Showing posts with label Article Business. Show all posts
Showing posts with label Article Business. Show all posts

LAWHCINNA & LAWHSAPNA

Kumpi nasep ka kipat cilna pen Tamu hi a, tu ma kum 15 lai ahi hi. Tua hun lai nuntakzonzia le sumbawlzia pen thuneite tawh a kikhawl thei zawdeuhte in noptak sa mahmah uh hi. Ahi zongin mipi a tamzaw pen kicimawh mahmah hi. Nasep om bangbang kisem hi. Ei mite bangin a diakin gamgi kantan a vanpuak (Carry kicise) kithalawh hi. A cithei zawdeuh pawlkhatte  in amah le amah in van lei in pua phei uh a, a ciah lam ciangin India van ama puak khopmah tawh ong ciah phei leuleu hi.
Khatveivei ciangin thukante le customste in vanpuate mat cihtakin man thei uh hi. Tua dan ciangin Sun le zan cih om loin pangcip uh uh a, man ngekngek uh hi. Amite bel man sam loin avan puak bangbang mat sak uh hi. Tua hun laitakin Tamu khuabup ading Telephone line 4 bek om ahih manin phone a zang nuam khempeuh ko zumah ong pai uh hi. Tua ahih manin tawlkhat sungin mel theih ka hau mahmah bilbel hi. Hong pai khempeuh hopihpih ka hih manin thucin thutang kiza kha hi.
Khatvei phone hopih dinga ong pai minih tawh zum sungah tukhawm in ka kihoho laitak un, customte bawkkhat khat zong phone ho nuam in ong pai ka gal muh tek uh hi. Ka gei a tegel in,“ Hia pa hi zen ei!! Tu zingsang a ka van ong mat sak hi. Gate 1 a Customs te hi” cituak lian uh hi. Anih un nak heh lua mahmah uh hi. Akhat pa in “ Ei nektawm ding takpi a zongte khawng ong man gawpgawp. Mihau miliante van lah man tuan lo, a ut te manin a ut te manlo, thuman kei, mudah ing, amel mahmah zong gitloh mel lua,..,” ci in a ma om muan ah phunphun hi. Customs pa ong lut phei ciangin a mulo kineih in en vetlo hi. Atheilo kineih lel hi.
Akhat pa leuleu in Customs pa ong lut phei ciangin hopih seisai leuleu hi. Nui seisai in a tutna awn a, tua kawm in,“ Sia aw, tu zingsang ka van nong matsak bel dongtuak peuhmah ing. Ka tate sang sum ding nangawn pia nai loin ka neih sunsun tawh van vial khat a puaphei hi veng. Tun ka lungkham lua peuh mah. Nang mahmah in nong huh loh phamawh ding ahi maw” ci-in va hopih khiankhian hi.
Customs pa in zong, “ Ko zong nuammawh sa peuhmah ung ei. Hi theileh ko zong ong man nuam mahmah lo hi ung. Tu sung pen tungsiah pan thu om in a kilimmat diak hi mah ei” ci hiathiat bilbel hi. Mipa in “ Tua leh, sia aw zingciang zingsang vial khat ong pai leuleu ning. Hehpihna tawh ong man nawn kei oo. Ka van a lemleh nang zong ong theih neih ning” ci kik pah hi.
Customs “ Zingciang bel ong pai nai kei oo. Lem nai kei. Thai ciang ong pai pan oo. Gate 1 ah zingsang bup tu ning. Kei tut sungin vial nih vial thum, nang kizawh zahzah pai oo” ci hiau hi. Hih lai ah a tuahsia minih lakah khat in gal le sa neih lawh a, akhat leuleu in meltheih kibehlapna le lawhcinna lampi thak neih lawh hi. Hih dan pen leitung nuntakna sungah om kawikawi mawk veh aw cih phawk sansan ing.
By: Pa Liantuang (Tongsan Tanupi Lui)

Sum om peuh leh na khempeuh a kicing takpi mah hiam?

Sum om peuh leh na khempeuh a kicing takpi mah hiam?

