmawhlo

Zomi tangpi a tamzaw in innlam thu, Zomi thu a lui a thak a tuamtuam mah kilunglut leh kithei nuam pen veve hi. Zongh lah theih ding, ki hopsawn ding a thupi a hihi.

Ei tawh kisai khollo, zak ngei mellohna mun khat khawng aa nupa kithat thu cihte peuh khawng sangin, Zomi tawh ki nahvawh a hih kei leh theihna ong khangsak knowledge tuamtuam cihte mah thupizaw veve hi. Mipi in, media or news post te ii share bangbang beh a sim uh dinmun ciang ah om lai a hihman in,  mipi aa ding phattuam pih leh minam itna khangsak, mitkeuh sak, theihna kibehlapsak thute mah, mipi aa dingin lim post huai pen hi.

Zomi te news lam manlang mahmah tawh a kibat pong sam hang,
Zomi informer tampi kisam lai hihang.
Official suah aa news/aritcles ki post cih dan a om nai mello cih theih lai phial dinmun ah Zomi media te kiom lai hi.
Namdangte in ong sim sak ding uh media gina a kician zongh om nailo cileng kikhiallo maitak ding hi.

I dinmun kiphawk kik zelna ding leh Zomite ei leh ei a hi kisa pahpahlo aa muhna zai-in, gualtung i tuang zo pah keizong, namdangte tawh liangko kikim in i taizawhna ding ciang beek vision neihhuai mahmah ta hi.

Sanggam Falam Khalkha Mizo Khumi te in, Kawllai, Mikanglai leh a mau lai tawh tampi nei uh aa, video news (TV) zongh 2 sang' a tamzaw neikim dimdiam uhhi.
Tuabek thamlo, Human Rights tawh kisai ngiat kipawlna kician nei baan ah, English version in kiciantak aa nei uh aa, thu leh la kholna, kepcingna in zongh nei uhhi. Hih tungtawn in, BBC manghun na ngawn ah, interview kibawl liang a hihi.
Zomite pen Zomi cih tentan pong bek mah kihi lai aa, a bangbang a bangbang ah ki tualniam leh kiziakai zaw lai lua mahmah hi. Tapkual pan tatkheh zawh ding kisam hi.

Zomi Kipawlna: UN ECOSOC Lutna thu

Thumapi: United Nations Economic and Social Council (UN ECOSOC) sung ah Zomi Innkuan Kipawlna in July 14, 2014 ni in Non-Governmental Organization (NGO), Civil Society khat hihna toh“Consultative Status” dinmun ngahta ahihman in Leitung buppi huap a Zomi khempeuh sunglaitang mahmah in UN Khawmpi tuamtuam ah tatsat lou in UN Daan toh kituak in kum li (4) sung Palai sawlthei gige diing ahita hi. Kum li (4) abeichiang a, Zomi Innkuan USA in UNO ah ‘Activities Report’ apelut diing a, hiai kum li hunsung a anasep silbawlte lungtunhuai ahihleh kum li (4) dang ‘Consultative Status’dinmun pen behlap zel diing ahi hi.

August 1, 2014 ni a Executive Committee Press Released, Official thusuak; Pa Go Sawm Khup, President, Zomi Innkuan USA, Pa Do Khan Khup, General Secretary, Zomi Innkuan USA akipan “Thupulakna” abawl uh dungzui in “UN Conference” tuamtuam ah kumteng in kihelsuak theiden diing chihna hita hi. UN Main Bodies nga om hi: (1) General Assembly, (2) Security Council, (3) Economic and Social Council, (4) Trusteeship Council, & (5) International Court of Justice ahi hi. Tuate lak a khat, “Economic and Social Council” sung ah Issues tuamtuam genkhawm diing a Khawmpi ah Zomi Innkuan USA in Palai sawl in tangtak a thukup bawlthei diing in dinmun saang huntawk, “Consultative Status” angah ahita hi: (1) Indigenous Issues & (2) Civil Society Issuestuamtuam gelkhawm diing leh thukup bawltheihna dinmun, Observer lel hi lou in, ‘Consultative Status’ dinmun ngah in kihelthei vek diing hi.

UN ECOSOC sung ah United Nations Peoples’ Forum on Indigenous Issues (UNPFII) kichi zong om hi. Hiai pen ahihleh Indigenous Issues toh kisai liuliau genkhawmna Forum ahihman in Issues dangte ah ngaihdan kuptheihna hun ngah lou in ‘Observer’ hihna toh UN Khawmpi siim thei lel diing chihna ahi. UNPFII nuai ah ZORO in Member hihna angah akipan tunitan UN Conference ah Palai kumteng a sawl in ana kiheltou nilouh uhi. Himahleh, tunitan in “Consultative Status” dinmun bel ngah zou nai lou hi.

Zomi Innkuan USA Kipawlna pen US gamsung a om Zomi taangpi-taangtate, khua-le-tui ‘Community Organization’ khat hi a; 2005 kum a kiphut ahi hi. Kum 2009 in USA Sorkar theihpihna ngah in kipawlna piching khat a chiamteh in om hi. Kum 2010 in UN ECOSOC nuai ah Civil Society khat hihna toh ‘Observer Status’ dinmun ana ngah hi. ‘Consultative Status’ a ngahtheihna diing in kum 2012 a Zomi Innkuan USA in Kumsim Khawmpi aneihna ah makaipite leh mipite’n hanchiam diing in khensatna leh thupukna aneih uh dungzui in kalsuan touden uhi. United Nations E/2014/32 (Part II) Economic and Social Council thusuak: Report of the Committee on Non-Governmental Organization on its 2014 Resumed Session, (New York, 19 – 28, May and 06, June 2014) laimai peek 10 & 40-na ah “Consultative Status” dinmun angahna agelhthoh in, Zomi Innkuan USA min zong tuang velvol maimah hi. Ref: https://groups.google.com/forum/#!forum/zomi-innkuan-okc UN Conference ah Zomi Makaite Kihel:
A 65th veina UN DPI/NGO Conference pen UN Headquarters, Trusteeship Council Chamber (Conference Building), New York, USA ah August 27 – 29, 2014 ni thum sung Khawmpi neih in om a, gam 117, NGO 900 pan Tangmi (Representative) 4,000 val, kihelthei uhi. Tua sung ah Zomi Innkuan USA zong Civil Society khat ahih toh kiton in UN ECOSOC Consultative Status dinmun ngah ahihna toh Taangmi (Representative) diing in Pu Go Sawm Khup, President, ZIUSA; Pu Do Khan Khup, Gen. Secy., ZIUSA; Rev. Pau Khan Khai, Exe. Committee sung pan makai avek a gawm in palai 30 vel kihelthei uhi. Tua baan ah, Kawlgam akipan Pu Gin Kam Lian, Gen. Secy., Zomi Congress for Democracy; Siamah Esther Cingsan zong va kihelthei uh chih thu kiza hi.
Hiai, UN DPI/NGO Conference ah Mr. Ban Ki-Moon, UN General Secretary in Middle East lam a akhualzin laitak ahihman in, Video message pan khawmpi honna leh vaidawnna nei a, H. E. Mr. John W. Ashe, President of the 68th session of the General Assembly in zong thugenna hun sau lou nei hi. Tua baan ah, Ms. Samantha Power (Permanent Representative of the United States of America to the United Nations) in zong tutung Meeting a kihel NGO bangzah pha chihte leh lungdam thu tuamtuam pulakna nei hi. Tutung UN DPI/UNO Conference ah “2015 and Beyond” chih thubulphuh a nei in, hong tung diing, kum 2015 akipan leitung Khua-hun Kikhelna (Climate Change) bangchi kep diing, chihte leh zawnna (Proverty) bangci kiamsak diing, Mihing suahtakna ahihke’h zalenna (Human Rights) chih thute kikuppi in nei uhi.

Tua ahihman in tutung UN DPI/UNO Meeting ah Zomite zong UN ah thu kuppih (Consultative) khat hihna angah toh kiton in, tangmi (Representative) khat in kihelthei  taktakta ahihman in, mai lam Zogam leh Zomite maban puah leh zuun zia diing muhna leh hanchiamna thak kineithei semsem diing chih lametna toh thungetna hisak chiat le’ng deihhuai petmah hi. Abeisa hunte ah Zomite UN Khawmpi ah vakihel thei chih gen louh UN Zumpi nangawn amu kha lou mi-nam i hi a, tu petpet in ahihleh Pasian in namdangte toh kikim in hong lamtouta ahihman in Toupa min kiphat semsemta hen... Toupa aw, Zomite hong makaih in!  ( Ref: UN Live Webcast & Pu Do Khan Khup... Source: Translated by Tongsan Media Group)

Thukhupna:
Leitung buppi huap a Zomi Kipawlna tuamtuam hunkhop om ahihna ah, mailam hun ah Zomi Innkuan USA malakna thupi leh chiamteh thamching ahihna ah, India leh Myanmar gamsung a Zomi Kipawlna min tuamtuam ana om mahleh, a mi pen kibang, Zomi ngen kihi ahihman in mapangkhawm a, kalsuan zia ah pilvangtak a Zosuante in tuibang gawmna diing gelsiam kiphamoh mahmah diing in uphuai hi.
India State tuamtuam a om Zomi, Kuki, Hmar; Myanmar a om Zomi, Chin & Kachin; Mizoram a om Hmar, Mizo, Zomi, pau-le-ham tuamtuam azang mi kikhat, Nam khat (One Nation, i.e., Zo Nation) chihte tengteng Zomi hi vek, Zo suan-le-khaakte kihi vek mai chih pen pomsiam kiphamoh mahmah hi. UN Conference a palai kuamahpeuh, Zomi Innkuan USA hi in ZoRO hitaleh, mi tuamtuam in UN Khawmpi hun a thusun neih chiang a, customs & culture kibang, pu-pa tawndan kikhat anei Nam hihna phawk kawm a, unau hihna mangngilh mai lou a, Nam Khat hihna tawisang a mailam hun a nasep-silbawl kong tuamtuam ah “Issue Based” a paikhawm kiphamoh petmah ahihlam phawk gige a, makaipi, palai khat peuhpeuh in mailam saupi muhkholhna toh mipite lung-gulh suahtakna leh UN Declaration, 2007 dungzui a mahni deihtelna neithei diing tandong a kalsuan kisam tawntung diing ahi chih chiamteh tinten hoih mahmah diing hi.

Neek-le-dawn, khosakna toh kisai Zomite kiniam lawlai ahihman in, Socio-Economic Development puahphat kisam mahmah hi. Tua ahihman in, mailam hun ah Zomi Innkuan USA in Leitung buppi huap a Zomite a diing a mohpuakna saangtak nei ahihlam kiphawkden a UN ECOSOC sung a “Consultative Status” dinmun angah pen zat phattuamdan kizilsiam mahmah kul-le-poimoh masa hi peuhmah di’n uphuai hi. USA a om, Zomite baan ah India leh Myanmar gamsung a om, apawpawt zou lou Zomite makaipi dinmun luahtute: Zomi Innkuan USA zahna leh pahtawina i piak toh kiton in lungpi geel a, dinmun niam leh neektaak zonna a haksa diak mi tampitak om lai ahihman in apilpi a khanletna leh masawnna thupitak ahong piankhiat theihna diing in mabang pangkhawm chiat in, mailam hun a kalsuan zia ah kipumkhatna toh Zomi mainawt chi in kihanchiam chiat le’ng i chi ahi. 

By: Dr. R. Sanga (Imphal, India) via Tongsan

Chin State uliante'n banghangin laihawmna tuamtuam khaktan

Chin State kumpi in Hakha Post akhawlsak khit ciangin Falam Post zong khawlsak a, tua ciangin Tedim Post zong khawlsak leuleu ahih manin mipite sungah lamdang sak mahmahna khangsak hi. U Go Suan Khai, Tedim Khuapi Uk Ahuhpa tung pan October 16, 2014 nimit tawh Tedim Post in Registration om lopi-in lai hawm loh ding thu hong kipia ahi hi. Tua hun akipan Tedim Post kihawm nawn lo hi.


State leh Division dangte ah laihawm vai registration tawh buaina om het lo napi bang hangin Chin State kumpi buai tuam se hi ding hiam?
Democracy ki-ukna akisin cil Myanmar adingin nisim thukizakna pen khantohna ding leh gam kip nadingin akisam pha mahmah thu ahi hi. Tua ahih leh bang hangin khantoh nading hi bang nasep hoihte Chin State kumpi in khak tan hi ding hiam? U Thein Sein Kumpi in ip sim seel sim om lo ding, nasepna khat peuhpeuh mipi in apailetin mu thei ding… cici napi bang hangin Chin State kumpi in thukizakna news om sunsunte khawlsak hi ding hiam, cih pen lunglut huai mahmah hi.

Myanmar sungah tulaitakin official language dingin Kawl kam kizang a, ahi zongin Kawl kam azang lo mualtung mite’ lai leh ngeina zong kumpi in amanthan loh nadingin kep cing ding leh phungvuh ding pen pi ngaihsut mahmah hi. Hakha Post, Falam Post leh Tedim Post te pen tualsuak mite’ lai tawh akihawm news ahi uh hi. Chin State kumpi budget ah hel a, kumpi in hawm khiat ding kilawm mahmah zaw phial hi napi mipite in amau’ hanciamna tawh ahawm uh hi bang nasep hoih pen kumpi hoih ahih uh leh bang hangin hong khak tan hi ding hiam?
Dictator-te gam ukna sungah mipi in thu atheih ding uh kumpite lau mahmah uh a, lai pil lai siam om se kei leh phamawh sa lo uh hi. Kuaman lai gelh se kei hen la kuaman lai sim kei leh nuam mahmah uh hi. Aneksim atak sim teng uh, thuman lopi a asep abawlna teng uh leh mizawng daipamte’ manphatna leh hamphat nading a suhsak teng uh akidawk ding ut lo uh ahih manin kumpi hoih lote in mipte’ mit avak sak ding thukizakna a deih lo uh ahi hi. Chin State kumpi pen tua bang hi ding hiam, cih ciangin tua bang hi dingin up huai sam lo hi. Banghang hiam cih leh Chin State kumpite pen Chin State sunga piang leh khangkhia mite mah ahi uh hi. Tungsiah in khawl ding agen leh zong akhawl loh nadingin tungsiah anawt dingte hi zaw uh hi.

A diakdiakin Tedim Post akihawm cil ding lai-in Information and Public Relation lamah registration tawh kisai kam tawh ahi a, lai tawh ahi zongin a kingen mah hi a, piak leh piak loh bangmah hong gen lo uh hi. Registration kingah nai ta kei leh lung muang takin kihawm toto a, hawm 13 dong kihawm khin zo hi. Mipi’ tung pan sum kila lo, kizuak lo a, thukhual mipite’ piaksa tawh 2014 sung akikalsuan sawm ahi hi. Tedim Post in mipite’ nisim nuntak khuasakna a thupiangte leh mipi in theih ding a kilawm khantoh nading kumpi’ nasepnate akibulphuh den hi a, kumpi thanemna lam kigelh ngei lo hi. Kumpi’ thanemna thuman akigelh leh zong zadah lo a akipuah phat ding uh hi zaw lai hi. Tua pen democracy gam kumpi hoihte’ zia ahi hi.

Myanmar Thukhunpi sungah gam mite in thukhun bangin lai leh ngeinate suakta takin puah thei, zun thei-in khangliansak thei ahi hi. Tua ahih manin mawhna om lo leh thukhun palsat hi, cihna ding bangmah malmat ding om lo napi registration neih loh man tawh Chin State kumpi in hi bang a mipi’ media nasepna a khawlsak mawk pen mailam adingin adah huai mahmah nasepna khat ahi hi.
By Thang Van Lian, Editor of the Tedim Post

2013-2014 Myanmar Event Review (Kawlgam dinmun etkikna)

( Kawlgam vai alunglut akuamapeuh adingin ngaihsut ding le noptuamna khat teitei om ding cih lametna tawh, Myanma tandaw Senh journal Lom 2, Hawm 52 le The WAVES magazine 1/2014 sunga “Kawlgam thupiang tangthu kantel mipil khat” cih min tawh Kawlgam gamvai thupiang Report ( 2013 kum ) Thului pen ong let khia ing ).

Kawlgam gamvai thupiang report ( 2013 kum )
2013 kum sung kawlgam gamvai thupiangte ahuampi in en kik hileng ngaihsut ding thu tampi tak om mawk hi. Minam vai buaina le biakna bulphuh buaina tuamtuam, Letpadawng sumngo khuak buaina le ngongtatna tuamtuamte pen kum kipat lamin ong nasia mahmah hi. Tua banah Mualmite vai, thautawi tuamtuamte vai, kipawlna tuamtuam vai le lemna ding kamkupna (Peace process ) cih te zong abanban in om toto hi. Gamvai vaihawmna lamah zong buaina kisiatna tawh kidim hi. Hih bangteng nianua pen khat le khat a kizom dimdiam hi phialmawk hiam cih nop huai hi. Ahuampi in I et ciangin kawlgam in I maingat mailam thu pen telmun mel om pha lo hi. Athupi tampi lakah athupi pen in khat le khat. kikal Kimuanna kizahtaksiamna neih zawh ding ahi hi. Langlam party te tawh ahi zongin, Mualmi thautawite le mipite sung mahmahah khat le khat kimuanna kizahtaksiamnate kiptak I neihzawh masiah kawlgam gamvai pen ahi ci milmial tawntung ding hi mai hi.

Rakhaing gam sung buaina
Rakhiang state buaina tawh kisai commission te’ muhkhiatna 2013 March kha in ong suakkhia hi. Buaina apiangsak thubulpite kantel in kilem takin nuntak khuasak khop theihna lampite ong suut uh ciangin sepding gelding maban lianpi om pah hi. Rakhiangte le Bangalite kikal ah muhzia ngaihsutziate kilamdang lua mahmah ahih manin mailam suapi ah a thu haksa mahmah ding khat ahi hi. Tua ahih manin Commission te Report pen alangnih un lungkim takin a san theih ding uh a thu baihlo ahi hi. Hih thu pen 2013 September kha President pa’ Tan Dway khua azinna ah ong kilang mahmah hi. Alangnih tuakun lungkim zolo uh hi. Adiakin Rakhaing mite lungkim lohna pen gambup kithukhatin mainawk dingin I hanciam mahmah laitak adingin athu namtui hetlo khat ahi hi. Hih in thunei ( kumpi )te tungah mualmite lungsim nopmawhna khat kibehlap sak hi.