(1) Sum in hong laamto thei-in, hong niamkiatsak thei hi.
(2) Sum in hong puksak thei-in, hong phongkik thei hi.
(3) Sum in, lam hong musak in, lam hong pialsak thei hi.
(4) Sum in, hong ki gawmsak in, hong kikhensak hi.
(5) Sum in hong behlap in, hong lakik thei hi.
(6) Sum in, nupa bangin hong omkhawmsak thei-a, nupa banga ki-itna hong pia thei lo hi.
(7) Sum in, hong tawldamsak in, hong gimsak hi.
(8) Sum in, lupna lei thei-in, ihmut nuam lei theilo hi.
(9) Sum in, an leh mehte lei thei-a, ankam limna lei thei lo hi.
(10) Sum in, zatui lei thei-a, damna lei thei theilo hi.
(11) Sum in, hong lungnuamsak pak a, tawntung lungnopna hong pia theilo hi.
(12) Sum in, inn hoih lamzo a, innkuan nuam lam zolo hi.
(13) Sum in, laibu lei thei-a, pilna lei zo lo hi.
(14) Sum in, hong gualnuamsak thei-a, lungnop tawldamna hong pia theilo hi.
(15) Sum in, i muhna hong liansak thei-a, i upna hong neusak thei hi.
(16) Sum in, hamphatna hong pia thei-a, manphatna hong pia zo lo hi.
(17) Sum in, leitung tawh hong kinaisak in, Pasian tawh hong kigamlasak hi.
(18) Sum in, Pawlpi mi lei thei-a, kha mangthang lei zolo hi.
(19) Sum in, leitung nuntakna nuamtuamsak a, kha nuntakna hong pia zolo hi.
xxxxx
Khazih sungah,
David Tuang

Zomite' sum zon dan nam khat

Gan khawng khawi keei, huan khawng bawl, gimpi tak aa lo kho keei in, gan khan ciang (gawh phat ciang), mehteh mehgah limci ngah ciang, ne zongh ne ngamlo aa danghkaa deih luat man in, duhpipi aa zuak khia.

Sen sumbawl siamte'n tua teng lei ta.
Tua mehteh mehgah leh sa te, meh in, a limnono aa bawl in zuak kik.

Amet (sum leh hun): gankhawi, huan bawl cihte in hun saupi leh thatang tampi la aa, sum tawmno bek tawh kikhawng (tawm bek lawh) lailai hi. 
Meh bawl pak pen sawtlo in, tampi manin zuak kik sawnsawn uhhi.


Zomite khang kizomin hauhlohna ahang

Zomite sungah a hun a hun in, sumhau minthang kiza theizel hi. Pawlkhatte khangkhat sungah zongh a min uh a dawk nawnlo zongh om thei aa, a tate khangciang ki phawk kha nawnlo cih zongh om thei hi. A hang a tuamtuam om kha ding aa, Innpi Admin ii ngaihsut khakte a nuai aa bang a hihi. Hih a nuai aa teng pan, khat a hih kei leh a dang khat teitei tawh kituak kha dingin ka lamen hi.

1. Baihno takin hauhzia tawh haupak. Tua mah bangin beikik pah thei hi. Hauhna pen a pia Pasian hi aa, ei thagum hatna hang hilozaw cih phawkhuai hi. 

2. Khang kizomin sep theih ding nasep nam tawh haulo, tua dan nam tawh sumlut neilo. A pa te nasep a tate in a zop theih ding nam hilo. Gtn. Suangbawl hoih lai in, a pa te hau thei ding aa, a ta te hun ciang, tua suangbawl hoih nawnlo a hihman in, a tate'n zom thei nawnlo. Galkap lut hoih lai in, galkap hi aa, a ta te in tua a pa nasep zom thei nawnlo. Tua a hihman in, sumlutna khanggui kitat cih theih a hihi. Kala te bang hi leh, saivan na ngawn,  khotloh hang sawtvei kikoih thei ding, sikvan vive zuakin neizaw lai uhhi. 

3. Pa te hauhna nopsak pih lua kha in, kisia. Ki phasak khial a hih kei leh noptat in thadah. Septheih kician mel a tate in neilo.

4. Zomite kitual niamlua mahmah laisam a hihciangin, taihinn khat leh mawtaw khat nei peuh leh a hau in kimu. Midangte in a hih kei leh a mau  leh a mau zongh a hau takpi kisa kha uh cih bang om thei hi. Tua ciang pen, bangmah bulkipna neilo a hau aa kitheihna bek cih theih hi mai hi. Tua a hihmanin, a tate khang ciang, bangmah gen luat ding, na om tuanlo.

Hih bang dan a hihman in, tate ii zop theih ding mabaan khat, ei khangin bangmah pi sumlutna hi tuan keimah ta leh kipat huai neih huai hi. Sum tampi nusiat aa tate mabaan neiloh sangin, a zop suak pah theih ding uh nasep nusiat theih ding kisam mahmah hi. Tua hileh bek, a khang a khangin hauhna kibehlap toto thei pan ding hi. Tu in a hihleh, a tamzaw a tate khansim, bem pan kitaw pat den a hihmanin, hauhna kibehlap in khangto semsem cih theih ding kitam nailo hi.  Ldam

Post khempeuh ki share kim den zolo a hihmanin, nisim aa post om masasa gawmtuah aa, ni khat in, khatveita email ah lut dingin kila thei hi. > Click Here <



Aksa KFC tawh sumbawlna thu

Kawlgam gamvai kikhelna huhau in a nungzuih thute ah sumbawlna lam khaktante ki hong in leitung gam tuamtuam te tawh sumbawl khawm thei ta cih thu ahihi. Tua hi aa Kawlgam ah leitung aa company minthang te in sumlom phum in sumlei sumzuak ding hong kipan ziahziah ta uhi.