Letpadawng ( Sumngo khuk vai )
Rakhaing vai commissionte report bangin thuneite a vaibuaisak mahmah Letpadawn ( sumngo khut ) report zong ong suakkhia leuleu hi. Hih report zong huamkim le laihawl mahmah ahih hangin tu ni ciang dong siangzo nailo hi. Rakhaing le Letpadawng vai ah thunung thuma tampi na om hi. Rakhaing vai ah gamdang NGO, INGO tuamtuamte nasepna in kumpi thunei lamte nasepna tampi dongkholh sak hi. Rakhaing vai pen gamvai hi a, letpadawng vai pen sumzuak sumleina vai ahi hi. Commissionte muhkhiatnate pen thupi mahmah in pahtawi huai mahmah hi. Democracy tawh lampai a kisin cil kawlgam adingin hih thute pen thasin le ahamsa mahmah thutea nawk kha I hi hi. Ahi zongin tuni ciangdong mah hi ci lian hi cih theih om nai lo hi.

THUKHUNPI
2013 kum sung kawlgam in a kibuaipih le athupi pen in 2008 thukhunpi puahding / laih ding vai ahi hi. 2008 thukhun bel hi thei mahmah sam kei ci in ahawmthawh mahmah tampi kiom hi. . President thuneihna tawh kiukzia ahih hangin England le America te thukhunpite sung pan’ hoih in teh cih teng akigawm tuah ahi hi. Tua ban ah gam tuamtuamte thukhun sungah a hoihte la in kawlgamzia tawh gawmtuakin a kilem tawm ahi hi. Kamdangkhat in gen leng America lukhu, England bombi le kawl puan-ak kigawmtuah ahih manin a etlawm mel lohna pawlkhat om hi ci in upadi lam mipil pawlkhat in gen hi. England le America thukhunte kawlgam paizia tawh a kigawmtuah ahih hangin amaute thukhunte khat le khat akizop dimdiam bangin kizom theilo a, kician sinsen loin akitukalh gawp thukhunpi hi ci in a gen zong om hi.

Hluttaw le Thuneite buaina
Thukhunpi mahmah kician sinsen lo ahih manin Thunei ( Govermment ) le Hluttaw kikal buaina ong om pah hi. Thukhunpi siksan in Thuneite le Hluttaw kikal kikamtamna tungtawnin kipawlna tuamtuam, mipi le party te in thukhunpi kilunglut to a, kibawhhuan ahih manin gamlum mahmah hi. Tua tungtawnin Thukhunpi puah ding le a thak tawh laih ding cih kidemna khat ong piang khia hi. Athak tawh laihding a deihte in “ Puah ding tam lua mahmah ahih manin athak khat gelh vet leng lem zaw ding hi” ci uh hi. Hih bangin a thak agelh nuam atamzaw pen langlam party sung pan a puakbakbak pawl le journalist sep kawmin gamvai a lunglutte hi pha deuh hi. Democracy taktak I deihleh athak gelh ding hi zaw ci in tangko ziahziah uh hi. Mipi in khut kibeng ziahziah hi. 
Mipi’te thapiakna ( khutbetna ) a za nuamte in hih thu nak gen semsem uh hi. Athulam dang khat ah hih bangin mipi a satsuah ziahziah lakah 90% pen ama thulo thu asa lo phadeuh mite tawh a kimemat zawdeuhte hi citciat hi.

“Thukhunpi athak tawh khek ding pen tu le tu in piang thei pak lo ding hi. Hih bangin I nawt gawpleh I gam sung kalsuanzia nungtolh kik kha ding hi. Tua ahih manin a kisawk thei tantan sawk phot in alem tantan puah photphot leng I vai khuang baihzaw ding hi cih ngaihsutna a nei pawlkhat om leuleu hi. 2008 thukhunpi ong pianna, 2010 kitelpi ong pianna, kumpi ( thunei ) thak kikhelnate pen galkap makaite gelna le sepna hi a, amau deihna om bangin a hei kiaukiau theihna dingin abawl uh ahi hi. Amau lungmuan dong ( amau gelna tan a tun dong ) a letkip theihna dingin a gelsa uh hi a, thatang hat thu tawh I sawn gawp leh a lehlam in ong taipih kha ding hi, ci in angaihsun zong pawl khat om hi. Lamkhat panin thatang tawh a nawksawm ( hard liner ) le thunem tawh a nawksawm ( soft liner ) te tha kidemna khat cih theih ahi hi. Hih kidemna in party sung, kipawln, journal le mipi mai thugenna tuamtuamte ah mun ong la to a, khat le khat kiko kikap kigensia toto uh hi.

NLD le thukhunpi
NLD party sung nangawnah hih ngaihsutzia namnih om ahih manin mipi deihna la masa ni ci in thukimna nei uh hi. Tua hun a kipan NLD in mipi’ deihna taktak bang hiam cih theihna dingin mipi tawh kimuh khopna nei toto uh hi. Mun khempeuh phial ah thukhunpi puahding maw khek ding cih mipi lungsim lakna nei uh a, tua hang mah in gambup in hih thukhunpi vai kilunglut to pah hi. Party khempeuh in zong amau dinmun ciat tangko uh hi. Khat le khat kibang hetlo uhi. Thukhunpi puah ding lamin mipi tonpih zaw uh hi. Tua kawm mah in party pawlzonna ( sii zung zi ) nei pah uh hi. Ahi zongin NLD conference ciangin “Thukhun puah ding” cih thu suak hiau hi. U Win Tin mahmah in “ Kei lungsim bang hi leh bel a thak tawh laih ding ut zaw ing. Ahi zongin party thukimna pen zuih ding hi zaw hi.” ci in tangko khia hi. NLD in thukhunpi apuahnopna mun tampi gual suak uh hi. Upadi paizia ah upadite alangval a kipuahleh a thak tawh kibang hi cih khat om se hi. Tua hi a, puahzaw ding a cih hangin athak a gelh tawh a kibang lel dan na hi leuleu zel hi.

USDP le Thukhunpi
USDP in zong Party sungah thukhunpi vai kikupna nei hiauhaiu uhi. Puah ding maw, athak tawh laih ding cih lam hi loin puah ding maw puah lo ding cih dan hi zaw hi. U Aung Tawng a kidotna khat ah “Kua in gamvai lungmuan huai ta hi ci ngam I hi hiam. Galkapte in khiamzo takpi ding hiam. Thukhunpi cih limlim pen a kul bangin puah ding hi mah hi. Ahi zongin tu le tu a puah ding I sanawh tengtung pen abang hi mawk hiam.” ci in a dawn thu pen thu tampi ahuamna hi kha ding hi.

Ahi zongin Party makaipi pa le ama naihuai piante kampannate I et ciangin Thukhunpi puahding pen thukim bek tham loin a kibuaipih mahmah Act 59 vai nangawn gen hak tuak lo hi. February kha sung Hluttaw tawlngana ah Media te thudotna khat ah Thura U Swe Mann “ Daw Aung San Suh Kyi in President angah zenzen leh zong kei lam pan ka gen ding bangmah om tuan kei. Amah tawh khut kilenin na sem khawm ning e” ci in dawng kik hi. Hih dan hileh thunem lam manawh a hih manin Puah ding lam ah a lek pianpian cih ding hi. 

U Swe Mann in “ Act 59 vai mah bangin hluttaw sungah vai thupi mahmah tampi akivaihawm ahi hi. Democracy kikhelna a dongtang sak thei ding thu tampi om hi. Tuate khempeuh huamkim tak gel kul ding hi.” ci lai hi. Tua khit ciangin puahhuai le puahtuak teng kiakhawm in hluttaw ah a puakto ding committee khat ong piang khia pah hi. NLD in zong a puah nop teng kaikhawm in hluttaw puak ding ong kipan uhi. Galkap lam pan zong a puah nop uh pawlkhat ong sung leuleu uhi. Ahuampi en leng bel thukhunpi apuahding lamin amaingah ta hi zaw hi.

Ngaihsutna nam nih
Puahzaw ding cih ong om ciangin koi teng puah ding cih ah thu kitukalhna ong om leuleu hi. Tua banah Thukhunpi puahding cih thulu nuai ah Hluttaw paizia tawh a puahnuam le hluttaw pualam pan( mipi tha ) tawh puah ding cih ngaihsutna namnih om leuleu hi. Hluttaw sung nasepzia pen a hi lianlian ding hamsa lua ahih manin hluttaw pualam pan puahding cih ngaihsutna a om ahi hi. Hih leuleu ah Hluttaw lampi tawn theileng lem pen ding hi aci pawl thahat zaw uh hi. Hluttaw lampi tawn leng hi thei mialmial kha dinga, apualam pan I tawsawn gawp lehbel I thu ong lehtai kha dinga utloh teng I sin kik kha ding hi ci in a ngaihsun pawlkhat zong om hi. Pawlkhatte leuleu in hih bangin I thu lettai kha ding hi a cici te pen a lettai takpi nadingin lampi a hilhhilh te hi lel hi ci leuleu uhi. Pawlkhat leuleu in lettai kha ding hi cih thapaih pen kithawmvauna hi a ci zong om leuleu hi.

Act 436
Thukhunpi puah ding cih leuleu ciangin Thukhunpi sunga Act 436 sungah “ Thukhun khat peuhpeuh puah ding ciangin Tangmi ( MP ) 75 % te in puah ding thukim dinga, gambup mipi mee alang val in athukim ciang bekin kipuah thei ding hi.” cih pen phawk huai mahmah hi. Thukhunpi puah nopleh a tunga bangin sep ding ong hi leuleu hi. Athu in bel 2008 thukhunpi pen puahdingin a haksa mahmah nam ahi hi. 

Galkap in mee 25% nei kingkeng ahih manin ama phal lohin mee 75 % ngah zawh ding a thubaihlo ding ahi hi. Ahi zo ngeilo ding thu hi mai hi. Thukhunpi puahna ah Act 436 pen masak zo leng a lem thei pen ding suak hi. Galkapte leuleu in hih 436 pen ol no takin phal khollo kha mai ding hi. Hih 25 % pen galkap in gamvai ah Vito power neihna dan in a ngaihsut hileh kilawm hi. Ama lung hihmawhna om bangin a gamtat theihna dingin a koih hi kha ding hi. Daw Aung San Suh Kyi in Kayin gam a athu genna ah “ Thukhunpi puahna dingin tangmi 2/3 ( seh thum suah seh nih ) ciang ahih keileh tangmi a langval te thukim ciang hileh kicing lel hi” ci in gen hi. Hi thei hiam hi zo lo hiam ciah pen ngak lai ding suak hi.

Galkap le thukhupi
Galkapte kithawizia en leuleu dih ni. Amau lam pan bel tampi khiam mahmah cih ding hi. Galkap bupipa ( Senior General ) Thai le Singapore gam a hawh lai in tampi na gen khia hi. Galkapte pen gamvai vaihawmna pan damdam in nungkik ding hi ung cih lim gen mahmah hi. Galkap lam pan ahi thei zahzah in khiam ding hi ung, hun bel nong piak uh kul ve, a ci nuam dan ahi hi. Bangtan vai sawt ding cih genna nei lo hi. Tawlpi khat ngak kul ding cihna hi pian hi. Thu dang khat in gen leng amau lung patauhna khempeuh a bei ciang dong ahi dingin ngaihsut ding ahi hi. Tu tadih in bel America president in Vito aana a neih bangin galkap in zong Vito aana a len dan ahihna kimu thei hi.

Thukhunpi puahding vai a kigen ngeingai ciangin galkap lampan in zong puahding pawlkhat om hi ci in thu ong gingkhia hi. Hluttaw lampi tawh thukhun puahding thukimna a lakna ahi hi. Galkap lampan a puahnop thukhunte le ama thukimpih thukhun puahna dangdang khempeuh zong ama mee 25% piakna tawh ama deih bangin a hei thei ding suak ta hi. Party dangdangte’ puahnop thukhunte pen galkap mee 25% kihel loin apiang zolo ding suak veve hi. Ahuampi en leng galkap pen gamvai vaihawmna ah “ a lo theilo” a thupi mun ah tu nuam lai ahihna kilang hi.

Thukhunpi sung mahmah ah Galkap in gamvai vaihawmna ah apangpi lamah ding ding ahihna kihel khin hi. Galkap in thunpi kem/cing/ zui ding hi ci ahih manin ama thukimna loin puah ding pen a thubaihlo ding thu ahi hi. Tua ahih manin Act 436 a kipuahzawh masiah thukhunpi puahding cih pen galkapte mit-hek en kawm a sep ding hi mai hi. Galkap in ama gelna le lampite a sukha thei ding thukhunpuahna peuhmah sangzo nai khollo kha mai ding hi.

Tua ahih manin thukhunpi puahding pen a thubaihlo thu ahihna kimu thei hi. Galkap lampan thunemna a om masiah thukhunpi a kipuah zolo ding thu ahi hi. Amau a-ut nak lehlah a piang thei thu hi leuleu hi. Galkapte a ut nakleh act 436 pen hamsa liangin puah kul lo a, act 109 ( b ) sunga galkap tangmi ( MP ) phazah khiap ding thukim bek lehzong vai tampi nuam tuam pah ding hi. A-ut kei uh lehlah cih theihna om sam lo hi.. Hluttaw in “Thukhunpi a enpha ding leh puah ding” committee khat ong nei to ta ahih hangin tua committee te kalsuanna pen thusua mahmah lai ding hi.

Mipi kisatsuah dekdek
Tua committee sungah mualmi party te tam kihello ahihmanin kikamtamna om leuleu hi. Mualmi party te in hih pen kithusim lohna hi ci in ngaihsun uh hi. Hih bang kilungsim nopmawhna a om pen a hoih hetlo khat ahi hi. Hluttaw sungah USDP, galkap le NLD le party dangdang pan tangmite in Thukhun puah ding hanciam kawm un khat le khat kisimdemna ki-et giaugiau na tampi a om laitak ahi hi.
Tua bang hun laitakin NLD makaipi nu in “ Thukhun puah ding pen ko cih dan in a pian theih keileh lampi dang khat zon kul ding hi.” ci in Shan state khualzinna ah gen hi. “ Lampi dang khat” acih pen banghiam cih gencianna om lo hi. Galkap pen tangpi tangtate it le zahtak ahih ding lim gen hi. 

1300 AYIIDAWPONG kum 75 cin pawi ah U WinTin in “ Asawt loin kisaksuahna lianpi khat ong piang ding hi.” ci in tangko na nei mawk hi. Hihte pen a ngaihsut huai thu hi ta hi. Gamvai ah kigin kholh theihna ding kitangkona hi ta hi.Tua banah 8888 sangnaupangte le NLD makaite Ni Pyi Taw ah a kimuhna thu khat ong om lailai hi. Hih teng khempeuh a kizom dimdiam pian ahihna ong kilang hi. Abeisa lai in NLD le 8888 te deihdan a kibat loh hangin tu kum sungin 3 vei bang kimuh khopna aneih uh pen a lamdang thu ahi hi.

8888 te in zong NLD tawh khut kilen in thukhunpi amanlang theihthei in puah dingin kumpite ( thuneite ) tawsawn dingin tangko uh hi. 16 February 2014 ni in Daw Aung San Suh Kyi inn ah Act 436 puah ding vai 8888 te tawh kikum uh a, hluttaw sung le hluttaw pualam anih in hanciam ding cih thu ong gingkhia hi. 8888 makai sung pan Ko Myah Aye in “ Ngaihsutna a kibanglo tampi a om hangin akibatna teng sem khawm masa ding, kibat lohnate zong lem tuah phalai ding, ngongh tatna tawh kalsuan ding bel ut huai kei” ci in news khat ah gen hi. NLD makaite pen hluttaw sungah zong akihel uh ahihna tawh kizui-in thu om zia te theitel ding uh ahih manin mipite saksuah in lamdungah pusuahpih sam lo kha ding hi. Daw Aung San Suh Kyi mahmah in “ Thukhunpi puah ding thu taksuakzo kei phial zongin mai kitelpina ah kilut veve ding hi.” ci in tangko hi. Tua himawk ahih manin mipi saksuahin thu toknawi nuam mi songpong pawlkhat na om gige cih ding hi.

Minam le biakna bulphuh in buaina
President pa thugenna khempeuh ahuampi in en leng, langkai lua loin laihawl den ahih hangin tu nung thugenna sungah “Ei kihel khak loh manin langpang ding….,” cih dan kammal azatna om kiaukiau hi. Hih kammal in kawk nop khat nei gige ahih lam kilang mahmah hi. Thukhunpi puahna ding vai ah kithukimna la zo loin mipi kisaksuah gawpna a pian ding lung himawh huai hi. 8888 makai lamte thu genna khat ah Act 59 puah ding vai nawngkaina khat peuhpeuh a omleh mipi mahmah pusuakin lamdungah I dian ngeingai kul ding hi.” ci in gen mawk hi. Hih pen ama ngaihsutna hi a, kipawlna’ thukimna hih tuak sam lo hi. Ama cih bangin mipi sung kisaksuah in lamdungah awng ngeingai kik leng kawlgam gamvai pen lunglen huai mahmah dinga, apat pan pat kik kul ding hi. Democracy manawhin I kalsuanna ah tu laitak dinmun ciang I tun toh nading pen a hamsa mahmah kimlai, mipi tha zangkhial in I lehtai khakding lauhuai hi.

Mipite lamdung ah a awng sak ngeingai nuam mi palang pawlkhat a om lam I gen sa ahi hi. Tuate in biakna khak le khat kikal ah buaina a pian theihna ding thu bawl tawm uh hi. Tua mi palang mi kheltatte hoih tak I et ciangin langlam party te a vatpai nuam pawl hileh kilawm hi. Thupomzia le kilungsim nopmawhna te bulphuh loin mipi mahmah bulphuh zaw leng I thupaizia ong hoih zaw ding hi.