Tunung deuh in thuthang khat ahi leitung a ‘nektheih (Fast Food) company minthang khat, KFC in Kawlgam ah sai hong ta ding cih thu i sim kha ciat dingin i lamen hi. Tua hi aa, KFC nungthu theihding le pilna lak ding ahkl lungsim thalak theih ding lunggulhna tawh kong at khia hi.

KFC thu ahkl nuntak khangno sung guallel ngekngek in khangham sihkuan ah gualzawhna a ngah mipa khat thu ci leng zong kikhiallo ding hi. A ma pianzia te in;

Kum (5) aphak ciangin a pa in sihsan vat hi. A pa om nawnlo ahih manin a nu in a nasep nusia kha hi.
Kum (12) a phak ciangin a nu in pasal kik neih hi. A pakik i simmawh bawlsiatna te thuak kha zel hi.
Kum (14) a phak ciangin sang kah nading lah sum neilo, a nu inn ah lah om nuam nawnlo ahih manin lamlai ah a vakthap mikhat suak hi.
Kum (16) aphak ciangin a kum khem in galkap tum hi. Tembaw kham pahpah ahih manin a inn ah kiciah sak kik hi.
Kum (18) a phak ciangin zi nei hi. Sawt kei. A zi in a neih a lamh teng zuak sak mangin nua kik hi.
Kum (20) a phak ciangin mei bawl sia, meileng lam nasem cih bang teng sem kawikawi in lem cih omlo hi.
Kum (30) a phak ciangin aamahkhan company (Insurance company) khat ah nasep ngah hi. Sum hamphatna (bonus) tawh kisai in a pu tawh kitawng uh ahih manin a nasepna pan tawp hi.
Kum (31) aphak ciangin Upadi (law) lam amah le amah in sin in a lawmte hanthohna tawh sitni sem hi. Ahih hangin thu khat hangin thukhen zum ah a thu ap pa tawh kilai dihdih uhi. 
Kum (32) a phak ciangin bangmah sep kician neimello in zawngkhal mahmah hi.
Kum (35) ah lemlohna mah mukha zel hi. Motor hawl kawmsa in lei tung apai laitak in tua lei kitan ahih manin motor tawh guam ah kia suk hi. A pumpi tungah liamna tawh kidim in leh a nasep motor pei zuakna ah zong semzo nawnlo hi.
Kum (40) khua khat ah namgimtui sai khat hong hi. A signboard suan khit phet in a sumbawlpih pa tawh ki tawng uh ahih manin thu kinei talai uhi.
Kum (47) ah a zi kik tawh kikhen in tanu tapa 3 nei hi.
Kum (61) ciangin mipi palai ding kiteelna ah alut hangin kitel lo hi.
Kum (65) a phak ciangin kumpi thuneite lampi kek na hangin a minnei tung Fast food ansai pen kisusiat sak hi. A van om sunsunte khol thiamthiam in akiman in zuak kik hi.
Kum (66) a phak ciangin a nuntak nading in zin kawikawi in ansai te ah a ma siam ahi aksa kan tawh nasep zong hi.
Kum (75) a phak ciangin na sem zo nawnlo ahih manin ama phuatkhiat min le siamna mitung ah ap hi. Tua anei thak pa in amah stock share tul sawm tawh a leisawm hangin amah ut lo hi. Tua zawh asawt lo in stoke man khang ahih manin a ma aading hauhna lampi khat kihong ta hi.
Kum (83) a phak ciangin Fast Food sai thak khat hong kik leuleu hi. Ahih hangin company logo tawh kisai in thu nei kha zel hi.
Kum (88) aphak ciangin a man gualzawhna ngah taktak ta hi. A ma min pen leitung ah kizel ta hi. Amah ahih leh KFC (Kentucky Fried Chicken) aksa kan sai a phuankhia Pu Harland David Sanders Colonel Sanders (9,sept, 1890 – 16, Dec, 1980) ahi hi.

KFC pen 1930 kum in aki phuankhia hi aa, tun ahih leh leitung ah nek paktheih nate (fast food chain) a bawl company lianpen nih na ahi hi. Gam 118 ah sai 18,875 hong khin zota hi. A phualpi ahi YUM in Pizza Hut le Taco Bell chain te zong nei lai hi. Tun hih company manphatna ahih leh $23 Billion hi ci hi.
Pu Colonel Sanders gen kammal khat ahi “Khuahun sia cih bang omlo aa, a kidang khuahun hoih te akigawm khawm hi zaw hi. Na hanciam kawm nungta ding maw ahkl a guallel pa bangin si ding” nang teltheih thu hi. (There’s no such thing as bad weather – just different kinds of good weather. You live on trying or die as loser.”)

Lai-at Nk Khanno via Zingsol