Makaipi 4 le thukhunpi
Thukhunpi khat peuhpeuh puahding zuun ding a baihsak gam pawl khat a om mah bangin a hamsa sak mahmah gam pawlkhat zong om veve hi. Kawlgam thukhun lakah 1947 Thukhunpi pen a thunem pawl in kigen a, 1974 Thukhunpi pen a khauh pawl sungah kihel hi. 2008 thukhunpi leuleu bel sawk theih dingin a hamsa pen thukhunpi hi dingin kigen hi. Ahi zongin thukhunpi puah ding pen thakhat thu in ong gamlum mahmah hi. Tua hang mah in Mi 4( great 4 ) kimuh khop ding langlam party pan ong pulak khia uh hi.
Apulak ten apulak hangin amite ( great 4 ) in a awl-mawh loh mawk pen amau sung thu ah khat le khat kimuanlahna hang hi leh kilawm hi. Makai sung bekah kikup sim khiankhian ding thute hih bangin tangko khiat sese pen min deihna hi ci in thunei ten a ngaihsut mawk pen khat le khat kimuanlahna mah ong hi zel hi. Kawlgam vai a kantel in a encik mipil khat in “ Makaite in gam le minam ading cih thulu tawh ma pan khop nopna lungsim a neihloh uh pen a buaihuai pen hi.” ci hi. 

 President pa kum thak Radio thugenna “ Kawlgam mi khat peuhpeuh in deidan om loin gam makai mun angah theihna ding leh gam le gam mite ading a kisam thukhunpi te bawlna / puahna ah vaibing sak thei ding thute a omlohna dingin i lampite zui khial kei ni .” ci mawk hi. Hem gen luadeuh aci zong om hi. U WinTin, U Aung Tawngte genna leh President pa, USDP makai pa thugenna te I et kak ciangin hi bialbual pian ahih manin Party pi te sung mahmah ah zong kilepphat mahmah kul ding hi ci in journal pawl khat suak hi.

Gamsung gampua muhdan kibanglo
Thukhunpi khat peuhpeuh puah ding a baih-a ahamsa phial zongin athupi pen ah tua thukhunpi a nuntak photphot ( kizang ) kisam hi. Tua bangin zang nailo sin nailo pi in khel kik pah huai lo hi ci in mipil pawlkhat in mu hi. Puah ding khek ding aci pen gamsung lam pan hi zaw deuh a, gam tuamtuam pan mipil pawlkhatte in tawl khat ngak phot ding thupi sa uh hi. Amaute in kawlgam kikhelzia pen manlang lua hi Atung lam ah kikhelna a om ziahziah hangin anuai lamin zui zo nailo ahihna lim gen uh hi. 

Daw Ang San Suh Kyi Germany apai lai athugenna khat ah “ kikhelna pen manlang lua cih theihna om tuan lo hi. Zekai lualeh lauhua zaw hi.” a cih kawmin Act 59 puahphat ding vai gen lai hi.
Gam sung lam panin thukhunpi puah ding/ laih ding cih thute nungah mualmite le Daw Aung San Suh Kyi in president a ngah theihna ding cih thute bilbial hangin party lianpite sungah lungsim galdona om pian hi. Act 59 vai pen mi khat ading ngaihsutna tawh puahding cih thu hi a, USDP makaite, galkapte le thunei lam panin kuamah apau kholloh hangin dik sa khollo uh hi leh kilawm hi. Hih Act 59 puah ding vai ah galkap, USDP le thunei pawl sungah zong ngaihsutna kibang kim lo a, USDP party chairman pa te pawl in bel puah lengzong hi mah e, a ci pawl hi leuleu hi

Tua kawmkal tengah “ Act 59 thukhunpi puah lo ding” cih lungphona pawlkhat ong om leuleu hi. Zangkong le Mandalay khuapi sunga act 59 puahding acite langah hih bangin thudang khat om leuleu cih ding hi. Act 59 puahna tawh gamdangmite sal dingin kipai khia tawm kei ni. Kawl phonggite bawl thukhunpi kipsak mengmeng ni ci in awng ngeingai uh hi. Hih bangin khat le khat a kitukalh dingin a vahihawmsim pen kua hi mawk hiam cih nop huai mahmah hi. Hih lungphonate ah NDF le USDP panmun nei pawlkhat va pai uh a, amau ngaihsutna ciat journal te ah ong suak khia ahih manin mipi sung kilok mahmah hi. USDP sungah ahi bengbang pian pawlkhat om ahihna kilang hi. NDF te in bel tuapawi a paite pen party tanga pai hi lo hi ci in tangkona khat nei uh hi. Hih lungphona pen phonggi te hanciam upadi akipsak nuam pawlte tawh na kizom pian ahihna ong kilang hi. Phonggite thukhun a kipsak nuamte zom ah, a phonggi te mahmah tawh kimemat to leuleu hi. 

Tua hi mawk a, act 59 puah ding vai pen biakna siksan in puahloh theihna ding lampi kizong ahihna ong kilang hi. Tua hi a act 59 puah ding vai nangawn USDP sungah deihna kibang lo uhi. Tua kibat lohna leh act 59 puah lohding lungphona te kimematna om pian mawk hi.

Deihdan kibanglo Hluttaw le Thuneipawl
Hluttaw le thuneipawl ( u Thein Sein pawl ) kikal deihdan le lunggulhna kibang mello ahihna hun tomno sungin mipite in kigalmuh thei pah hi. Banghanghiam cih I kan ciangin Thukhunpi kiciat lohna hang mah na hi zel hi. Mimal kilemlohna zong tawmtawm kihel hi. Galkap sunga training kah khawmte ( batch kibang ) te alomlom a, “Upa zaw, nauzaw” vai zong kihel ahihna ong kidawk simsim hi.

Amasa in Telephone ( MPT ) te contract sap ding vai hluttaw le thuneite kikal thukinialna tawh ong kipan hi. Tua nungah President pa in golhguk vai tawh kisai hluttaw ah lai apuakna hangin amaute gel kikal ong so pianpian ta hi. Tua zomah President pa kha sum vai kinialna om leuleu hi. Ahuampi in I et ciangin mai kitel kikna ah President a ut vive ahihna hangin kila thei hi. President pa America a zin lai VOA te thudotna ah mipite in ong deih laileh term kik ah zong sep ding ngaihsun lai ing ci in na in gen khia hi. Tua hi mawkleh USDP chairman pen kua hi mawk hiam cih ding ong hi leuleu hi. 
Thukhunpi sungah “President a ngah a kipan party sunga panmun le tavuan len kha nawnlo ding hi.” ci in kigelh hi. Amasa lam in USDP chairman pen vice chairman Thura U Swe Mann in alen khawm dan ahi hi. Ahi zongin tulaitaka chairman panmun ala pa pen chairman hi pah hi cih party sung pan a gen pawlkhat a om ciangin ki gamlum ngeingai hi. USDP khangno khawmpi khat ah U Swe Mann pen party chairman pa ci in tang takin a gen uh journalte pan suak henhan a, journal pawlkhat in hih pen party sung panmun kisuanna hi ci in a at zong om hi.

Hih teng thu a om bialbual ciangin NLD tangmi khat in USDP chairman kua taktak hi peuhmah hiam cih hluttaw ah donga President zum minister khat in dawn kikna nei cih kiza hi. Adawngna ah Thukhunsunga upadi pawlkhat siksan in thu tampi gen a, party chairman pen tu laitaka I President pa mah hi cih hem gen se hi. Party chairman le President panmun pen kiton pian ahih manin kinialna khangto semsem hi. Tua hun laitakin Thura U Swe Mann in “ Presindent pa tawh ka kiho na vuah, term kik ciangin sep ding ngaihsun nawn kei ing” ci hi ci in tangko khia hi. President zum lam pan in “ Tua thugenna pen mipi tungah gen sawn ding hi lo a, kiho na mawkmawk hi” ci in thuk kik leuleu hi. Tua banah “ Mipi theih ding akilawm hun ciangin siangtakin kitangko khia ding hi” ci beh lei hi.

President pa ut-lai le ut nawnlo cih pen thutuam khat hi lai a, ama vang anoptuampih kim le kianga te in sem sak nuamlai hileh kilawm hi. Tua hi mawk ahih manin USDP sung bekbek panin President ding pupi nihte a kidem ding thu ahi hi. Party in kua pia zaw ding cih pen lunglut huai thu ahi hi. Tua mah bangin party sungah athunem nuam pawl le a vik vitvit nuam pawl cih khennih pha ahihna kimu thei hi. Gam tuamtuamte maipha a ngah mahmah tu laitaka thuneite ( U Thein Sein pawl ) in USDP tawh kizopna kinbawl phalo ahih manin party dang khat peuh tawh ong ding kha thei ding tawh zong kibang hi. Hih pen USDP sung tu laitak dinmun panin apiang thei lua ding thu ahi hi. Nungdeuh khat U Hlah Swe ( Amyotha MP ) thu gen na khat ah “ President pa cih bangbang galkap MP teng in lungkim pih lianlian hi.” ci hi. Hih pen President pa le galkapte kizopzia hi pah kha mai ding hi.
Tu nungdeuh journal khatin President zum tawh dotna khat a bawlna sungah “ President ding kua kilawm pen ding hiam cih tawh buai ding hi dihdih lo hi. Party gualzawhna ding hanciam ding hi phot hi. 

President panmun cih pen a ut khempeuh sep theih nam hi lo hi.” ci in gen hi. Hih pen party sung kikamtamna le U Aung Tawng, U Aung Ko te a thuk kikna zong hi kha ding hi. Akilawm khollo khat ah President zum Minister khat in Hluttaw speaker le party chairman pipa a ko bawl khak pen alungman huai thu ahi hi. Thei pipi a ako bawl zong hi kha thei mai ding hi. Thu kician khat om keileh hih bangin pau ngam khollo kha ding hi.
Thukhunpi siksan in sialkhau kisuhna President pa le Hluttaw kikal kikamtamna abanban a om na thu pen atunga I gen sa mah bangin 2008 Thukhunpi thanemna hang hi pi pen hi. Upadi bawl theihna thuneihna pen hluttaw in aneihna tungtawnin upadi bawlbawl uh a tua khit ciangin President kiang puak phei uh hi. President pa in kipsakna aneih khit ciang bekin Updi dingin akizang thei pan ahi hi. President pa in lem a sak nai keileh Thukhunpi sunga paiziate zui in ama deihna ( behlap/ hemkhia ) tawh hluttaw ah puak kik thei hi. Ahi zongin tua pen ani ( hun )kiciangtan na sung bekah hi thei hi. 

President pa deihna te hluttaw in a san sak pawlkhat om a, azatsak loh zong pawlkhat om hi. Hluttaw thukhensakna pen a thu tawpna ahih manin President pa in a thukimpih mah kul zel hi. President pa thukimpihna tawh Upadi pawlkhat akip suak a, pawlkhat pen ani ( ahun ) cing ahih manin akip suak veve ahihna News te panin kimu zel hi. Hih pen Hluttaw le kumpi thunei ( President ) te kidemna na khat ahi hi. Hluttaw upadi bawlpawl le thuneilamte upadi bawlpawl te pilna kidemna hi a, a makai te gel a kidodo tawh kibang hi. Hih hang mah zong thukhunpi khenmangte (ခုံရုံး ) avek un atawp giapna uh thubulpi na hi pah hi. Nung lam deuh in hluttaw pan a kibawl upadi nam 7 le thukhupi puahna ding thu 16 te pen President pa in thukhunpi thukhenmangte kiang puak dingin a gelna I mu ciat hi.

Hih pen President pa in hluttawte bawl thukhunte a thukimlohna ahemlam takin alak ahi hi. Upadi pawlkhat hluttaw ah apuak kik kawm in media ah pusuah zel hi. President pa mahmah in hluttaw le Thuneite ( kumpi ) kikalah kinawkna om hi ci in siangtakin tangko hi. Ataktak Upadi bawl theihna ding thuneihna pen hluttaw in aneih mah bangin hluttaw te kipsakna tawh U Thein Sein zong President angah thei ahih manin khat le khat kisangsiam takin akizop huai ahi hi. Khat le khat kikap / kilangpan nadingin hluttaw pen langlam party te thuzawhna mun hi sam lo hi. Party khat vive a kidodo hi lel ahih manin kilawm khol lo hi.

Hluttaw kithusim phalo
Ataktakin cileng U Thein Sein in Union hluttaw MP pawlkhatte telna hangin President ngah ahihna mangngilh kha hi leh kilawm hi. Mipite in direct in a tel hi lo a, Pyituh hluttaw, Amyotha hluttaw le galkap te in vice president khat ta kipuak a, tua sung panin a kitel ahi hi. Ahi zongin President pa in Minister te ding pen ama deihdeih la thei hi. Tua ahih manin Minister te hluttaw sung pan hi mello uh hi. Tua ahih manin luttaw thusim phalo pah uh hi. Minister ding pen President pa deihtel hi mawk ahih manin agualzo party te in minister te tungah thunei zo phalo bek tham loin hluttaw nangawn in zo mel lo mawk ahih manin hluttaw le thuneite kikal kidemna a khauh semsem ahi hi. hi. MP te in amau mee gamhuam( telcing ngahna gam huam ) sunga thu le la om te dotna a neih uh ciangin Minister te in thupi sim khol loin a dawn kik milmialna thute uh kiza za den MP te thugenna ah “ Minister te in hluttaw sunga a gen bangin na sem taktak lo uh hi.” cih hi mawk hi. 

Thudang khat in genleng Minister te in hluttaw a thusim lo hi mawk hi. Hluttaw in amau mawhna azongzong dan khat in Thuneipawl ( kumpi / u Thein Sein’ pawl ) in ngaihsun hileh kilawm hi. Hluttaw te zong mipite’ deih ngetna le kikona te in tawphuut leuleu hi. Thuneite in sep theihna ding thuneihna a nei hi a, hluttaw te in nget theihna ding thuneihna anei ahihna tungtawnin thunei lam pawlin kei sep sak ciang beka thusuakzo ding hi cih lungsim tawh nasem ahih manin khat le khat kikal kinawkna a om ahi hi. Mipite in hluttaw atelkhialhna dingin media zangin su pianpian uh hi. MP pawlkhatte khualzinna khawngah thunei lamte thu na sitna thei zel uh ahih manin abul lam a kilemlohna pen a dawndongah kizom ahihna kimu thei hi.

President pa le a pawlte
Hluttaw le thuneite( kumpi ) khat le khat ki encik in a tonkhawm ding ( check and balance ) thu ahih hangin khat le khat kidemin ki-el bawl zaw sop uh hi ci in kigen ciat hi. Hih kidemna kidona sungah azat uh galvan pen Thukhunpi mah ong hi zel hi. Anih tuak un “ Thukhunpi sungah” cih tawh kikapkap uh hi. MP te khat peuhpeuh khawlsak theihna ding upadi te amanlang theithei in ong bawl un ci in U Tin Aye (Chairman, Election commission) in 14 February 2014 ni in ngen mawk hi. Hih pen Hluttaw in Thuneite ( kumpi, adiakin abul lamte ) lem a sak keileh hepkhiat theihna aana a neihna uh tawh a kilekkim dingin a ngen ahi hi. Thukhunpi sungah MP te khat peuhpeuh amah mee apia mipite 1 % in deihlohna lai akhiat leh Commission in tua thu kan dinga mee pai mipi alangval in a deihnawn kei takpi leh tua MP pa kikawl sak ding hi cih khat om hi. Athu lamdang khatah galkap MP te nangawnin tua upadi pawlding thukimpih zenzen hi. Tua ahih manin President pa, galkapte le commission te pen pawlkhat ahihna kimu thei hi. Tua upadi ong man zenzen hen la, thunei lam panin a sepnop pawlkhat ong sem zenzenleh hluttaw le thuneite kizopna a kigamla semsem ding ahi hi.

Mualmi thautawite le gambup lemna ( Peace )
2013 February 11 ni in MPC ( Myanma Peace Center ) in KIO makaipupi kiangah kilemna thu gen ding a zot a kipan Mualmi thautawite tawh kilemna thu vaihawmna ong kipan hi. February kha in Sweli khuapi kimuh khopna panin tangkona khat ong nei khia uh hi. Amuanhuai kilemna amanlang thei pen in neih zawhna ding le kikapna a omna munte etcik nading cih thute kihel hi. MPC te le UNFC tangmi te Thai gam ah 2013 February 25 ni in kihona nei uh a, tangkona khat ong nei leuleu uh hi. March kha sung KIO tawh kiho leuleu hi. Tua khit ciangin Wa te a kipan thautawi dangdangte tawh kimuhna om toto a, November kha ciangin Myikyina khuapi ah thautawi makaite tawh kimuhna nei uh hi.

Ahi zongin deihdan le sandan kilamdan’na tampi om hi. Federal galkap vai kikup ding pen thunei lamte a ut nailoh mah bangin thunei lamte bawlkholhsa thukimlai sunga thu pawlkhat zong mualmite in sang zolo hi. Hpa-an khuapi ( Kayin state ) ah kimuh kik dingin kiho uh hi. Mualmite vai le Thukhunpi puahna pen kizom mahmah ahih manin hun lak mahmah kul ding hi. Mualmite in Federal kiukna le federal galkap thu a gen pen thu tampi a genna uh ahih manin hih vai ah pilvang mahmah ding leh a langnih tuakin citakin lungsim siangtho ding kisam mahmah hi.

Thunei lamte in thautawite tawh kiho na ah asikhinsa sahang peuh phong kik in anungta bangin a bawl uh pen thuhoih mah hiam cih khat ngaihsut huai hi. Galkap nei lo ahih manin akim le pan a mi om peuh lammat pak uh a ,uniform khu sak tawnin aliangko tungah aksi khawng a suang liapluap pawl kha tawh zong ka kiho kha ngei hi. “ Syaihka sik kimlai bawk 3 za tawh galkap ka lut nipi khat cing nai kei” a ci pawlkhat tawh ka kiho kha hi. Thunei lamte in amaimang dekdek te nangawn hih bangin a tawsawn gawp pen a ngaihsut huai thu ahi hi.

Mualmite om dan I et ciangin kawlte limlim gal bangin angaihsun pawlkhat om hi. Lemna daihna tawh kidim gam khangto, gam thahat khat hih ding sangin amau deihna amau utna khat abulphuh zaw pawlkhat mah om leuleu hi. Gamvai met bawl theihna dingin gamdang tawh kizopna a bawl tawm thautawi pawlkhat zong om hi. Mipilte cial tawn in gamvai deih ngetnate a bawltawm pawlkhat a om lam zong I thei tek hi. Hih bangta tawh paisuak leng I mailam ding bel sau lai mahmah ding hi. Thukhunpi siksan in thu tampi kivaihawm thei ahihna zong I zat siam ding thupi kha ding hi. Hun kihon laitak la samsam ding cihna lam hilo zaw in panmun kikim takin nawkkhawm tantan in gualzo peuhleng leitung bupin kawlgam kalsuanziate langdang le thupi sa in kamka liang ding uh hi. Ahi zongin tu tadih in bel aktui bangin I dop mahmahkul ding a, sawk khial kha vanglak leng khat om leh a kigawi mang thei ding dinmun vive ahi hi.

Kum khat sung thupiang khempeuh I et ciangin buaina kidemna bekbek hi mai hi. Kum khat sung tawntung hamsa pi takin kikantan hi. Hih vai lianpi teng mah 2014 kum ah kipua to suak hi. Nawkkhiat ding paihkhait ding thuham sa tampi om hi. Mipi nisim nuntakna kilap sangna ding bangmah kisem nailo hi. Minam buaina, biakna buaina le gamvai buainate sep lai ding ahi ci pi in om lai hi. Tu laitak dinmun sangin a siatzawk lohna dingin I hanciam zawhleh ahoih mahmah ahi hi. 2014 kum sungin sep ding na lian tampi om hi. Mikhempeuh in gam le lei, khua le tui adingin khut kilen in

ma I pan khop zawh leh I mai a om guam thukpi kikan tanzo dinga I mailam ding lawp huai mahmah ding hi. Gam khat peuhpeuh akhantoh theihna dingin mimal kim hanciamna kisam hi. Angsung lungsim nei in, panmun deihna, huaihamna, gualzawh nopluatna cih te nusia phot a, mipite lunggulh tawntung ahi akhangto gam lam i manawh kawm in 2014 zong kantan ciat ni ( 5 Oc 2014 ) Lian Tuang

Ngeina Khangkhan nading

"Zomi nacihcih-uh, na' ngeina kician mahmah, akhanghaam mahmah khat honggen/honglak sin-aw, azom honggen/honglak behlaai sin-aw" hongkici zenzenleh bang I-gentam?

  • Pawlkhatte-in, "Zolai" lakding uhhi. Zomi sungmah pan-in "Tua Zolai hizenzen kei-e, Tedim/Tiddim Chin akici veleh" cihsan laaiding uh-a, akhankum zongsuk kiikleh 1930 kiim-a J. H. Cope -in Roman alphabet-tawh hong pattah hi-in, Leitung Gaalpi 1na (The First World War: 1914) nungsang-a apiang ahihteh khangmoi luazeen-e, hong kicihsak khathei dinghi.
  • Khenkhatte-in, "Zopuan" lakding uh-a, anti-Zomi peuhmah-in, "Tua zenzen laaizang 1960 nungsang ciang-a Col. Khen Za Moong-in design agelh hi-in, designer-pa mahmah "Zomi" kici lopi, tu-inzong nungta laaiveh, naak khangmoi nalawmlawm-e, na' ngeina-uh hongkici leuleu khalel dinghi.
Minam khat' Ngeina cihciang-in, pau leh haamla leh laamkhutsiamna pupa' khanggui zuui-a akizomto tawnzia, zatziate akip leh abul penpente ahihi. 
  • Pau: Zomite' kammal athuuk leh akicing mahmah-a akizangh tampi om-a, 'pau' I-cihpen abeisa hunte-ah "awsuah (accent)" genna-ah kizanghtaang ahihman-in "paukam (language)" leh "kampau (speaking)" ci-in kammal piicing-in kizuun-hi. Hiah "pau" bek-pen na' genkhiat kammal (word of mouth)-in meelcik theiciat nihang. Lpd: na' pau kidawm-ou (watch your mouth) cihbang-in kizangh-hi. Pupate-in "lai" neilo ahihman-in thupiang (dahna, nuamna, nopna, gaalmat, samat, gualzawhna cbt) khempeuh "La (Song)"-tawh ciamteh uhhi. Tua late ahunzil-in sazeel uh-a, khangsawnte kitaaibaan suksuk ahihman-in "La"-pen pupate' hinkhua zungpi khat ahihi. Lpd: Khuasaat takciang-a aphuah-uh la-pen tua khuasaat taangthu ciaptehna document kician penpen khat hipah-a, khuasaat kua, kuateng-tawh, bangziak-a, cihte 'la'-tawh akiciamteh ahihman-in "La-pen Zomite' Ngei Thupipen" ahihlam phawkthak ciatding kisam-hi.
  • La: Pupate-in 'pau' sang-in 'la'-tawh upazil thupite aciapteh-uh, aphuah-uh mahbang-in ataangpi-in "Lakam" theikim simsim-uhhi. Nungak leh tangvaal kiheel nangawn la-mahtawh kiheel, la-mah kipaih, akiphuaksa azangh-tawh, aphuak suklianlian-a apaih-tawh nasialua uhhi. Zola Awluan guipi nei uh-a, gualbaan tumging (modern music) awluan-tawh kinahvawh hetlo-hi. Lapi (lazek: Ton hun bek-a akisa, sih hun bek-a akisa) ahizong-in, gaalla, sala, zawlla, laphei, latung cihte awluan kidang diimdiam-hi. Ka' neulaai thumangmawh khat; innlak pate khat Tual Biakna sung-ah hongsih ciang-in ka'nu zuui-in ka' sihgaalna-ah akisa la khat ka' meelcik-hi. Tua la-pen leenciil hun, zawlleenna khat-ah ka' sak huauhuauleh apu-in akiim-apaam tuibuuk phih seuhseuh-in, hongsam-a, mundang-ah mawksak theihloh ahihna kiciantak-in honghilh ciatciat-hi. Thupi kasa mahmah-hi, banghanghiam cihleh Zomi pupate-in ahunzil amualzil-in "la" sa uh-a, mawksak hetlo, thupi, zehtan bangphial-a zahtaakbawl cihpen "Zomi kahi" cih giapgiap ngam nading tawsawnpi khat ahihlam khuasikmul tho liang-in kaphawk-hi.
"La" naakpi-in thupi-a, hih late sa lecin, Zopau apau-thei ciangciang khat-in thei kilkel loding-hi, banghanghiam cihleh athuuk mahmah, kammal leh awsuah atuam vilvel "Lakam" vive-tawh akiphuak ahihman-in pau-theih maimai ciang-tawh "la' deihna" kithei hetlo-hi. Hihpen "Zomi na' hihna, ka' hihna akipsak, teci apang thuguipi" ahihi. 

Ahihleh nangmah-in tua late' lak-ah "dawng bangzah meelcik/sa-thei na-hihiam?" hong kicileh:
  • "Thinglua, khit nauhciahlua, haivaai, saktheih neikeng, zong neihsawmkeng, thupi sahiaukeng, khantohvaai keilua...." aci tampi om khading.
  • "Kei ka' pilehpu pan-a Tapidaw hi-in, Zola theih neihiau keng-ei, zong kisam sakeng, biakna-tawh kikaih sakeng, lawki-vaailua hilo-maw......" aci-zong tampi om khading.
  • "Ko Tedim/Kawlpi/Yangon-ah neutuung pan-a teeng kahih ciang-vua, hih Zola vaaivaai tepawl kiza-kha vetlo, kithei-kha vetlo, kan-a nei hiaulo...." aci-zong tampi om khading. 
Hih dawnnate naakpi-in tualniam-a, 'hai mahmahna' ahihi. Minam abawl Pasian-in atuam-neih mahmah Israel-te bangpen Abraham' khang-a kipan tuni ciangdong angeina-uh pomkip uh-a, mi' nuai-ah om tuanlo, tua ngeinate akepbit man-in tualniamlawh tuanlo uhhi. Khazihmi (Tapidaw, Christian) I' hih seemleh pupa' ngeina naakpi-a kepbitding, puahding, zuunding thumaan ahihi, banghanghiam cihleh ama' piankhiatna pupate athupisak mi-pen mipil ahihi. Dawnnate-pen "ama' minam, phung, zung atheilo ganhing tanzil" hi dektak ding-in ka-sehhi. Khantohvaai-ah akhangto minamte-in amau' ngeina hoihte leitung-a minam tampi-in atheihpih nading-in tawsawnna lam-ah thahaat mahmah uhhi. Lpd: English te naakpi-in khangto uh-a, adiak-in Christian akici khempeuh-in English te' la awluan-tawh Pasian phat uhhi. Tua la awluan-pen Topa ZEISU' hun laai-a phatna la awluan-tawh kidang-hi, Judaism leh Islam te' la awluan-tawh phatna biakna kibawl hizaw laai-hi. Tua hileh a-Zomite' khantohvaai acih abang ahitam? Ngeina nusiatna-pen khantohna hi ngeilo-hi. Pilehpu Khazihmi ahih seemleh lazek ahilo ngeina late-beek hong hilhding-uh amau' mawhpuak hi-a, honghilh kei-uhleh "ka' beh, ka' khua, ka' minam hibang-hi ci-in ka' tapa hilh keileng" tua-tawh akisuun ahihi. Akhangto minamte tuipi gaalkhat akaai zong-in angeina-uh, ala-uh, alaam-uh, apau-uh kihilh ciatciat uhhi. Zomite bang I-cici uhhiam?

La baan-ah; 

Pupa' khutsiamna; patkol, patkaapna, muiitung, muiiphei, siåm (siåmbu: ciampeek, ciangtang, tukot, nahvawh, siåmciang, kolka, kolpum, pumlawng, duap, sakuhling...), mawngthaak, puandum, puanlaaisan, khephiau, teipaak/teipi, tualmeisah (meisuang/flint, leè - pat bang-a aneel phiuhpeuh, sekta - siikseh neulo), khi (khibah, khipi, khisan, simkhi,vaaihuupkhi, khinaal, cbt) buuk, zubeel, zupeeng, tu leh hei, lawh leh ciang, beem, cbt. 

tumtheih vante - khuang, sialkii, guasok, phiit (pumpa or mau-tawh kibawl), lawingeet, kibik, kilong, dingdong, taamngai, liamlo, guasem, cbt.

Hirte Leitung Gaalpi Masa mapekpek pan-a kipan pupate' vanzat hi-a, kuama' kiang pan-a aciintawm-uh, namdang khatpeuh pan-a alaak-uh hilo-hi. Gaalpi Masa madiak 1880 kiim pan-in siik alianpipi mu theita-uh ahihman-in zaamseekthei uh-a, Kawlmaang leh English te akido ciang-in Manipur kuam leh Assam kuam-a anusiat-uh thaute ngah-uh ahihman-in thaubu seektheih hong kipan uhhi. Tua nangawn Falam-te Pu Am Thawng akicipa' seek-pen kei' khang ciangdong thaubu hoihpen-in kizong vangvang laai-hi. Deihna-ah, Zothau, Zaam, Zolai, Zopuan cihte zaandiak vante hi-a, ngeina vante-a lahding moilua-hi. 

Zopuan amaantak-pen puansilh hilo-in puandum leh puanlaaisan hi-a, khephiau leh tanghciin te-in anuazuih ahihi. Zopuan designer pa-in ama' pian mapek-a pupa' ngeina puan meelte akim ding-in hong gelhsiam ahihman-in thupi-hi. 

Atunga vangil, ngeina khampaalnote bangzah I' keemlaai, I' neilaai, I' theilaai uhhiam? Zepthuah akuullo, pupa' khutma Zogam-ah bangzah I' neilaai uhhiam? Khangsawnte I' lahding bangteng neilaai I-hihiam? Hihte-in minam khanghaam, minam kip, minam guipi-nei I-hihna lahsil (evidence) manpha mahmahte ahihi. Tu-a kipan-in zongkiik, kankiik, zamkiik-in nungta sakkiik lehang, Zo Tuunnu laukha amuang diaive!

Zomi Pasian' Thupha!

Zokhai

MARTIN LUTHER KING JR. (1929-1968) LEH ZOMITE

LEITUNG BUP ZOMITE TUNGAH THUZAKSAKNA

Leitung mun tuamtuam aa kikhen Zomi khempeuh aw, i honpa Zeisu' minin itna tawh na khut uh kong len hi. Pasian' kiang panin Thupha leh Daihna note tungah hong tung kimciat tahen!

2010 November kha-a kibawl Kum (100) Cin Pawipi panin Leitungbup Zomi Kipawlna (GZA) kiphut khia-a, Makaipi dingin Pawlpi lutang (6) hong kiseh hi. Zomite pen Pasian' thupha ngah minam hita i hih manin i nuntakna ah Pasian' deihna banga nuntak ding, cih lunggulhna-in a kiphut hi-a, tua bang ahih nadingin ko Biakna makaipi (6) te zong hong kiseh-in ko zong i minamte leh Pasian' hong teel hi, ci-in lungdamna tawh ka saang uh hi. Tua mah bangin 2011, June kha sung Singapore-ah ka kimuh masak pen-un Zomite ading zum le dai, kolbulh khaukhih i tuah leh hang takin tuak ngam hang, ci-in a ki-ap ngiat ka hi uh hi.

Kote'nasep lian pen in mailam-ah Zomite Pasian' thu tawh kalsuan-in i minamte i kihuai theih ding ka tup lian pen uh hi-a, tua bang a pianna dingin zong a hunhun-in lai kong hawm (uh) a, mailam ah zong kong hawm den ding uh hi. Zomite Pasian' thu tawh i kalsuan theihna dingin ko teng sanga muanzawk ding leh Zomi itzaw ding tam lo ding hi. Tua ahih manin, kong laihawmte uh pen nial ding (debate) hi lo-in Zomite' kalsuanna ding aa zuih ding (directives) a hihi. Ka genkhiatte uh ko' ngaihsut tawm hi lo-in Lai Siangtho bulphuh-in i minamte kong gen uh (prophetic voice) hi ci-in na saang ta un. Zomite kong gammanpih kei ding (uh) hi. Na lunglau het kei un. 

Thu tawh nungta lo-in lungsim picing lo khat leh nih gen daina tawh Zomi namte ka itna (uh) nengkha zong kilok zo lo ding hi. Thu gina lote simna ding leh dawnna ding hun ka nei kei uh hi. Zomite thu tawh nungta dih ni.

MARTIN LUTHER KING JR. (1929-1968) LEH ZOMITE

Kum (44) sung vilvel Pasian' na ka sep sungin etteh dingin (model) Pasian' mizat leh makai minthang li bang oma, tua lakah Baptist Minister Reverend Dr. Martin Luther King, Jr. zong khat a hihi. Paakta lua ka hih manin New York Union Theological Seminary ah Master ka kah sungin ama' thu bulkanna (research) nei-in a gamtatna diak Harlem leh a thongkiatna mun Alabama gamkhen Birmingham khuapi dong-ah ka va kan hi. Amah tawh kisai Research Paper khat zong ka at ngei hi. Zomi Pasian nasemte lakah Martin Luther King Jr. thu a tel theihte lakah khat hi ngeingei dingin ka ki-um hi.

Martin Luther in Pawlpi leh a minampih Mivom (Blacks)-te a makaihna ah a zatpi leh leitungbup ah a pholhkhiat thupi pen in Ngongtat lohna (Nonviolence) a hihi. A taktak-in hih thukip pen ama' phuahtawm hi lo-in Lai Siangtho sung, Russia lai-at siam Leo Tolstoy (1828-1910), leh minam makai minthang Mahatma Gandhi (1869-1948) kiang pana a ngah thubul a hihi. Amah in nongtatna peuhmah nial vinven a, ahi zongin a mivom mite a makaihpih Malcolm X in ahih leh ngongtatte ngongtatna mah tawh thuhkik ding hi, ci hi. Tua ahih manin a totnop uh lam hong kakhia a, Martin Luther King Jr. in bel ngongtat lohna (nonviolence) mah pom vinven hi. 

A nuntakna piak lawh hi. Tu-in Baptist Pawlpi makaipi leh a minamte makai Martin Luther King Jr. tung panin Zomite in i kipuahphat ding thu pawlkhat a tomin hong gen nuam hi ing.

1. Innkuan sung ngongtatna (Domestic Violence)
Khristian biakna bek hilo, biakna khempeuh in ngongtatna peel uh hi. Zomite i khantoh lahna pen innkuan sung tek panin ngongtatna (violence) i neih hang a hihi. I kipuahphat kul ding hi.

2. Zapi lakah ngongtatna (Social Violence)
I innkuan sung bek hi lo, midangte tawh i kithuahna-ah Zomite a ngongtat nuam i tam hi. I khuak (reason) in i lungtang (emotion) uk zolo ahih manin koi gam koi gam tung taleng, ngongtat i tum hi. Minam dangte'n hai hong sa mahmah ding hi.

3. Lai tungtawna ngongtatna (Media Violence)
A tuungin ZONET leh Zomite kizopnate Zomi it ka hih manin ka sim dena, ahi zongin mimal kikona leh mimal kitotna vive om ahih manin simtak sa nawn lo-in, ka muh ciangin ka simma-in ka phiat (delete) masa hi. Zomite pen i pilna in hong uk zo nai lo mahmah lo ahih manin thu ngaihsun lo-in "Penglam suangtat sat ngam" tampi omlai hi. I khuamuh zawh sawt nai lo ahih manin i tualniam lungsim (uncivilized thinking) in hong uk lai hi. Dahhuai ka sa mahmah hi. A diakdiakin thupha saanga gamdang tung Zomite aw, hong haitat nawn lo-in pil le picin hong tuh unla, thu tawh nuntak hong tum un. Lai hong hai at nawn kei un. Ko, i gam i lei aa omte'n, hong muang mahmah-in Pasian kiangah thupha kong ngetsak tanghtangh uh hi. Hong hai gamtat kha het kei un.
Rev. Dr. Martin Luther King, Jr. kiang pana Zomite in i lak ding thupha lian pen in ngongtat lohna (nonviolence) a hihi. A dang tampi zong om lai ding hi. Pasian in tua ngongtat lohna leh picinna Zomite lakah hong buaksuk henla, picing minam hong hisak tahen!

Mailam-ah zong Zomite tot ding lamkhun a hunhun kong suaksak ding hi.
Pasian in thupha hong piakim tahen!
Itna takpi tawh,
Rev. Dr. Simon Pau Khan En
GZA Makaipi
Oct 29, 2012